KO HAI ‘a e sevāniti lelei taha ‘a e ‘Otuá kuo faifai pea mo‘ui maí?— ‘Oku tonu ia, ko Sīsū Kalaisi. ‘Okú ke fakakaukau ‘e malava ke ta hangē ko iá?— Sai, ‘oku pehē ‘e he Tohitapú na‘á ne fokotu‘u ‘a e fa‘ifa‘itaki‘angá kia kitaua ke ta muimui ai. Pea ‘okú ne fakaafe‘i kitaua ke ta hoko ko ‘ene ongo ākonga.

‘Okú ke ‘ilo ‘a e ‘uhinga ‘o e pehē ke hoko ko ha ākonga ‘a Sīsuú?— ‘Oku ‘i ai ‘a e ngaahi me‘a ‘oku ‘uhinga ki ai. ‘Uluakí, kuo pau ke ta ako meiate ia. Ka ‘oku ‘ikai ko ia pē. Kuo pau foki ke ta toe tui mo‘oni ki he me‘a ‘okú ne lea‘akí. Kapau ‘okú ta fai pehē, te ta fai ai ‘a e me‘a ‘okú ne tala mai kia kitauá.

‘Oku pehē ‘e he kakai tokolahi ‘oku nau tui kia Sīsū. ‘Okú ke fakakaukau ko ‘ene kau ākonga mo‘oni kotoa kinautolu?— ‘Ikai, ko e tokolahi taha ‘o kinautolú ‘oku ‘ikai. ‘Oku nau ‘alu nai ki he lotú. Ka ko e tokolahi ‘ia kinautolú kuo te‘eki ai te nau fakamoleki ha taimi ke ako ai ‘a e me‘a na‘e ako‘i ‘e Sīsuú. Ko hono mo‘oní, ko e fa‘ahinga pē ‘oku muimui ‘i he fa‘ifa‘itaki‘anga ‘a Sīsuú ‘oku nau hoko ko ‘ene kau ākongá.

Ta talanoa angé ‘o fekau‘aki mo e ni‘ihi ‘o e fa‘ahinga ‘a ia na‘a nau hoko ko e kau ākonga ‘a Sīsū ‘i he taimi na‘á ne hoko ai ko ha tangata ‘i he māmaní. Ko e taha ‘i he ‘uluaki ke hoko ko ha ākongá ko Filipe. ‘Oku ‘alu ‘a Filipe ke kumi ‘a hono kaume‘a ko Nātanielá (‘oku toe ui ko Pātolomiú), ‘a ia ‘okú ke sio ki ai ‘oku tangutu ‘i he lalo ‘akaú. ‘I he ha‘u ‘a Nātaniela kia Sīsuú, ‘oku pehē ‘e Sīsū: ‘Vakai, ko ha tangata  faitotonu eni, ko ha ‘Isileli mo‘oni.’ ‘Oku ‘ohovale ‘a Nātaniela peá ne ‘eke ange: ‘ ‘Oku anga-fēfē ho‘o ‘ilo‘i aú?’

“ ‘I he te‘eki ke ui koe ‘e Filipe, lolotonga ho‘o ‘i he lolo fiki, na‘a ku sio kiate koe,” ko e lea ia ‘a Sīsuú. ‘Oku ‘ohovale ‘aupito ‘a Nātaniela ‘i he ‘ilo‘i totonu ‘e Sīsū ‘a e feitu‘u na‘e ‘i aí, ko ia ‘oku pehē ai ‘e Nātaniela: “Ko koe ia ‘a e ‘Alo ‘o e ‘Otua; ko e Tu‘i Isileli koe.”—Sione 1:50 (1:49, PM).

Na‘e hoko ‘a e ni‘ihi kehe ko e kau ākonga ‘a Sīsū ‘i he ‘aho ko ia ki mu‘a pea hoko ‘a Filipe mo Nātaniela ko e ongo ākongá. Ko e fa‘ahingá ni ko ‘Anitelū mo hono tokoua ko Pitá pea pehē foki kia Sione pea mahalo nai mo e tokoua ‘o Sione ko Sēmisí. (Sione 1:35-52) Kae kehe, ‘i he taimi nounou mei ai, ‘oku toe foki ‘a e toko faá ni ki he‘enau ngāue fakaetoutaí. ‘I he ‘aho leva ‘e taha, lolotonga ‘a e luelue ‘a Sīsū ‘i he matātahi ‘o e Tahi Kālelí, ‘okú ne sio ai kia Pita mo ‘Anitelū ‘okú na tuku hifo ha kupenga ki tahi. ‘Oku ui atu ‘a Sīsū kia kinaua: “Mo ōmi ‘o muimui ‘iate au.”

 ‘I he taha si‘i atu ‘a Sīsuú, ‘okú ne sio ai kia Sēmisi mo Sione. ‘Okú na ‘i ha vaka mo ‘ena tamaí, ‘o monomono honau kupengá. ‘Oku ui kinaua ‘e Sīsū ke na muimui foki kiate ia. Ko e hā na‘á ke mei faí kapau na‘e ui koe ‘e Sīsū? Na‘á ke mei ‘alu mo ia ‘o ‘ikai toe tatali?— Ko e kau tangatá ni ‘oku nau ‘ilo‘i ‘a Sīsū. ‘Oku nau ‘ilo na‘e fekau mai ia ‘e he ‘Otuá. Ko ia, ‘oku nau li‘aki ‘i he taimi pē ko iá ‘enau ngāue fakaetoutaí pea muimui ‘ia Sīsū.—Mātiu 4:18-22.

‘I he taimi na‘e hoko ai ‘a e kau tangatá ni ko e kau muimui ‘o Sīsuú, na‘e ‘uhinga iá ‘i he hili leva iá na‘a nau fai ma‘u pē ‘a e me‘a na‘e tonú?— ‘Ikai. Te ke manatu‘i nai ko e kau tangatá ni na‘e a‘u ‘o nau fekīhiaki ‘ia kinautolu pe ko hai na‘e lahi taha ‘ia kinautolú. Ka na‘a nau fanongo kia Sīsū, pea na‘a nau loto-lelei ke fai ha liliu. Kapau ‘okú ta loto-lelei ke fai ha liliu, ko kitaua foki ‘e lava ke ta hoko ko e ongo ākonga ‘a Sīsū.

Na‘e fakaafe‘i ‘e Sīsū ‘a e kakai kehekehe kotoa pē ke hoko ko ‘ene kau ākonga. ‘I he taimi ‘e taha, na‘e ha‘u ha pule koloa‘ia kei si‘i kia Sīsū ‘o ne ‘eke ange ‘a e founga ke ma‘u ai ‘a e mo‘ui ta‘engatá. ‘I he pehē ‘e he pule koloa‘iá kuó ne talangofua ki he ngaahi fekau ‘a e ‘Otuá ‘o talu mei he‘ene kei si‘í, na‘e fakaafe‘i ia ‘e Sīsū: “Ha‘u, o muimui iate au.” ‘Okú ke ‘ilo ‘a e me‘a na‘e hokó?—

Sai, ‘i he ‘ilo‘i ‘e he tangatá ko e hoko ko ha ākonga ‘a Sīsuú na‘e pau ke mahu‘inga ange ia ‘i he hoko ‘o koloa‘iá, na‘á ne loto-mamahi ‘aupito. Na‘e ‘ikai te ne hoko ko ha ākonga ‘a Sīsū koe‘uhí he na‘á ne ‘ofa ki he‘ene pa‘angá ‘o lahi ange ia ‘i he‘ene ‘ofa ki he ‘Otuá.—Luke 18:18-25, PM.

‘I he hili ‘a e malanga ‘a Sīsū ‘o meimei lava ‘a e ta‘u ‘e taha mo e konga, na‘á ne fili ha toko 12 ‘o ‘ene kau ākongá ke nau hoko ko e kau ‘apositolo. Ko e kau ‘apositoló ko e kau tangata ia na‘á ne fekau atu ke nau fai ‘a e ngāue makehe. ‘Okú ke ‘ilo honau hingoá?— Ta sio angé pe ‘e lava ke ta ‘ilo‘i kinautolu. Sio angé ki honau fakatātaá, pea sio pe ‘e lava ke ke tala mai honau hingoá. Peá ke feinga leva ke lau ma‘uloto honau hingoá.

‘I he faai mai ‘a e taimí, ko e taha ‘o e kau ‘apositolo ‘e toko 12 na‘e hoko ia ‘o kovi. Ko Siutasi ‘Isikaliote ia. ‘I he hili iá, na‘e toe fili ha ākonga ‘e taha ke hoko ko ha ‘apositolo. ‘Okú ke ‘ilo ‘a hono hingoá?— Ko Mataiasi.  Ki mui ai, na‘e hoko foki ‘a Paula mo Panepasa ko e ongo ‘apositolo, ka na‘e ‘ikai te na kau ‘i he toko 12.—Ngāue 1:23-26; 14:14.

Hangē ko ia na‘á ta ako ‘i he Vahe 1 ‘o e tohi ko ení, na‘e mahu‘inga‘ia ‘a Sīsū ‘i he fānau īkí. Ko e hā na‘á ne fai pehē aí?— Koe‘uhí he na‘á ne ‘ilo ‘e malava ke nau hoko foki ko ‘ene kau ākonga. Ko hono mo‘oní, ‘oku fa‘a malava ke lea‘aki ‘e he fānaú ‘a e ngaahi me‘á ‘i ha founga ‘oku a‘u nai ‘o malava ke ne ‘ai ‘a e kakai lalahí ke nau fanongo mo loto ke ako lahi ange ‘o fekau‘aki mo e Faiako Lahí.

Na‘e toe hoko ‘a e kakai fefine tokolahi ko e kau ākonga ‘a Sīsū. Ko e ni‘ihi na‘e fononga fakataha mo ia ‘i he taimi na‘á ne ‘alu ai ke malanga ‘i he ngaahi kolo kehé. Ko Mele Makitaline, Sōana mo Sūsana  na‘a nau fai ia. Na‘a nau toe tokoni nai ke teuteu ‘a ‘ene me‘akaí mo fō hono valá.—Luke 8:1-3.

‘Okú ke loto ke hoko ko ha ākonga ‘a Sīsū?— Manatu‘i, ko e pehē pē ko ha taha kitaua ‘o ‘ene kau ākongá ‘oku ‘ikai ke ‘ai ai ke ta hoko ko ha ākonga. Kuo pau ke ta fai ‘o hangē ko ha taha ‘o ‘ene kau ākongá ‘i ha feitu‘u pē ‘okú ta ‘i ai, ‘o ‘ikai ‘i he taimi pē ‘okú ta ‘alu ai ki he ngaahi fakataha faka-Kalisitiané. ‘E lava ke ke fakakaukau ki ha feitu‘u ‘e ni‘ihi ‘a ia ‘oku mahu‘inga ai ke ta fai ‘o hangē ko ha ākonga ‘a Sīsuú?—

‘Io, ‘oku totonu ke ta fai pehē ‘i ‘api. Ka neongo ia, ko ha feitu‘u ‘e taha ‘a e ‘apiakó. Ko e me‘a ‘oku totonu ke ‘oua ‘aupito na‘a ngalo ‘ia koe mo aú, ke hoko ko ha ākonga mo‘oni ‘a Sīsuú, kuo pau ke ta fai ‘o hangē ko iá ‘i he kotoa ‘o e ‘ahó, ‘i he ‘aho kotoa pē, ‘o tatau ai pē pe ‘okú ta ‘i fē.