LĒSONI 7
Kuo ‘i Ai Nai ha Taimi Na‘á Ke Ongo‘i Ta‘elata mo Ilifia Ai?
Sio ki he ki‘i tamasi‘i ‘i he fakatātaá. ‘Oku mata ta‘elata mo ilifia, ‘ikai ko ia? Kuó ke fa‘a ongo‘i pehē?— ‘Oku ongo‘i pehē ‘a e tokotaha kotoa ‘i he taimi ‘e ni‘ihi. ‘Oku fakamatala ‘a e Tohi Tapú fekau‘aki mo e ngaahi kaume‘a ‘o Sihova na‘a nau ongo‘i ta‘elata foki mo ilifia. Ko e taha ‘o kinautolu ko ‘Ilaisiā. Tau ako angé fekau‘aki mo iá.
Na‘e loto ‘a Sisipeli ke tāmate‘i ‘a ‘Ilaisiā
Na‘e nofo ‘a ‘Ilaisiā ‘i ‘Isileli ‘i he taimi fuoloa ki mu‘a ke ‘alo‘i ‘a Sīsuú. Ko ‘Ēhapi ko e tu‘i ‘o ‘Isilelí na‘e ‘ikai lotu ia ki he ‘Otua mo‘oní, ‘a Sihova. Ko ‘Ēhapi mo hono uaifí, ‘a Sisipeli na‘á na lotu ki he ‘otua loi ko Pēalí. Ko ia ko e tokolahi taha ‘o e kakai ‘i ‘Isilelí na‘a nau kamata foki ke lotu kia Pēali. Na‘e fu‘u anga-kovi ‘aupito ‘a kuini Sisipeli peá ne loto ke tāmate‘i kotoa e kakai na‘a nau lotu kia Sihová, ‘o kau ai ‘a ‘Ilaisiā! ‘Okú ke ‘ilo‘i ko e hā ‘a e me‘a na‘e fai ‘e ‘Ilaisiaá?—
Na‘e hola ‘a ‘Ilaisiā! Na‘e ‘alu ia ‘o mama‘o atu ki he toafá pea toi ‘i ha ‘ana. ‘Okú ke pehē ko e hā na‘á ne fai ai iá?— ‘Io, na‘á ne ilifia. Ka na‘e ‘ikai fiema‘u kia ‘Ilaisiā ke ilifia. Ko e hā hono ‘uhingá? Koe‘uhí na‘á ne ‘ilo ‘e lava ‘a Sihova ‘o tokoni‘i ia. Na‘e ‘osi fakahā ‘e Sihova hono mālohí kia ‘Ilaisiā ki mu‘a. ‘I he taimi ‘e taha, na‘e tali ‘e Sihova ‘a e lotu ‘a ‘Ilaisiaá ‘aki hono ‘omai ha afi mei hēvani. ‘Io ko e mo‘oni, na‘e lava ‘e Sihova ‘o tokoni‘i ‘a ‘Ilaisiā ‘i he taimi ko ení!
Ko e hā e founga na‘e tokoni‘i ai ‘e Sihova ‘a ‘Ilaisiaá?
Lolotonga ‘a e nofo ‘a ‘Ilaisiā ‘i he ‘aná, na‘e lea ‘a Sihova kiate ia peá ne ‘eke ange: ‘Ko e hā ho‘o me‘a ‘oku fai hení?’ Na‘e tali ‘e ‘Ilaisiā: ‘Ko au toko taha pē ‘oku ou kei lotu kiate koé. Ko au pē ‘i hení pea ‘oku ou ilifia na‘a tāmate‘i au.’ Na‘e fakakaukau ‘a ‘Ilaisiā na‘e ‘osi tāmate‘i ‘a e fa‘ahinga kotoa na‘a nau lotu kia Sihová. Ka na‘e tala ange ‘e Sihova kia ‘Ilaisiā: ‘‘Ikai, ‘oku ‘ikai mo‘oni ia. ‘Oku ‘i ai ‘a e kakai ‘e toko 7,000 ‘oku nau kei lotu mai kiate au. Ke ke hoko ‘o to‘a. ‘Oku lahi ‘a ‘eku ngāue kiate koe ke ke faí!’ ‘Okú ke fakakaukau na‘e fiefia ‘a ‘Ilaisiā ke fanongo ki aí?—
Ko e hā ‘e lava ke ke ako mei he me‘a na‘e hoko kia ‘Ilaisiaá?— ‘Oku ‘ikai ‘aupito fiema‘u ke ke ongo‘i ta‘elata mo ilifia. ‘Oku ‘i ai ho ngaahi kaume‘a ‘oku nau ‘ofa kia Sihova pea ‘oku nau ‘ofa ‘ia koe. ‘Ikai ko ia pē, ‘oku ma‘u ‘e Sihova ‘a e mālohi lahi pea te ne tokoni‘i ma‘u pē koe! ‘Okú ke fiefia ke ‘ilo‘i he‘ikai ha taimi te ke fu‘u ongo‘i ta‘elata ai?—
