‘OKÚ KE sai‘ia ‘i hono fai ‘e ha taha ha me‘a lelei ma‘au?— Sai, ‘oku sai‘ia foki mo e kakai kehé ‘i hono fai ‘e ha taha ha me‘a lelei ma‘anautolu. ‘Oku tau pehē kotoa. Na‘e ‘ilo‘i ia ‘e he Faiako Lahí, pea na‘á ne fai ma‘u pē ‘a e ngaahi me‘á ma‘á e kakaí. Na‘á ne pehē: ‘Na‘e ‘ikai te u ha‘ú ke tauhia, ka ke tauhi.’—Mātiu 20:28, PM.

Ko ia, kapau ‘okú ta loto ke hangē ko e Faiako Lahí, ko e hā kuo pau ke ta faí?— Kuo pau ke ta ngāue ma‘á e ni‘ihi kehé. Kuo pau ke ta fai ‘a e ngaahi me‘a lelei ma‘a kinautolu. Ko e mo‘oni, ‘oku ‘ikai ke fai eni ‘e he kakai tokolahi. Ko hono mo‘oní, ko e tokolahi taha ‘o e kakaí ‘oku nau fiema‘u ma‘u pē ke ngāue ange ‘a e ni‘ihi kehé kia kinautolu. ‘I he taimi ‘e taha, na‘a mo e kau muimui ‘o Sīsuú na‘a nau ongo‘i pehē. Ko e tokotaha taki taha na‘á ne fiema‘u ke hoko ko e lahi tahá pe ko e tokotaha mahu‘inga tahá.

‘I he ‘aho ‘e taha, na‘e fononga fakataha ai ‘a Sīsū mo ‘ene kau ākongá, ‘a ia ko hono kau muimuí. Hili ‘enau hū ki he kolo ko Kāpaneumé, ofi ki he Tahi Kālelí, na‘a nau hū kotoa ki ha fale. Na‘e fehu‘i ai ‘e Sīsū kia kinautolu: “Ko e ha ‘a e me‘a na‘a mou fakakikihi ki ai ‘i he hala?” Na‘a nau hanganaki longo pē he ‘i he halá na‘a nau fakakikihi ai ‘ia kinautolu pe ko hai ‘oku lahí.—Maake 9:33, 34.

 Na‘e ‘ilo‘i ‘e Sīsū na‘e ‘ikai totonu ki ha taha pē ‘o ‘ene kau ākongá ke fakakaukau ko e lahi tahá ia. Hangē ko ia na‘á ta ako ‘i he ‘uluaki vahe ‘o e tohi ko ení, na‘á ne fokotu‘u ha ki‘i tama ‘i honau lotolotongá pea fakahā kia kinautolu ‘oku totonu ke nau anga-fakatōkilalo ‘o hangē ko e ki‘i tama ko iá. Ka neongo ia, na‘e te‘eki ai pē ke nau ako. Ko ia, ‘i he taimi nounou ki mu‘a pea pekiá, na‘e ako‘i ‘e Sīsū kia kinautolu ha lēsoni ‘e ‘ikai ‘aupito ngalo ‘ia kinautolu. Ko e hā na‘á ne faí?—

Sai, lolotonga ‘enau kai fakatahá kotoa, na‘e mālanga hake ‘a Sīsū mei he tēpilé ‘o ne vete ‘a hono ngaahi kofu tu‘á. ‘I hono to‘o hake ha tauveli, na‘á ne nono‘o ia ki hono kongalotó. Na‘á ne to‘o leva ha pēsoni fanofano pea ‘ai ki ai ha vai. Kuo pau pē na‘e fifili ‘a hono kau muimuí pe ko e hā te ne faí. ‘I he‘enau mamatá, na‘e takai atu ‘a Sīsū kia kinautolu kotoa, tulolo hifo, pea fufulu honau va‘é. Na‘á ne holo leva honau va‘é ‘aki ‘a e tauvelí. Fakakaukau atu ki ai! Fēfē kapau na‘á ke ‘i ai? Na‘e mei fēfē ‘a ho‘o ongo‘í?—

Na‘e ongo‘i ‘e hono kau muimuí na‘e ‘ikai totonu ki he Faiako Lahí ke ne ngāue ma‘a kinautolu ‘i he foungá ni. Na‘a nau ongo‘i mā. Ko hono mo‘oní, ko Pita na‘e ‘ai ke ‘oua te ne faka‘atā ‘a Sīsū ke ne fai ‘a e ngāue mā‘ulaló ni kiate ia. Ka na‘e pehē ‘e Sīsū ‘oku mahu‘inga kiate ia ke fakahoko ia.

‘Oku ‘ikai ke tau anga‘aki ‘a e fefufulu‘aki hotau va‘é ‘i he ‘ahó ni. Ka na‘e fai ‘a e me‘á ni ‘i he taimi na‘e ‘i māmani ai ‘a Sīsuú. ‘Okú ke ‘ilo ‘a hono ‘uhingá?— Sai, ‘i he fonua na‘e nofo ai ‘a Sīsū mo hono kau muimuí, na‘e tui ‘e he kakaí ‘i honau va‘é ‘a e senitolo na‘e ‘ikai mapuni. Ko ia, ‘i he‘enau lue ‘i he ngaahi hala kelekelé, na‘e efua honau va‘é. Ko ha anga-‘ofa ia ke fufulu ‘a e efú mei he va‘e ‘o ha taha ‘a ia na‘e ‘a‘ahi mai ki he ‘apí.

Ka ‘i he taimi ko ení, na‘e ‘ikai ha taha ‘o e kau ākonga ‘a Sīsuú na‘á ne fakahaa‘i te ne fufulu ‘a e va‘e ‘o e ni‘ihi kehé. Ko ia, na‘e fai tonu ia ‘e Sīsū. ‘I hono fai ení, na‘e ako‘i ai ‘e Sīsū ki hono kau muimuí ha lēsoni mahu‘inga. Na‘e fiema‘u ke nau ako ‘a e lēsoni ko ení. Pea ko ha lēsoni ia ‘oku fiema‘u ke ta ako he ‘ahó ni.

 ‘Okú ke ‘ilo pe ko e hā ‘a e lēsoni ko iá?— Hili hono tui ‘e Sīsū hono ngaahi kofu tu‘á pea foki ki hono nofo‘anga ‘i he tēpilé, na‘á ne pehē: ‘ ‘Oku mahino kiate kimoutolu ‘a e me‘a kuó u fai kiate kimoutolú? ‘Oku mou ui au ko e Faiako mo e ‘Eiki: pea ‘oku totonu ho‘omou lea peheé; he ko au ia. Pea kapau ā kuó u fufulu homou va‘é, ‘a au ko e ‘Eiki mo e Faiakó; pea ‘oku totonu ke fai ‘e kimoutolu foki, ‘o fefufulu‘aki homou va‘e ‘omoutolú.’—Sione 13:2-14.

Na‘e fakahaa‘i heni ‘e he Faiako Lahí na‘á ne fiema‘u ‘a hono kau muimuí ke nau fengāue‘aki. Na‘e ‘ikai te ne fiema‘u ke nau fakakaukau pē kia kinautolu. Na‘e ‘ikai te ne loto ke nau fakakaukau ‘oku nau fu‘u mahu‘inga ‘o totonu ma‘u pē ai ke ngāue ange ‘a e ni‘ihi kehé kia kinautolu. Na‘á ne fiema‘u ke nau loto-lelei ke ngāue ma‘á e ni‘ihi kehé.

‘Ikai ko ha lēsoni lelei ia?— Te ke hangē ko e Faiako Lahí ‘o ngāue ma‘á e kakai kehé?— ‘Oku tau malava kotoa ke fai ha me‘a ma‘á e ni‘ihi kehé. ‘E ‘ai ai kinautolu ‘e he me‘á ni ke nau fiefia. Kae hiliō he me‘a kotoa, ‘e ‘ai ai ‘a Sīsū mo ‘ene Tamaí ke na fiefia.

‘Oku ‘ikai faingata‘a ke ngāue ma‘á e kakai kehé. Kapau te ke vakai holo, te ke sio ai ‘i he ngaahi me‘a lahi ‘e lava ke ke fai ma‘á e ni‘ihi kehé. Fakakaukau angé he taimi ní: ‘Oku ‘i ai ha me‘a ‘e lava ke ke fai ke tokoni  ai ki ho‘o fa‘eé? ‘Okú ke ‘ilo‘i ‘oku lahi ‘a e ngaahi me‘a ‘okú ne fai ma‘au mo e toenga ‘o e fāmilí. ‘E lava ke ke tokoni kiate ia?— Fēfē ke ke ‘eke ange ki ai?

Mahalo ‘e lava ke ke seti ‘a e tēpilé ki mu‘a ke kai ‘a e fāmilí. Pe mahalo ‘e lava ke ke fakamaau ‘a e ‘ū ipu ‘ulí mei he tēpilé ‘i he ‘osi ‘a e kai ‘a e fāmilí. Ko e fānau ‘e ni‘ihi ‘oku nau ‘ave ‘a e vevé ki tu‘a ‘i he ‘aho kotoa pē. Pe ko e hā pē ‘e lava ke ke faí, te ke ngāue ai ma‘á e ni‘ihi kehé, ‘o hangē ko ia na‘e fai ‘e Sīsuú.

‘Oku ‘i ai hao fanga tokoua, tuofāfine pe fanga tuonga‘ane iiki hifo ‘e lava ke ke ngāue ma‘a kinautolu? Manatu‘i, ko Sīsū, ‘a e Faiako Lahí, na‘e a‘u ‘o ne ngāue ma‘a hono kau muimuí. ‘I ho‘o ngāue ma‘a ho‘o fanga tokoua, tuofāfine pe fanga tuonga‘ane iiki hifó, te ke fa‘ifa‘itaki ai kia Sīsū. Ko e hā ‘e lava ke ke fai ma‘anautolú?— Mahalo ‘e lava ke ke tokoni kia kinautolu ke nau ako ke tuku ‘enau me‘a-va‘ingá ki hono tuku‘angá ‘i he ‘osi ‘enau va‘ingá. Pe mahalo pē ‘e lava ke ke tokoni ki  hono fakatui honau valá. Pe mahalo ‘e lava ke ke tokoni kia kinautolu ‘i hono ngaahi honau mohengá. Te ke lava ‘o fakakaukau ki ha toe me‘a kehe ‘e lava ke ke fai ma‘a kinautolu?— ‘I ho‘o fai ‘a e ngaahi me‘a ko ení te nau ‘ofa ai ‘ia koe, ‘o hangē pē ko e ‘ofa ‘a e kau muimui ‘o Sīsuú ‘iate iá.

‘I he ‘apiakó foki ‘e lava ke ke ngāue ai ma‘á e ni‘ihi kehé. Ko ho ngaahi kaungāakó nai pe ko ho‘o faiakó. Kapau ‘oku tō ha ‘ū tohi ‘a ha taha, ko ho‘o anga-‘ofa ia kapau te ke tokoni ki ai ‘i hono to‘o hake ia ki ‘olungá. Te ke fokotu‘u atu nai ke tāmate‘i ‘a e palakipoé, pe ke fai ha me‘a kehe ma‘a ho‘o faiakó. Na‘a mo hono pukepuke ‘a e matapaá kae hū ha tahá ko ha ngāue anga-‘ofa ia.

‘I he taimi ‘e ni‘ihi, te ta ‘ilo ai ‘e ‘ikai ke fakamālō mai ‘a e kakaí ia ‘i he‘eta ngāue ange ma‘a kinautolú. ‘Okú ke fakakaukau ‘oku totonu ke ta‘ofi kitaua ‘e he me‘á ni mei he faileleí?— ‘Ikai! Ko e kakai tokolahi na‘e ‘ikai te nau fakamālō kia Sīsū ‘i he‘ene ngaahi ngāue leleí. Ka na‘e ‘ikai ke ta‘ofi ia ‘e he me‘a ko iá mei he faileleí.

Ko ia, ‘oua ‘aupito na‘a tuku ‘eta ngāue ma‘á e kakai kehé. Ta manatu‘i ‘a e Faiako Lahí, ‘a Sīsū, pea feinga ma‘u pē ke muimui ‘i he‘ene fa‘ifa‘itaki‘angá.