‘I HO‘O lau nusipepá, sio televīsoné, pe fanongo letioó, ‘okú ke sio ai mo fanongo ki he ngaahi talanoa lahi fekau‘aki mo e faihiá, taú, mo e tautoitoí. Mahalo pē ‘okú ke faingata‘a‘ia koe‘uhi ko ha puke pe ko e mate ha taha ‘okú ke ‘ofa ai.

‘Eke hifo kiate koe:

• Ko e me‘a eni ‘oku fiema‘u ‘e he ‘Otuá ke hoko kiate au mo hoku fāmilí?

• ‘E lava ke u ma‘u mei fē ha tokoni ke fekuki ai mo ‘eku ngaahi palopalemá?

• ‘E ‘i ai koā ha melino mo‘oni?

‘Oku ‘omai ‘e he Tohi Tapú ‘a e tali fakatupu tuipau ki he ngaahi fehu‘i ko iá.

• ‘E ‘ikai ke kei ongo‘i ‘e he kakaí ha langa, tupu ‘o motu‘a, pe mate.​—Fakahā 21:4

• “‘E hopo ‘a e heké ‘o hangē ko e tiá.”​—‘Aisea 35:6

• “‘E ‘ā ‘a e mata ‘o e kuí.”​—‘Aisea 35:5

•  ‘E toe fakamo‘ui ‘a e kau maté.​—Sione 5:28, 29

• ‘E ‘ikai ha taha ‘e puke.​—‘Aisea 33:24

• Ko e tokotaha kotoa ‘i he māmaní te nau ma‘u ‘a e me‘akai lahi fau ke kai.​—Saame 72:16

‘E faingofua ke fakakaukau ko e me‘a kuó ke lau ‘i he ‘uluaki ngaahi peesi ‘o e tohí ni ko ha misi pē ia. Ka kuo tala‘ofa ‘a e ‘Otuá ‘oku vavé ni ‘aupito ke ne fai ‘a e ngaahi liliu ko iá ki he māmaní, pea ‘oku fakamatala‘i ‘e he Tohi Tapú ‘a e founga te ne fai ai iá.

‘Oku fai ‘e he Tohi Tapú ‘a e me‘a lahi ange ai. ‘Okú ne tala mai ‘a e me‘a ‘oku fiema‘u ke tau ‘ilo ke tau fiefia mo‘oni ai pea fiefia ‘i he mo‘uí ‘i he taimí ni. Fakakaukau angé ‘i ha mōmeniti ki he ngaahi me‘a ‘okú ne ‘ai koe ke ke hoha‘á. ‘Oku kau nai heni ‘a e pa‘angá pe ko e ngaahi me‘a fakafāmilí, mahamahakí, pe ko e mate ‘a ha taha ‘okú ke ‘ofa ai. ‘E lava ke tokoni‘i koe ‘e he Tohi Tapú ke ke fekuki mo e ngaahi palopalemá ni, pea ‘e lava ke ne fakafiemālie‘i koe ‘aki hono tali ‘a e ngaahi fehu‘i hangē ko ení:

• Ko e hā ‘oku tau faingata‘a‘ia aí?

• ‘E lava fēfē ke tau fekuki mo ‘etau ngaahi palopalemá?

• ‘E lava ke fiefia hotau fāmilí?

• Ko e hā ‘oku hoko kiate kitautolu ‘i he taimi ‘oku tau mate aí?

• Te tau toe sio koā ki hotau ngaahi ‘ofa‘anga kuo maté?

• Ko e hā ‘oku lava ai ke tau falala pau ‘e fai ‘e he ‘Otuá ‘a e me‘a kotoa pē kuó ne tala‘ofa‘akí?

 ‘I ho‘o lau ‘a e tohí ni ‘oku fakahaa‘i ai ‘okú ke fie ‘ilo ki he me‘a ‘oku ako‘i ‘e he Tohi Tapú. ‘E tokoni‘i koe ‘e he tohí ni. ‘Oku ‘i ai ‘a e ngaahi fehu‘i ki he ngaahi palakalafí, ‘a ia te ne tokoni‘i koe ke ke mahino‘i lelei ange ‘a e Tohi Tapú. Kuo fiefia ‘a e kakai ‘e laui miliona ‘i he fetalanoa‘aki ‘i he Tohi Tapú mo e Kau Fakamo‘oni ‘a Sihová. ‘Oku mau ‘amanaki ‘e pehē pē mo koe. ‘Ofa ke faitāpuekina koe ‘e he ‘Otuá ‘i ho‘o ‘ilo‘i ‘a e me‘a ‘e lava ke ako‘i kiate koe ‘e he Tohi Tapú!