KAPAU te ta mate, ‘e loto ‘a e ‘Otuá ke toe fokotu‘u kitaua, ‘a ia, ke toe fakafoki mai kitaua ke ta mo‘ui?— Ko e tangata lelei ko Siopé na‘á ne tui ‘oku loto ki ai ‘a e ‘Otuá. Ko ia, ‘i he taimi na‘e fakakaukau ai ‘a Siope ‘oku teu ke ne maté, na‘á ne pehē ki he ‘Otuá: “Te ke toki ui, pea te u tali atu ‘e au.” Na‘e pehē ‘e Siope ko Sihova ko e ‘Otuá te ne holi, pe fiema‘u lahi ke fokotu‘u hake ia.—Siope 14:14, 15.

‘Oku hangē tofu pē ‘a Sīsū ko ‘ene Tamaí, ‘a Sihova ko e ‘Otuá. ‘Oku loto ‘a Sīsū ke tokoni‘i kitaua. ‘I he taimi na‘e pehē ai ‘e ha tangata na‘e puke ‘i he kiliá kiate ia, “ka ne ke loto ke fai, te ke lava ke fakama‘a au,” na‘e tali ‘e Sīsū: “ ‘Oku ou loto pe.” (Faka‘ītali ‘amautolu.) Pea na‘á ne fakamo‘ui ‘a e tangata na‘e puké mei hono kiliá.—Maake 1:40-42.

Na‘e ako ‘e Sīsū mei he‘ene Tamaí ke ‘ofa ‘i he fānaú. ‘I ha me‘a ‘e ua na‘e hoko ‘i he kuohilí, na‘e ngāue‘aki ai ‘e Sihova ‘a ‘ene kau sevānití ke fokotu‘u hake ‘a e fānaú. Na‘e kole ‘a ‘Ilaisiā kia Sihova ke fokotu‘u hake ‘a e foha ‘o ha fefine ‘a ia na‘e anga-lelei kia ‘Ilaisiā. Pea na‘e fai ia ‘e Sihova. Na‘e  toe ngāue‘aki ‘e Sihova ‘a ‘ene sevāniti ko ‘Ilaisá ke fokotu‘u hake ha ki‘i tamasi‘i.—1 Tu‘i 17:17-24; 2 Tu‘i 4:32-37.

‘Ikai ko ha me‘a fakafiefia ia ke ‘ilo ‘oku ‘ofa lahi ‘aupito mai ‘a Sihova kia kitaua?— ‘Oku ‘ikai te ne fakakaukau mai pē kia kitaua ‘i he taimi ‘okú ta mo‘ui aí. ‘Okú ne toe manatu‘i kitaua kapau te ta mate. Na‘e pehē ‘e Sīsū ‘oku a‘u ‘o vakai ‘a e Tamaí ki he fa‘ahinga kuo mate ‘okú ne ‘ofa aí ‘oku nau kei mo‘ui! (Luke 20:38) ‘Oku pehē ‘e he Tohitapú ‘ ‘e ‘ikai lava ‘e he maté, pe ko e mo‘uí, pe ko ha ngaahi me‘a he lolotongá ni, pe ko ha ngaahi me‘a ka hoko mai ke ne motuhi kitaua mei he ‘ofa ‘a e ‘Otuá.’—Loma 8:38, 39.

‘I he taimi na‘e ‘i māmani ai ‘a Sīsuú, na‘á ne fakahaa‘i ‘oku tokanga mai ‘a Sihova ki he fānau īkí. Te ke manatu‘i na‘e vahe‘i ‘e Sīsū ha taimi ke talanoa ai ki he fānaú ‘o fekau‘aki mo e ‘Otuá. Ka na‘á ke ‘ilo ko e ‘Otuá na‘á ne ‘oange kia Sīsū ‘a e mālohi ke toe fakafoki mai ai ‘a e fānaú mei he maté?— Ta talanoa angé ‘o fekau‘aki mo e taimi na‘e fokotu‘u hake ai ‘e Sīsū ‘a e ‘ofefine ta‘u 12 ‘o ha tangata ko hono hingoá ko Sailosi.

‘Oku nofo ‘a Sailosi mo hono uaifí pea mo ‘ena tama pē tahá ‘o ofi ki he Tahi Kālelí. ‘I he ‘aho ‘e taha, ‘oku hoko ‘o puke lahi ‘a e ki‘i ta‘ahiné, pea ‘oku lava ke sio ‘a Sailosi te ne mate. ‘Oku kamata ke ne fakakaukau kia Sīsū, ‘a e tangata fakaofo ko ia na‘e fanongo ai ‘a Sailosi ‘oku malava ke ne fakamo‘ui ‘a e kakaí. Ko ia, ‘oku ‘alu ‘a Sailosi ‘o kumi kiate ia. ‘Okú ne ‘ilo ‘a Sīsū ‘i he matātahi ‘o e Tahi Kālelí, ‘okú ne ako‘i ha fu‘u kakai tokolahi.

‘Oku lue atu ‘a Sailosi ‘i he fu‘u kakaí ‘o ne tū‘ulutui ‘i he va‘e ‘o Sīsuú. ‘Okú ne pehē kia Sīsū: ‘Ko ‘eku ki‘i ta‘ahiné ‘oku puke lahi. Te ke kātaki ka ke ha‘u ‘o tokoni‘i ia? ‘Oku ou kole atu ke ke ha‘u.’ ‘I he taimi pē ko iá, ‘oku ‘alu ‘a Sīsū mo Sailosi. Ko e fu‘u kakai na‘a nau ha‘u ke sio ki he Faiako Lahí ‘oku nau muimui atu foki. Ka ‘i he hili ‘enau mavahe atú, ‘oku ha‘u ha kau tangata mei he fale ‘o Sailosí ‘o tala kiate ia: ‘Kuo mate ho ‘ofefiné! Ko e hā ke kei fakahoha‘asi ai ‘a e faiakó?’

‘Oku fanongo atu ‘a Sīsū ki he lea ko eni ‘a e kau tangatá.  ‘Okú ne ‘ilo ‘a e loto-mamahi lahi ko ia ‘a Sailosi ‘i he mole ‘a ‘ene tama pē ‘e tokotahá. Ko ia, ‘okú Ne tala ange kiate ia: ‘ ‘Oua ‘e manavahē. Tui pē ki he ‘Otuá, pea ‘e sai ho ‘ofefiné.’ Na‘e hoko atu pē ‘enau ‘alú kae ‘oua kuo nau a‘u ki he fale ‘o Sailosí. ‘Oku tangi heni ‘a e ngaahi kaume‘a ‘o e fāmilí. ‘Oku nau loto-mamahi he kuo mate ‘a honau ki‘i kaume‘á. Ka ‘oku tala ange ‘e Sīsū kia kinautolu: ‘ ‘Oua ‘e tangi. Kuo ‘ikai ke mate ‘a e ta‘ahiné, ka ‘okú ne mohe.’

‘I he lea‘aki ‘e Sīsū ‘a e me‘a ko ení, ‘oku kamata ke kata ‘a e kakaí, he ‘oku nau ‘ilo kuo mate ‘a e ta‘ahiné. Ko e hā leva ‘okú ke fakakaukau ai ‘oku pehē ‘e Sīsū ‘okú ne mohé?— Ko e hā ‘a e lēsoni ‘okú ke fakakaukau ‘okú ne loto ke ako‘i ki he kakaí?— ‘Okú ne loto ke nau ‘ilo‘i ko e maté ‘e lava ke hangē ia ha mohe-ma‘ú. ‘Okú ne loto ke ako‘i kinautolu, fakafou ‘i he mālohi ‘o e ‘Otuá, ‘e lava ke ne fakafoki mai ha tokotaha kuo mate ke toe mo‘ui ‘o faingofua tatau pē mo ‘eta lava ke fafangu ha taha mei he mohé.

‘Oku ‘ai ‘e Sīsū ke mavahe ‘a e tokotaha kotoa mei he falé tuku kehe pē ‘a ‘ene kau ‘apositolo ko Pita, Sēmisi mo Sioné pea mo e tamai mo e fa‘ē ‘a e ta‘ahiné. ‘Okú ne hū atu leva ki he feitu‘u ‘oku ‘i ai ‘a e ki‘i tamá. ‘Okú ne puke ‘a hono nimá ‘o ne pehē: ‘Ta‘ahine, tu‘u hake!’ Pea ‘i he  taimi pē ko iá ‘okú ne tu‘u hake ‘o kamata ke luelue! ‘Oku fiefia ‘aupito ‘a ‘ene tamaí mo ‘ene fa‘eé.—Maake 5:21-24, 35-43; Luke 8:40-42, 49-56.

Sai, fakakaukau angé ki he me‘á ni. Koe‘uhi na‘e lava ‘e Sīsū ke toe fakafoki mai ‘a e ki‘i ta‘ahine ko iá ke toe mo‘ui, ‘e lava ke ne fai ‘a e me‘a tatau ki he ni‘ihi kehé?— ‘Okú ke fakakaukau te ne fai mo‘oni ia?— ‘Io, te ne fai pehē. Na‘e pehē tonu ‘e Sīsū: “ ‘Oku ‘unu mai ha taimi, ‘a ia ‘e fanongo ai ki [hoku] le‘o ‘e he kakai kotoa pe ‘oku ‘i he ngaahi fa‘itoka, pea te nau ‘alu atu mei ai.”—Sione 5:28, 29.

‘Okú ke fakakaukau ‘oku loto ‘a Sīsū ke fokotu‘u hake ‘a e kakaí?— ‘Oku tokoni ha toe fakatātā ‘e taha ‘i he Tohitapú ke tali ‘a e fehu‘i ko iá. Ko e me‘a ‘oku hoko ‘i he ‘aho ‘e taha ‘o ofi ki he kolo ko Neiní ‘oku fakahā ai ‘a e anga ‘o e ongo‘i ‘a Sīsū ‘o fekau‘aki mo e kakai ‘oku nau mamahi ‘i he ngaahi putú.

‘Oku kau ha fefine ‘i he fakaha‘ele putu ma‘a hono fohá ‘i he mavahe ‘a e fu‘u kakaí mei Neiní. Na‘e mate ki mu‘a ‘a hono husepānití, pea ko ‘ene tama pē eni ‘e tokotahá ‘oku mate. He loto-mamahi lahi ē ka ko ia! Ko e tokolahi ‘o e kakai ‘o Neiní ‘oku nau muimui atu ‘i hono fata ki tu‘a ‘a e sino ‘o hono fohá mei he koló. ‘Oku tangi ‘a e fefiné, pea ‘oku ‘ikai ha me‘a ‘e lava ke fai ‘e he kakaí ke fakafiemālie‘i ia.

‘I he ‘aho ko ení, ‘oku ha‘u ai ‘a Sīsū mo ‘ene kau ākongá ki he kolo ko Neiní. Ofi ki he matapā ‘o e koló, ‘oku nau fetaulaki ai mo e fu‘u kakai ‘oku nau ‘alu atu ke tanu ‘a e tama ‘a e fefiné. ‘I he sio ‘a Sīsū ki he tangi ‘a e fefiné, ‘okú ne ongo‘i faka‘ofa‘ia ‘iate ia. ‘Oku maongo ki hono lotó ‘a ‘ene loto-mamahi lahí. ‘Okú ne loto ke tokoni kiate ia.

Ko ia, ‘i he fakaalaala kae mālohi ‘o ‘ai ai ‘a e fefiné ke fanongó, ‘okú ne pehē: “ ‘Oua ‘e tangi.” Ko ‘ene tō‘ongá mo ‘ene ngāué ‘okú ne ‘ai ‘a e tokotaha kotoa ke tokanga kiate ia. ‘I he laka atu ‘a Sīsū ki he sinó, kuo pau pē ‘oku fifili ‘a e tokotaha kotoa pe ko e hā te ne faí. ‘Oku lea ‘a Sīsū, ‘o ne fekau: “Tama, ‘oku ou tala atu, Ke ke tu‘u.” ‘I he taimi pē ko iá, ‘okú ne tangutu hake! Pea ‘oku kamata ke ne lea.—Luke 7:11-17.

 Fakakaukau atu ki he ongo‘i kuo pau na‘e ma‘u ‘e he fefiné! ‘E anga-fēfē ho‘o ongo‘í ‘i ho‘o talitali ha ‘ofa‘anga na‘e mate?— ‘Ikai ‘oku fakahaa‘i ‘e he me‘á ni ‘oku ‘ofa mo‘oni ‘a Sīsū ‘i he kakaí pea ‘okú ne loto ke tokoni‘i kinautolu?— Fakakaukau atu ki he me‘a fakafiefia mo‘oni ‘e hoko ‘i he māmani fo‘ou ‘a e ‘Otuá ke toe talitali lelei mai ‘a e kakaí ki he mo‘uí!—2 Pita 3:13; Fakahā 21:3, 4.

‘I he taimi ko iá, ko e ni‘ihi ‘o e fa‘ahinga ‘e toe fokotu‘u maí ko e kakai na‘á ta ‘ilo‘i ki mu‘a, kau ai ‘a e fānaú. Te ta ‘ilo kinautolu ‘o hangē pē ko e ‘ilo‘i ‘e Sailosi ‘a hono ‘ofefiné ‘i hono toe fokotu‘u hake ia ‘e Sīsuú. Ko ha ni‘ihi ai ko e kakai na‘a nau mate ‘i he ta‘u ‘e laui teau pe laui afe ki mu‘a. Ka ‘e ‘ikai ngalo kinautolu ‘i he ‘Otuá koe‘uhi pē ko ‘enau mo‘ui ‘i ha taimi fuoloa ki mu‘á.

‘Ikai ko ha me‘a fakafiefia ia ke ‘ilo ‘oku lahi pehē ‘a e ‘ofa mai ‘a Sihova ko e ‘Otuá mo hono ‘Alo ko Sīsuú kia kitauá?— ‘Okú na fiema‘u ke ta mo‘ui, ‘o ‘ikai ‘i ha ngaahi ta‘u si‘i pē, kae ta‘engata!