‘I HE ‘aho ‘e taha na‘e ha‘u ai ha tangata ke sio kia Sīsū. Na‘á ne ‘ilo‘i ko Sīsuú na‘e poto ‘aupito, ko ia na‘á ne pehē kiate ia: ‘Faiako, tala ki hoku tokouá ke ne foaki mai ha ni‘ihi ‘o e ngaahi me‘a ‘okú ne ma‘ú.’ Na‘e fakakaukau ‘a e tangatá ‘oku totonu ke ne ma‘u ‘a e ni‘ihi ‘o e ngaahi me‘a ko iá.

Kapau na‘a ko Sīsū koe, ko e hā na‘á ke mei lea‘akí?— Na‘e vakai ‘a Sīsū ko e tangatá na‘e ‘i ai ‘ene palopalema. Ka ko e palopalemá na‘e ‘ikai ko ‘ene fiema‘u ‘a e me‘a na‘e ma‘u ‘e hono tokouá. Ko e palopalema ‘a e tangatá ko e ‘ikai te ne ‘ilo ‘a e me‘a na‘e mahu‘inga mo‘oni ‘i he mo‘uí.

Ta fakakaukau angé ki he me‘a ko ení. Ko e hā ‘oku totonu ke mahu‘inga taha kia kitauá? ‘Oku totonu ke pehē ko hono ma‘u ‘a e ngaahi me‘a-va‘inga leleí, vala fo‘oú, pe ko e ngaahi me‘a hangē ko iá?— ‘Ikai, ‘oku ‘i ai ‘a e me‘a ‘oku mahu‘inga lahi ange ia. Pea ko e lēsoni eni na‘e fiema‘u ‘e Sīsū ke ako‘í. Ko ia, na‘á ne fai leva ha talanoa ‘o fekau‘aki mo ha tangata na‘e ngalo ai ‘a e ‘Otuá. Te ke fie fanongo ki ai?—

Ko e tangatá ni na‘e koloa‘ia ‘aupito. Na‘á ne ma‘u ha kelekele mo ha ngaahi fale tauhi‘anga koloa. Ko e ngoue na‘á ne toó na‘e tupu lelei ‘aupito. Na‘e ‘ikai ke ‘i ai ha feitu‘u ‘atā ‘i hono ngaahi fale tauhi‘anga koloá ke fa‘oaki ai ‘a e fua kotoa ‘o e ngoué. Ko ia, ko e hā ‘a e me‘a na‘e teu ke ne faí? Sai, na‘á ne pehē kiate ia: ‘Te u holoki hoku ngaahi fale tauhi‘anga koloá pea langa ha ngaahi fale ‘oku lalahi angé. Pea te u toki fa‘oaki kotoa ‘a e ngaahi fua ‘o ‘eku ngoué mo ‘eku ngaahi  me‘a lelei kotoa pē ‘i he ngaahi fale tauhi‘anga koloa fo‘oú ni.’

Na‘e fakakaukau ‘a e tangata koloa‘iá ko e me‘a fakapotopoto eni ke faí. Na‘á ne fakakaukau ‘okú ne fu‘u poto ‘aupito ‘i hono fa‘oaki ha ngaahi me‘a lahi. Na‘á ne pehē kiate ia: ‘Kuo fa‘oaki ma‘aku ‘a e ngaahi me‘a lelei lahi. ‘E fe‘unga ia kiate au ‘i he ngaahi ta‘u lahi. Ko ia leva ‘e lava ke u fiemālie he taimí ni. Te u kai, inu mo fiefia.’ Ka na‘e ‘i ai ‘a e me‘a na‘e fehālaaki ‘i he fakakaukau ‘a e tangata koloa‘iá. ‘Okú ke ‘ilo pe ko e hā ia?— Na‘á ne fakakaukau pē kiate ia pea mo ‘ene fiefia ‘a‘aná. Na‘e ngalo ai ‘a e ‘Otuá.

Ko ia, na‘e lea ‘a e ‘Otuá ki he tangata koloa‘iá. Na‘á ne pehē: ‘ ‘A e tangata vale. Te ke mate ‘i he poó ni. Ko hai leva te ne ma‘u ‘a e ngaahi me‘a na‘á ke fa‘oakí?’ ‘E lava ke ngāue‘aki ‘e he tangata koloa‘ia ko iá ‘a e ngaahi me‘a ko iá ‘i he hili ‘ene maté?— ‘Ikai, ‘e ma‘u ia ‘e ha taha kehe. Na‘e pehē ‘e Sīsū: ‘Ko e anga ‘eni ‘o ia ‘oku fokotu‘u koloa ma‘aná, ka ‘oku ‘ikai te ne koloa‘ia ki he ‘Otuá.’—Luke 12:13-21.

‘Oku ‘ikai te ke loto ke hangē ko e tangata koloa‘ia ko iá, ‘ikai ko ia?— Ko ‘ene taumu‘a tefito ‘i he mo‘uí ko hono ma‘u ‘a e ngaahi me‘a fakamatelié.  Ko ha fehālaaki ia. Na‘á ne fiema‘u ma‘u pē ‘a e me‘a lahi ange. Ka na‘e ‘ikai te ne ‘koloa‘ia ki he ‘Otuá.’

Ko e kakai tokolahi ‘oku nau hangē ko e tangata koloa‘ia ko iá. ‘Oku nau fiema‘u ma‘u pē ‘a e me‘a lahi ange. Ka ‘e lava ke iku ‘a e me‘á ni ki he ngaahi palopalema lahi. Ko e fakatātaá, ‘oku ‘i ai ho‘o ngaahi me‘a-va‘inga, ‘ikai ko ia?— Ko e hā ‘a e ni‘ihi ‘o e ngaahi me‘a-va‘inga ‘okú ke ma‘ú? Tala mai angé.— Fēfē kapau ko e taha ‘o ho ngaahi kaume‘á ‘oku ‘i ai ha‘ane fo‘i pulu pe ko ha‘ane tamapua pe ko ha‘ane me‘a-va‘inga kehe ‘oku ‘ikai te ke ma‘u? ‘E tonu nai kia koe ke ke feinga ke ‘ai ‘a ho‘o ongo mātu‘á ke na fakatau mai ha taha ma‘au?—

‘Oku ‘i ai nai ha taimi ‘oku hā mātu‘aki mahu‘inga ai ha me‘a-va‘inga. Ka ko e hā ‘oku hoko ki aí ‘i ha taimi nounou mei ai?— ‘Oku faka‘au ke motu‘a ia. ‘E maumau nai, pea ‘e ‘ikai leva te ke toe fiema‘u ia ‘e koe. Ko hono mo‘oní, ‘okú ke ma‘u ‘a e me‘a ‘oku mātu‘aki mahu‘inga ange ia ‘i he me‘a-va‘ingá. ‘Okú ke ‘ilo pe ko e hā ia?—

Ko ho‘o mo‘uí. Ko ho‘o mo‘uí ‘oku mātu‘aki mahu‘inga koe‘uhí ‘i he ‘ikai ha mo‘uí, ‘e ‘ikai lava ke ke fai ha me‘a. Ka ko ho‘o mo‘uí ‘oku fakatefito ia ‘i hono fai ‘a e me‘a ‘oku fiefia ai ‘a e ‘Otuá, ‘ikai ko ia?— Ko ia, ‘ai ke ‘oua te ta hangē ko e tangata koloa‘ia vale ko ia na‘e ngalo ai ‘a e ‘Otuá.

 ‘Oku ‘ikai ko e fānaú pē ‘a e fa‘ahinga te nau fai nai ha ngaahi me‘a fakavalevale ‘o hangē ko e tangata koloa‘iá. ‘Oku tokolahi ‘a e kakai lalahi ‘oku nau fai pehē foki. Ko e ni‘ihi ‘o kinautolu ‘oku nau fiema‘u ma‘u pē ha me‘a lahi ange ‘i he me‘a ‘oku nau ma‘ú. ‘Oku nau ma‘u nai ha me‘akai ki he ‘ahó, vala ke tui, pea mo ha feitu‘u ke nofo ai. Ka ‘oku nau kei fiema‘u pē ‘a e me‘a lahi ange. ‘Oku nau fiema‘u ke lahi ‘a e valá. Pea ‘oku nau fiema‘u ‘a e ngaahi fale lalahi ange. Ko e ngaahi me‘á ni ‘oku totongi‘aki ‘a e pa‘anga. Ko ia, ‘oku nau ngāue mālohi ke ma‘u ha pa‘anga lahi. Pea ko e lahi ange ‘a e pa‘anga ‘oku nau ma‘ú, ko e lahi ange ia ‘a e me‘a ‘oku nau fiema‘ú.

‘Oku hoko ‘a e kakai lalahi ‘e ni‘ihi ‘o fu‘u femo‘uekina ‘i he feinga ke ma‘u ha pa‘angá ‘o ‘ikai ai ke ‘i ai hanau taimi ke fakataha ai mo honau fāmilí. Pea ‘oku ‘ikai ke ‘i ai hanau taimi ma‘á e ‘Otuá. ‘E lava ‘e he‘enau pa‘angá ke tauhi kinautolu ke nau mo‘ui?— ‘Ikai, ‘oku ‘ikai te ne lava. ‘E lava ke nau ngāue‘aki ‘enau pa‘angá ‘i he hili ‘enau maté?— ‘Ikai. ‘Oku hoko ení koe‘uhí ko e kau maté ‘oku ‘ikai lava ke nau fai ha me‘a ‘e taha.—Koheleti 9:5, 10.

‘Oku ‘uhinga ení ‘oku hala ke ma‘u ha pa‘anga?— ‘Ikai. ‘E malava ke ta fakatau mai ha me‘akai mo ha vala ‘aki ‘a e pa‘angá. ‘Oku pehē ‘e he Tohitapú ko ha malu‘anga ia. (Koheleti 7:12) Ka ‘o kapau ‘okú ta ‘ofa ‘i he pa‘angá, ‘e ‘i ai leva ‘a e palopalema ‘e hoko kia kitaua. Te ta hangē ko e tangata koloa‘ia vale ko ia na‘e fa‘oaki koloa ma‘ana pea ‘ikai te ne koloa‘ia ki he ‘Otuá.

Ko e hā ‘a e ‘uhinga ‘o e pehē ke koloa‘ia ki he ‘Otuá?— ‘Oku ‘uhinga iá ke fakamu‘omu‘a ‘a e ‘Otuá ‘i he‘eta mo‘uí. ‘Oku pehē ‘e he kakai ‘e ni‘ihi ‘oku nau tui ki he ‘Otuá. ‘Oku nau fakakaukau ko e tuí pē ‘a e me‘a ‘oku fiema‘ú. Ka ‘oku nau koloa‘ia mo‘oni ki he ‘Otuá?— ‘Ikai, ‘oku nau hangē kinautolu ko e tangata koloa‘ia na‘e ngalo ai ‘a e ‘Otuá.

Na‘e ‘ikai ‘aupito ngalo ‘ia Sīsū ‘a ‘ene Tamai ‘oku ‘i hēvaní. Na‘e ‘ikai te ne feinga ke ma‘u ha pa‘anga lahi. Pea na‘e ‘ikai te ne ma‘u ha ngaahi me‘a fakamatelie lahi. Na‘e ‘ilo‘i ‘e Sīsū ‘a e me‘a na‘e mahu‘inga mo‘oni ‘i he mo‘uí. ‘Okú ke ‘ilo pe ko e hā ‘a e me‘a ko iá?— Ko e hoko ‘o koloa‘ia ki he ‘Otuá.

Tala mai angé, ‘e lava fēfē ke ta hoko ‘o koloa‘ia ki he ‘Otuá?— ‘E malava  ke ta hoko ‘o koloa‘ia ki he ‘Otuá ‘aki hono fai ‘a e me‘a ‘okú ne lelei‘ia aí. Na‘e pehē ‘e Sīsū: ‘ ‘Oku ou fai ma‘u ai pē ‘a e ngaahi me‘a ‘okú ne lelei‘ia aí.’ (Sione 8:29) ‘Oku sai‘ia ‘a e ‘Otuá ‘i he‘eta fai ‘a e ngaahi me‘a ‘okú ne fiema‘u mai ke ta faí. Tala mai he taimí ni, ko e hā ‘a e ngaahi me‘a ‘e lava ke ke fai ke lelei‘ia ai ‘a e ‘Otuá?— ‘Io, ‘e lava ke ke lau ‘a e Tohitapú, ‘alu ki he ngaahi fakataha faka-Kalisitiané, lotu ki he ‘Otuá pea mo tokoni‘i ‘a e ni‘ihi kehé ke ako kiate ia. Ko e mo‘oni ko e ngaahi me‘a mahu‘inga taha ia ‘i he mo‘uí.

Koe‘uhi na‘e koloa‘ia ‘a Sīsū ki he ‘Otuá, na‘e tokanga‘i ia ‘e Sihova. Na‘á ne foaki kia Sīsū ‘a e pale ko e mo‘ui ta‘engata. Kapau ‘okú ta hangē ko Sīsuú, ‘e ‘ofa‘i kitaua ‘e Sihova mo tokanga‘i foki kitaua. Ko ia, ‘ofa ke ta hangē ko Sīsuú pea ‘oua ‘aupito na‘á ta hangē ko e tangata koloa‘ia ko ia na‘e ngalo ai ‘a e ‘Otuá.