KO E HĀ ‘a e ‘uluaki me‘a ‘okú ke fa‘a ‘eke ki ha taha ‘i ho‘o fuofua fe‘iloaki mo iá?— ‘Io, ‘okú ke ‘eke ‘a hono hingoá. ‘Oku ‘i ai kotoa hotau hingoa. Na‘e ‘oange ‘e he ‘Otuá ki he ‘uluaki tangata ‘i he māmaní ha hingoa. Na‘á ne fakahingoa ia ko ‘Ātama. Ko e uaifi ‘o ‘Ātamá na‘e fakahingoa ia ko ‘Ivi.

Kae kehe, ‘oku ‘ikai ko e kakaí pē ‘oku ‘i ai honau hingoá. Fakakaukau ki ha toe ngaahi me‘a kehe ‘oku ‘i ai honau hingoa. ‘I he taimi ‘oku ‘oatu ai ‘e ha taha ha‘o tamapua pe ha manu ke tauhi, ‘okú ke fakahingoa ia, ‘ikai ko ia?— ‘Io, ko e ma‘u ha hingoá ‘oku mahu‘inga ‘aupito.

Vakai hake ki he ngaahi fetu‘u lahi ‘aupito ‘i he po‘ulí. ‘Okú ke fakakaukau ‘oku ‘i ai hanau hingoa?— ‘Io, na‘e ‘oange ‘e he ‘Otuá ha hingoa ki he fo‘i fetu‘u taki taha ‘i he langí. ‘Oku tala mai ‘e he Tohitapú kia kitaua: “ ‘A ‘ene ‘Afio ‘oku ne lau ‘a e ngaahi fetu‘u pe ‘oku fiha; ‘oku ne fakahingoa honau kotoa.”—Sāme 147:4.

Ko hai te ke pehē ko e tokotaha mahu‘inga taha ia ‘i he ‘univēsí kotoa?— ‘Io, ko e ‘Otuá. ‘Okú ke fakakaukau ‘oku ‘i ai hano hingoa?— Na‘e pehē ‘e Sīsū ‘oku ‘i ai Hono hingoa. Na‘e tu‘o taha ‘a e pehē ‘e Sīsū ‘i ha lotu ki he ‘Otuá: ‘Kuó u faka‘ilo ho huafá ki hoku kau muimuí.’ (Sione 17:26) ‘Okú ke ‘ilo ‘a e hingoa ‘o e ‘Otuá?— ‘Oku tala tonu mai ia ‘e he ‘Otuá kia kitaua. ‘Okú ne folofola: “Ko Sihova au; ko hoku hingoa ia.” Ko ia, ko e hingoa ‘o e ‘Otuá ko SIHOVA.—Aisea 42:8.

‘Oku fēfē ho‘o ongo‘í ‘i he taimi ‘oku manatu‘i ai ‘e he ni‘ihi kehé ho hingoá?— ‘Okú ke fiefia, ‘ikai ko ia?— ‘Oku fiema‘u foki ‘e Sihova ‘a e kakaí ke nau ‘ilo‘i ‘a hono hingoá. Ko ia, ‘oku totonu ke ta ngāue‘aki ‘a e hingoa Sihová ‘i he‘eta talanoa ‘o kau ki he ‘Otuá. Ko e Faiako Lahí na‘á ne ngāue‘aki ‘a e hingoa ‘o e ‘Otuá, ‘a e Sihová, ‘i he taimi na‘á ne lea ai ki he kakaí. ‘I he taimi ‘e taha na‘e pehē ai ‘e Sīsū: ‘Te ke ‘ofa kia  Sihova ko ho ‘Otuá ‘aki ho lotó kotoa.’—Maake 12:30, PM.

Na‘e ‘ilo‘i ‘e Sīsū ko e ‘Sihová’ ko ha hingoa mātu‘aki mahu‘inga ia. Ko ia, na‘á ne ako‘i ‘a hono kau muimuí ke nau ngāue‘aki ‘a e hingoa ‘o e ‘Otuá. Na‘e a‘u ‘o ne ako‘i kinautolu ke lea‘aki ‘a e hingoa ‘o e ‘Otuá ‘i he‘enau lotú. Na‘e ‘ilo‘i ‘e Sīsū ‘oku fiema‘u ‘e he ‘Otuá ke ‘ilo‘i ‘e he kakai kotoa pē ‘a Hono hingoa, ko e Sihová.

‘I he kuohilí, na‘e fakahaa‘i ‘e he ‘Otuá ‘a e mahu‘inga ‘o hono hingoá ki he tangata ko Mōsesé, ‘a ia ko ha ‘Isileli. Na‘e nofo ‘a e kau ‘Isilelí ‘i he fonua na‘e ui ko ‘Isipite. Ko e kakai ‘o e fonua ko iá na‘e ‘iloa ko e kau ‘Isipité. Na‘a nau ‘ai ‘a e kau ‘Isilelí ko e kau pōpula pea na‘a nau anga-fakamamahi ‘aupito kia kinautolu. ‘I he tupu hake ‘a Mōsesé, na‘á ne feinga ke tokoni‘i ‘a e tokotaha ‘i hono kakaí. Na‘e ‘ai ‘e he me‘á ni ke ‘ita ‘a Felo, ko e tu‘i ‘o ‘Isipité. Na‘á ne loto ke fakapoongi ‘a Mōsese! Ko ia, na‘e hola ‘a Mōsese mei ‘Isipite.

Na‘e ‘alu ‘a Mōsese ki ha fonua ‘e taha.  Ko e fonua ia ko Mitianí. Na‘e mali ai ‘a Mōsese pea kamata ke tauhi hake ha fāmili. Na‘á ne toe ngāue foki ko ha tauhi-sipi ‘o tokanga‘i ‘a e fanga sipí. ‘I he ‘aho ‘e taha, ‘i he femo‘uekina ‘a Mōsese ‘i hono tokanga‘i ‘a ‘ene fanga sipí ‘o ofi ‘i ha mo‘unga na‘á ne mamata ai ki ha me‘a fakaofo. Na‘e ulo ha fu‘u ‘akau talatala, ka na‘e ‘ikai ke vela ia! Na‘e ‘unu‘unu ofi atu ‘a Mōsese ke sio lelei ki ai.

‘Okú ke ‘ilo‘i ‘a e me‘a ne hokó?— Na‘e fanongo ‘a Mōsese ki ha le‘o ‘oku ui mai mei he loto ‘akau talatala ulo ko iá. Na‘e ui mai ‘a e le‘ó, “Mōsese! Mōsese!” Ko hai na‘á ne lea mai ‘aki iá?— Ko e ‘Otuá ia na‘e leá! Na‘e lahi ‘a e ngāue ‘a e ‘Otuá ke fai ‘e Mōsesé. Na‘e folofola ‘e he ‘Otuá: ‘Ke ke ha‘u kau fekau atu koe kia Felo, ko e tu‘i ‘o ‘Isipité, ke ‘omi mei ‘Isipite ‘a hoku kakai ko ha‘a ‘Isilelí.’ Na‘e palōmesi ‘a e ‘Otuá te ne tokoni‘i ‘a Mōsese ke ne fai ‘a e me‘á ni.

Ka na‘e pehē ‘e Mōsese ki he ‘Otuá: ‘Kau ka ‘alu ki ha‘a ‘Isileli ‘i ‘Isipité peá u pehē na‘e fekau mai au ‘e he ‘Otuá. Fēfē kapau te nau pehē kiate au, “Ko hai hono huafa?” ‘Ko e hā ha‘aku lea ‘e fai?’ Na‘e folofola ‘e he ‘Otuá kia Mōsese ke tala ki ha‘a ‘Isileli: ‘Kuo fekau au ‘e Sihova kiate kimoutolu. Ko Sihova ‘a hoku hingoá ‘o ta‘engata.’ (Ekisoto 3: 1-15) ‘Oku fakahaa‘i ‘e he me‘á ni ‘e tauhi ‘e he ‘Otuá ‘a e hingoa ko e Sihová. ‘E ‘ikai ‘aupito te ne liliu ia. Na‘e fiema‘u ‘e he ‘Otuá ke ‘ilo‘i ‘aki ia ‘a hono hingoa ko e Sihová ‘o ta‘engata.

‘I he taimi na‘e foki ai ‘a Mōsese ki ‘Isipité, na‘e fakakaukau ‘a e kau ‘Isipité kia Sihova ko ha ki‘i ‘otua valevale pē ‘o e kau ‘Isilelí. Na‘e ‘ikai te nau fakakaukau ko e ‘Otua ia ‘o e fo‘i māmaní kotoa. Ko ia, na‘e folofola ‘a Sihova ki he tu‘i ‘o ‘Isipité: ‘Te u ‘ai ke ongoongoa hoku hingoá ‘i māmani kātoa.’ (Ekisoto 9:16) Na‘e ‘ai mo‘oni ‘e Sihova ‘o ongoongoa ‘a hono hingoá. ‘Okú ke ‘ilo ‘a e founga na‘á ne fai ai iá?—

Sai, na‘á ne ‘ai ‘a Mōsese ke ne taki ‘a e kakai ‘o ‘Isilelí ki tu‘a mei ‘Isipite. ‘I he‘enau a‘u ki he Tahi Kulokulá, na‘e ‘ai ‘e Sihova ha hala mātu‘u ‘i loto tonu ai. Na‘e laka lelei atu ‘a e kau ‘Isilelí ‘i he fonua mōmoá. Ka, ‘i he hili ‘a e a‘u atu ‘a Felo mo e kotoa ‘o ‘ene kau taú ki he kilisitahi mōmoá, na‘e holo hifo ‘a e vai na‘e ta‘ofi ‘i he ongo tafa‘akí ‘i he kau ‘Isipité, pea ne nau mate kotoa ai.

Na‘e vave ai ‘a e kamata ke fanongoa ‘e he kakai kotoa pē ‘i he māmaní ‘a e me‘a kuo fai ‘e Sihova ‘i he Tahi Kulokulá. ‘Oku anga-fēfē ‘eta ‘ilo‘i na‘a nau fanongo aí?— Sai, hili ‘a e ta‘u ‘e 40 nai, na‘e ha‘u ‘a e kau ‘Isilelí ki Kēnani, ‘a ia ko e fonua na‘e palōmesi ‘e Sihova te ne foaki ma‘anautolú. Na‘e tala ai ‘e ha ki‘i fefine ko Lēhapi ki ha ongo tangata ‘Isileli: “Kuo mau fanongo ki he fakamatu‘u ‘e Sihova ‘a e  Tahi Kulokula ‘i homou ‘ao ‘i ho‘omou hu mai mei Isipite.”—Siosiua 2:10.

‘I he ‘ahó ni, ‘oku tokolahi ‘a e kakai ‘oku nau hangē tofu pē ko e kau ‘Isipite ko iá. ‘Oku ‘ikai te nau tui ko Sihova ‘a e ‘Otua ‘o e fo‘i māmaní kotoa. Ko ia, ‘oku fiema‘u ai ‘e Sihova ‘a hono kakaí tonu ke nau talanoa ki he ni‘ihi kehé ‘o fekau‘aki mo ia. Ko e me‘a eni na‘e fai ‘e Sīsuú. ‘I he ofi ke ngata ‘a ‘ene mo‘ui ‘i he māmaní, na‘á ne tala hake kia Sihova ‘i he lotu: “Kuo u faka‘ilo kiate kinautolu ho huafa.”—Sione 17:26.

 ‘Okú ke loto ke hangē ko Sīsuú? Pe‘i tala leva ki he ni‘ihi kehé ko e hingoa ‘o e ‘Otuá ko Sihova. Te ke ‘ilo‘i nai ai ‘oku ‘ikai ke ‘ilo ia ‘e he kakai tokolahi. Ko ia, mahalo ‘e lava ke ke fakahā ange kia kinautolu ‘a e konga tohi ‘i he Tohitapú ko e Sāme 83:18 (PM). To‘o mai he taimí ni ‘a e Tohitapú peá ta kumi fakataha ‘a e konga tohi ko iá. ‘Oku pehē: ‘Koe‘uhi ke ‘ilo ‘e he kakaí ko koe, ko ho huafa ‘o‘oú ko Sihova, ko e Fungani Mā‘olunga ‘i māmani kotoa pē.’

Ko e hā ‘okú ta ako mei hono lau ení?— ‘Io, ‘okú ta ako ai ko e Sihová ‘a e hingoa mahu‘inga taha ‘oku ‘i aí. Ko e hingoa ia ‘o e ‘Otua Māfimafi-Aoniú, ‘a e Tamai ‘a Sīsuú pea mo e Tokotaha na‘á ne ngaohi ‘a e me‘a kotoa pē. Pea manatu‘i, na‘e pehē ‘e Sīsū ‘oku totonu ke ta ‘ofa kia Sihova ko e ‘Otuá ‘aki hota lotó kotoa. ‘Okú ke ‘ofa ‘ia Sihova?—

‘E lava fēfē ke ta fakahaa‘i ‘okú ta ‘ofa ‘ia Sihova?— Ko e founga ‘e tahá, ko e hoko ‘o ‘ilo‘i ia ‘i he tu‘unga ko ha Kaume‘a. Ko e toe founga ‘e taha, ko hono tala ki he ni‘ihi kehé ‘a hono hingoá. ‘E malava ke ta fakahaa‘i hangatonu ange kia kinautolu mei he Tohitapú ko hono hingoá ko Sihova. ‘E toe malava foki ke ta fakamatala ki he ngaahi me‘a fakaofo kuo ngaohi ‘e Sihová pea mo e ngaahi me‘a lelei kuó ne faí. ‘Oku ‘ai ‘e he me‘á ni ke fiefia lahi ‘a Sihova he ‘okú ne fiema‘u ‘a e kakaí ke nau ‘ilo ‘o fekau‘aki mo ia. ‘Oku malava ke ta kau ‘i hono fai iá, ‘ikai ko ia?—

‘E ‘ikai ke loto ‘a e tokotaha kotoa ke fanongo ‘i he‘eta talanoa ‘o kau kia Sihová. Ko e kakai tokolahi na‘e ‘ikai te nau fanongo ‘i he taimi na‘e talanoa ai na‘a mo Sīsū, ‘a e Faiako Lahí, ‘o kau kiate Iá. Ka na‘e ‘ikai ke ta‘ofi ‘e he me‘a ko iá ‘a Sīsū mei he‘ene talanoa ‘o fekau‘aki mo Sihová.

Ko ia, ‘ai ke ta hangē ko Sīsuú. Ta hanganaki talanoa ‘o fekau‘aki mo Sihova. Kapau te ta fai pehē, ‘e lelei‘ia ‘a Sihova ko e ‘Otuá ‘ia kitaua he ‘okú ta fakahaa‘i ‘a e ‘ofa ki hono hingoá.