1-4. Ko e hā ʻoku ʻalu ai ʻa Paula ki Selusalemá, pea ko e hā ʻoku fakatatali mai ai kiate iá?

 KO E māvae ko ia ʻi Mīletó ko ha māvae ia naʻe mātuʻaki fakalotomamahi. He faingataʻa ē kia Paula mo Luke ke na mavahe mai mei he kau mātuʻa ʻEfesoó, ʻa ia naʻá na hoko ʻo ʻofa aí! ʻOku tuʻu atu ʻa e ongo misinalé mei he fungavaká. Ko ʻena kató ʻoku fonu ʻi he ngaahi tokonaki ʻoku fiemaʻu ki he fonongá. ʻOkú na toe ʻalu foki mo e paʻanga naʻe tātānaki maʻá e kau Kalisitiane masiva ʻi Siuteá pea ʻokú na vēkeveke ke fakapapauʻi ʻe ʻave ʻa e meʻaʻofa ko ení ke aʻu.

² ʻOku angiangiiki mai ʻa e havilí ki he laá, pea ʻoku mavahe mai ʻa e vaká mei he longoaʻa ʻa e uafú. Ko e ongo tangatá, fakataha mo hona kaungāfononga ʻe toko fitú, ʻoku nau sio fakamamaʻu atu ki he fofonga mamahi ʻa honau fanga tokoua ʻi ʻutá. (Ngā. 20:4, 14, 15) ʻOku hokohoko taʻataʻalo atu pē ʻa e kau folaú kae ʻoua ke fakaʻau pē ʻo puli atu honau ngaahi kaungāmeʻá.

³ ʻI he taʻu nai ʻe tolu, kuo ngāue vāofi ai ʻa Paula mo e kau mātuʻa ʻi ʻEfesoó. Ka ʻi he taimi ní, ʻi hono tataki ʻe he laumālie māʻoniʻoní, ʻokú ne fononga atu ki Selusalema. ʻOku ʻi ai nai ʻene kiʻi ʻilo ki he meʻa ʻoku fakatatali mai kiate iá. Ki muʻa atu, naʻá ne tala ange ki he kau mātuʻa ko iá: “ʻOku ou ʻalú ni ki Selusalema ʻi hono tataki au ʻe he laumālie māʻoniʻoní, neongo ʻoku ʻikai te u ʻiloʻi ʻa e ngaahi meʻa ʻe hoko ai kiate aú, ka mei he kolo ki he kolo ʻoku toutou faifakamoʻoni mai ai ʻa e laumālie māʻoniʻoní kiate au, ʻo pehē ʻoku fakatatali mai ʻa e tuku pilīsone mo e ngaahi mamahi kiate au.” (Ngā. 20:22, 23) Neongo ʻa e fakatuʻutāmakí, ʻoku ongoʻi ʻe Paula ʻoku “tataki [ia] ʻe he laumālie māʻoniʻoní”​—ʻo ne ongoʻi ko hono fatongia ia peá ne toe loto-lelei foki ke muimui ʻi he tataki ʻa e laumālié ke ʻalu ki Selusalemá. ʻOku mahuʻinga kiate ia ʻa ʻene moʻuí, ka ko hono fai ʻa e finangalo ʻo e ʻOtuá ʻa e meʻa mahuʻinga taha kiate iá.

⁴ ʻOku pehē ʻa e anga hoʻo ongoʻí? ʻI he taimi ʻoku tau fakatapui ai kitautolu kia Sihová, ʻoku tau fai ai ha palōmesi toputapu ke ʻai ʻa hono fai  hono finangaló ko e meʻa mahuʻinga taha ia ʻi heʻetau moʻuí. ʻE lava ke tau maʻu ʻaonga ʻaki ʻetau vakai ki he faʻifaʻitakiʻanga ʻo e faitōnunga ʻa e ʻapositolo ko Paulá.

5. Ko e halanga folau fē naʻe folau ai ʻa Paula mo hono ngaahi kaungāfonongá ki Tāiá?

⁵ Ko e vaka naʻe heka ai ʻa Paula mo hono ngaahi kaungāfonongá naʻe “taloa hangatonu.” ʻA ia, naʻe folau ia kae angi mui atu ʻa e matangí, ʻo ʻikai toe fākahua, pea naʻe matangi lelei ʻa e folaú ʻo nau aʻu ai ki Kō ʻi ha taimi ki mui ange ʻi he ʻaho tatau pē ko iá. (Ngā. 21:1) ʻOku hā ngali naʻe lī taula ai ʻa e vaká ʻi he pō ko iá ki he ʻaho ʻe tahá ki muʻa ke hoko atu e folaú ki Lota mo Pātala. ʻI Pātala, ʻi he matāfanga fakatonga ʻo ʻĒsia Mainá, naʻe heka ai ʻa e fanga tokouá ʻi ha fuʻu vaka lahi uta koloa, ʻa ia naʻá ne ʻave hangatonu ai kinautolu ki Tāia, ʻi Finisiá. ʻI heʻenau fonongá, naʻa nau fakalaka ʻi he “motu ko Saipaló . . . [ʻi he  tafaʻaki] toʻohema” ʻo e vaká. (Ngā. 21:3) Ko e hā naʻe lave ai ʻa Luke, ʻa e tokotaha-tohi ʻo e tohi ʻa Ngāué, ki he fakaikiiki ko iá?

6. (a) Ko e hā naʻe hoko nai ai ʻa e sio atu ki Saipaló ʻo fakalototoʻa kia Paulá? (e) ʻI hoʻo fakakaukauloto atu ki he founga kuo tāpuakiʻi mo tokoniʻi ai koe ʻe Sihová, ko e hā ʻa e fakamulituku ʻokú ke aʻu ki aí?

⁶ Mahalo pē naʻe tuhu ʻa Paula ki he motu ko iá ʻo ne fakamatala ki he ngaahi meʻa naʻá ne hokosia aí. ʻI heʻene ʻuluaki fononga fakamisinale ʻi he taʻu nai ʻe hiva ki muʻá, ko Paula, fakataha mo Panepasa mo Sione Maʻake, naʻa nau fetaulaki ai mo e tokotaha faimana ko ʻElimasí, ʻa ia naʻá ne fakafepakiʻi ʻenau malangá. (Ngā. 13:4-12) Ko e vakai atu ki he motu ko iá mo fakakaukauloto ki he meʻa naʻe hoko aí ʻoku ngalingali pē naʻá ne fakalototoʻaʻi ʻa Paula mo fakaivimālohiʻi ia ki he meʻa naʻe toka mei muʻá. ʻE lava ke tau maʻu ʻaonga mo kitautolu foki mei he fakakaukauloto atu ki he founga kuo tāpuakiʻi mo tokoniʻi ai kitautolu ʻe he ʻOtuá ke tau kātekina ʻa e ngaahi ʻahiʻahí. Ko e fakakaukauloto peheé ʻe lava ke ne tokoniʻi kitautolu ke tau ongoʻi ʻo hangē ko e lea ʻa Tēvitá, ʻa ia naʻá ne tohi: “Oku lahi ae gaahi mamahi oe maonioni: ka oku fakamoui ia mei ai kotoabe e Jihova.”​—Saame 34:19, PM.

7. Ko e hā naʻe fai ʻe he kau fonongá ʻi heʻenau aʻu ki Tāiá?

⁷ Naʻe mahinoʻi ʻe Paula ʻa e mahuʻinga ʻo e feohi faka-Kalisitiané pea naʻá ne vēkeveke ke feohi mo e faʻahinga ʻo e tui tataú. ʻI he aʻu atu ki Tāiá, ʻoku tohi ʻe Luke, “naʻa mau kumi ʻo ʻilo ʻa e kau ākongá.” (Ngā. 21:4) ʻI hono ʻiloʻi naʻe ʻi ai honau ngaahi kaungā-Kalisitiane ʻi Tāiá, naʻe kumi kinautolu ʻe he kau fonongá ʻo maʻu pea ʻoku ngalingali naʻa nau nofo mo kinautolu. Ko e taha ʻo e ngaahi tāpuaki fisifisimuʻa ʻo hono maʻu ʻa e moʻoní ko e tatau ai pē pe ko fē ha feituʻu te tau ʻalu ki ai, ʻe lava ke tau maʻu ai ʻa e kau tui ʻoku tau maʻu ʻa e fakakaukau tatau ʻa ia te nau talitali lelei kitautolu. Ko e faʻahinga ʻoku ʻofa ki he ʻOtuá pea ʻoku nau tōʻongaʻaki ʻa e lotu moʻoní ʻoku ʻi ai honau ngaahi kaungāmeʻa ʻi ha faʻahinga feituʻu pē he māmaní.

8. ʻOku totonu ke fēfē ʻetau mahinoʻi ʻa e Ngāue 21:4?

⁸ ʻI hono fakamatalaʻi ʻa e ʻaho ʻe fitu naʻa nau nofo ai ʻi Tāiá, ʻoku lēkooti ai ʻe Luke ha meʻa ʻe ʻuluaki ngali fakapuputuʻu nai: “Fakafou ʻi he laumālié [ko e fanga tokoua ʻi Tāiá] naʻa nau toutou tala kia Paula ke ʻoua naʻa tuʻu hono vaʻé ki Selusalema.” (Ngā. 21:4) Naʻe liliu nai ʻe Sihova ia ʻa ʻene fakakaukaú? Kuó ne tataki nai he taimi ko ení ʻa Paula ke ʻoua ʻe ʻalu ia ki Selusalema? ʻIkai. Naʻe fakahaaʻi ʻe he laumālié ʻe ngaohikoviʻi ʻa Paula ʻi Selusalema, ka naʻe ʻikai ko e ʻuhingá ke ne fakamamaʻo mei he koló. ʻOku ngalingali ko e tupu mei he laumālie māʻoniʻoní, naʻe fakamulituku totonu ʻaki ai ʻe he fanga tokoua ʻi Tāiá ʻe faingataʻaʻia ʻa Paula ʻi Selusalemá. Ko ia ai, koeʻuhí ko ʻenau tokanga kia Paulá, naʻa nau fakalototoʻaʻi ai ia ke ʻoua ʻe ʻalu hake ki he koló. Ko ʻenau holi ke maluʻi ʻa Paula mei he fakatuʻutāmaki naʻe tuʻunuku ke hokó naʻe lava ke mahinoʻi ia. Neongo ia, ʻi he fakapapauʻi ʻe Paula ke fai ʻa e finangalo ʻo Sihová, naʻá ne hoko atu ai ʻi heʻene fononga ki Selusalemá.​—Ngā. 21:12.

9, 10. (a) ʻI he fanongo ki he loto-hohaʻa ʻa e fanga tokoua ʻi Tāiá, naʻe manatuʻi nai ʻe Paula ʻa e tuʻunga meimei tatau ko e hā? (e) Ko e hā ʻa e fakakaukau ʻoku lahi ʻi he māmaní he ʻaho ní, pea ʻoku anga-fēfē ʻene kehe mei he lea ʻa Sīsuú?

 ⁹ ʻI he fanongo ʻa Paula ki he loto-hohaʻa ʻa e fanga tokouá, naʻá ne manatuʻi nai ʻa e fetaulaki ʻa Sīsū mo ha taʻelototatau meimei tatau hili ia ʻene tala ange ki heʻene kau ākongá te ne ʻalu ki Selusalema, ʻe faingataʻaʻia ʻi he ngaahi meʻa lahi, pea hoko ʻo tāmateʻi. ʻI hono ueʻi ʻo Pita ʻe heʻene ngaahi ongoʻí, naʻá ne pehē ange kia Sīsū: “Anga-ʻofa muʻa kiate koe, ʻEiki; ʻe ʻikai teitei hoko ʻa e meʻá ni kiate koe.” Naʻe tali ange ʻe Sīsū: “ʻAlu ki mui Sētane! Ko ha tūkiaʻanga koe kiate au, koeʻuhi ʻokú ke fakakaukau, ʻo ʻikai ko e ngaahi fakakaukau ʻa e ʻOtuá, ka ko e ngaahi fakakaukau ʻa e tangatá.” (Māt. 16:21-23) Naʻe fakapapauʻi ʻe Sīsū ke tali ʻa e ʻalunga feilaulauʻi-kita naʻe vaheʻi ange ʻe he ʻOtuá kiate iá. Naʻe ongoʻi pehē pē mo Paula. Ko e fanga tokoua ʻi Tāiá, ʻi he hangē ko e ʻapositolo ko Pitá, ʻoku pau pē naʻa nau taumuʻa lelei pē, ka naʻe ʻikai te nau lāuʻilo ki he finangalo ʻo e ʻOtuá.

¹⁰ Ko e foʻi fakakaukau ko ia ʻo e anga-ʻofa pē kiate kita pe ko e muimui ʻi he ʻalunga ʻoku faingofua tahá ʻoku saiʻia ai ʻa e tokolahi he ʻahó ni. Ko e kakaí fakalūkufua ʻoku nau hehema ke kumi ki ha lotu ʻoku fakafiemālie mo fiemaʻu ai ʻa e meʻa siʻi pē mei hono kau mēmipá. ʻI hono kehé, naʻe fakalototoʻaʻi ʻe Sīsū ia ha tūkunga fakaefakakaukau mātuʻaki kehe ʻaupito. Naʻá ne tala ange ki heʻene kau ākongá: “Kapau ʻoku fie muimui ha taha ʻiate au, tuku ke ne siʻaki ʻe ia ia pea toʻo hake ʻene ʻakau fakamamahí pea hanganaki muimui ʻiate au.” (Māt. 16:24) Ko e muimui ʻia Sīsuú ʻa e ʻalunga fakapotopotó, ʻa e ʻalunga totonú, ka ʻoku ʻikai ko e ʻalunga faingofuá ia.

11. Naʻe anga-fēfē hono fakahaaʻi ʻe he kau ākonga ʻi Tāiá ʻenau ʻofa mo e poupou kia Paulá?

¹¹ Naʻe tuʻunuku mai ʻa e taimi kia Paula, Luke mo e niʻihi kehe naʻe kau fakataha mo kinauá ke hoko atu ʻenau fonongá. Ko e fakamatala ki heʻenau mavahé ʻoku fakaueʻiloto. ʻOku fakahaaʻi ai ʻa e ongoʻi ʻofa naʻe maʻu ʻe he fanga tokoua Tāiá kia Paulá pea pehē ki heʻenau poupou mālohi ki heʻene ngāue fakafaifekaú. Ko e kakai tangatá, kakai fefiné, mo e fānaú naʻa nau fakafeʻao ʻa Paula mo e faʻahinga naʻe ʻiate iá ki he matātahí. Naʻa nau tūʻulutui kātoa hifo ʻo lotu fakataha pea nau toki fepōpoakiʻaki fakamāvae leva. Hili iá, naʻe heka leva ʻa Paula, Luke  mo hona ngaahi kaungāfonongá ki ha toe vaka ia ʻe taha pea nau hoko atu ki Tolimeasi, ʻa ia naʻa nau fetaulaki ai mo e fanga tokouá pea nau nofo ʻaho taha mo kinautolu.​—Ngā. 21:5-7.

12, 13. (a) Ko e hā ʻa e lēkooti ʻo e ngāue faitōnungá naʻe maʻu ʻe Filipé? (e) ʻOku anga-fēfē ʻa e hoko ʻa Filipe ko ha faʻifaʻitakiʻanga lelei ki he ngaahi tamai Kalisitiane ʻi he ʻaho ní?

¹² Ko hono hokó, ʻoku līpooti ʻe Luke, naʻe hoko atu ʻa Paula mo e faʻahinga naʻe fononga mo iá ki Sesalia. ʻI heʻenau tau pē ki aí, naʻa nau “hū ki he fale ʻo Filipe ko e ʻevangelioó.” a (Ngā. 21:8) ʻOku pau pē naʻa nau fiefia he sio kia Filipé. ʻI he taʻu nai ʻe 20 ki muʻá ʻi Selusalema, naʻe fakanofo ai ia ʻe he kau ʻapositoló ke tokoni ki hono tokangaʻi ʻa hono tufa ʻo e meʻakaí ʻi he fakatahaʻanga Kalisitiane naʻe toki fokotuʻu foʻoú. Naʻe hoko ʻa Filipe ko ha tokotaha malanga faivelenga fuoloa. Manatuʻi ʻi he taimi naʻe ʻai ai ʻe he fakatangá ke movete holo ʻa e kau ākongá, naʻe ʻalu ai ʻa Filipe ki Samēlia pea kamata ke ne malanga. Ki mui ai, naʻá ne malanga ai ki he ʻiunoke ʻItiopeá peá ne papitaiso ia. (Ngā. 6:2-6; 8:4-13, 26-38) Ko ha lēkooti moʻoni ē ʻo e ngāue faitōnungá!

¹³ Naʻe ʻikai mole meia Filipe ʻa ʻene faivelenga ki he ngāue fakafaifekaú. ʻI heʻene nofo he taimi ko ení ʻi Sesaliá, naʻá ne kei femoʻuekina pē ʻi he ngāue fakamalangá, ʻo hangē ko ia ʻoku fakahaaʻi ʻe Luke ʻi heʻene ui ia “ko e ʻevangelioó.” ʻOku tau toe ʻilo foki naʻá ne maʻu he taimi ko ení ʻa e ngaahi ʻofefine ʻe toko fā naʻa nau kikite, ʻa ia ʻoku fakahuʻunga mai ai naʻa nau muimui ʻi he topuvaʻe ʻo ʻenau tamaí. b (Ngā. 21:9) Ko ia, ʻoku pau pē naʻe fai  ʻe Filipe ʻa e meʻa lahi ke langa hake ʻa e tuʻunga fakalaumālie ʻa hono fāmilí. Ko e ngaahi tamai Kalisitiane ʻi he ʻaho ní ʻoku lelei ke nau muimui ʻi heʻene faʻifaʻitakiʻangá, ʻo nau takimuʻa ʻi he ngāue fakafaifekaú mo tokoniʻi ʻenau fānaú ke nau fakatupulekina ha ʻofa ki he ngāue fakaʻevangelioó.

14. ʻOku ʻikai ha veiveiua naʻe iku ʻa e ʻaʻahi ʻa Paula ki hono ngaahi kaungātuí ki he hā, pea ko e hā ʻa e ngaahi faingamālie meimei tatau ʻoku maʻu he ʻaho ní?

¹⁴ ʻI he feituʻu ki he feituʻu, naʻe kumi ai ʻa Paula ki he ngaahi kaungātuí peá ne fakamoleki ha taimi mo kinautolu. ʻOku pau pē naʻe vēkeveke ʻa e fanga tokoua fakalotofonuá ke fakaaʻu atu ʻa e anga-talitali kakaí ki he misinale fefonongaʻaki ko ení mo hono ngaahi kaungāfonongá. ʻOku ʻikai ha veiveiua naʻe iku atu ʻa e ngaahi ʻaʻahi peheé ki ha “fefakalototoʻaʻaki.” (Loma 1:11, 12) ʻOku maʻu ʻa e ngaahi faingamālie meimei tatau ʻi he ʻahó ni. ʻOku maʻu ʻa e ngaahi ʻaonga lahi mei hono fakaava atu ho ʻapí ki ha ʻovasia sēketi mo hono uaifí, tatau ai pē pe ʻoku masiva fēfē ho ʻapí.​—Loma 12:13.

15, 16. Ko e hā ʻa e pōpoaki naʻe ʻomi ʻe ʻAkapusí, pea ko e hā ʻa e ola naʻe hoko ai ki he faʻahinga naʻe fanongo ki aí?

¹⁵ Lolotonga ʻa e nofo ʻa Paula mo Filipé, naʻe aʻu hifo ha tokotaha ʻaʻahi ʻe taha naʻe fai hono tokaʻi​—ko ʻAkapusi. Ko e faʻahinga naʻe fakatahataha ʻi he ʻapi ʻo Filipé naʻa nau ʻiloʻi ko ʻAkapusí ko ha palōfita ia; naʻá ne tomuʻa tala ha fuʻu honge lahi he lolotonga ʻa e pule ʻa Kalautiasí. (Ngā. 11:27, 28) Mahalo pē naʻa nau fifili: ‘Ko e hā kuo haʻu ai ʻa ʻAkapusí? Ko e hā ʻa e pōpoaki ʻokú ne ʻomí?’ ʻI heʻenau sio fakamamaʻu atú, naʻá ne toʻo ʻa e noʻo ʻo Paulá​—ko ha konga tupenu lōloa hangē ha letá ʻa ia naʻe lava ke faʻo ai ʻa e paʻangá pea mo ha ngaahi meʻa kehe pea naʻe tui ʻi he kongalotó. Naʻe haʻiʻaki ia ʻe ʻAkapusi ʻa hono ongo vaʻe mo hono ongo nima pē ʻoʻoná. Naʻá ne lea leva. Ko e pōpoakí naʻe mafatukituki: “Ko e lea eni ʻa e laumālie māʻoniʻoní, ‘Ko e tangata ʻoku ʻoʻona ʻa e leta ko ení ʻe haʻi peheni ia ʻe he kau Siú ʻi Selusalema, pea te nau tuku atu ia ki he nima ʻo e kakai ʻo e ngaahi puleʻangá.’”​—Ngā. 21:11.

¹⁶ Naʻe fakapapauʻi ʻe he kikité ʻe ʻalu ʻa Paula ki Selusalema. Naʻe toe fakahaaʻi foki ai ko ʻene ngaahi feangainga mo e kau Siu ʻi aí ʻe iku ia ki hono tuku atu ia “ki he nima ʻo e kakai ʻo e ngaahi puleʻangá.” Ko e kikité ni naʻe maongo loloto ia ki he faʻahinga naʻe ʻi aí. ʻOku tohi ʻe Luke: “Ko ia ʻi heʻemau fanongo ki he meʻá ni, ko kimautolu fakatouʻosi mo e faʻahinga naʻe ʻi aí naʻa mau kamata kōlenga kiate ia ke ʻoua te ne ʻalu hake ki Selusalema. Naʻe tali ange leva ʻe Paula: ‘Ko e hā ʻoku mou faí, ʻi hoʻomou tangi mo feinga ke fakavaivaiʻi ʻa ʻeku fakapapaú? Mou fiemālie pē, ʻoku ou mateuteu au ʻo ʻikai ki hano haʻi pē kae pehē foki ke u mate ʻi Selusalema maʻá e huafa ʻo e ʻEiki ko Sīsuú.’”​—Ngā. 21:12, 13.

17, 18. Naʻe anga-fēfē hono fakahāhā ʻe Paula ʻa ʻene loto-fakapapau mālohí, pea naʻe anga-fēfē ʻa e fakafeangai ʻa e fanga tokouá?

¹⁷ Sioloto atu ki he meʻa ʻoku hokó. Ko e fanga tokouá, ʻo kau ai ʻa Luke, ʻoku nau kōlenga kia Paula ke ʻoua te ne ʻalu. ʻOku tangi ʻa e niʻihi. ʻI hono ueʻi ʻo  Paula ʻe he tokanga ʻofa ʻoku nau fakahāhā ange kiate iá, ʻokú ne lea fakaalaala ange ʻo pehē ʻoku nau “fakavaivaiʻi ʻa [ʻene] fakapapaú,” pe hangē ko ia ko hono liliu ʻe he ngaahi liliu ʻe niʻihi ʻa e fakalea faka-Kalisí, ʻoku nau “fakalotomamahiʻi” ia. Neongo ia, ko ʻene fakapapaú ʻoku mālohi, pea hangē pē ko ia ʻi he taimi naʻá ne fetaulaki ai mo e fanga tokoua ʻi Tāiá, ʻe ʻikai te ne fakaʻatā ʻa e ngaahi kōlengá pe ngaahi loʻimatá ke ne ʻai ia ke ne toumoua. ʻI hono kehé, ʻokú ne fakamatalaʻi ange kiate kinautolu ʻa e ʻuhinga kuo pau ai ke ne ʻalú. Ko ha loto-toʻa mo ha loto-fakapapauʻi moʻoni ē naʻá ne fakahāhaá! ʻI he hangē pē ko Sīsū ʻa ia naʻe ki muʻa ʻiate iá, naʻe fakahanga papau ʻe Paula hono fofongá ke ʻalu ki Selusalema. (Hep. 12:2) Naʻe ʻikai feinga ʻa Paula ia ke hoko ko ha tokotaha māʻata, ka ʻo kapau naʻe hoko ʻa e meʻa ko iá, te ne lau ko ha lāngilangi ia ke mate ʻi he tuʻunga ko ha tokotaha muimui ʻo Kalaisi Sīsū.

¹⁸ Naʻe anga-fēfē ʻa e fakafeangai ʻa e fanga tokouá? Ko hono fakanounoú, ʻi ha anga-fakaʻapaʻapa. ʻOku tau lau: “ʻI he ʻikai lava ke fakalotoʻi iá, naʻe tuku ʻemau vilitakí pea mau pehē: ‘Tuku ā ke fai ʻa e finangalo ʻo Sihová.’” (Ngā. 21:14) Ko e faʻahinga naʻa nau feinga ke fakalotoʻi ʻa Paula ke ʻoua ʻe ʻalu ki Selusalemá naʻe ʻikai te nau tuʻukāivi ke fai ʻa e ngaahi meʻá ʻi heʻenau founga ʻanautolú. Naʻa nau fanongo kia Paula pea nau ʻulutukua, ʻo nau ʻiloʻi mo tali ʻa e finangalo ʻo Sihová, neongo ko e fai peheé naʻe faingataʻa ia kiate kinautolu. Naʻe ʻosi kamata ʻa Paula ia ʻi ha ʻalunga ʻa ia ʻe faai atu pē ʻo taki atu ki  heʻene maté. ʻE faingofua ange kia Paula kapau ko e faʻahinga naʻe ʻofa ʻiate iá naʻe ʻikai te nau feinga ke fakalotoʻi ia ke ʻoua te ne ʻalu.

19. Ko e hā ʻa e lēsoni mahuʻinga ʻoku tau ako mei he meʻa naʻe hoko kia Paulá?

¹⁹ ʻOku tau ako ha lēsoni mahuʻinga mei he meʻa naʻe hoko kia Paulá: ʻOku ʻikai ʻaupito te tau loto ke feinga ke fakalotoʻi ʻa e niʻihi kehé ke ʻoua te nau tuli ki ha ʻalunga feilaulauʻi-kita ʻi he tauhi ki he ʻOtuá. ʻE lava ke tau ngāueʻaki ʻa e lēsoni ko ení ʻi he ngaahi tuʻunga lahi, ʻo ʻikai ko e ngaahi tuʻunga pē ʻoku fekauʻaki mo e moʻuí mo e maté. Ko e fakatātaá, neongo kuo hoko ʻo faingataʻa ki he ngaahi mātuʻa Kalisitiane tokolahi ke sio ki he mavahe ʻenau fānaú mei ʻapi koeʻuhí ke ngāue kia Sihova ʻi he ngaahi vāhenga-ngāue mamaʻó, ʻoku nau fakapapauʻi ke ʻoua ʻe fakalotosiʻiʻi kinautolu. Ko Phyllis, ʻa ia ʻokú ne nofo ʻi ʻIngilani, ʻokú ne manatu ki he anga ʻene ongoʻí ʻi he taimi naʻe ʻalu ai ʻa ʻene taʻahine pē ʻe toko tahá ke ngāue fakamisinale ʻi ʻAfiliká. “Ko ha taimi fakalotomamahi moʻoni ia,” ko e lau ia ʻa Phyllis. “Naʻe faingataʻa kiate au ʻa e ʻiloʻi te ne fuʻu mamaʻo ʻaupitó. Naʻá ku ongoʻi loto-mamahi mo laukau ʻi he taimi tatau. Naʻá ku lotu lahi ʻo fekauʻaki mo e meʻa ko iá. Ka ko e fili ia ʻaʻana, pea naʻe ʻikai ʻaupito te u feinga ke liliu ia. He ko ē, naʻá ku akoʻi maʻu pē ia ke ne fakamuʻomuʻa ʻa e ngaahi meʻa ʻo e Puleʻangá! Kuó ne ngāue ʻi ha ngaahi vāhenga-ngāue muli ʻi he taʻu ʻe 30 kuo maliu atú, pea ʻoku ou fakamālō ʻi he ʻaho kotoa pē kia Sihova ʻi heʻene faitōnungá.” He lelei moʻoni ē ʻetau fakalototoʻaʻi ʻa e ngaahi kaungātui feilaulauʻi-kitá!

20, 21. Ko e hā ʻokú ne fakahaaʻi ʻa e holi ʻa Paula ke feohi mo e fanga tokouá, pea ko e hā naʻá ne loto ai ke feohi mo e faʻahinga naʻe tui tatau mo iá?

²⁰ Naʻe fai ʻa e ngaahi teuteú, pea naʻe hoko atu ʻa e fononga ʻa Paulá, ʻo ʻalu fakataha mo ia ha fanga tokoua ʻa ia naʻa nau fakamoʻoniʻi ai ʻa ʻenau poupou loto-ʻaufuatoó. ʻI he tuʻunga kotoa pē ʻo e fononga ki Selusalemá, naʻe feinga ai ʻa Paula mo e faʻahinga naʻe ʻalu fakataha mo iá ke feohi mo honau fanga tokoua mo e fanga tuofāfine Kalisitiané. ʻI Tāia, naʻa nau ʻilo ai ʻa e kau ākongá pea naʻa nau nofo mo kinautolu ʻi he ʻaho ʻe fitu. ʻI Tolimeasi, naʻa nau feʻiloaki ai mo honau fanga tuofāfiné mo e fanga tokouá pea naʻa nau nofo ʻaho taha mo kinautolu. ʻI Sesalia, naʻa nau nofo ai ʻi ha ngaahi ʻaho ʻi he ʻapi ʻo Filipé. Ko hono hokó, ko e niʻihi ʻo e kau ākonga mei Sesaliá naʻa nau fakafeʻao ʻa Paula mo hono ngaahi kaungāfonongá ki Selusalema, ʻa ia naʻe talitali ai kinautolu ʻe Nēsoni, ko ha ākonga fuoloa. Fakaʻosí, ʻi he aʻu ʻa e kau fonongá ki Selusalemá, ʻoku līpooti ʻe Luke “naʻe talitali fiefia kimautolu ʻe he fanga tokouá.”​—Ngā. 21:17.

²¹ ʻOku hā mahino, naʻe loto ʻa Paula ke feohi mo e faʻahinga naʻe tui tatau mo iá. Naʻe maʻu ʻe he ʻapositoló ʻa e fakalototoʻa mei hono fanga tokouá mo e fanga tuofāfiné, ʻo hangē pē ko kitautolu ʻi he ʻaho ní. ʻOku ʻikai ha veiveiua, ko e fakalototoʻa ko iá naʻá ne fakaivimālohiʻi ai ʻa Paula ke ne fehangahangai mo e kau fakafepaki loto-ʻita ʻa ia naʻa nau feinga ke tāmateʻi iá.