Ko Lepeká ko ha fefine na‘e ‘ofa kia Sihova. Ko e hingoa hono husepānití ko ‘Aisake pea na‘e toe ‘ofa mo ia kia Sihova. Na‘e anga-fēfē ‘a e fetaulaki ‘a Lepeka mo ‘Aisaké? Na‘e anga-fēfē ‘ene fakahaa‘i na‘á ne loto ke ‘ai ‘a Sihova ke fiefiá? Tau ako lahi angé fekau‘aki mo Lepeka.

Ko e ongo mātu‘a ‘a ‘Aisaké ko ‘Ēpalahame mo Sela. Na‘a nau nofo ‘i he fonua ko Kēnaní, ‘a ia ko e kakai aí na‘e ‘ikai ke nau lotu kia Sihova. Ka na‘e loto ‘a ‘Ēpalahame ke mali hono fohá mo ha fefine na‘e lotu kia Sihova. Ko ia, mahalo ko ‘Eliesa ‘ene sevāniti na‘e fekau‘i ke kumi ha uaifi ‘o ‘Aisake ‘i he feitu‘u na‘e ui ko Hālani, ‘a ia na‘e nofo ai ‘a e ni‘ihi ‘o e ngaahi kāinga ‘o ‘Ēpalahamé.

Na‘e fononga ‘a ‘Eliesa mo e ni‘ihi ‘o e kau sevāniti ‘a ‘Ēpalahamé. Ko ha fu‘u fononga mama‘o ia. Na‘a nau ō mo ha kāmeli ‘e hongofulu na‘e fakaheka ai ‘a e me‘akai mo e ngaahi me‘a‘ofa. Na‘e ‘ilo‘i fēfē ‘e ‘Eliesa ‘a e fefine ke fili ma‘a ‘Aisaké? ‘I he a‘u atu ‘a ‘Eliesa mo e ni‘ihi ‘o e kau sevānití ki Hālaní, na‘a nau mālōlō ‘i ha vaikeli koe‘uhí na‘e ‘ilo‘i ‘e ‘Eliesa kuo mei omi ‘a e kakaí ke ‘utu vai. Na‘á ne lotu kia Sihova ‘o pehē: ‘Ko e ki‘i fefine te u kole ke ‘omai ha vai peá ne ‘omi ia kiate au mo fakainu ‘eku fanga  kāmelí, te u ‘ilo ai ko e fefine eni kuó ke filí.’

Na‘e ha‘u ‘a e ki‘i fefine ko Lepeká ki he vaikelí. ‘Oku pehē ‘e he Tohi Tapú ko e ta‘ahine talavou ‘aupito. Na‘e kole ange ‘e ‘Eliesa ha vai kiate ia ke ne inu, peá ne pehē: ‘‘Io. Te u ‘oatu ha vai ma‘au pea te u ‘alu ‘o ‘omai ha vai ki ho‘o fanga kāmelí foki.’ Ki‘i fakakaukau angé! Ko e fanga kāmeli fieinuá ‘oku nau inu lahi, ko ia ai na‘e pau kia Lepeka ke toutou lele ki he vaikelí. ‘Okú ke sio ‘i he fakatātaá ki he ngāue lahi ‘okú ne faí?— Na‘e ofo ‘a ‘Eliesa ‘i he founga na‘e tali ai ‘e Sihova ‘ene lotú.

Na‘e ‘oange ‘e ‘Eliesa kia Lepeka ha ngaahi me‘a‘ofa faka‘ofo‘ofa. Na‘á ne fakaafe‘i ‘a ‘Eliesa mo ‘ene kau sevānití ki hono ‘apí. Na‘e fakamatala ‘e ‘Eliesa ‘a e ‘uhinga na‘e fekau mai ia ‘e ‘Ēpalahamé mo e founga na‘e tali ai ‘e Sihova ‘ene lotú. Na‘e fiefia ‘a e fāmili ‘o Lepeká ke ‘oatu ia ke mali mo ‘Aisake.

Ka ‘okú ke fakakaukau na‘e loto ‘a Lepeka ke mali mo ‘Aisake?— Na‘e ‘ilo‘i ‘e Lepeka na‘e fekau ange ‘e Sihova ‘a ‘Eliesa. ‘I he taimi na‘e ‘eke ai ‘e he fāmili ‘o Lepeká pe ‘oku loto ke ‘alu ki Kēnani ‘o mali mo ‘Aisaké, na‘á ne tala ange: ‘‘Io, ‘oku ou loto ke ‘alu.’ ‘I he taimi pē ko iá, na‘á ne ‘alu mo ‘Eliesa. ‘I he‘ena a‘u ki Kēnaní, na‘e mali ‘a Lepeka mo ‘Aisake.

Koe‘uhí na‘e fai ‘e Lepeka ‘a e me‘a na‘e loto ki ai ‘a Sihová na‘e tāpuaki‘i ia ‘e Sihova. Hili ‘a e ngaahi ta‘u lahi mei ai, na‘e fanau‘i ‘a Sīsū mei hono fāmilí! Kapau te ke hangē ko Lepeká mo ‘ai ‘a Sihova ke fiefia te ne tāpuaki‘i mo koe foki.