1-3. (a) Ko hai ʻa e kaungāfononga foʻou ʻo Paulá, pea ko e tokotaha fēfē ia? (e) Ko e hā te tau ako ki ai ʻi he vahe ko ení?

 ʻI HEʻENAU fononga ʻo kolosi atu ʻi he ngaahi konga fonua tokakovi ʻi he vahaʻa ʻo e ngaahi koló, ʻoku sio mo fakakaukau ʻa e ʻapositolo ko Paulá ki he kiʻi talavou ʻoku luelue ʻi hono tafaʻakí. Ko hono hingoá ko Tīmote. ʻI he kei talavou mo fonu ʻi he mālohí, ko Tīmoté ʻoku taʻu hongofulu tupu lahi nai pe 20 tupu siʻi. Ko e foʻi manga taki taha ʻo e fononga foʻou ko ʻení ʻokú ne ʻave ai ia ke ne mamaʻo ange mei hono ʻapí. ʻI he fakaʻau ke ʻosi atu ʻa e ʻaho ko iá, ʻoku ʻalu ke puli atu meiate kinaua ʻa e vahefonua ko Līsita mo ʻAikoniumé. Ko e hā ʻoku toka mei muʻá? ʻOku ʻi ai ha ʻilo ki ai ʻa Paula, he ko ʻene fononga fakamisinale hono uá eni. ʻOkú ne ʻiloʻi ʻe ʻi ai ʻa e ngaahi faingataʻa mo e ngaahi palopalema lahi fau. ʻE anga-fēfē nai ʻa e fekuki mo ia ʻa e kiʻi talavou ko ia ʻi hono tafaʻakí?

² ʻOku maʻu ʻe Paula ʻa e loto-falala kia Tīmote, ʻo lahi ange nai ʻi he loto-falala ʻoku maʻu ʻe he kiʻi talavou anga-fakatōkilaló ni ʻo fekauʻaki mo iá. Ko e ngaahi meʻa naʻe toki ʻosi atu ʻene hokó kuó ne ʻai ʻa Paula ke ne maʻu ʻa e tuipau lahi ange ʻi ha toe taimi ki muʻa, ʻoku fiemaʻu kiate ia ʻa e tokotaha kaungāfononga totonú. ʻOku ʻiloʻi ʻe Paula ko e ngāue ʻoku hanga mai mei muʻá​—ʻa e ʻaʻahi ki he ngaahi fakatahaʻangá ʻo fakaivimālohiʻi kinautolú​—ʻe fiemaʻu ki ai ʻa e loto-papau taʻetoeueʻia pea mo e fakakaukau fāʻūtaha ʻi he tafaʻaki ʻa e kau faifekau fefonongaʻakí. Ko e hā ʻoku ongoʻi peheni nai ai ʻa Paulá? Ko e ʻuhinga nai ʻe taha ki ai ko ha felotokehekeheʻaki naʻá ne fakatupunga ki muʻa ke mavaeua ʻa Paula mo Panepasa.

³ ʻI he vahe ko ʻení, te tau ako ai ʻa e meʻa lahi ʻo fekauʻaki mo e founga lelei taha ke fakaleleiʻi ai ʻa e ngaahi felotokehekeheʻakí. Te tau ako foki ai ki he ʻuhinga naʻe fili ai ʻe Paula ʻa Tīmote ke ne hoko ko hano kaungāfonongá, pea te tau maʻu ai ʻa e vavanga fakaefakakaukau ki he ngafa mātuʻaki mahuʻinga ʻo e faʻahinga ʻoku nau ngāue ko e kau ʻovasia sēketi ʻi he ʻaho ní.

4. Ko e hā naʻe taumuʻa ʻa Paula ke ne fai ʻi he lolotonga ʻene fononga fakamisinale hono uá?

⁴ ʻI he vahe naʻe toki ʻosi atú, naʻa tau sio ai ki he anga hono hanga ʻe hano fekau atu ʻo ha fanga tokoua ʻe toko fā​—ko Paula, Panepasa, Siutasi, mo Sailosi​—ʻo langa hake ʻa e fakatahaʻanga ʻi ʻAniteoké ʻaki ʻa e fili naʻe fai ʻe he kulupu pulé ʻo fekauʻaki mo e kamú. Ko e hā ʻa e meʻa hono hoko naʻe fai ʻe Paulá? Naʻá ne fakaofiofi atu kia Panepasa mo ha palani fononga foʻou, ʻo ne pehē: “Ta foki he taimí ni ʻo ʻaʻahi ki he fanga tokoua ʻi he kolo kotoa pē ʻa ia naʻá ta fanongonongo ai ʻa e folofola ʻa Sihová, ke vakai pe ʻoku nau fēfē.” (Ngā. 15:36) Naʻe ʻikai ke fokotuʻu ange ʻe Paula ia ha ʻaʻahi fakaekaumeʻa pē ki he kau Kalisitiane ne toki tafoki foʻou mai ko iá. ʻOku fakaeʻa ʻe he tohi ʻa Ngāué ʻa e taumuʻa kakato ʻo e fononga fakamisinale hono ua ʻa Paulá. ʻUluakí, ʻe hokohoko atu ai pē ʻene tuku atu ʻa e ngaahi tuʻutuʻuni kuo fai ʻe he kulupu pulé. (Ngā. 16:4) Ko hono uá, ʻi he tuʻunga ko ha ʻovasia fefonongaʻakí, naʻe fakapapauʻi ʻe Paula ke langa hake fakalaumālie ʻa e ngaahi fakatahaʻangá, ʻo tokoniʻi kinautolu ke nau hoko ʻo tuʻu mālohi ʻi he tuí. (Loma 1:11, 12) ʻOku anga-fēfē ʻa e muimui ʻa e kautaha ʻi onopooni ʻo e Kau Fakamoʻoni ʻa Sihová ki he sīpinga naʻe fokotuʻu ʻe he kau ʻapositoló?

5. ʻOku anga-fēfē hono ʻoatu ʻe he Kulupu Pule ʻi onopōní ʻa e tataki mo e fakalototoʻa ki he ngaahi fakatahaʻangá?

⁵ ʻI he ʻahó ni, ʻoku ngāueʻaki ʻe Kalaisi ʻa e Kulupu Pule ʻa e Kau Fakamoʻoni ʻa Sihová ke tataki ʻa ʻene fakatahaʻangá. Fakafou ʻi he ngaahi faitohi, ʻū tohi ʻi he ʻinitanetí pea kuo pulusi, ngaahi fakatahá, mo e ngaahi founga fetuʻutaki kehé, ʻoku ʻoatu ai ʻe he kau tangata pani faitōnunga ko ʻení ʻa e tataki mo e fakalototoʻa ki he ngaahi fakatahaʻanga kotoa takatakai ʻi he māmaní. ʻOku toe feinga foki ʻa e Kulupu Pulé ke tauhi maʻu ʻa e fetuʻutaki vāofi mo e fakatahaʻanga taki taha. ʻOku nau ngāueʻaki leva ai ʻa e fokotuʻutuʻu ʻovasia-fefonongaʻakí. Kuo fakanofo fakahangatonu ʻe he Kulupu Pulé ʻa e kau mātuʻa taau ʻe laui afe takatakai he māmaní ke nau hoko ko e kau ʻovasia sēketi.

6, 7. Ko e hā ha niʻihi ʻo e ngaahi fatongia ʻo e kau ʻovasia sēketí?

⁶ ʻOku tokangataha ʻa e kau ʻovasia fefonongaʻaki ʻi onopōní ki hono ʻoatu ʻa e tokanga fakafoʻituitui mo e fakalototoʻa fakalaumālie ki he faʻahinga kotoa ʻi he ngaahi fakatahaʻanga ʻoku nau ʻaʻahi ki aí. Anga-fēfē? ʻAki ʻenau muimui ki he sīpinga naʻe fokotuʻu ʻe he kau Kalisitiane ʻi he ʻuluaki senitulí ʻo hangē ko Paulá. Naʻá ne enginaki ki hono kaungāʻovasiá: “Malangaʻi ʻa e folofolá; fai fakavavevave ia ʻi he taimi faingamālie mo e taimi faingataʻa; valoki, fakatokanga mālohi, enginaki, ʻaki ʻa e anga-kātaki fakaʻaufuli mo e pōtoʻi fakafaiako. . . . Fai ʻa e ngāue ʻa ha ʻevangeliō.”​—2 Tīm. 4:2, 5.

⁷ ʻI he fehoanaki mo e ngaahi lea ko iá, ko e ʻovasia sēketí​—fakataha mo hono uaifí kapau ʻoku mali​—ʻokú ne kau fakataha atu mo e kau malanga  fakalotofonuá ʻi he ngaahi tafaʻaki kehekehe ʻo e ngāue fakamalangá. Ko e kau malanga fefonongaʻaki peheé ʻoku nau faivelenga ʻi he ngāue fakafaifekaú pea ko e kau faiako pōtoʻi​—ʻa ia ko e ongo ʻulungaanga ia ʻoku ʻi ai hono ola lelei ki he tākangá. (Loma 12:11; 2 Tīm. 2:15) Ko e faʻahinga ʻi he ngāue fakasēketí ʻoku ʻiloa lahi taha kinautolú ʻi heʻenau ʻofa feilaulauʻi-kitá. ʻOku nau foaki loto-lelei atu kinautolu, ʻo nau fononga ʻi he ngaahi ʻea ʻikai lelei pea naʻa mo e ʻi he ngaahi feituʻu fakatuʻutāmaki. (Fil. 2:3, 4) ʻOku toe fai foki ʻe he kau ʻovasia sēketí ʻa e fakalototoʻa, faiako, pea enginaki ki he fakatahaʻanga taki taha ʻo fakafou ʻi he ngaahi malanga makatuʻunga ʻi he Tohi Tapú. ʻOku maʻu ʻaonga ʻa e tokotaha kotoa ʻi he fakatahaʻangá ʻi heʻenau fakakaukauloto atu ki he ʻulungaanga ʻo e kau faifekau fefonongaʻaki ko ʻení pea ʻi he faʻifaʻitaki ki heʻenau tuí.​—Hep. 13:7.

8. Naʻe anga-fēfē ʻa e tali ʻa Panepasa ki he fakaafe ʻa Paulá?

⁸ Naʻe tali lelei ʻe Panepasa ʻa e fokotuʻu ʻa Paula ke na “ʻaʻahi ki he fanga tokoua.” (Ngā. 15:36) Naʻe ngāue lelei fakataha ʻa e ongo tangatá ni ʻi he tuʻunga ko e ongo hoa ngāue fefonongaʻaki pea naʻá na ʻosi maheni fakatouʻosi kinaua pea mo e ngaahi vahefonuá pea mo e kakai te na ʻaʻahi ki aí. (Ngā. 13:2–14:28) Ko ia ko e foʻi fakakaukau ko ia ʻo e kau fakataha ki hono fai ʻa e foʻi ngāue ko ʻení naʻe hā ngali fakapotopoto mo ʻaonga nai ia. Ka naʻe mapuna hake ha palopalema. ʻOku fakamatala ʻa e Ngāue 15:37: “Naʻe vilitaki ʻa Panepasa ke ʻave ai mo Sione, ʻa ia naʻe ui ko Maʻaké.” Naʻe ʻikai ko hano ʻoatu pē ia ʻe Panepasa ha foʻi fokotuʻu. Naʻá ne “vilitaki” ke fakakau ʻa Maʻake ʻa ia naʻá ne tokouaʻakí ke ne hoko ko ha hoa ngāue fefonongaʻaki ʻi he fononga fakamisinale ko ʻení.

9. Ko e hā naʻe ʻikai loto-tatau ai ʻa Paula mo Panepasá?

⁹ Naʻe ʻikai ke loto ki ai ʻa Paula. Ko e hā hono ʻuhingá? ʻOku pehē ʻe he fakamatalá: “Kae kehe, naʻe ʻikai loto ʻa Paula ke ʻave [ʻa Maʻake] ke nau ō, ʻi he sio atu ko ia ki heʻene mavahe meiate kinaua ʻi Pamifīlia ʻo ʻikai ke ʻalu mo kinaua ʻi he ngāué.” (Ngā. 15:38) Naʻe fononga ʻa Maʻake mo Paula mo Panepasa ʻi heʻena ʻuluaki fononga fakamisinalé ka naʻe ʻikai te ne nofo ke ʻosi ʻa e fononga ko iá. (Ngā. 12:25; 13:13) ʻI ha kamata atu pē ʻa e fononga ko iá, ʻi he lolotonga ʻenau kei ʻi Pamifīliá, naʻe mavahe ai ʻa Maʻake ia mei heʻene vāhenga-ngāué peá ne ʻalu ki hono ʻapí ki Selusalema. ʻOku ʻikai ke tala mai ia ʻe he Tohi Tapú ʻa e ʻuhinga naʻá ne mavahe aí, ka ʻoku hā mahino mai naʻe vakai ʻa e ʻapositolo ko Paulá ko e meʻa naʻe fai ʻe Maʻaké naʻe ʻikai ke anga-fakamatuʻotuʻa. ʻOku ngalingali pē naʻe fehuʻia ʻe Paula ʻa e tuʻunga alafalalaʻanga ʻo Maʻaké.

10. Ko e hā naʻe iku atu ki ai ʻa e ʻikai loto-tatau ʻa Paula mo Panepasá, pea ko e hā ʻa e olá?

¹⁰ Neongo ia, naʻe tuʻukāivi pē ʻa Panepasa ia ke ʻave ʻa Maʻake. Naʻe pehē  tofu pē ʻa e tuʻukāivi ʻa Paula ke ʻoua ʻe ʻave ʻa Maʻake ia. “ʻI he meʻá ni naʻe hoko ai ʻo na kē, ko ia naʻá na mavaeua,” ko e fakamatala ia ʻa e Ngāue 15:39. Naʻe folau ʻa Panepasa ia ʻo ne ʻalu ki hono motu tupuʻanga ko Saipaló, ʻo ne ʻave ai mo Maʻake. Naʻe hoko atu pē ʻa Paula ia ʻi heʻene ngaahi palaní. ʻOku pehē ʻe he fakamatalá: “Naʻe fili ʻe Paula ia ʻa Sailosi ʻo na mavahe ʻi he hili ia ʻa e lotu ʻa e fanga tokouá ke fakahaaʻi ʻe Sihova ʻa ʻene ʻofa maʻataʻataá kia Paula.” (Ngā. 15:40) Naʻá na fononga fakataha ai ʻo fou “ʻi Sīlia mo Silisia, ʻo fakaivimālohiʻi ʻa e ngaahi fakatahaʻangá.”​—Ngā. 15:41.

11. Ko e hā ʻa e ngaahi ʻulungaanga ʻoku fiemaʻu tefito ke taʻofi ai ha hoko ʻa ha fetēleni tuʻuloa ʻi hotau vā mo ha taha kuó ne fakaʻitaʻi kitautolu?

¹¹ ʻOku fakamanatu mai nai ʻe he fakamatala ko ʻení kiate kitautolu ʻa hotau natula taʻehaohaoá tonu. Naʻe fakanofo ʻa Paula mo Panepasa ke na hoko ko e ongo fakafofonga makehe ʻo e kulupu pulé. ʻOku ngalingali naʻe hoko ʻa Paula tonu ko ha mēmipa ia ʻo e kulupu ko iá. Neongo ia, ʻi he meʻa ko ʻeni ne hokó, naʻe ikunaʻi ʻe he ngaahi hehema taʻehaohaoa fakaetangatá ia ʻa Paula mo Panepasa. Naʻá na fakaʻatā nai ʻa e tuʻungá ni ke ne fakatupunga ha fetēleni tuʻuloa ʻi hona vaá? Neongo naʻá na taʻehaohaoa, ko Paula mo Panepasá ko e ongo tangata naʻe anga-fakatōkilalo, pea naʻá na maʻu ʻa e fakakaukau ʻa Kalaisí. ʻOku ʻikai ha veiveiua, ʻi he faai atu ʻa e taimí naʻá na fakahāhā ha laumālie ʻo e fetokouaʻaki faka-Kalisitiane pea mo e anga-fakamolemole. (ʻEf. 4:1-3) Ki mui ai, naʻe ngāue fakataha ʻa Paula mo Maʻake ʻi he ngaahi vāhenga-ngāue fakateokalati kehe. a​—Kol. 4:10.

12. Ko e hā ʻoku totonu ke ʻulungaangaʻaki ʻe he kau ʻovasia ʻi onopōní, ʻi he faʻifaʻitaki kia Paula mo Panepasá?

¹² Ko e foʻi felāuaki ʻe taha ko ʻení naʻe ʻikai ke ʻulungaangaʻaki ia ʻe Panepasa pe ko Paula. Naʻe ʻiloa ʻa Panepasa ko ha tangata loto-ʻofa mo nima-homo​—ʻo aʻu ki ha tuʻunga ʻo ʻikai ke kei ui ai ia ʻaki hono hingoa totonú, ʻa e Siosifá, ka naʻe ui ia ʻe he kau ʻapositoló ko Panepasa, ʻa ia ko hono ʻuhingá ko e “Foha ʻo e Fakafiemālié.” (Ngā. 4:36) Naʻe toe ʻiloa foki mo Paula ʻi heʻene manavaʻofá mo ʻene natula anga-fakaalaalá. (1 Tes. 2:7, 8) ʻI he faʻifaʻitaki kia Paula mo Panepasá, ko e kau ʻovasia Kalisitiane kotoa ʻi he ʻaho ní, ʻo kau ai ʻa e kau ʻovasia sēketí, ʻoku totonu ke nau feinga maʻu pē ke fakahāhā ʻa e anga-fakatōkilaló pea ke tōʻongafai ki honau ngaahi kaungāmātuʻá pea pehē foki ki he tākangá fakakātoa ʻi he manavaʻofa.​—1 Pita 5:2, 3. 

13, 14. (a) Ko hai ʻa Tīmote, pea ko e hā ʻa e ngaahi tuʻunga naʻe feʻiloaki nai ai ʻa Paula mo iá? (e) Ko e hā naʻá ne taki atu ʻa Paula ke ne tokanga makehe kia Tīmoté? (f) Ko e hā ʻa e ngāue naʻe vaheʻi ange kia Tīmoté?

¹³ Ko e fononga fakamisinale hono ua ʻa Paulá naʻá ne ʻave ai ia ki he vahefonua Loma ko Kalētiá, ʻa ia naʻe ʻosi fokotuʻu ai ha ngaahi fakatahaʻanga ʻe  niʻihi. Faai atu pē “naʻá ne aʻu ki Teape pea mo Līsita foki.” ʻOku hoko atu ʻa e fakamatalá: “Naʻe ʻi ai ha ākonga ko hono hingoá ko Tīmote, ko e tama ʻa ha fefine Siu naʻe tui, ka ko ʻene tamaí ko e Kalisi.”​—Ngā. 16:1. b

¹⁴ ʻOku hā mahino, naʻe ʻosi feʻiloaki ʻa Paula mo e fāmili ʻo Tīmoté ʻi heʻene ʻuluaki fononga ki he feituʻu ko ení ʻi he taʻu 47 T.S. nai. ʻI he lolotonga ko ʻeni ʻene ʻaʻahi hono ua ʻi he taʻu ʻe ua pe tolu mei aí, naʻe tokanga makehe ai ʻa Paula ki he kiʻi talavou ko Tīmoté. Ko e hā hono ʻuhingá? Koeʻuhí ko Tīmoté “naʻe talanoaʻi ʻa e lelei ʻa hono ongoongó ʻe he fanga tokoua.” Naʻe ʻikai ngata pē ʻi he leleiʻia ʻa e fanga tokoua ʻi hono kolo tupuʻangá ʻiate iá ka naʻe ongona ʻa hono ongoongó ʻo fakalaka atu ia ʻi he fakatahaʻanga naʻá ne kau ki aí. ʻOku pehē ʻe he fakamatalá ko e fanga tokoua ʻi Līsita mo ʻAikoniumé fakatouʻosi, ʻa ia ko hona vāmamaʻó ko e kilomita ʻe 30 nai, naʻa nau leaʻaki ha ngaahi meʻa lelei ʻo fekauʻaki mo ia. (Ngā. 16:2) ʻI hono tataki ʻe he laumālie māʻoniʻoní, naʻe tuku atu ʻe he kau mātuʻá ki he talavou ko Tīmoté ha fatongia mafatukituki​—ke tokoni kia Paula mo Sailosi ʻi he tuʻunga ko ha faifekau fefonongaʻaki.​—Ngā. 16:3.

15, 16. Naʻe anga-fēfē hono maʻu ʻe Tīmote ha ongoongo lelei pehē faú?

¹⁵ Naʻe anga-fēfē hono maʻu ʻe Tīmote ha ongoongo lelei pehē fau ʻi heʻene kei taʻu siʻí? Naʻá ne maʻu iá koeʻuhí ko ʻene ʻatamai leleí, ko hono fōtunga hāmai fakasinó, pe ko ʻene ngaahi malava fakaenatulá? Ko e faʻahinga ʻo e tangatá ʻoku faʻa maongo kiate kinautolu ʻa e ngaahi anga ko iá. Naʻa mo e palōfita ko Sāmiuelá naʻe ʻi ai ʻa e taimi ʻe taha naʻe tākiekina tōtuʻa ia ʻe he fōtunga hāmai ki tuʻá. Kae kehe, naʻe fakamanatu ange ʻe Sihova kiate ia: “Talaʻehai ko e fai ki he sio ʻa e tangata; he ʻoku sio ʻa e tangata ki he mata, ka ʻoku sio ʻa e ʻEiki [Sihova] ki he loto.” (1 Sām. 16:7) ʻI he ʻikai ko e tupu mei ha faʻahinga malava fakafoʻituituí, naʻe maʻu ʻe Tīmote ʻa e ngaahi ʻulungaanga ʻi loto ʻa ia naʻe tupu ai ʻene maʻu ha ongoongo lelei ʻi he haʻohaʻonga ʻo hono ngaahi kaungā-Kalisitiané.

¹⁶ ʻI ha ngaahi taʻu ki mui ai, naʻe lave ai ʻa e ʻapositolo ko Paulá ki he niʻihi ʻo e ngaahi ʻulungaanga fakalaumālie ʻo Tīmoté. Naʻe fakamatala ʻa Paula ki he hehema fakaefakakaukau lelei ʻa Tīmoté, ko ʻene ʻofa feilaulauʻi-kitá, pea mo ʻene tōtōivi ʻi hono tokangaʻi ʻa e ngaahi fatongia fakateokalatí. (Fil. 2:20-22) Naʻe toe ʻiloa foki ʻa Tīmote ʻi heʻene maʻu ʻa e “tui taʻemālualoi.”​—2 Tīm. 1:5.

17. ʻE lava fēfē ke faʻifaʻitaki ʻa e kau talavou ʻi he ʻaho ní kia Tīmote?

¹⁷ ʻI he ʻahó ni, ʻoku faʻifaʻitaki ʻa e kau talavou tokolahi kia Tīmote ʻaki hono fakatupulekina ʻa e ngaahi ʻulungaanga fakaʻotuá. ʻOku nau maʻu leva ai ha ongoongo lelei ʻi he vakai mai ʻa Sihová pea mo ʻene kakaí, naʻa mo e ʻi he kei taʻu siʻí. (Pal. 22:1; 1 Tīm. 4:15) ʻOku nau fakahāhā ʻa e tui  taʻemālualoi, ʻo nau fakafisi ke moʻui ʻi ha moʻui lōua. (Saame 26:4) Ko hono olá, ʻoku lava ai ʻa e kau talavou tokolahi, hangē ko Tīmoté, ʻo nau fakahoko ha ngafa mahuʻinga ʻi he fakatahaʻangá. He fakalototoʻa lahi moʻoni ē ki he kau ʻofa kotoa kia Sihova ʻoku takatakai kiate kinautolú ʻi he taimi ʻoku nau taau ai ke hoko ko e kau malanga ʻo e ongoongo leleí pea faai atu pē ʻo nau fai ha fakatapui kia Sihova pea nau papitaisó!

18. (a) Ko e hā ʻa e ngaahi monū naʻe maʻu ʻe Paula mo Tīmote ʻi he tuʻunga ko e ongo faifekau fefonongaʻakí? (e) Naʻe anga-fēfē hono tāpuakiʻi ai ʻa e ngaahi fakatahaʻangá?

¹⁸ Naʻe ngāue fakataha ʻa Paula mo Tīmote ʻi ha ngaahi taʻu. ʻI he tuʻunga ko e ongo faifekau fefonongaʻakí, naʻá na fakahoko ʻa e ngaahi fononga kehekehe maʻá e kulupu pulé. ʻOku pehē ʻe he fakamatala ʻa e Tohi Tapú: “ʻI heʻenau fononga atu ʻi he ngaahi koló, naʻa nau tuku atu ai pē kiate kinautolu ʻa e ngaahi tuʻutuʻuni ke tauhi ʻa ia kuo ʻosi fai ʻa e fili ki ai ʻa e kau ʻapositoló mo e kau mātuʻa naʻe ʻi Selusalemá.” (Ngā. 16:4) ʻOku hā mahino, naʻe muimui ʻa e ngaahi fakatahaʻangá ki he tataki mei he kau ʻapositoló pea mo e kau mātuʻa ʻi Selusalemá. Ko hono ola ʻo e talangofua peheé, “naʻe hokohoko atu ʻa hono ʻai ʻa e ngaahi fakatahaʻangá ke tuʻu mālohi ʻi he tuí mo tupulekina ai pē honau tokolahí ʻi he ʻaho ki he ʻaho.”​—Ngā. 16:5.

19, 20. Ko e hā ʻoku totonu ai ke talangofua ʻa e kau Kalisitiané ki he “faʻahinga ʻoku nau takimuʻa”?

¹⁹ ʻI he tuʻunga meimei tatau, ʻoku maʻu ʻe he Kau Fakamoʻoni ʻa Sihova ʻi he ʻaho ní ʻa e ngaahi tāpuaki ʻoku haʻu mei he talangofua fakamoʻulaloa ki he tataki ʻoku nau maʻu mei he “faʻahinga ʻoku nau takimuʻa” ʻi honau lotolotongá. (Hep. 13:17) Koeʻuhí ko e feliuliuaki maʻu pē ʻa e tuʻunga ʻo e māmaní, ʻoku mātuʻaki mahuʻinga ki he kau Kalisitiané ke nau hanganaki laka fakataha mo e meʻakai fakalaumālie kuo tokonaki mai ʻe he “tamaioʻeiki anga-tonu mo potó.” (Māt. 24:45; 1 Kol. 7:29-31) ʻI he fai peheé ʻe lava ke kalofi ai ʻa e fakatamaki fakalaumālié pea tokoniʻi ai kitautolu ke tau nofoʻaki taʻehaʻila mei he māmaní.​—Sēm. 1:27.

²⁰ Ko e moʻoni, ko e kau ʻovasia Kalisitiane ʻi onopōní, ʻo kau ai ʻa e ngaahi mēmipa ʻo e Kulupu Pulé, ʻoku nau taʻehaohaoa, ʻo hangē pē ko Paula, Panepasa, Maʻake, pea mo e kau mātuʻa pani kehe ʻi he ʻuluaki senitulí. (Loma 5:12; Sēm. 3:2) Ka koeʻuhí ko e muimui pau ʻa e Kulupu Pulé ki he Folofola ʻa e ʻOtuá pea nau pipiki ki he sīpinga naʻe fokotuʻu ʻe he kau ʻapositoló, ʻoku nau fakamoʻoniʻi mai ai ko kinautolú ʻoku nau alafalalaʻanga. (2 Tīm. 1:13, 14) Ko hono olá, ʻoku fakaivimālohiʻi mo ʻai ai ʻa e ngaahi fakatahaʻangá ke nau tuʻu mālohi ʻi he tuí.