LAU ha fa‘ahinga nusipepa pē. Sio ‘i he televīsoné, pe fanongo ki he letioó. ‘Oku lahi fau ‘a e ngaahi talanoa fekau‘aki mo e faihiá, taú mo e tautoitoí! Fakakaukau atu ki ho‘o ngaahi faingata‘a‘ia pē ‘a‘aú. Mahalo pē ko e puke pe ko e mate ‘a ha taha ‘ofeina ‘okú ne fakatupunga ha‘o mamahi lahi. Te ke ongo‘i nai ‘o hangē ko e tangata lelei ko Siopé, ‘a ia na‘á ne pehē na‘á ne “bito i he bubutuu [pe mamahí].”—Siope 10:​15, PM.

‘Eke hifo kiate koe:

• Ko e me‘a eni na‘e fakataumu‘a ‘e he ‘Otuá kiate au pea ki he toenga ‘o e fa‘ahinga ‘o e tangatá?

• Ko fē ‘e lava ke u ma‘u mei ai ha tokoni ke fekuki ai mo hoku ngaahi palopalemá?

• ‘Oku ‘i ai ha ‘amanaki ‘e faifai ange pea tau sio ki ha melino ‘i he māmaní?

‘Oku ‘omai ‘e he Tohi Tapú ‘a e ngaahi tali fakafiemālie ki he ngaahi fehu‘i ko ení.

“Te ne holoholo ‘a e lo‘imata kotoa pē mei honau mata; pea ‘e ‘ikai toe ai ha mate, pea ‘e ‘ikai toe ai ha mamahi, pe ha tangi, pe ha ongosia.”​—Fakahā 21:4

“Toki hopo ‘a e heke hange ha tia.”​—Aisea 35:6

“ ‘E toki fakaava ‘a e mata ‘o e kui.”​—Aisea 35:5

 ‘⁠Ko e kakai kotoa pe ‘oku ‘i he ngaahi fa‘itoká, . . . te nau ‘alu atu mei ai.’​—Sione 5:​28, 29

“ ‘Oku ‘ikai ha nofo ai te ne pehe, ‘Oku ou mahaki.”​—Aisea 33:24

“Ke mafola mai ‘a e koane ‘i he fonua.”​—Sāme 72:16

‘Oua ‘e si‘aki fakavave ‘o pehē ko e me‘a ‘oku ‘omai ‘i he ngaahi peesi ki mu‘á ko ha fakakaukau fakaefaka‘amu pē. Kuo tala‘ofa ‘a e ‘Otuá te ne ‘omai ‘a e ngaahi me‘á ni, pea ‘oku fakamatala‘i ‘e he Tohi Tapú ‘a e founga te ne fai ai iá.

Ka ‘oku fai ‘e he Tohi Tapú ‘a e me‘a lahi ange ia ‘i he me‘a ko iá. ‘Okú ne ‘omai ‘a e kī ki ho‘o ma‘u ha mo‘ui fakafiemālie mo‘oni na‘a mo e ‘i he taimi ní. Fakakaukau angé ‘i ha mōmeniti fekau‘aki mo ho‘o ngaahi loto-mo‘uá mo e faingata‘a‘iá tonu. ‘Oku kau nai ki ai ‘a e ngaahi me‘a fakapa‘anga, ngaahi palopalema fakafāmili, mole ‘a e tu‘unga mo‘ui leleí, pe ko e mate ‘a ha tokotaha ‘ofeina. ‘E lava ke tokoni‘i koe ‘e he Tohi Tapú ke ke feangainga mo e ngaahi palopalema he ‘aho ní, pea ‘e lava ke ne ‘omai ‘a e fakanonga ‘aki hono tali ‘a e ngaahi fehu‘i hangē ko ení:

• Ko e hā ‘oku tau faingata‘a‘ia aí?

• ‘E lava fēfē ke tau fekuki mo e ngaahi loto-mo‘ua ‘i he mo‘uí?

• ‘E lava fēfē ke tau ‘ai ‘etau mo‘ui fakafāmilí ke fiefia ange?

• Ko e hā ‘oku hoko kiate kitautolu ‘i he taimi ‘oku tau mate aí?

• ‘E faifai ange pea tau toe sio ki he fa‘ahinga na‘a tau ‘ofa ai kuo nau maté?

• ‘E lava fēfē ke tau fakapapau‘i ‘e fakahoko ‘e he ‘Otuá ‘ene ngaahi tala‘ofa ki he kaha‘ú?

 Ko e mo‘oni‘i me‘a ko ia ‘a ho‘o lau ‘a e tohi ko ení ‘oku fakahaa‘i ai te ke sai‘ia ke ‘ilo‘i ‘a e me‘a ‘oku ako‘i ‘e he Tohi Tapú. ‘E tokoni‘i koe ‘e he tohí ni. Fakatokanga‘i ange ko e ngaahi palakalafí ‘oku ‘i ai ‘a e ngaahi fehu‘i fehoanakimālie. Kuo fiefia ‘a e laui miliona ‘i hono ngāue‘aki ‘a e founga fehu‘i mo e talí ‘i he fetalanoa‘aki ki he Tohi Tapú mo e Kau Fakamo‘oni ‘a Sihová. ‘Oku mau fakatauange te ke pehē mo koe foki. ‘Ofa ke ke ma‘u ‘a e tāpuaki ‘a e ‘Otuá ‘i ho‘o ma‘u he taimí ni ‘a e hokosia fakafiefia mo fakafiemālie ‘o e ako ki he me‘a ‘oku ako‘i mo‘oni ‘e he Tohi Tapú!