‘OKU pehē ‘e he kakai ‘e ni‘ihi ‘oku nau tui pē ki he me‘a ‘oku malava ke nau sio ki aí. Ka ‘oku fakavalevale ia. ‘Oku lahi ‘aupito ‘a e ngaahi me‘a mo‘oni kuo te‘eki ‘aupito te ta mamata ai ‘aki hota matá. ‘E lava ke ke tala mai ha taha?—

Fēfē ‘a e ‘ea ‘okú ta mānava‘akí? ‘Oku malava ke ta ongo‘i ia?— Puke hake ho nimá, peá ke puhi‘i ia. Na‘á ke ongo‘i ha me‘a?— Na‘á ke ongo‘i, ka ‘oku ‘ikai lava ke ke sio ki he ‘eá, ‘ikai ko ia?—

Na‘á ta ‘osi talanoa ‘o fekau‘aki mo e fa‘ahinga laumālié, ‘a ia ‘oku ‘ikai lava ke ta sio ki aí. Na‘á ta ako ai ‘oku lelei ‘a e ni‘ihi kae kovi ‘a e ni‘ihi. Tala mai angé ha kau laumālie lelei ‘e ni‘ihi ‘oku ‘ikai lava ke ta sio ki ai.— ‘Io, ko Sihova ko e ‘Otuá, ko Sīsū mo e kau ‘āngelo leleí. ‘Oku ‘i ai mo ha kau ‘āngelo kovi?— ‘Oku pehē ‘e he Tohitapú ‘oku ‘i ai. Tala mai angé ‘a e me‘a kuó ke ako ‘o fekau‘aki mo kinautolú.—

Ko e me‘a ‘e taha ‘okú ta ‘iló, ‘oku mālohi fakatou‘osi ange ‘a e kau ‘āngelo leleí mo e kau ‘āngelo koví ‘ia kitaua. Ko e Faiako Lahí na‘á ne ‘ilo lahi ‘o fekau‘aki mo e kau ‘āngeló. Na‘e peheé koe‘uhí he na‘á ne hoko ko e ‘āngelo ki mu‘a ke fā‘ele‘i mai ia ko ha pēpē ‘i he māmaní. Na‘á ne nofo mo ha kau ‘āngelo kehe ‘i hēvani. Na‘á ne ‘ilo ‘a e laui miliona ‘o kinautolu. ‘Oku ‘i ai ha hingoa ‘o e kau ‘āngelo kotoa ko ení?—

Sai, na‘á ta ako ki hono fakahingoa ‘e he ‘Otuá ‘a e ngaahi fetu‘ú. Ko ia, ‘oku lava ke ta fakapapau‘i ko e kau ‘āngeló kotoa ‘oku ‘i ai foki mo honau hingoa. Pea ‘okú ta ‘ilo ‘oku malava ke nau fetalanoa‘aki koe‘uhí he ‘oku lau ‘a e Tohitapú ‘o fekau‘aki mo e ‘lea ‘a e kau ‘āngeló.’ (1 Kolinito 13:1) Ko e hā ‘okú ke fakakaukau ‘oku talanoa ki ai ‘a e kau ‘āngeló? ‘Oku nau talanoa ‘o fekau‘aki mo kitaua ko eni ‘i he māmaní?—

‘Okú ta ‘ilo ko e kau ‘āngelo ‘a Sētané, ‘a e kau tēmenioó, ‘oku nau feinga ke ‘ai kitaua ke ta talangata‘a kia Sihova. Ko ia, kuo pau pē ‘oku nau  talanoa ‘o fekau‘aki mo e founga ‘e malava ke nau fai ai ení. ‘Oku nau loto ke ta hangē ko kinautolú ke ‘oua na‘a sai‘ia ‘a Sihova ‘ia kitaua foki. Kae fēfē ‘a e kau ‘āngelo faitōnunga ‘a e ‘Otuá? ‘Okú ke fakakaukau ‘oku nau talanoa mo kinautolu ‘o kau kia kitaua?— ‘Io, ‘oku nau fai pehē. ‘Oku nau loto ke tokoni‘i kitaua. Te u talanoa atu ‘a e founga na‘e tokoni‘i ai ‘e he ni‘ihi ‘o e kau ‘āngelo ‘a e ‘Otuá ‘a e kakai na‘a nau ‘ofa kia Sihova mo tauhi iá.

Ko e fakatātaá, na‘e ‘i ai ‘a e tangata ko hono hingoá ko Taniela ‘a ia na‘e nofo ‘i Pāpilone. Ko e kakai tokolahi ‘i aí na‘e ‘ikai te nau ‘ofa kia Sihova. Na‘e a‘u ‘o ‘ai ‘e he kakaí ‘a e lao ‘a ia ‘e tautea ai ha taha pē na‘e lotu kia Sihova ko e ‘Otuá. Ka ko Taniela, na‘e ‘ikai ke tuku ‘a ‘ene lotu kia Sihová. ‘Okú ke ‘ilo ‘a e me‘a na‘a nau fai kia Tanielá?—

‘Io, na‘e ‘ai ‘e he kakai koví ‘a Taniela ke lī ia ki ha ‘ana ‘o e fanga laioné. Na‘e ‘i ai tokotaha pē ‘a Taniela mo ha fanga laione fiekaia. ‘Okú ke ‘ilo ‘a e me‘a na‘e hoko aí?— “Kuo fekau ‘e [he] ‘Otua ‘ene angelo, pea kuo ne tapuni ‘a e ngutu ‘o e  fanga laione,” ko e lea ia ‘a Tanielá. Na‘e ‘ikai ‘aupito ha‘ane momo‘i lavea! ‘Oku malava ke fai ‘e he kau ‘āngeló ‘a e ngaahi me‘a fakaofo ma‘á e fa‘ahinga ‘oku tauhi kia Sihová.—Taniela 6:19-23 (Tan. 6:18-22, PM).

Pehē foki, na‘e ‘i ai ‘a e taimi na‘e ‘i pilīsone ai ‘a Pita. Te ke manatu‘i nai ko Pitá ko e kaungāme‘a ia ‘o e Faiako Lahí, ‘a Sīsū Kalaisi. Na‘e ‘ikai ke sai‘ia ‘a e kakai ‘e ni‘ihi ‘i hono tala ange ‘e Pita kia kinautolu ko Sīsuú ko e ‘Alo ia ‘o e ‘Otuá. Ko ia, na‘a nau tuku pilīsone ai ‘a Pita. Na‘e le‘ohi ‘e he kau sōtiá ‘a Pita ke fakapapau‘i na‘e ‘ikai te ne hola. Na‘e ‘i ai ha taha te ne lava ke tokoni‘i ia?—

Na‘e mohe ‘a Pita ‘i he vaha‘a ‘o ha ongo le‘o ‘e toko ua, pea na‘e ha‘i sēini ‘a hono ongo nimá. Ka ‘oku pehē ‘e he Tohitapú: ‘ ‘Iloange na‘e ha‘u ha ‘āngelo ‘a Sihova, pea na‘e kamata ke malama mai ha maama ‘i he  lokí. ‘I he ala ki he vakavaka ‘o Pitá, na‘e fafangu ia ‘e he ‘āngeló, ‘o ne pehē, Tu‘u ke vave.’

‘I he me‘a ko iá, na‘e homo ‘a e ongo sēini ‘o Pitá mei hono nimá! Pea na‘e pehē ‘e he ‘āngeló kiate ia: ‘ ‘Ai ho valá, fakama‘u ho senitoló pea muimui kiate au.’ Na‘e ‘ikai lava ‘e he ongo le‘ó ke ta‘ofi kinaua he na‘e tokoni‘i ‘e he ‘āngeló ‘a Pita. Na‘á na a‘u mai leva ki ha ‘ā ukamea, pea na‘e hoko ai ha me‘a ngalikehe. Na‘e ava pē ‘a e ‘aá ‘iate ia pē! Ko e ‘āngelo ko iá, na‘á ne tukuange ‘a Pita koe‘uhi ke malava ‘o hokohoko atu ‘a ‘ene malangá.—Ngāue 12:3-11.

‘E lava ‘e he kau ‘āngelo ‘a e ‘Otuá ke toe tokoni‘i mo kitaua?— ‘Io, ‘oku nau malava. ‘Oku ‘uhinga ení ‘e ‘ikai ‘aupito te nau tuku kitaua ke ta lavea?— ‘Ikai, ‘oku ‘ikai ta‘ofi ‘e he kau ‘āngeló kitaua mei ha‘ata lavea ‘o kapau ‘okú ta fai ha ngaahi me‘a fakavalevale. Ka neongo kapau ‘oku ‘ikai te ta fai ha ngaahi me‘a fakavalevale, te ta kei lavea pē nai. ‘Oku ‘ikai tala ki he kau ‘āngeló ke nau ta‘ofi eni mei ha‘ane hoko. ‘I hono kehé, kuo ‘oange ‘e he ‘Otuá kia kinautolu ‘a e ngāue makehe ke nau fai.

‘Oku fakamatala ‘a e Tohitapú ‘o kau ki ha ‘āngelo ‘okú ne tala ki he kakai ‘i he feitu‘u kotoa pē ke lotu ki he ‘Otuá. (Fakahā 14:6, 7) ‘Oku anga-fēfē hono tala ‘e he ‘āngeló kia kinautolu ‘a e me‘a ko iá? ‘Okú ne kaila hifo mei hēvani koe‘uhi ke lava ‘a e tokotaha kotoa ‘o fanongo kiate ia?— ‘Ikai, ‘i hono kehé, ko e kau muimui ‘o Sīsū ‘i he māmaní ‘oku nau talanoa ki he ni‘ihi kehé ‘o fekau‘aki mo e ‘Otuá, pea ‘oku tataki ‘e he kau ‘āngeló kinautolu ‘i he‘enau ngāué. ‘Oku fakapapau‘i ‘e he kau ‘āngeló, ko e fa‘ahinga ko ia ‘oku nau fiema‘u mo‘oni ke ‘ilo fekau‘aki mo e ‘Otuá ‘oku ‘i ai ha faingamālie ke nau fanongo. ‘Oku malava ke ta kau ‘i he ngāue fakamalanga ko iá, pea ‘e tokoni‘i kitaua ‘e he kau ‘āngeló.

Kae fēfē kapau ko e kakai ‘oku ‘ikai te nau ‘ofa ki he ‘Otuá ‘oku nau fakatupu palopalema kia kitaua? Fēfē kapau te nau tuku pilīsone kitaua? ‘E tukuange kitaua ‘e he kau ‘āngeló?— ‘Oku nau malava ia. Ka ‘oku ‘ikai ma‘u pē ko e me‘a ia ‘oku nau faí.

Ko e tokotaha muimui ‘o Sīsū ko Paulá na‘e ‘i ai ha taimi na‘á ne hoko ai ko ha pōpula. Na‘á ne folau ‘i ha vaka lolotonga ia ha fu‘u matangi kovi. Ka na‘e ‘ikai ke tukuange ia ‘e he kau ‘āngeló ‘i he taimi pē ko iá. Na‘e hoko  ení koe‘uhí he na‘e ‘i ai ‘a e kakai kehe na‘e fiema‘u ke nau fanongo ‘o fekau‘aki mo e ‘Otuá. Na‘e pehē ‘e ha ‘āngelo: “ ‘E Paula, ‘oua te ke manavahē; kuo pau te ke tu‘u ‘i he ‘ao ‘o Sisa.” ‘Io, na‘e pau ke ‘ave ‘a Paula ki he pule fakaemāmani ko Sisá koe‘uhí ke malava ai kia Paula ke ne malanga kiate ia. Na‘e ‘ilo‘i ma‘u pē ‘e he kau ‘āngeló ‘a e feitu‘u na‘e ‘i ai ‘a Paulá, pea na‘a nau tokoni‘i ia. Te nau tokoni‘i foki mo kitaua kapau ‘okú ta tauhi mo‘oni ‘a e ‘Otuá.—Ngāue 27:23-25.

‘Oku toe ‘i ai ‘a e ngāue mahu‘inga ‘e taha ‘e fai ‘e he kau ‘āngeló, pea ‘e vavé ni ke nau fai ia. Ko e taimi ‘a e ‘Otuá ke faka‘auha ‘a e kakai fulikivanú ‘oku ofi ‘aupito. Ko e fa‘ahinga kotoa ‘oku ‘ikai te nau lotu ki he ‘Otua mo‘oní ‘e faka‘auha ia. Ko e fa‘ahinga ko ia ‘oku nau pehē ‘oku ‘ikai te nau tui ‘oku ‘i ai ha kau ‘āngelo koe‘uhí ko e ‘ikai malava ke nau sio ki aí te nau toki ‘ilo‘i ai ‘enau fehālaakí.—2 Tesalonaika 1:6-8.

Ko e hā ‘ene ‘uhinga ia kia kitauá?— Kapau ‘okú ta kau ‘i he tafa‘aki ‘a e kau ‘āngelo ‘a e ‘Otuá, te nau tokoni‘i kitaua. Ka ‘okú ta ‘i he‘enau tafa‘akí?— ‘Okú ta ‘i ai, kapau ‘okú ta tauhi ‘a Sihova. Pea kapau ‘okú ta tauhi ‘a Sihova, te ta tala ki he kakai kehé ke nau tauhi foki kiate ia.