Vahe 2

Ko ha Fili ʻo e Moʻui Taʻengatá

1. Koeʻuhi ko e ʻikai faʻa maʻu ʻa e fiefiá mo e melinó, ko e hā ʻa e ngaahi fehuʻi ʻoku malanga haké?

 FIEFIA ʻi he māmaní​—meimei ko e tokotaha kotoa pē ʻokú ne fiemaʻu ia. Ko ia, ko e hā ʻoku ʻikai fiefia ai ʻa e tokolahi? Ko e hā ʻa e meʻa ʻoku halá? Koeʻuhi ʻoku fiemaʻu ʻe he meimei tokotaha kotoa pē ʻa e melinó, ko e hā ʻoku tau ai ʻa e ngaahi puleʻangá pea fetāufehiʻaʻaki ʻa e kakaí? ʻOku ʻi ai ha mālohi ʻokú ne tataki mo ueʻi ʻa kinautolu ke nau fai ʻa e ngaahi meʻa ʻoku koví ni? ʻE malava nai ʻe ha mālohi fakalūkufua taʻehāmai ʻo puleʻi ʻa e ngaahi puleʻangá?

2. Ko e hā ʻa e ngaahi faihia he hisitōliá ʻokú ne ueʻi ʻa e tokolahi ke fifili pe ʻoku ʻi ai ha mālohi kovi taʻehāmai ʻokú ne puleʻi ʻa e faʻahinga ʻo e tangatá?

² ʻOku tokolahi ʻa e faʻahinga kuo nau fifili ʻi he meʻá ni ʻi heʻenau fakakaukau atu ki hono fakamamahiʻi fakalilifu ʻo e faʻahinga ʻo e tangatá​—ko hono ngāueʻaki ʻi he taú ʻa e ngaahi kasa fakamanavahē ke fakafulutāmakia mo tutuʻaki ʻa e kakaí ke mate, pehē ki he ngaahi pomu naipami mo e ngaahi pomu ʻātomi. Toe fakakaukau atu ki he meʻafana afi, ko e ngaahi ʻapitanga tau fakamamahi, ko hono fakapoongi fakalūkufua ʻo e kakai ʻe laui miliona, ʻo hangē ko ia naʻe toki hokó ni ʻi Kemipōtia ʻi he ngaahi taʻu siʻi kuo hili angé. ʻOkú ke fakakaukau atu naʻe hoko noa pē ʻa e ngaahi meʻa fakalilifú ni? Neongo ʻoku malava ʻe he tangatá ʻiate ia pē ke fai ʻa e ngaahi meʻa fakalilifú ni, ʻi hoʻo fakakaukau atu ki he kovi ʻaupito ʻo ʻene ngaahi ngāué, ʻikai ʻoku hā ai kuo tākiekina ia ʻe ha mālohi kovi taʻehāmai?

3. Ko e hā ʻa e lau ʻa e Tohitapú ʻo kau ki he tuʻunga-pule ʻo e māmaní?

³ ʻOku ʻikai ha fiemaʻu ke mateʻi ʻa e meʻá ni. ʻOku fakahā mahino ʻe he Tohitapú ko ha tokotaha poto taʻehāmai kuó ne puleʻi fakatouʻosi ʻa e ngaahi puleʻangá mo e tangatá. ʻI he Tohitapú, ʻoku ui ʻe Sīsū Kalaisi ʻa e tokotaha mālohi ko ení, ko e “ʻeiki ʻo e maama ko eni.” (Sione 12:31; 14:30; 16:11) Ko hai ia?

4. Ko e hā naʻe fakaʻaliʻali kia Sīsū ʻe he Tēvoló, pea ko e hā naʻá ne tuʻuaki ki aí?

⁴ Ke tokoniʻi kitautolu ke tau ʻilo pe ko hai iá, fakakaukau atu ki he meʻa naʻe hoko ʻi he kamata ʻo e ngāue fakafaifekau ʻa Sīsū ʻi heni he  māmaní. ʻOku fakahā kiate kitautolu ʻe he Tohitapú, ʻi he hili pē ʻa e papitaiso ʻo Sīsuú naʻá ne ʻalu ki he toafá, pea naʻe ʻahiʻahiʻi ai ʻe ha meʻa moʻui taʻehāmai ʻoku ui ko Sētane ko e Tēvolo. Ko e konga ʻo e ʻahiʻahí ni ʻoku fakamatalaʻi ʻo pehé ni: “Pea ʻave foki ia ʻe he Tevolo ki ha moʻunga naʻe maʻolunga ʻaupito, ʻo ne fakaʻaliʻali ki ai ʻa e ngāhi puleʻanga kotoa pe ʻo mamani mo honau nāunau; ʻo ne pehe kiate ia, ko e ngāhi meʻa ni kotoa pe te u ʻatu moʻou, ʻo kapau te ke fakatomapeʻe ʻo lotu kiate au.”​—Mātiu 4:8, 9.

5. (a) Ko e hā ʻokú ne fakahaaʻi pe ko e ngaahi puleʻanga kotoa ʻo e māmaní ko e meʻa ia ʻa e Tēvoló? (e) Fakatatau ki he Tohitapú, ko hai ʻa e “ʻotua ʻo e tuʻu ko eni”?

⁵ Fakakaukau atu ki he meʻa naʻe tuʻuaki ʻe he Tēvoló kia Sīsū Kalaisí. Ko e “ngāhi puleʻanga kotoa pe ʻo mamani.” Ko e moʻoni ko e ngaahi puleʻanga kotoa ʻo e māmaní ko e meʻa ia ʻa e Tēvoló? ʻIo, he kapau naʻe ʻikai ʻaʻana ia, ne lava fēfē ke ne tuʻuaki ia kia Sīsū? Naʻe ʻikai ke fakaʻikaiʻi ʻe Sīsū ʻa e ʻia Sētane ʻa e ngaahi puleʻangá. He naʻá ne mei fakaʻikaiʻi, ʻo kapau naʻe  ʻikai ʻo Sētane ʻa e ngaahi puleʻangá. ʻOku moʻoni ko Sētané ko e pule taʻehāmai ia ʻo e ngaahi puleʻanga kotoa ʻo e māmaní! ʻOku fakahā mahino ʻe he Tohitapú: “Ko hono kotoa ʻo mamani ʻoku ʻi he nima [mafai, NW] ʻo e fili.” (1 Sione 5:19) Ko hono moʻoní, ʻoku ui ʻe he Folofola ʻa e ʻOtuá ʻa Sētane ko e “ʻotua ʻo e tuʻu ko eni.”​—2 Kolinitō 4:4.

6. (a) ʻOku tokoniʻi ʻa kitautolu ʻe he fakamatala ko eni ʻo fekauʻaki mo e tuʻunga-pule ʻa Sētané ke mahino ʻa e hā? (e) Ko e hā ʻoku manako ʻa Sētane ke fai kiate kitautolú, ko ia ko e hā kuo pau ke tau faí?

⁶ ʻOku tokoniʻi ʻa kitautolu ʻe he fakamatalá ni ke mahino ʻa e ʻuhinga naʻe pehē ai ʻe Sīsū: “Ko hoku puleʻanga ʻoku ʻikai ʻo e maama ko eni.” (Sione 18:36) ʻOkú ne toe tokoniʻi ʻa kitautolu ke mahino ʻa e ʻuhinga ʻo e fetāufehiʻaʻaki ʻa e ngaahi puleʻangá mo ʻenau feinga ke fefakaʻauhaʻaki neongo ko e holi ʻa e kakai fakakaukau lelei kotoa pē ke moʻui melino. ʻIo, ko “Setane . . . ʻoku ne kākāʻi ʻa mamani kātoa.” (Fakahā 12:9) ʻOkú ne manako ke kākaaʻi mo kitautolu foki. ʻOku ʻikai te ne saiʻia ke tau maʻu ʻa e foaki-ʻofa ʻa e ʻOtuá ko e moʻui taʻengatá. Ko ia kuo pau ke tau faitau ke ʻoua naʻá ne tākiekina ʻa kitautolu ke tau faikovi. (ʻEfesō 6:12) ʻOku fiemaʻu ke tau ʻilo ʻo kau kia Sētane mo e anga ʻo ʻene ngāué, koeʻuhi ke tau lava ʻo tekeʻi ʻa ʻene ngaahi feinga ke kākaaʻi ʻa kitautolú.

KO IA KO E TĒVOLÓ

7. Ko e hā ʻoku taʻemalava ai ke tau sio ki he Tēvoló?

⁷ Ko Sētane ko e Tēvoló ko ha tokotaha moʻoni ia. ʻOku ʻikai ko e kovi pē ia ʻoku ʻi he faʻahinga ʻo e tangatá kotoa ʻo hangē ko e tui ʻa e niʻihi. Ko e moʻoni, ʻoku ʻikai malava ke mamata ʻa e faʻahinga ʻo e tangatá ki he Tēvoló, ʻo ʻuhinga tatau pē mo e ʻikai te nau malava ʻo mamata ki he ʻOtuá. Ko e ʻOtuá ko ha tokotaha laumālie ia pea ʻoku pehē pē foki mo e Tēvoló, ko e tuʻunga ia ʻo e moʻuí ʻoku māʻolunga ange ʻi he faʻahinga ʻo e tangatá pea taʻehāmai ki hotau matá.​—Sione 4:24.

8. Ko e hā ʻoku tui ai ʻa e tokolahi naʻe fakatupu ʻe he ʻOtuá ʻa e Tēvoló?

⁸ ʻE ʻeke nai ʻe ha taha, ‘Kapau ʻoku ʻofa ʻa e ʻOtuá, ko e hā naʻá ne ngaohi ai ʻa e Tēvoló?’ (1 Sione 4:8) Ko hono moʻoní, naʻe ʻikai fakatupu ʻe he ʻOtuá ʻa e Tēvoló. ʻE toe pehē nai ʻe ha taha, ‘Kapau naʻe fakatupu ʻe he ʻOtuá ʻa e tokotaha kotoa pē, kuo pau pē naʻá ne fakatupu ʻa e Tēvoló. He ko toe hai naʻá ne malava? Naʻe hoko mai mei fē ʻa e Tēvoló?’

9. (a) Ko e faʻahinga fēfē ʻa e kau ʻāngeló? (e) Ko e hā ʻa e ʻuhinga ʻo e foʻi lea “tēvolo” mo e “sētane”?

⁹ ʻOku fakahā ʻe he Tohitapú naʻe fakatupu ʻe he ʻOtuá ʻa e kau laumālie tāutaha tokolahi ʻaupito ʻo hangē pē ko iá. ʻI he Tohitapú, ʻoku ui ʻa e kau laumālie ko ení ko e kau ʻāngelo. Pehē foki, ʻoku ui ʻa kinautolu ko e “ngaahi foha ʻo e ʻOtua.” (Siope 38:7; Sāme 104:4; Hepelū 1:7, 13, 14) Naʻe haohaoa ʻa hono fakatupu kotoa ʻo kinautolu ʻe he ʻOtuá. Naʻe ʻikai ke ʻiate kinautolu ha tēvolo, pe ko ha sētane. Ko e ʻuhinga ʻo e  foʻi lea “tēvolo” ko e tokotaha lauʻikovi, pea ko e ʻuhinga ʻo e foʻi lea “sētane” ko e tokotaha fakafepaki.

10. (a) Ko hai naʻá ne ngaohi ʻa Sētane ko e Tēvoló? (e) ʻE anga-fēfē nai ʻa e malava ʻe ha tokotaha lelei ke ne ʻai pē ʻe ia ia ko ha tokotaha faihia?

¹⁰ Ka naʻe hoko mai ʻa e taimi, ko ha taha ʻo e ngaahi foha fakalaumālie ʻo e ʻOtuá naʻe ʻai pē ʻe ia ia ko e Tēvolo, ʻa ia ko ha tokotaha loi fakafehiʻanekina ʻokú ne leaʻaki ʻa e ngaahi meʻa ʻoku kovi ʻo kau ki ha taha kehe. Naʻá ne toe ʻai pē ʻe ia ia ko e Sētane, ʻa ia, ko ha tokotaha fakafepaki ki he ʻOtuá. Naʻe ʻikai ke fakatupu ia ke pehē, ka ki muí naʻá ne hoko ko e tokotaha pehē. Ko e fakatātā: Ko ha tangata kaihaʻa ʻoku ʻikai fanauʻi mai ia ko ha tangata kaihaʻa. Ko ha taha nai ia mei ha fāmili lelei, ʻi ha ongo mātuʻa faitotonu mo e ngaahi tokoua mo e ngaahi tuofāfine tauhi-lao. Ka ko e tōtuʻa ʻa ʻene holi pē ʻaʻana ki he meʻa ʻoku malava ʻo fakatauʻaki ʻa e paʻangá naʻe fakatupunga nai ai ʻa ʻene hoko ko ha tokotaha kaihaʻá. Naʻe fēfē leva ʻa e hoko ha taha ʻo e ngaahi foha fakalaumālie ʻo e ʻOtuá ke ne ʻai pē ʻe ia ia ko Sētane ko e Tēvoló?

11. (a) Ko e hā ʻa e taumuʻa ʻa e ʻOtuá naʻe ʻilo ki ai ha ʻāngelo angatuʻu? (e) Ko e hā naʻe holi ki ai ʻa e ʻāngelo ko ení, pea naʻe tataki atu ai ia ke ne fai ʻa e hā?

¹¹ Ko e ʻāngelo naʻe hoko ko e Tēvoló naʻe ʻi ai ʻi he taimi naʻe fakatupu ai ʻe he ʻOtuá ʻa e māmaní mo e ʻuluaki ongo meʻa malí, ko ʻĀtama mo ʻIvi. (Siope 38:4, 7) Ko ia naʻá ne fanongo ki he folofola ʻa e ʻOtuá kiate kinaua ke na fanafanaú. (Sēnesi 1:27, 28) Naʻá ne ʻilo ʻe ʻikai ke fuoloa kuo fonu ʻa e māmaní ʻi he kakai māʻoniʻoni ʻoku nau lotu ki he ʻOtuá.  Ko e taumuʻa ia ʻa e ʻOtuá. Kaekehe, naʻe fakakaukau lahi ʻaupito ʻa e ʻāngeló ni ki hono potó mo hono fakaʻofoʻofa pē ʻoʻoná peá ne fiemaʻu ke fai ange kiate ia ʻa e lotu ko ia ʻe fai ki he ʻOtuá. (ʻIsikeli 28:13-15; Mātiu 4:10) ʻI he ʻikai ke ne fakangaloʻi ʻa e holi fehālaaki ko ení mei hono ʻatamaí, ne hanganaki fakakaukau pē ia ki ai. Naʻe tataki ai ia ke ne fai ha meʻa ke ne maʻu ʻa e lāngilangi mo e tuʻunga mahuʻinga naʻá ne holi ki ai. Ko e hā ʻa e meʻa naʻá ne faí?​—Sēmisi 1:14, 15.

12. (a) Naʻe founga fēfē ʻa e lea ʻa e ʻāngeló ni kia ʻIví, pea ko e hā naʻá ne tala ki aí? (e) Naʻe anga-fēfē ʻa e hoko ʻa e ʻāngelo ko ení ko Sētane ko e Tēvoló? (f) Ko e hā ha fakakaukau hala ʻo fekauʻaki mo e fōtunga ʻo e Tēvoló?

¹² Naʻe ngāueʻaki ʻe he ʻāngelo angatuʻú ni ha ngata ke lea ki he ʻuluaki fefiné, ko ʻIvi. Naʻá ne fai ʻeni ʻo hangē tofu pē ko ha taha poto ʻoku lava ʻo lea ʻi ha founga ʻo ngalingali ko ha manu totolo ofi mai pe ko ha tamapua ʻokú ne fai ʻa e leá. Ka ko hono moʻoní ko e ʻāngelo angatuʻu ko ení, ʻa e tokotaha ʻoku ui ʻi he Tohitapú ko e “gata motua,” ko ia naʻe lea kia ʻIví. (Fakahā 12:9, PM) Naʻá ne pehē kuo ʻikai tala kiate ia ʻe he ʻOtuá ʻa e moʻoní, pea kuó Ne taʻofi meiate ia ʻa e ʻilo ʻoku totonu ke ne maʻú. (Sēnesi 3:1-5) Ko e loi fakafehiʻanekiná ni naʻá ne ʻai ia ke ne hoko ko ha tēvolo. Naʻá ne toe hoko ai ko ha tokotaha fakafepaki ki he ʻOtuá, pe ko ha Sētane. Hangē ko ia ʻoku malava ke mahino kiate koé, ʻoku hala ke fakakaukau ko e Tēvoló ko ha meʻa moʻui ʻoku ʻi ai hano ongo meʻatui mo haʻane fuʻu huhu lahi pea ʻokú ne tokangaʻi ha feituʻu fakamamahi ʻi lalofonua. Ko ha tokotaha mālohi ʻaupito ia, ka ko e ʻāngelo anga-fulikivanu.

TUPUʻANGA ʻO E NGAAHI FAINGATAʻA ʻI MĀMANÍ

13. (a) Ko e hā naʻe fai ʻe ʻIvi ʻi he loi ʻa e Tēvoló? (e) Ko e hā naʻe taukaveʻi ʻe he Tēvoló?

¹³ Ko e loi naʻe tala ʻe he Tēvoló kia ʻIví naʻe hoko ia ʻo hangē tofu pē ko ia naʻá ne faʻufaʻu ki aí. Naʻe tui ki ai ʻa ʻIvi peá ne talangataʻa ki he ʻOtuá. Peá ne toe malava foki ke ne ʻai ʻa hono husepānití ke ne maumauʻi ʻa e lao ʻa e ʻOtuá. (Sēnesi 3:6) Naʻe taukaveʻi ʻe he Tēvoló ʻoku malava ʻo lavameʻa ʻa e faʻahinga ʻo e tangatá taʻekau ai ʻa e ʻOtuá. Naʻá ne kikihiʻi ʻe lavaʻi lelei pē ʻe he tangatá ʻo pule kiate ia pē, taʻekau ai ha tokoni ʻa e ʻOtuá. Naʻe toe taukaveʻi ʻe he Tēvoló te ne malava ʻo fakatafokiʻi mei he ʻOtuá ʻa kinautolu kotoa pē te nau hoko ko e hako ʻo ʻĀtama mo ʻIví.

14. Ko e hā naʻe ʻikai fakaʻauha ai leva ʻe he ʻOtuá ʻa Sētané?

¹⁴ Ko e moʻoni, naʻe malava pē ke fakaʻauha ai leva ʻe he ʻOtuá ʻa Sētane. Ka heʻikai hoko ia ke ne tali ʻa e ngaahi fehuʻi naʻe ʻohake ʻe Sētané, he ʻe kei nofo pē ʻa e ngaahi fehuʻi ko iá ʻi he ʻatamai ʻo e kau ʻāngelo naʻa nau vakai ki aí. Ko ia naʻe tuku ʻe he ʻOtuá ke ʻi ai ha taimi  ke feinga ai ʻa Sētane ke fakamoʻoniʻi ʻa e ngaahi taukaveʻi naʻá ne faí. Ko e hā leva ʻa e ikuʻangá?

15, 16. (a) Ko e hā kuo fakamoʻoniʻi he faai mai ʻa e taimí ʻo fekauʻaki mo e ngaahi taukaveʻi ʻa e Tēvoló? (e) Ko e hā ʻa e meʻa kuo vavé ni ke hokó?

¹⁵ ʻI he faai mai ʻa e taimí kuo fakamoʻoniʻi ai ʻoku ʻikai malava ʻe he faʻahinga ʻo e tangatá ke lavaʻi lelei ʻa ʻenau pule kiate kinautolu pē ʻo taʻekau ai ha tokoni ʻa e ʻOtuá. Kuo siva fakaʻaufuli ʻenau ngaahi feingá. Kuo mātuʻaki mamahi ʻa e kakaí ʻi he malumalu ʻo e ngaahi puleʻanga ʻo e tangatá, ʻo hangē ko ia ʻoku fakahā ʻe he Tohitapú kuo puleʻi taʻehāmai ʻe he Tēvoló. Pehē foki, ʻi hono fakangofua ʻe he ʻOtuá ʻa e taimí, kuo fakahā mahino ai ʻa e taʻemalava ʻe Sētane ke ne fakatafoki ʻa e kakai kotoa pē mei he lotu ki he ʻOtuá. Kuo ʻi ai maʻu pē ʻa e faʻahinga kuo nau tauhimaʻu ʻenau angatonú ki he tuʻunga pule ʻa e ʻOtuá. Hangē ko ení, ʻoku malava ke ke lau ʻi he Tohitapú naʻe feinga ʻa Sētane, ʻo ʻikai te ne lavameʻa, ke taʻofi ʻa Siope mei hono tauhi ʻa e ʻOtuá.​—Siope 1:6-12.

¹⁶ Ko ia kuo fakamoʻoniʻi ʻoku hala ʻa e meʻa naʻe taukaveʻi ʻe he Tēvoló. Ko ia, ʻoku mātuʻaki taau ke fakaʻauha ia koeʻuhi ko ʻene kamata ha angatuʻu fulikivanu ki he ʻOtuá. Meʻa fakafiefiá, kuo tau aʻusia ʻa e taimi ke fakangata ai ʻe he ʻOtuá ʻa e pule ʻa Sētané. ʻI hono fakamatalaʻi ʻa e ʻuluaki vāʻihala ki hono fai ʻa e meʻá ni, ʻoku fakahā ʻe he Tohitapú ʻo kau ki ha tau mahuʻinga naʻe fai ʻi hēvani, ʻa ia naʻe ʻikai mātā mo fanongoa ʻe he kakai ʻo e māmaní. Lau fakalelei ʻa e fakamatala ko eni ʻa e Tohitapú:

17. (a) ʻOku anga-fēfē ʻa hono fakamatalaʻi ʻe he Tohitapú ʻa e tau ʻi hēvaní? (e) Ko e hā hono ikuʻanga kiate kinautolu ʻi hēvaní, pea mo kinautolu ʻi māmaní?

¹⁷ “Pea naʻe hoko ha tau ʻi he langi: ko Maikeli [ko Sīsū Kalaisi kuo ʻosi toetuʻu] mo ʻene kau ʻangelo naʻa nau fai tau mo e  Talakoni, pea naʻe tau ʻa e Talakoni mo ʻene kau ʻangelo aʻana, ka naʻe ʻikai te nau lava; ʻio, naʻe ʻikai kei maʻu hanau potu ʻi he langi. Pea naʻe kapusi ʻa e Talakoni lahi, ʻa ia ko e Ngata ʻo ono ʻaho, ʻa e toko taha ʻoku ui ko e Tevolo mo Setane, ʻa e toko taha ʻoku ne kākāʻi ʻa mamani kātoa: naʻe li ia ki mamani, pea li mo ia ʻene kau ʻangelo. Ko ia mou fiefia ʻa e ngaahi langi, mo kimoutolu ʻoku nofo tapanekale ʻi ai. Ka ʻoiaue ʻa e fonua mo e tahi! He kuo hoko hifo ʻa e Tevolo kiate kimoua, ʻoku ne ʻita lahi, ko ʻene ʻilo, ʻoku toesiʻi pe hono taimi.”—Fakaha 12:7-9, 12.

18. (a) Naʻe fai ʻa e tau ʻi hēvaní ʻanefē? (e) Ko e hā kuo hoko ʻi he māmaní talu mei hono “li” hifo ʻo Sētané?

¹⁸ Naʻe hoko ʻanefē ʻa e tau ko ia naʻe fai ʻi hēvaní? ʻOku fakahā ʻe he fakamoʻoní naʻe hoko ia feʻunga nai mo e taimi ʻo e Tau I ʻa Māmaní, ʻa ia naʻe kamata ʻi he 1914. Hangē ko ia ʻoku tuhu ki ai ʻa Fakahā, naʻe tuli ʻa Sētane mei hēvani ʻi he taimi ko iá, ʻa ia ko hono ʻuhingá kuo tau nofó ni ʻi he “toesiʻi pe hono taimi” talu mei ai. Ko ia, ko e “gaahi aho fakamui” eni ʻo e māmani ʻo Sētané. Ko e tupulekina ʻo e maumaulaó, ko e manavahē, ko e ngaahi tau, ko e nounou ʻo e meʻatokoní, ko e ngaahi mahaki mo e ngaahi tuʻunga fakamamahi kuo tau aʻusiá, ko e fakamoʻoniʻi ia ʻo e moʻoniʻi meʻa ko ení.​—Mātiu 24:3-12; Luke 21:26; 2 Tīmote 3:1-5, PM.

19. (a) Ko e hā ʻoku feinga mālohi ʻa Sētane ke fai he taimi ní? (e) Ko e hā ʻoku fakapotopoto ke tau faí?

¹⁹ Koeʻuhi ʻoku ʻilo ʻe Sētane “ʻoku toesiʻi pe hono taimi” pea ʻosi, ʻokú ne fuʻu feinga mālohi ʻaupito ʻo ʻikai hano tatau ki muʻa ke taʻofi ʻa e kakaí mei heʻenau tauhi ʻa e ʻOtuá. Ko ʻene fiemaʻu ke ne ʻave ʻa e tokolahi taha te ne malavá ke fakaʻauha fakataha mo ia. ʻOku ʻuhinga lelei hono fakamatalaʻi ia ʻe he Tohitapú, ʻokú ne hangē ha laione ngungulu ʻokú ne kumi ha taha ke ne folo. (1 Pita 5:8, 9) Kapau ʻoku tau fiemaʻu ke ʻoua te ne maʻu ʻa kitautolu, ʻoku totonu ke tau ako ke ʻilo pe ʻoku fēfē ʻa ʻene ngaahi ʻohofí mo e ngaahi founga ʻokú ne takihalaʻi ai ʻa e kakaí.​—2 Kolinitō 2:11.

FOUNGA HONO TAKIHALAʻI ʻE SĒTANE ʻA E KAKAÍ

20. (a) Kuo lavameʻa fēfē ʻa e ʻohofi kuo fai ʻe Sētané? (e) Ko e hā ke tau fakakaukau atu ai ko ʻene ngaahi filioʻí ʻe faʻa hā lelei, pea mo ʻaonga foki?

²⁰ ʻOua ʻe fakakaukau ʻoku faingofua maʻu pē ke ʻilo ʻa e ngaahi founga ʻoku ngāueʻaki ʻe Sētane ke muimui ai ʻa e kakaí kiate iá. Ko ha tokotaha mataotao ia ʻi hono kākaaʻi ʻo e kakaí. Ko hono moʻoní, ko ʻene ngaahi foungá ʻi he laui afeʻi taʻu kuo hilí kuo fuʻu fakapoto ʻaupito, he ko e kakai tokolahi ʻi he ʻahó ni ʻoku ʻikai te nau tui ʻokú ne ʻi ai ni. Kiate kinautolu, ko e fulikivanú mo e koví ko e ngaahi tuʻunga totonu pē ia ʻoku hoko pea ʻe pehē ai pē. ʻOku hangē tofu pē ʻa e ngāue ʻa Sētané ko e kau taki faihia ʻi he ʻaho ní, ʻa ia ʻoku nau hā ki tuʻa ko e kau tauhi-lao, ka ʻoku nau fai fakapulipuli ʻa e ngaahi meʻa ʻoku kovi ʻaupito.  ʻOku fakamatalaʻi ʻe he Tohitapú: “Naʻa mo Setane ʻoku ne ʻai ʻa e anga ʻo ha angelo mei he maama.” (2 Kolinitō 11:14) Ko ia ai, ke tau fakakaukau atu ko ʻene ngaahi filioʻi ki he takihalaʻi ʻo e kakaí ʻe faʻa hā lelei, pea mo ʻaonga foki.

21. Ko e hā ha filioʻi ʻe taha kuo ngāueʻaki ʻe Sētane?

²¹ Manatuʻi, naʻe hā fakakaumeʻa ʻa Sētane kia ʻIvi. Pea naʻá ne kākaaʻi leva ia ke ne fakakaukau ko e meʻa te ne faí ʻe hoko ko e lelei kiate ia tonu pē. (Sēnesi 3:4-6) ʻOku tatau pē ʻi he ʻahó ni. Hangē ko ení, ʻoku fakaʻaiʻai kākā ʻe Sētane ʻa e kakaí ʻo fakafou mai ʻi hono kau fakafofonga fakaetangatá, ke nau ʻai ʻa e ngaahi meʻa ʻoku kau ki he ngaahi puleʻanga fakaetangatá ke māʻolunga ange ia ʻi heʻenau ngāue ki he ʻOtuá. Kuo fakatupu ai ʻa e laumālie ʻo e mamahiʻi-fonuá, ʻo iku ki he ngaahi tau fakalilifu. ʻI he ngaahi taimi ki muí ní kuo ueʻi ai ʻe Sētane ʻa e kakaí ke nau fakahoko ʻa e ngaahi filioʻi kehekehe ʻi heʻenau fekumi ki he melinó mo e maluʻangá. Ko e taha ʻo e ngaahi meʻá ni ko e Puleʻanga Fakatahatahá. Ka kuo fakatupu ai ha māmani melino? Mole ke mamaʻo! Kaekehe, kuo fakamoʻoniʻi ko ha founga ia ke fakatafokiʻi ai ʻa e tokanga ʻa e kakaí mei he fokotuʻutuʻu ʻa e ʻOtuá ke fakahoko mai ʻa e melinó ki he faʻahinga ʻo e tangatá ʻi hono puleʻanga ʻe hoko mai ʻi he malumalu ʻo Sīsū Kalaisi, ko e “Pilinisi ʻo e Melino.”​—ʻAisea 9:6, NW [5, PM]; Mātiu 6:9, 10.

22. Ko e hā ʻa e ʻilo ʻoku ʻikai fiemaʻu ʻe Sētane ke tau maʻú?

²² Ka ke tau maʻu ʻa e moʻui taʻengatá, ʻoku fiemaʻu ke tau ʻilo kānokano ʻo kau ki he ʻOtuá, ki hono ʻAlo-Tuʻí mo hono puleʻangá. (Sione 17:3) ʻOku ʻilo pau, ʻoku ʻikai fiemaʻu ʻe Sētane ko e Tēvoló ke ke maʻu ʻa e ʻilo ko ení, pea ko ia te ne faiʻaki ʻa e kotoa hono mālohí ke taʻofi koe mei hano maʻu ia. ʻE anga-fēfē ʻene fai ení? Ko e founga ʻe taha ko ʻene fakalanga ha fakafepakituʻu kiate koe, ʻo fakafou mai nai ʻi he manuki. ʻOku fakahā mai ʻe he Tohitapú kiate kitautolu: “Ko kinautolu kotoabe oku loto ke moui aga faka-Otua kia Kalaisi Jisu, te nau ilo ae fakataga.”​—2 Tīmote 3:12, PM.

23. (a) ʻE anga-fēfē nai hano ngāueʻaki ʻe Sētane ʻa e ngaahi kaumeʻá mo e kāingá ke fakalotosiʻi kitautolu? (e) Ko e hā ʻoku totonu ai ke ʻoua naʻá ke foʻi ki he fakafepakituʻú?

²³ Naʻa mo e ngaahi kaumeʻá pe kāinga ofí te nau tala atu nai ʻoku ʻikai te nau saiʻia ʻi hoʻo vakaiʻi lelei ʻa e Tohitapú. Naʻa mo Sīsū Kalaisi tonu naʻá ne fakatokanga mai: “Pea ʻe hoko ai, ko e ngaahi fili ʻo ha tangata ʻa hono kau nofoʻanga. Ko ia ʻoku lahi ʻene ʻofa ki heʻene tamai, pe ko ʻene faʻē, ʻi heʻene ʻofa kiate au, ʻoku ʻikai tāu ia mo au: pea ko ia ʻoku lahi ʻene ʻofa ki hono foha, pe ko hono ʻofefine, ʻi heʻene ʻofa kiate au, ʻoku ʻikai tāu ia mo au.” (Mātiu 10:​36, 37) ʻE feinga nai ʻa e kāingá ke fakalotosiʻi koe, pea ko ʻenau fai eni ʻi he loto-moʻoni koeʻuhi ko e ʻikai te nau ʻilo ʻa e ngaahi moʻoni fakaofo ko ia ʻoku ʻi he Tohitapú. Ka,  ʻe fēfē ʻa e vakai mai ʻa e ʻOtuá kiate koe ʻo kapau te ke foʻi hono ako ʻa e Folofola ʻa e ʻOtuá ʻi he hoko ʻa e fakafepakituʻú? ʻIkai ngata aí, kapau te ke foʻi hono akó, ʻe fēfē ai haʻo tokoniʻi ʻa e ngaahi kaumeʻá mo e ngaahi ʻofaʻangá ke mahino kiate kinautolu ʻoku ʻi ai hono kaunga ki he moʻui pe mate ʻa e ʻilo kānokano ʻo e Tohitapú? Ko hoʻo nōfoʻi ʻi he ngaahi meʻa ʻokú ke ako mei he Folofola ʻa e ʻOtuá ʻe faifai pē nai pea tākiekina ai kinautolu ke ako ki he moʻoní.

24. (a) Ko e hā mo ha toe ngaahi founga ʻoku ngāueʻaki ʻe he Tēvoló ke taʻofiʻaki ʻa e kakaí mei heʻenau tali ʻa e ʻilo foaki-moʻuí? (e) ʻOku fēfē hono mahuʻinga kiate koe ke ako ʻa e Folofola ʻa e ʻOtuá?

²⁴ ʻI he tafaʻaki ʻe tahá, ko Sētané ko e tupuʻanga nai ia ʻo hano ʻahiʻahiʻi koe ke kaungāfai ʻi ha tōʻonga taʻetaau, ʻa ia ʻoku taʻefakahōifua ki he ʻOtuá. (1 Kolinitō 6:​9-11) Pe ko haʻane ʻai nai koe ke ke ongoʻi ʻokú ke fuʻu femoʻuekina ke ako ʻa e Tohitapú. Ka ʻi hoʻo fakakaukau atu ki aí, ʻoku toe ʻi ai ha meʻa ʻe mahuʻinga ange ʻi hono maʻu ʻa e faʻahinga ʻilo ko ení? ʻOua naʻa fakangofua ha meʻa ke ne taʻofi koe mei hoʻo maʻu ʻa e ʻiló ni, ʻa ia ʻokú ne malava ke tataki koe ke maʻu ʻa e moʻui taʻengata he palataisi ʻi he māmaní!

25. Kapau ʻe hokohoko atu ʻa ʻetau fakafepakiʻi ʻa e Tēvoló, ko e hā ʻe ʻikai malava ke ne fai kiate kitautolú?

²⁵ ʻOku naʻinaʻi mai ʻa e Tohitapú: “Tali tekeʻi ʻa e Tevolo.” Kapau te ke fai eni, “te ne hola meiate kimoutolu.” (Sēmisi 4:7) ʻOku ʻuhinga eni, kapau te ke tekeʻi ʻa e ʻohofi ʻoku fai ʻe Sētané te ne foʻi ai pea ʻikai te ne toe fakafaingataʻaʻiaʻi koe? ʻIkai, te ne feinga maʻu ai pē ke ne ʻai koe ke ke fai ʻa e meʻa ʻokú ne fiemaʻú. Ka ʻo kapau te ke fakafepakiʻi maʻu pē ia, heʻikai ʻaupito lava ke ne ʻai koe ke ke fou ʻi ha ʻalunga ʻoku fakafepaki ki he ʻOtuá. Ko ia, tōtōivi ke ke maʻu ʻa e ʻilo mātuʻaki mahuʻinga ʻo e Tohitapú peá ke fai ki he meʻa ʻokú ke ako aí. ʻOku mahuʻinga ʻaupito eni koeʻuhi ke taʻofi koe mei hano kākaaʻi ʻe he toe meʻa ʻe taha ʻo e ngaahi meʻa ʻoku ngāueʻaki ʻe Sētane ke takihalaʻiʻaki ʻa e kakaí, ʻa ia ko e lotu loí.

[Fehuʻi ki he Ako]

[Fakatātā ʻi he peesi 16, 17]

ʻE lava ʻe Sētane ke tuʻuaki kia Kalaisi ʻa e ngaahi puleʻanga kotoa ʻo māmaní ʻo kapau naʻe ʻikai ʻaʻana ia?

[Fakatātā ʻi he peesi 19]

Ko e tangata kaihaʻá ni naʻe ʻikai fanauʻi mai ko ha tangata kaihaʻa, ʻo hangē tofu pē ko e Tēvoló naʻe ʻikai ke fakatupu mai ia ko ha “tēvolo”

[Fakatātā ʻi he peesi 20, 21]

Naʻe fakangata ʻa e tau ʻi hēvaní ʻaki hano lī hifo ʻo Sētane mo e kau tēmeniō ki māmani. ʻOku lolotonga uesia koe ʻe hono ngaahi haʻahaʻá he taimí ni

[Fakatātā ʻi he peesi 24]

ʻE ʻi ai nai ha fakafepakituʻu ki hano hokohoko atu ʻa hoʻo ako ʻa e Tohitapú