KO E ngaahi kaume‘á ko e kakai ia ‘okú ta sai‘ia ke talanoa ki ai mo fakamoleki fakataha ‘a e taimí mo kinautolu. Ka ‘oku mahu‘inga ke ma‘u ‘a e fa‘ahinga kaume‘a totonú. Ko hai ‘okú ke fakakaukau ko e kaume‘a lelei taha ia ‘e lava ke ta ma‘ú?— ‘Io, ko Sihova ko e ‘Otuá.

‘E lava ke ta hoko mo‘oni ko ha kaume‘a ‘o e ‘Otuá?— Sai, ‘oku pehē ‘e he Tohitapú na‘e hoko ‘a ‘Ēpalahame, ko ha tangata na‘e mo‘ui fuoloa ki mu‘a, ko e “kaume‘a ‘o Sihova.” (Semisi 2:23, NW) ‘Okú ke ‘ilo ‘a e ‘uhinga na‘á ne hoko ai ko e kaume‘a ‘o Sihová?— ‘Oku tali mai ‘e he Tohitapú, ko ‘Ēpalahamé na‘e talangofua ki he ‘Otuá. Na‘á ne talangofua neongo na‘e faingata‘a ‘a e me‘a na‘e kole kiate ia ke ne faí. Ko ia, ke hoko ko e kaume‘a ‘o Sihová, kuo pau ke ta fai ‘a e me‘a ‘okú ne lelei‘ia aí, hangē pē ko e me‘a na‘e fai ‘e ‘Ēpalahamé pea hangē ko e me‘a na‘e fai ma‘u pē ‘e he Faiako Lahí.—Senesi 22:1-14; Sione 8:28, 29; Hepelu 11:8, 17-19.

 Na‘e tala ange ‘e Sīsū ki he‘ene kau ‘apositoló: “Ko hoku ngaahi kaume‘a ‘akimoutolu ‘o kapau ‘oku mou fai ‘a e ngaahi me‘a ‘oku ou tu‘utu‘uni atu.” (Faka‘ītali ‘amautolu; Sione 15:14) Koe‘uhi ko e ngaahi me‘a kotoa pē na‘e tala ‘e Sīsū ki he kakaí na‘e ha‘u meia Sihova, na‘e pehē ‘e Sīsuú ko hono ngaahi kaume‘á ‘a e kakai na‘a nau fai ‘a e me‘a na‘e pehē ‘e he ‘Otuá ‘oku totonu ke nau faí. ‘Io, na‘e ‘ofa kotoa hono ngaahi kaume‘á ki he ‘Otuá.

Ko e ni‘ihi ‘o e ngaahi kaume‘a ofi taha ‘o e Faiako Lahí ko ‘ene kau ‘apositoló, ‘a ia ko honau fakatātaá ‘oku lava ke ke sio ki ai ‘i he peesi 75 ‘o e tohí ni. Na‘a nau fononga fakataha mo ia mo tokoni kiate ia ke fakahoko ‘a e ngāue fakamalangá. Na‘e fakamoleki lahi ‘e Sīsū ‘a hono taimí mo e kau tangatá ni. Na‘a nau kai fakataha. Na‘a nau talanoa fakataha ‘o kau ki he ‘Otuá. Pea na‘a nau fai fakataha mo e ngaahi me‘a kehe. Ka na‘e ‘i ai ‘a e ngaahi kaume‘a tokolahi kehe ‘o Sīsū. Na‘á ne fa‘a nofo mo kinautolu, pea na‘a nau feohi fiefia fakataha.

Ko e ki‘i fāmili ‘e taha na‘e sai‘ia ‘a Sīsū ke nofo aí na‘a nau nofo ‘i he ki‘i kolo ko Pētani, ‘i tu‘a pē ‘i he kolo lahi ko Selusalemá. ‘Okú ke manatu‘i kinautolu?— Ko Mele mo Mā‘ata mo hona tuonga‘ane ko Lāsalosí.  Na‘e ui ‘e Sīsū ‘a Lāsalosi ko hono kaume‘a. (Sione 11:1, 5, 11) Ko e ‘uhinga na‘e ‘ofa ai ‘a Sīsū ‘i he ki‘i fāmili ko ení mo fiefia ‘i he nofo fakataha mo kinautolú koe‘uhí he na‘a nau ‘ofa kia Sihova mo tauhi Ia.

‘Oku ‘ikai ke ‘uhinga ení na‘e ‘ikai ke anga-lelei ‘a Sīsū ia ki he kakai na‘e ‘ikai te nau tauhi ‘a e ‘Otuá. Na‘á ne anga-lelei foki kia kinautolu. Na‘e a‘u ‘o ne ‘alu ki honau ngaahi ‘apí ‘o ne kai fakataha mo kinautolu. Na‘e fakatupunga ‘e he me‘á ni ha ni‘ihi ke nau pehē ko Sīsuú ko ha ‘kaume‘a ‘o e kau tānaki tukuhaú mo e kau angahalá.’ (Mātiu 11:19) Ko hono mo‘oní, na‘e ‘ikai ke ‘alu ‘a Sīsū ia ki he ngaahi ‘api ‘o e kakaí ni koe‘uhi ko ‘ene sai‘ia ‘i he‘enau founga mo‘uí. Na‘á ne ‘a‘ahi kia kinautolú koe‘uhi ke ne lava ai ‘o talanoa kia kinautolu ‘o fekau‘aki mo Sihova. Na‘á ne feinga ke tokoni‘i kinautolu ke nau liliu mei he‘enau ngaahi founga koví pea tauhi ki he ‘Otuá.

Na‘e hoko ‘a e me‘a ko ení ‘i he ‘aho ‘e taha ‘i he kolo ko Sielikoó. Na‘e fou atu ‘a Sīsū ai ‘i he‘ene fononga ki Selusalemá. Na‘e ‘i ai ha fu‘u kakai, pea na‘e ‘i he fu‘u kakaí ha tangata ko hono hingoá ko Sākeasi. Na‘á ne fiema‘u ke ne sio kia Sīsū. Ka ko Sākeasí na‘e nounou, pea na‘e ‘ikai lava ke ne sio koe‘uhi ko e fu‘u kakaí. Ko ia, na‘á ne lele mu‘omu‘a ‘i he halá ‘o ne kaka ‘i ha fu‘u ‘akau koe‘uhi ke ne sio lelei ai ki he ‘alu hifo ‘a Sīsuú.

‘I he taimi na‘e a‘u mai ai ‘a Sīsū ki he fu‘u ‘akau ko iá, na‘á ne hanga hake ‘o ne pehē:  ‘ ‘Alu hifo ke vave, he ko e ‘ahó ni te u ‘alu atu ki ho falé.’ Ka ko Sākeasí ko ha tangata koloa‘ia ia na‘á ne fai ‘a e ngaahi me‘a na‘e kovi. Ko e hā na‘e fiema‘u ai ‘e Sīsū ke ‘alu ki he fale ‘o ha tangata peheé?—

Na‘e ‘ikai koe‘uhi na‘e sai‘ia ‘a Sīsū ‘i he founga mo‘ui ‘a e tangata ko iá. Na‘á ne ‘alu ki aí ke talanoa kia Sākeasi ‘o fekau‘aki mo e ‘Otuá. Na‘á ne sio ki he feinga mālohi ‘a e tangata ko iá ke sio kiate iá. Ko ia, na‘á ne ‘ilo ‘e fanongo nai ‘a Sākeasi. Ko ha taimi lelei eni ke talanoa ai kiate ia ‘o fekau‘aki mo e founga ‘oku pehē ‘e he ‘Otuá ‘oku totonu ke mo‘ui ai ‘a e kakaí.

Ko ia, ko e hā ‘okú ta sio ‘oku hoko he taimi ní?— ‘Oku sai‘ia ‘a Sākeasi ‘i he ngaahi akonaki ‘a Sīsuú. ‘Okú ne ongo‘i loto-mamahi ‘aupito ‘i he‘ene kākaa‘i ‘a e kakaí, pea ‘okú ne palōmesi te ne fakafoki ‘a e pa‘anga na‘e ‘ikai ha‘ane totonu ke to‘ó. Hili iá, ‘okú ne hoko leva ko ha muimui ‘o Sīsū. Ko e toki taimi ia ‘oku hoko ai ‘a Sīsū mo Sākeasi ko e ongo kaume‘á.—Luke 19:1-10.

Kapau te ta ako mei he Faiako Lahí, te ta ‘a‘ahi nai ki he kakai ‘oku ‘ikai ko hota ngaahi kaume‘á?— ‘Io. Ka ‘e ‘ikai te ta ‘alu ki honau falé koe‘uhi ko ‘eta sai‘ia ‘i he‘enau founga mo‘uí. Pea ‘e ‘ikai te ta fai fakataha mo kinautolu ‘a e ngaahi me‘a ‘oku halá. Te ta ‘a‘ahi kia kinautolú  koe‘uhi ke ta lava ai ‘o talanoa kia kinautolu ‘o fekau‘aki mo e ‘Otuá.

Ka ko hota ngaahi kaungāme‘a ofí ko e fa‘ahinga ia ‘oku tautefito ki ai ‘eta sai‘ia ke fakamoleki fakataha ‘a e taimí mo kinautolú. Ke hoko ko e fa‘ahinga kaume‘a totonú, kuo pau ke nau hoko ko e fa‘ahinga ‘oku sai‘ia ai ‘a e ‘Otuá. ‘Oku a‘u ‘o ‘ikai ‘ilo‘i nai ‘e he ni‘ihi ko hai ‘a Sihova. Ka ‘o kapau ‘oku nau loto ke ‘ilo ‘o fekau‘aki mo ia, ‘e lava ke ta tokoni kia kinautolu. Pea ‘i he a‘u ki he taimi ‘oku nau ‘ofa ai kia Sihova ‘o hangē ko kitauá, ‘e lava leva ke ta hoko ko honau kaungāme‘a ofi.

‘Oku toe ‘i ai ‘a e founga ‘e taha ke ‘ilo ai pe ‘e hoko ha taha ko ha kaume‘a lelei. Siofi ‘a e ngaahi me‘a ‘okú ne faí. ‘Okú ne fai ha ngaahi me‘a ta‘e‘ofa ki he kakai kehé pea kata‘i leva ia? ‘Oku ‘ikai ke tonu ia, ‘ikai ko ia?— ‘Okú ne tō ma‘u pē ki ha faingata‘a? ‘E ‘ikai te ta fiema‘u ke ta tō fakataha mo ia ki ha faingata‘a, ‘ikai ko ia?— Pe ‘okú ne fai ‘ilo pau pē ‘a e ngaahi me‘a ‘oku koví peá ne fakakaukau leva ‘okú ne poto koe‘uhi ko e ‘ikai ke ma‘u iá? Neongo kapau na‘e ‘ikai ke ma‘u ‘a e tokotaha ko iá, na‘e sio hifo ‘a e ‘Otuá ki he me‘a na‘á ne faí, ‘ikai ko ia?— ‘Okú ke fakakaukau ko e kakai ‘oku nau fai ‘a e ngaahi me‘a peheé te nau hoko ko hota ngaahi kaume‘a lelei?—

Fēfē ke ke to‘o mai ‘a ho‘o Tohitapú? Ta sio angé ki he me‘a ‘oku lea‘aki ai ‘o fekau‘aki mo e anga ‘o hono uesia ‘e hota ngaahi kaume‘á ‘a ‘eta mo‘uí. Ko e konga Tohitapú ko e Palovepi vahe 13, veesi 20. ‘Okú ke ma‘u ia?— ‘Oku pehē ai: “Ko ia ‘oku fafale ki he kau poto, te ne hoko ko e poto: ka ko ia ‘oku kaume‘a mo e sesele ‘e hoko ko e lusa.” ‘Oku ‘uhinga ení kapau te ta feohi mo e kakai seselé pe koví, te ta hoko nai ai ‘o kovi. Pea ‘oku toe mo‘oni foki ko e ngaahi kaume‘a lelei mo potó ‘okú ne tokoni‘i kitaua ke ta fakatupu ‘a e ngaahi ‘ulungaanga leleí.

‘Oua ‘aupito na‘a ngalo ‘ia kitaua ko Sihova ‘a e Tokotaha mahu‘inga taha ‘i he‘eta mo‘uí. ‘Oku ‘ikai te ta loto ke maumau‘i ‘a ‘eta kaume‘a mo iá, ‘ikai ko ia?— Ko ia, kuo pau ke ta tokanga ke kaume‘a mo e fa‘ahinga pē ‘oku ‘ofa ki he ‘Otuá.