‘OKÚ KE ‘ilo ha taha ‘oku loto ma‘u pē ia ke mu‘omu‘a?— Te ne teke‘i nai ha taha koe‘uhí kae mu‘omu‘a ia ‘i he lainé. Kuó ke sio ha me‘a pehē kuo hoko?— Na‘e sio ‘a e Faiako Lahí na‘a mo e kakai lalahí ‘oku nau feinga ke ma‘u ‘a e tu‘unga fika ‘uluakí pe mahu‘inga tahá. Pea na‘e ‘ikai te ne sai‘ia ai. Ta sio angé ki he me‘a na‘e hokó.

‘Oku tala mai ‘e he Tohitapú kia kitaua na‘e fakaafe‘i ‘a Sīsū ki ha kai me‘akai lahi ‘i he ‘api ‘o ha Fālesi, ‘a ia ko ha taki lotu mahu‘inga. ‘I he hili ‘a e a‘u atu ‘a Sīsuú, na‘e kamata ke ne mamata ki he kau ‘a‘ahi kehé ‘oku nau ha‘u pea fili ‘a e ngaahi nofo‘anga lelei tahá. Ko ia, na‘á ne fai ha talanoa ki he fa‘ahinga na‘e fakaafe‘í. Te ke fie fanongo ki ai?—

 Na‘e pehē ‘e Sīsū: ‘ ‘I hono fakaafe‘i koe ‘e ha taha ki ha kātoanga mali, ‘oua te ke fili ‘a e nofo‘anga lelei tahá pe mahu‘inga tahá.’ ‘Okú ke ‘ilo ‘a e ‘uhinga na‘e lea pehē ai ‘a Sīsuú?— Na‘á ne fakamatala na‘a kuo fakaafe‘i ha tokotaha ia ‘oku mahu‘inga angé. Ko ia, hangē ko ia ‘oku lava ke ke sio ki ai ‘i he fakatātaá, ko e tokotaha ‘oku ha‘ana ‘a e kātoangá ‘okú ne ha‘u ‘o pehē: ‘Tuku ki he tangatá ni ke ne nofo ‘i he potú ni, ka ke ‘alu koe ki he potu ko eé.’ ‘E fēfē leva ‘a e ongo‘i ‘a e tokotaha ‘a‘ahí?— Te ne ongo‘i mā koe‘uhí he ‘e sio kotoa atu ‘a e kau ‘a‘ahi kehé kiate ia ‘okú ne hiki ki he nofo‘anga ‘oku si‘i hono mahu‘ingá.

Na‘e fakahaa‘i ‘e Sīsū ‘oku ‘ikai totonu ke fiema‘u ‘a e nofo‘anga lelei tahá. Ko ia, na‘á ne pehē: ‘ ‘I hono fakaafe‘i koe ki ha kātoanga mali, ‘alu ‘o tangutu ‘i he nofo‘anga mā‘ulalo tahá. Pea ko e tokotaha leva na‘á ne fakaafe‘i koé te ne ha‘u nai ‘o pehē, “Kaume‘a, ‘alu koe ki mu‘a.” Te ke ma‘u leva ai ‘a e lāngilangi ‘i he ‘ao ‘o e kau ‘a‘ahi kehé kotoa ‘i ho‘o hiki ki he nofo‘anga lelei angé.’—Luke 14:1, 7-11.

Na‘á ke ma‘u ‘a e poini ‘o e talanoa ‘a Sīsuú?— Ta fai ha ki‘i fakatātā ke sio angé pe na‘á ke ma‘u ‘a e poiní. Fakakaukauloto atu ‘okú ke heka ‘i ha pasi ‘oku fonu. ‘Oku totonu ke ke fakavave ke ma‘u hao nofo‘anga kae tuku ha tokotaha matu‘otu‘a ange ia ke tu‘u?— ‘E sai‘ia nai ‘a Sīsū kapau na‘á ke fai ia?—

‘E pehē nai ‘e ha taha ‘oku ‘ikai ke tokanga ‘a Sīsū ia ki he me‘a ‘okú ta faí. Ka ‘okú ke tui ki ai?— ‘I he taimi na‘e ‘i he kai me‘akai lahi ai ‘a Sīsū ‘i he ‘api ‘o e Fālesí, na‘á ne mamata ki he kakaí ‘i he‘enau fili honau ngaahi nofo‘angá. ‘Ikai ‘okú ke fakakaukau ‘oku pehē pē ‘ene tokanga ki he me‘a ‘okú ta fai ‘i he ‘aho ní?— Koe‘uhi ‘oku ‘i hēvani ‘a Sīsū he taimí ni, ‘okú ne ‘i ha tu‘unga lelei mo‘oni ai ke vakai hifo kia kitaua.

 ‘I he taimi ‘oku feinga ai ha taha ke mu‘omu‘á, ‘e lava ke hoko ai ha palopalema. ‘Oku fa‘a hoko ai ha fakakikihi, pea ‘oku ‘ita ‘a e kakaí. ‘I he taimi ‘e ni‘ihi ‘oku hoko ‘a e me‘á ni ‘i he taimi ‘oku heka pasi fakataha ai ‘a e fānaú. ‘I he ava pē ‘a e matapā ‘o e pasí, ‘oku fakavave ‘a e fānaú ke mu‘omu‘a. ‘Oku nau fiema‘u ‘a e nofo‘anga lelei tahá, ‘a e ngaahi sea ‘oku ofi ki he matapā sio‘atá. Ko e hā leva nai ‘e hokó?— ‘Io, te nau fe‘ita‘aki nai ai.

Ko e loto ke mu‘omu‘á ‘e lava ke hoko ai ‘a e ngaahi palopalema lahi. Na‘e a‘u ‘o ne fakatupunga ha palopalema ‘i he lotolotonga ‘o e kau ‘apositolo ‘a Sīsuú. Hangē ko ia na‘á ta ako ‘i he Vahe 6 ‘o e tohí ni, na‘a nau fakakikihi ‘ia kinautolu pe ko hai na‘e lahi tahá. Ko e hā leva na‘e fai ‘e Sīsuú?— ‘Io, na‘á ne fakatonutonu kinautolu. Ka, ki mui aí na‘a nau toe fakakikihi. Ta sio angé ki he anga ‘o ‘ene kamatá.

Ko e kau ‘apositoló, fakataha mo e ni‘ihi kehé, ‘oku nau fononga faka‘osi mo Sīsū ki he kolo ko Selusalemá. Na‘e talanoa ‘a Sīsū kia kinautolu  ‘o fekau‘aki mo hono Pule‘angá, ko ia na‘e fakakaukau ai ‘a Sēmisi mo Sione ‘o fekau‘aki mo ‘ena pule ko e ongo tu‘i fakataha mo ia. Na‘e a‘u foki ‘o na talanoa mo ‘ena fa‘eé, ‘a Sālome, ‘o fekau‘aki mo ia. (Mātiu 27:56; Maake 15:40) Ko ia, ‘i he‘enau ‘alu ki Selusalemá, ‘oku ha‘u ‘a Sālome kia Sīsū ‘o punou ‘i mu‘a ‘iate ia peá ne fai ha kole.

‘Ko e hā ho lotó?’ ‘oku ‘eke ‘e Sīsū. ‘Okú ne tali ange ‘okú ne loto ke tuku ‘e Sīsū ‘a hono ongo fohá ke na tangutu ‘i hono tafa‘akí ‘i hono Pule‘angá, ko e tokotaha ‘i hono nima to‘omata‘ú pea ko e tokotaha ‘i hono to‘ohemá. Sai, ‘i he ‘ilo ‘e he kau ‘apositolo kehe ‘e toko hongofulú ‘a e me‘a na‘e ‘ai ‘e Sēmisi mo Sione ke kole ‘e he‘ena fa‘eé, ‘okú ke pehē ‘oku fēfē ‘enau ongo‘í?—

‘Io, ‘oku nau ‘ita lahi kia Sēmisi mo Sione. Ko ia, ‘oku fai ‘e Sīsū ki he‘ene kau ‘apositoló kotoa ha ngaahi akonaki lelei. ‘Oku tala ange ‘e Sīsū kia kinautolu ko e kau pule ‘o e ngaahi pule‘angá ‘oku nau sai‘ia ke hā lahi  mo mahu‘inga. ‘Oku nau loto ke ma‘u ha tu‘unga mā‘olunga ‘a ia ‘oku talangofua ange ai ‘a e tokotaha kotoa kia kinautolu. Ka ‘oku tala ange ‘e Sīsū ki hono kau muimuí ‘oku ‘ikai totonu ke nau pehē. ‘I he kehe mei aí, ‘oku pehē ‘e Sīsū: “Ko ia ‘oku ne holi ke tu‘ukimu‘a ‘iate kimoutolu te ne nofo ko ho‘omou tamaio‘eiki.” Fakakaukau atu ki ai!—Mātiu 20:20-28.

‘Okú ke ‘ilo ‘a e me‘a ‘oku fai ‘e ha tamaio‘eiki?— ‘Okú ne ngāue ki he kakai kehé, ‘o ‘ikai te ne ‘amanekina ‘a e ni‘ihi kehé ke nau ngāue ange ki ai. ‘Okú ne nofo ‘i he nofo‘anga mā‘ulalo tahá, ‘ikai ko e nofo‘anga mu‘omu‘á. ‘Okú ne ngāue ‘i he tu‘unga ko e tokotaha ia ‘oku si‘i taha hono mahu‘ingá, ‘ikai ko e mahu‘inga tahá. Pea manatu‘i, na‘e pehē ‘e Sīsū ko e tokotaha ‘oku loto ke mu‘omu‘á ‘oku totonu ke ne hangē ha tamaio‘eikí ki he ni‘ihi kehé.

Ko e hā leva ho‘o fakakaukau ki he ‘uhinga ‘o e me‘a ko iá kia kitauá?— ‘E fakakikihi nai ha tamaio‘eiki mo ‘ene ‘eikí pe ko hai te ne ma‘u ‘a e nofo‘anga lelei tahá? Pe te ne fakakikihi nai pe ko hai ‘e ‘uluaki kaí? Ko e hā ho‘o fakakaukaú?— Na‘e fakamatala ‘a Sīsū, ko ha tamaio‘eiki ‘okú ne tuku ma‘u pē ke mu‘omu‘a ‘a hono ‘eikí ‘iate ia.—Luke 17:7-10.

Ko ia, ‘i he ‘ikai feinga ke mu‘omu‘á, ko e hā ‘oku totonu ke ta faí?— ‘Io, ‘oku totonu ke ta hangē ha tamaio‘eikí ki he ni‘ihi kehé. Pea ‘oku ‘uhinga iá, ko hono fakamu‘omu‘a ‘a e ni‘ihi kehé ‘ia kitaua. ‘Oku ‘uhingá ke vakai ki he ni‘ihi kehé ‘oku nau mahu‘inga ange ‘ia kitaua. ‘E lava ke ke fakakaukau ki ha ngaahi founga ‘e lava ke ke fakamu‘omu‘a ai ‘a e ni‘ihi kehé?— Fēfē ke ke toe huke ki he peesi 40 mo e 41 pea sio angé ki he ngaahi founga ‘e ni‘ihi ‘e lava ke ke fakamu‘omu‘a ai ‘a e ni‘ihi kehé ‘aki ho‘o ngāue kia kinautolu.

Te ke manatu‘i ko e Faiako Lahí na‘á ne fakamu‘omu‘a ‘a e ni‘ihi kehé ‘iate ia ‘aki ‘ene ngāue ma‘a kinautolu. Ko e efiafi faka‘osi na‘á ne fakataha ai mo ‘ene kau ‘apositoló, na‘e a‘u ‘o ne tū‘ulutui hifo ‘o fufulu honau va‘é. Kapau foki ‘okú ta fakamu‘omu‘a ‘a e ni‘ihi kehé ‘aki ‘eta ngāue ma‘anautolu, te ta fakafiefia‘i fakatou‘osi ai ‘a e Faiako Lahí mo ‘ene Tamaí, ‘a Sihova ko e ‘Otuá.