KO E HĀ ko ha fehu‘i mahu‘inga ai ‘a e, Ko hai ho ‘Otuá?— Koe‘uhí he ‘oku lotu ‘a e kakaí ki he ngaahi ‘otua tokolahi. (1 Kolinito 8:5) ‘I he taimi na‘e ma‘u ai ‘e he ‘apositolo ko Paulá ‘a e mālohi meia Sihova ke fakamo‘ui ha tangata ‘a ia na‘e ‘ikai ‘aupito lava ke ne ‘alu ki mu‘á, na‘e kaila ‘a e kakaí: ‘Kuo maliu hifo ‘a e ngaahi ‘otuá kiate kitautolu ‘i he anga ‘o e tangatá.’ Na‘e loto ‘a e kakaí ke lotu kia Paula mo hono kaungāme‘a ko Panepasá. Na‘a nau ui ‘a Paula ko Hēmesi pea ui ‘a Panepasa ko Siusi, ‘a ia ko e hingoa ia ‘o e ongo ‘otua loi.

Ka na‘e ‘ikai ke tuku ‘e Paula mo Panepasa ‘a e kakaí ke nau lotu ange kia kinaua. Na‘á na ‘oho atu ki he kakaí ‘o na pehē: “Tafoki mei he ngaahi ‘otua noa ni ki he ‘Otua Mo‘ui.” (Ngāue 14:8-15) Ko hai ‘a e “ ‘Otua Mo‘ui,” ‘a ia na‘á ne fakatupu ‘a e ngaahi me‘a kotoa peé?— ‘Io, ko Sihova, ‘ko e Fungani Mā‘olunga ‘i māmani kotoa pē.’ Na‘e ui ‘e Sīsū ‘a Sihova “ko e Otua mo‘onia pe taha.” Ko ia leva, ko hai tokotaha pē ‘oku taau ke fai ki ai ‘a e lotú?— Ko Sihova pē!—Sāme 83:18, PM; Sione 17:3; Fakahā 4:11.

Ko e tokolahi taha ‘o e kakaí ‘oku nau lotu ki he ngaahi ‘otua kehe mei he “Otua mo‘onia pe taha.” ‘Oku nau fa‘a lotu ki he ngaahi me‘a ‘oku nau ngaohi mei he ‘akaú, maká, pe mētalé. (Ekisoto 32:4-7; Livitiko 26:1; Aisea 44:14-17) Na‘a mo e kau tangata mo e kau fefine ‘oku nau hoko ‘o ongoongoá ‘oku fa‘a ui kinautolu ‘i he taimi ‘e ni‘ihi ko e ngaahi ‘otua, kau sitā, pe ngaahi ‘aitoli. ‘Oku tonu ke fakalāngilangi‘i kinautolu?—

‘I he hili ‘a e hoko ‘a Saula ko e ‘apositolo ko Paulá, na‘á ne tohi: “Kuo fakakui ‘e he ‘otua ‘o e tu‘u ko eni ‘a e ‘atamai ‘o e kau ta‘etui.” (2 Kolinito 4:4) Ko hai ‘a e ‘otua ko ení?— ‘Io, ko Sētane ko e Tēvoló! Kuo malava ‘e Sētane ke ‘ai ‘a e kakaí ke nau lotu ki he kakai tokolahi mo e ngaahi me‘a lahi.

 ‘I he taimi na‘e feinga ai ‘a Sētane ke ‘ai ‘a Sīsū ke punou ange ‘o lotu kiate iá, ko e hā na‘e tala ‘e Sīsū kia Sētané?— “Ko Sihova ko ho ‘Otuá kuo pau ke ke lotu ki aí, pea ko ia pē tokotaha kuo pau ke ke fai ki ai ho‘o ngāue toputapú.” (Mātiu 4:10, NW) Ko ia, na‘e ‘ai ‘e Sīsū ke mahino ko e lotú ko e me‘a pē ia ‘a Sihova. Ta lau angé ‘o fekau‘aki mo ha kau talavou na‘a nau ‘ilo eni. Ko honau hingoá ko Setaleki, Mēsake mo ‘Apitenikō.

Ko e kau talavou Hepelū ko ení na‘a nau kau ‘i he pule‘anga ‘o e ‘Otuá ko ‘Isilelí pea na‘e taki pōpula kinautolu ki he fonua ko Pāpiloné. Ko ha tu‘i ‘i ai ko hono hingoá ko Nepukanesa na‘á ne langa ha fu‘u ‘īmisi koula lahi ‘aupito. ‘I he ‘aho ‘e taha, na‘á ne tu‘utu‘uni ‘o pehē ko e taimi ‘e tā ai ‘a e fasí, ko e tokotaha kotoa pē ‘oku totonu ke punou ki he ‘īmisí. ‘ ‘Ilonga ‘a ia ‘e ‘ikai punou ‘o lotú ‘e lī ia ki he loto tafu‘anga afi kakahá,’ ko ‘ene fakatokangá ia. Ko e hā na‘á ke mei faí?—

 Ko Setaleki, Mēsake mo ‘Apitenikō na‘a nau fa‘a fai ma‘u pē ‘a e me‘a kotoa na‘e tu‘utu‘uni ‘e he tu‘í. Ka na‘a nau fakafisi ke fai ‘a e me‘a ko ení. ‘Okú ke ‘ilo ‘a hono ‘uhingá?— Koe‘uhí he na‘e pehē ‘e he lao ‘a e ‘Otuá: ‘ ‘Oua na‘a ai hao ‘otua kehe meiate au. ‘Oua te ke ngaohi ma‘au ha ‘īmisi kuo tongi peá ke punou ki ai.’ (Ekisoto 20:3-5) Ko ia ai, na‘e talangofua ‘a Setaleki, Mēsake mo ‘Apitenikō ki he lao ‘a Sihová kae ‘ikai ko e tu‘utu‘uni ‘a e tu‘í.

Na‘e ‘ita lahi ‘aupito ‘a e tu‘í, ko ia ‘i he taimi pē ko iá na‘á ne fekau ke ‘omi ki hono ‘aó ‘a e kau talavou Hepelū ‘e toko tolú. Na‘á ne ‘eke: ‘Ko e mo‘oni ‘oku ‘ikai te mou tauhi hoku ngaahi ‘otuá? Te u ‘oatu hamou faingamālie. ‘I ho‘omou fanongo leva ki he fasí, mou fo‘ohifo ‘o lotu ki he ‘īmisi kuó u ngaohí. Ka ‘ikai, ‘e lī kimoutolu ki he loto tafu‘anga afi kakahá. Pea ko hai ia ‘a e ‘otua te ne fakahaofi kimoutolu mei hoku nimá?’

Ko e hā leva ‘e fai he taimí ni ‘e he kau talavoú? Ko e hā na‘á ke mei faí?— Na‘a nau pehē ki he tu‘í: ‘Ko e ‘Otua ‘oku mau tauhi ki aí ‘oku malava ke ne fakahaofi kimautolu. Ka neongo kapau ‘e ‘ikai te ne fai pehē, ‘e ‘ikai te mau tauhi ki ho ngaahi ‘otuá. ‘E ‘ikai te mau punou ki ho‘o ‘īmisi koulá.’

Na‘e ‘ita lahi ‘aupito ‘a e tu‘í. Na‘á ne tu‘utu‘uni: ‘Tafu ‘a e tafu‘anga  afí ke liunga fitu ‘a ‘ene velá ‘i he‘ene fa‘a vela ki mu‘á!’ Na‘á ne fekau atu leva ki he‘ene kau tangata mālohí ke ha‘i ‘a Setaleki, Mēsake mo ‘Apitenikō pea lī kinautolu ki he loto tafu‘anga afí! Na‘e fu‘u vela ‘aupito ‘a e tafu‘anga afí ‘o mate ‘a e kau tangata ‘a e tu‘í ‘i he ulo ‘a e afí! Fēfē ‘a e kau Hepelū ‘e toko tolú?

Na‘e tō tonu ‘a Setaleki, Mēsake mo ‘Apitenikō ki he loto afí. Ka neongo ia, na‘a nau tu‘u hake! Na‘e ‘ikai te nau vela. Pea na‘e ‘ikai ke kei ha‘i kinautolu. Na‘e malava fēfē ‘a e me‘á ni?— Na‘e vakai atu ‘a e tu‘í ki he loto tafu‘anga afí, pea ko e me‘a na‘á ne sio ki aí na‘e ‘ai ai ia ke ne ilifia. ‘ ‘Ikai na‘a tau lī ‘a e kau tangata ‘e toko tolu ki he loto afí?’ ko ‘ene ‘eké ia. Na‘e tali ‘e he‘ene kau sevānití: ‘ ‘Io, ‘e tu‘i.’

Na‘e pehē leva ‘e he tu‘í: ‘Vakai ‘oku ou mamata ki he toko fā ‘oku nau lue holo ai, pea ‘oku ‘ikai vela ha taha ‘o kinautolu.’ ‘Okú ke ‘ilo ‘a e tokotaha na‘e toko fā ‘akí?— Ko ha ‘āngelo ia ‘a Sihova. Na‘á ne malu‘i ‘a e kau Hepelū ‘e toko tolú mei ha‘anau vela.

Sai, ‘i he mamata ki he me‘a ko ení, na‘e ha‘u ‘a e tu‘í ki he matapā ‘o e tafu‘anga afí ‘o ne kaila atu: “Setaleki, Mesake,  mo Apeteniko, ‘a e kau tamaio‘eiki ‘a e ‘Otua Taupotu, mou hu mai, pea ha‘u ki heni.” ‘I he‘enau hū mai ki tu‘á, na‘e malava ke sio ‘a e tokotaha kotoa na‘e ‘ikai te nau vela. Na‘e a‘u ‘o ‘ikai ha‘anau namu-‘ohuafi. Na‘e pehē atu leva ‘e he tu‘í: ‘Ke mālō‘ia ‘a e ‘Otua ‘o Setaleki, Mēsake mo ‘Apitenikō, ‘a ia kuó ne fekau ha ‘āngelo ke fakahaofi ‘a ‘ene kau sevānití koe‘uhi na‘e ‘ikai te nau lotu ki ha toe ‘otua kehe ka ko honau ‘Otuá pē.’—Taniela, vahe 3.

‘E lava ke ta ako ha lēsoni mei he me‘a ko eni na‘e hokó. Na‘a mo e ‘ahó ni ‘oku fokotu‘u ‘e he tangatá ha ngaahi ‘īmisi, pe ngaahi ‘aitoli ki he lotú. ‘Oku pehē ‘e he The Encyclopedia Americana: “Ko e fuká, ‘i he hangē ko e kolosí, ‘oku toputapu.” Ko e ngaahi ‘īmisí ‘oku malava ke ngaohi ia mei he ‘akaú, maká, mētalé, pe tupenú. Ko e kau ākonga ki mu‘a ‘a Sīsuú na‘e ‘ikai te nau fai ha tō‘onga lotu ki he ‘emipola Lomá, ‘a ia na‘e pehē ‘e he faihisitōlia ko Daniel P. Mannix ‘oku lava ke fakahoa ia ki he “fakafisi ke faka‘apa‘apa ki he fuká pe lau ‘a e fakapapau ‘o e tukupaá.”

Ko ia, ‘okú ke fakakaukau ‘oku mahu‘inga ki he ‘Otuá kapau ‘oku ngaohi ha ‘īmisi fakalotu mei he tupenú, ‘akaú, maká pe mētalé?— ‘E tonu ki ha sevāniti ‘a Sihova ke fai ha tō‘onga lotu ‘i mu‘a ‘i ha ‘īmisi pehē?— Na‘e ‘ikai ke fai ia ‘e Setaleki, Mēsake mo ‘Apitenikō, pea na‘e lelei‘ia ‘a Sihova ‘ia kinautolu. ‘E lava fēfē ke ke fa‘ifa‘itaki ki he‘enau fa‘ifa‘itaki‘angá?—