NA‘E tuku ‘e he ‘Otuá ‘a ‘Ātama mo ‘Ivi ‘i he ngoue ko ‘Ītení. Neongo na‘á na hoko ‘o talangata‘a peá na mate, kuo ‘ai ‘e he ‘Otuá ke malava ‘a ‘ena fānaú, kau ai kitaua he ‘aho ní, ke mo‘ui ta‘engata ‘i he Palataisí. ‘Oku palōmesi ‘a e Tohitapú: “Ko ha‘a fai totonu te nau ma‘u ‘a e fonua [“māmaní,” NW], pea te nau nofo ai ‘o tuputupu‘a.”—Sāme 37:29.

‘Oku fakamatala ‘a e Tohitapú ‘o fekau‘aki mo ha “ngaahi langi fo‘ou” pea “mo ha māmani fo‘ou.” (Aisea 65:17, NW; 2 Pita 3:13, NW) Ko e “ngaahi langi” lolotongá ‘oku fa‘u‘aki ia ‘a e ngaahi pule‘anga fakaetangata he ‘aho ní, ka ko Sīsū Kalaisi mo e fa‘ahinga ‘oku pule fakataha mo ia ‘i hēvaní ‘e fa‘u‘aki kinautolu ‘a e “ngaahi langi fo‘ou.” He me‘a lelei mo‘oni ē ko e taimi ‘e pule‘i ai ‘e he ngaahi langi fo‘ou ko ení, ‘a ia ko e pule‘anga mā‘oni‘oni melino ‘a e ‘Otuá, ‘a e fo‘i māmaní kotoa!

Ko e hā leva ‘a e “māmani fo‘ou” ia?— Ko e māmani fo‘oú ko e kakai lelei ia ‘oku nau ‘ofa kia Sihova. ‘Oku fiema‘u ke ke mahino‘i, ‘i he taimi ‘oku lea ai ‘a e Tohitapú ‘o kau ki he “mamani,” ‘oku ‘uhinga ia ‘i he taimi ‘e ni‘ihi ki he kakai ‘oku nofo ‘i he fo‘i māmaní, kae ‘ikai ko e fonuá tonu. (Senesi 11:1, PM; Sāme 66:4; 96:1) Ko ia, ko e kakai ‘oku fa‘u‘aki ‘a e māmani fo‘oú te nau mo‘ui ‘i heni tonu ‘i he fo‘i māmani ko ení.

Ko e māmani lolotonga ‘o e kakai koví ‘e ‘ikai ke nau toe ‘i ai. Manatu‘i, ko e Lōmaki ‘o e ‘aho ‘o Noá na‘á ne to‘o atu ha māmani ‘o e kakai koví. Pea hangē ko ia kuó ta akó, ko e māmani kovi ko eni he taimi ní ‘e faka‘auha ia ‘i ‘Āmaketone. Ta sio leva he taimí ni pe ‘e anga-fēfē ‘a e mo‘ui ‘i he māmani fo‘ou ‘a e ‘Otuá ‘i he hili ‘a ‘Āmaketoné.

 ‘Okú ke fiema‘u ke ke mo‘ui ta‘engata ‘i he Palataisi ‘i he māmani fo‘ou melino ‘a e ‘Otuá?— ‘Oku ‘ikai ha toketā ‘e lava ke ne ‘ai kitaua ke ta mo‘ui ta‘engata. ‘Oku ‘ikai ha fo‘i‘akau te ne ta‘ofi kitaua mei he maté. Ko e founga pē ‘e taha ‘e lava ke ta mo‘ui ta‘engata aí ko e ‘unu‘unu ofi ki he ‘Otuá. Pea ‘oku tala mai ‘e he Faiako Lahí kia kitaua ‘a e founga ke fai ai ‘a e me‘a ko iá.

To‘o mai ‘eta Tohitapú pea fakaava ia ki he Sione vahe 17, veesi 3. ‘Okú ta ma‘u ai heni ‘a e ngaahi lea ko eni ‘a e Faiako Lahí: “Ko eni ia ‘a e mo‘ui ta‘engata, ke nau fai ke ‘ilo koe ko e Otua mo‘onia pe taha, pea mo Sisu ne ke fekau mai ko e Misaia.”

Ko ia, ko e hā ‘a e me‘a na‘e pehē ‘e Sīsū ‘oku fiema‘u ke ta fai ke ma‘u ai ‘a e mo‘ui ta‘engatá?— ‘Uluakí, kuo pau ke ta ‘ilo‘i ‘eta Tamai fakahēvani ko Sihová, pea pehē ki hono ‘Aló, ‘a ia na‘á ne foaki ‘a ‘ene mo‘uí ma‘ataua. ‘Oku ‘uhinga ení ‘oku fiema‘u ke ta ako ‘a e Tohitapú. Ko e tohí ni, ‘a e Ako mei he Faiako Lahí, ‘okú ne tokoni‘i kitaua ke ta fai ‘a e me‘a ko iá.

Ka ‘e lava fēfē ke tokoni‘i kitaua ‘e he ako fekau‘aki mo Sihová ke ta mo‘ui ta‘engata?— Sai, hangē pē ko ‘eta fiema‘u ha me‘akai ‘i he ‘aho kotoa pē, ‘oku fiema‘u ke ta ako ‘o fekau‘aki mo Sihova ‘i he ‘aho kotoa pē. ‘Oku pehē ‘e he Tohitapú: ‘Oku ikai mo‘ui ‘a e tangatá ‘i he maá pe, ka ‘i he ngāhi lea kotoa pe ‘oku ‘alu atu mei he ngutu ‘o e ‘Otuá.’—Mātiu 4:4.

‘Oku toe fiema‘u ke ta ‘ilo‘i ‘a Sīsū Kalaisi koe‘uhí he na‘e fekau hifo ‘e he ‘Otuá ‘a hono ‘Aló ke ne to‘o ‘eta angahalá. ‘Oku pehē ‘e he Tohitapú: “ ‘Oku ‘ikai ke tu‘u ‘i ha taha kehe ‘a e fakamo‘ui.” Pea ‘oku toe pehē ‘e he Tohitapú: “Ko ia ‘oku ne tui pikitai ki he ‘Alo ‘oku ne ma‘u ‘a e mo‘ui ta‘engata.” (Ngāue 4:12; Sione 3:36) Sai, ko e hā ‘a e ‘uhinga ‘o e pehē ke “tui” kia Sīsuú?— ‘Oku ‘uhinga iá ‘okú ta tui mo‘oni kia Sīsū pea ‘ilo‘i ‘e ‘ikai lava ke ta mo‘ui ta‘engata ‘o ta‘ekau ai ia. ‘Okú ta tui ki he me‘a ko iá?— Kapau ko ia, te ta hokohoko atu ke ako mei he Faiako Lahí ‘i he ‘aho kotoa pē, pea te ta fai ‘a e me‘a ‘okú ne tala maí.

 Ko e founga lelei ‘e taha ke ako ai mei he Faiako Lahí ko e toutou lau ‘a e tohí ni pea sio mo fakakaukau ki he kotoa ‘o e ngaahi fakatātaá. Sio pe ‘e lava ke ke tali ‘a e ngaahi fehu‘i ‘oku ‘asi ‘i he ‘ū fakatātā ko ení. Pehē foki, lau ‘a e tohí mo ho‘o fa‘eé pe tamaí. Kapau ‘oku ‘ikai ke faingamālie ‘a ho‘o ongo mātu‘á, lau fakataha ia mo e kakai lalahi kehé pea mo e fānau kehé. ‘Ikai ko ha me‘a lelei ia kapau ‘e lava ke ke tokoni‘i ‘a e ni‘ihi kehé ke nau ako mei he Faiako Lahí ‘a e me‘a ‘oku fiema‘u ke nau fai ke mo‘ui ta‘engata ai ‘i he māmani fo‘ou ‘a e ‘Otuá?—

‘Oku tala mai kia kitaua ‘e he Tohitapú: “ ‘Oku faka‘a‘au ke mole ‘a mamani.” Ka neongo ia ‘oku fakamatala‘i ‘e he Tohitapú ‘a e founga ‘e malava ke ta mo‘ui ta‘engata ai ‘i he māmani fo‘ou ‘a e ‘Otuá. ‘Oku pehē ai: “Ko ia ‘oku ne fai ‘a e finangalo ‘o e ‘Otua, ‘oku ne nofo ma‘u ‘o ta‘engata.” (1 Sione 2:17) Ko ia ‘e lava fēfē ke ta mo‘ui ta‘engata ‘i he māmani fo‘ou ‘a e ‘Otuá?— ‘Io, ‘aki ‘a e hoko ‘o ‘ilo‘i ‘a Sihova mo hono ‘Alo ‘ofeina ko Sīsuú. Ka kuo pau foki ke ta fai, pe ngāue‘aki ‘a e me‘a ‘okú ta akó. ‘Ofa ke tokoni‘i koe ‘e ho‘o ako ‘a e tohí ni ke ke fai ‘a e ngaahi me‘á ni.