KUO kaiha‘asi ‘e ha taha ha me‘a meia koe ‘i ha taimi?— Na‘e fēfē ho‘o ongo‘í?— Ko hai pē na‘á ne kaiha‘asi iá ko ha tokotaha kaiha‘a, pea ‘oku ‘ikai ha taha ‘e sai‘ia ‘i ha tokotaha kaiha‘a. ‘Oku anga-fēfē ho‘o fakakaukau ki he hoko ‘a ha taha ko ha kaiha‘a? ‘Oku fanau‘i mai ia ‘oku pehē?—

Na‘á ta toki ako eni ‘oku fanau‘i mai ‘a e kakaí mo e angahala. Ko ia, ko kitautolu kotoa ‘oku tau ta‘ehaohaoa. Ka ‘oku ‘ikai ha taha ‘e fanau‘i mai ko ha kaiha‘a. ‘E ha‘u nai ha tokotaha kaiha‘a mei ha fāmili lelei. Ko ‘ene ongo mātu‘á, ko hono fanga tokouá mo hono fanga tuofāfiné ‘oku nau faitotonu nai. Ka ko e holi ‘a ha taha ki he ngaahi me‘a hangē ko e pa‘angá mo e me‘a ‘e lava ke fakatau mai ‘e he pa‘angá ‘e fakatupunga nai ai ia ke ne hoko ko ha kaiha‘a.

Ko hai te ke pehē na‘e hoko ko e ‘uluaki kaiha‘á?— Ta fakakaukau angé ki aí. Na‘e ‘ilo‘i ‘e he Faiako Lahí ‘a e tokotaha ko iá ‘i he taimi na‘e ‘i hēvani aí. Ko e tokotaha kaiha‘a ko iá ko ha ‘āngelo. Ka koe‘uhi na‘e ngaohi ‘e he ‘Otuá ‘a e kau ‘āngelo kotoa pē ke haohaoa, na‘e anga-fēfē ‘a e hoko ‘a e ‘āngelo ko iá ko ha kaiha‘á?— Sai, hangē ko ia na‘á ta ako ‘i he Vahe 8 ‘o e tohí ni, na‘á ne fiema‘u ha me‘a na‘e ‘ikai ‘a‘ana. ‘Okú ke manatu‘i ko e hā ia?—

‘I he hili hono fakatupu ‘e he ‘Otuá ‘a e ‘uluaki tangatá mo e fefiné, na‘e fiema‘u ‘e he ‘āngelo ko iá ke na lotu ange ki ai. Na‘e ‘ikai ha‘ane totonu ki he‘ena lotú. Ko ‘ena lotú ko e me‘a ia ‘a e ‘Otuá. Ka na‘á ne kaiha‘asi ia! ‘I hono ‘ai ‘a ‘Ātama mo ‘Ivi ke na lotu ange ki aí, na‘e hoko ai ‘a e ‘āngelo ko iá ko ha kaiha‘a. Na‘á ne hoko ko Sētane ko e Tēvoló.

Ko e hā ‘a e me‘a ‘okú ne ‘ai ha taha ke hoko ko ha kaiha‘á?— Ko ha holi ki he me‘a ‘oku ‘ikai ‘a‘aná. Ko e holi ko ení ‘e lava ke hoko ‘o mālohi  ‘aupito ‘o malava ai ke ne ‘ai na‘a mo e kakai leleí ke nau fai ‘a e ngaahi me‘a ‘oku koví. ‘I he taimi ‘e ni‘ihi, ko e kakai ko ia ‘oku hoko ko e kau kaiha‘á ‘oku ‘ikai ‘aupito te nau toe liliu ‘o fai ‘a e me‘a ‘oku leleí. Ko e taha ‘o kinautolu ko ha ‘apositolo ‘a Sīsū. Ko hono hingoá ko Siutasi ‘Isikaliote.

Na‘e ‘ilo‘i ‘e Siutasi ‘oku hala ke kaiha‘a koe‘uhí he na‘e ‘osi ako‘i ia ki he Lao ‘a e ‘Otuá ‘o talu mei he‘ene kei si‘í. Na‘á ne ‘ilo na‘e a‘u ‘o lea hifo ‘a e ‘Otuá mei hēvani ‘i ha taimi ‘o tala ki hono kakaí: “ ‘Oua na‘a ke kaiha‘a.” (Ekisoto 20:15) ‘I he taimi na‘e tupu hake ai ‘a Siutasí, na‘á ne fetaulaki mo e Faiako Lahí peá ne hoko ko ha taha ‘o ‘ene kau ākongá. Ki mui ai, na‘e a‘u ‘o fili ‘e Sīsū ‘a Siutasi ke hoko ko e taha ‘o ‘ene kau ‘apositolo ‘e toko 12.

Ko Sīsū mo ‘ene kau ‘apositoló na‘a nau fononga fakataha holo. Na‘a nau kai fakataha ‘enau me‘akaí. Pea ko e pa‘anga kotoa na‘a nau ma‘ú na‘e tauhi ia ‘i ha puha. Na‘e ‘oange ‘e Sīsū ‘a e puha ko iá kia Siutasi ke ne tokanga‘i. ‘Oku mo‘oni, na‘e ‘ikai ko e pa‘anga ia ‘a Siutasi. Ka ‘okú ke ‘ilo ‘a e me‘a na‘e fai ‘e Siutasí ‘i he hili ha taimi nounou mei ai?—

Na‘e kamata ke to‘o ‘e Siutasi ha pa‘anga mei he puhá ‘i he taimi na‘e ‘ikai totonu ai ke ne fai peheé. Na‘á ne to‘o ia ‘i he taimi na‘e ‘ikai ke sio atu ai ‘a e ni‘ihi kehé, pea na‘e a‘u ‘o ne feinga ke ma‘u ha ngaahi founga ke ma‘u ai ha pa‘anga lahi ange. Na‘e kamata ke ne fakakaukau ki he pa‘angá ‘i he taimi kotoa pē. Ta sio ki he me‘a na‘e iku ki ai ‘a e holi fehālaaki ko ení ‘i he ngaahi ‘aho si‘i pē ki mu‘a pea tāmate‘i ‘a e Faiako Lahí.

Ko Melé, ko ha tuofefine ‘o e kaume‘a ‘o Sīsū ko Lāsalosí, na‘á ne ‘ave ha lolo lelei ‘aupito ‘o ne lilingi ia ‘i he va‘e ‘o Sīsuú. Ka na‘e lāunga ‘a Siutasi ia. ‘Okú ke ‘ilo ‘a hono ‘uhingá?— Na‘á ne pehē, koe‘uhí na‘e totonu ke fakatau atu ‘a e loló pea foaki ‘a e pa‘anga ko iá ki he kakai masivá. Ka na‘á ne fiema‘u mo‘oni ke lahi ange ‘a e pa‘anga ‘i he puhá koe‘uhí ke ne kaiha‘asi ia.—Sione 12:1-6.

Na‘e tala ange ‘e Sīsū kia Siutasi ke ‘oua ‘e fakatupu palopalema kia Mele, ‘a ia na‘á ne anga-lelei ‘aupitó. Na‘e ‘ikai ke sai‘ia ‘a Siutasi ‘i hono tala ange ‘e Sīsū ‘a e me‘a ko iá kiate iá, ko ia na‘á ne ‘alu ki he kau taula‘eiki  lahí, ‘a ia ko e ngaahi fili kinautolu ‘o Sīsuú. Na‘a nau loto ke puke ‘a Sīsū, ka na‘a nau fiema‘u ke fai ia ‘i he po‘ulí koe‘uhi ke ‘oua ‘e sio atu ‘a e kakaí kia kinautolu.

Na‘e tala ange ‘e Siutasi ki he kau taula‘eikí: ‘Te u tala atu kia kimoutolu ‘a e founga ‘e lava ke mou puke ai ‘a Sīsuú ‘o kapau te mou ‘omi kiate au ha pa‘anga. Ko e fiha te mou ‘omaí?’

‘Te mau ‘oatu kia koe ‘a e konga siliva ‘e tolunoa,’ ko e tali ia ‘a e kau taula‘eikí.—Mātiu 26:14-16.

Na‘e to‘o ‘e Siutasi ‘a e pa‘angá. Na‘e hangē pē ia ha‘ane fakatau atu ‘a e Faiako Lahí ki he kau tangata ko iá! ‘E lava ke ke fakakaukau atu ki ha taha ‘okú ne fai ha fu‘u me‘a kovi pehē?— Sai, ko e fa‘ahinga me‘a ia ‘oku hoko ‘i he taimi ‘oku hoko ai ha taha ko ha kaiha‘a pea kaiha‘a pa‘angá. ‘Oku ‘ofa ia ‘i he pa‘angá ‘o lahi ange ‘i he‘ene ‘ofa ‘i he kakai kehé ‘o a‘u ki he ‘Otuá.

Mahalo te ke pehē, ‘ ‘E ‘ikai ‘aupito te u ‘ofa ‘i ha me‘a ‘o laka hake ‘i he‘eku ‘ofa kia Sihova ko e ‘Otuá.’ Ko e me‘a lelei ‘a ho‘o ongo‘i peheé. ‘I he taimi na‘e fili ai ‘e Sīsū ‘a Siutasi ko ha ‘apositoló, ngalingali ko e anga ia ‘o e ongo‘i ‘a Siutasí. Ko e ni‘ihi na‘a nau hoko ko e kau kaiha‘á na‘a nau ongo‘i pehē nai mo kinautolu foki. Ta talanoa angé ‘o fekau‘aki mo ha ni‘ihi ‘o kinautolu.

 Ko e tokotaha ko ha sevāniti ‘a e ‘Otuá ko hono hingoá ko ‘Ākani, ‘a ia na‘e mo‘ui fuoloa ia ki mu‘a pea toki fanau‘i ‘a e Faiako Lahí. Na‘e sio ‘a ‘Ākani ki ha kofu faka‘ofo‘ofa, ko ha konga koula, mo ha ngaahi pa‘anga siliva. Na‘e ‘ikai ko ha me‘a ia ‘a‘ana. ‘Oku pehē ‘e he Tohitapú ko e me‘a ia ‘a Sihova koe‘uhí he na‘e to‘o ia mei he ngaahi fili ‘o e kakai ‘a e ‘Otuá. Ka na‘e fiema‘u lahi ia ‘e ‘Ākani ‘o ne kaiha‘asi ai ia.—Siosiua 6:19; 7:11, 20-22.

Ko ha toe fakatātā eni ‘e taha. ‘I he kuohilí, na‘e fili ‘e Sihova ‘a Tēvita ko e tu‘i ki he kakai ‘o ‘Isilelí. ‘I he ‘aho ‘e taha, na‘e kamata ke sio ‘a Tēvita ki he fefine faka‘ofo‘ofa ko Patisepá. Na‘á ne toutou sio ma‘u pē kia Patisepa pea fakakaukau ‘o fekau‘aki mo hono ‘ave ia ki hono ‘apí ke na nofo. Kae kehe, ko e uaifi ia ‘o ‘Ulaiá. Ko e hā na‘e totonu ke fai ‘e Tēvitá?—

 Na‘e totonu ke ta‘ofi ‘e Tēvita ‘a ‘ene fakakaukau ‘o fekau‘aki mo hono ma‘u ‘o Patisepá. Ka na‘e ‘ikai te ne fai pehē. Ko ia, na‘e ‘ave ai ia ‘e Tēvita ki hono ‘apí. Pea na‘á ne ‘ai leva ke tāmate‘i ‘a ‘Ulaia. Ko e hā na‘e fai ai ‘e Tēvita ‘a e ngaahi me‘a kovi ko ení?— Koe‘uhí he na‘á ne hokohoko fiema‘u ha fefine na‘e ma‘u ‘e ha tokotaha kehe.—2 Samiuela 11:2-27.

Koe‘uhi na‘e fakatomala ‘a Tēvita, na‘e tuku ia ‘e Sihova ke mo‘ui. Ka ‘i he taimi ko ení na‘e lahi ‘a e faingata‘a na‘e hoko kia Tēvitá. Ko hono foha ko ‘Apisalomé na‘á ne loto ke ma‘u ‘a e tu‘unga ‘o Tēvita ko e tu‘í. Ko ia, ‘i he taimi na‘e ha‘u ai ‘a e kakaí ke sio kia Tēvitá, na‘e ala atu ‘a ‘Apisalome ‘o puke mai kinautolu ‘o ne ‘uma kia kinautolu. ‘Oku pehē ‘e he Tohitapú: “Na‘e kaiha‘asi ‘e Apisalome ‘a e loto ‘o e kau tangata Isileli.” (Faka‘ītali ‘amautolu.) Na‘á ne fakaloto‘i ‘a e kakai ko iá ke nau loto ke tu‘i ia kae tuku ‘a Tēvita ia.—2 Samiuela 15:1-12.

Kuó ke fu‘u fiema‘u nai ha me‘a ‘i ha taimi, ‘o hangē ko ‘Ākani, Tēvita mo ‘Apisalomé?— Kapau ko e me‘a ia ‘a ha tokotaha kehe, ke to‘o ia ‘o ‘ikai ma‘u ha ngofua ki aí ko e kaiha‘á ia. ‘Okú ke manatu‘i ‘a e me‘a na‘e fiema‘u ‘e he ‘uluaki tokotaha kaiha‘á, ‘a Sētane?— Na‘á ne fiema‘u ke lotu ange ‘a e kakaí kiate ia kae ‘ikai ko e ‘Otuá. Ko ia ai, na‘e kaiha‘a ‘a Sētane ‘i he‘ene ‘ai ‘a ‘Ātama mo ‘Ivi ke na talangofua ange ki aí.

‘I hono ma‘u ‘e ha taha ha me‘a, ‘okú ne ma‘u ‘a e totonu ke ne pehē pe ko hai nai te ne ngāue‘aki iá. Ko e fakatātaá, te ke ‘alu nai ke va‘inga mo e fānau kehé ‘i honau ‘apí. ‘E sai ke to‘o ha me‘a mei ai pea ‘ave ia ki ho ‘apí?— ‘E ‘ikai, tuku kehe kapau ‘oku pehē ‘e he tamai pe fa‘ē ‘a e fānau ko iá ‘e lava ke ke ‘alu mo ia. Kapau te ke ‘ave ha me‘a ki ho ‘apí ‘o ‘ikai te ke kole kia kinaua, ko e kaiha‘á ia.

Ko e hā ‘e fakatauele‘i nai ai koe ke ke kaiha‘á?— Koe‘uhí he ‘okú ke fiema‘u ha me‘a ‘oku ‘ikai ko ho‘o me‘a. Neongo kapau ‘oku ‘ikai ke sio atu ha taha ‘okú ke to‘o ia, ko hai ‘oku sio atú?— Ko Sihova ko e ‘Otuá. Pea ‘oku fiema‘u ke ta manatu‘i ‘oku fehi‘a ‘a e ‘Otuá ‘i he kaiha‘á. Ko ia, ko e ‘ofa ki he ‘Otuá pea mo ho kaungā‘apí ‘e tokoni ia kia koe ke ‘oua ‘aupito te ke hoko ko ha kaiha‘a.