‘I he taimi na‘e kei si‘i ai ‘a Sāmiuelá, na‘á ne nofo mo ngāue ‘i he tāpanekalé, ko e feitu‘u ia na‘e ha‘u ki ai ‘a e kakaí ke lotu kia Sihova. ‘Okú ke ‘ilo‘i ‘a e ‘uhinga na‘e ‘i he tāpanekalé ai ‘a Sāmiuelá? Tau ‘uluaki ako angé fekau‘aki mo e fa‘ē ‘a Sāmiuelá, ‘a ‘Ana.

Ko e taimi fuoloa, ‘a e ‘ikai malava ‘a ‘Ana ke ma‘u ha tama neongo na‘á ne fiema‘u mo‘oni ia. Ko ia, na‘á ne lotu kia Sihova ‘o kōlenga kiate ia ke tokoni mai ki ai. Na‘á ne palōmesi kapau te ne ma‘u ha tama te ne ‘ave ia ke nofo mo ngāue ‘i he tāpanekalé. Na‘e tali ‘e Sihova ‘a e lotú ‘a ‘Aná, pea na‘á ne ma‘u ha tama. Na‘á ne fakahingoa ia ko Sāmiuela. Pea hangē ko ia ko e palōmesi ‘a ‘Aná, ‘i he taimi na‘e ta‘u tolu pe ta‘u fā ai ‘a Sāmiuelá na‘á ne ‘ave ia ki he tāpanekalé ke ngāue ai ki he ‘Otuá.

Ko ‘Īlai na‘e taula‘eiki lahi ‘i he tāpanekalé. Na‘e ngāue foki ‘i ai hono ongo fohá. Manatu‘i, ko e tāpanekalé ko e fale ia ‘o e ‘Otuá ‘oku fai ai e lotú, ko e kakaí kuo pau ke nau fai ‘i ai ‘a e ngaahi me‘a ‘oku leleí. Ka ko e ongo foha ‘o ‘Īlaí na‘á na fai ‘a e ngaahi me‘a na‘e kovi ‘aupito. Na‘e sio ‘a Sāmiuela ki he me‘a na‘á na faí. Na‘e fai ‘e Sāmiuela ha me‘a kovi ‘o hangē ko e ongo foha ‘o ‘Īlaí?— ‘Ikai, na‘á ne fai ma‘u pē ‘a e me‘a na‘e totonú, ‘o hangē ko e me‘a na‘e ako‘i ange he‘ene ongo mātu‘á.

Ko e hā ho‘o fakakaukau ki he me‘a na‘e totonu ke fai ‘e ‘Īlai ki hono ongo fohá?— Na‘e totonu ke ne tautea‘i kinaua. Na‘e totonu ke ‘oua te ne toe fakangofua ke na ngāue ‘i he fale ‘o e ‘Otuá. Ka na‘e ‘ikai ke fai ia ‘e ‘Īlai, ko ia na‘e houhau ‘a Sihova kiate ia mo hono ongo fohá. Na‘e fakapapau‘i ‘e Sihova ke tautea‘i kinautolu.

‘I ha pō ‘e taha ‘i he kei mohe ‘a Sāmiuelá, na‘á ne fanongo ki ha tokotaha ‘okú ne ui ia: ‘Sāmiuela!’ Na‘á ne lele kia ‘Īlai, ka na‘e tala ange ‘e ‘Īlai: ‘Na‘e ‘ikai ke u ui koe.’ Na‘e tu‘o ua ‘a e hoko ‘a e me‘á ni. ‘I hono tu‘o tolú, na‘e tala ange  ‘e ‘Īlai kia Sāmiuela kapau te ne toe fanongo ki ha le‘o, ‘oku totonu leva ke ne pehē: ‘Fakamolemole Sihova, Lea mai; ‘oku ou fanongo atu.’ Ko ia ko e me‘a ia na‘e fai ‘e Sāmiuelá. Na‘e toki pehē ‘e Sihova kia Sāmiuela: ‘Tala kia ‘Īlai te u tautea‘i hono fāmilí ki he ngaahi me‘a kovi kuo nau faí.’ ‘Okú ke fakakaukau na‘e faingofua kia Sāmiuela ke ne fakahoko ‘a e fekau ko ení kia ‘Īlai?— ‘Ikai, na‘e ‘ikai ke faingofua. Ka neongo na‘e ilifia ‘a Sāmiuela, na‘á ne fai ‘a e me‘a na‘e tala ange ‘e Sihova kiate ia ke ne faí. Ko e me‘a na‘e lea‘aki ‘e Sihová na‘e hoko mo‘oni ia. Na‘e tāmate‘i ‘a e ongo foha ‘o ‘Īlaí pea na‘e mate mo ‘Īlai foki.

Ko Sāmiuelá ko ha fa‘ifa‘itaki‘anga lelei kia kitautolu. Na‘á ne fai ‘a e me‘a na‘e totonú neongo na‘á ne sio ki he ni‘ihi kehé na‘a nau fai ‘a e ngaahi me‘a na‘e koví. Kae fēfē koe? Te ke hangē ko Sāmiuelá ‘o fai ma‘u pē ‘a e me‘a ‘oku totonú? Kapau te ke fai pehē te ke ‘ai ai ‘a Sihova mo ho‘o ongo mātu‘á ke nau fiefia.