1-3. (a) Naʻe anga-fēfē hono hokosia ʻe Paula mo hono ongo kaungāfonongá ʻa e tataki ʻa e laumālie māʻoniʻoní? (e) Ko e hā ʻa e ngaahi meʻa naʻe hoko te tau lāulea ki aí?

 ʻOKU mavahe ha kulupu ʻo e kau fefine mei he kolo ko Filipaí ʻa ē ʻoku ʻi Masitōniá. ʻIkai ke fuoloa, ʻoku nau aʻu ki he vaitafe fāsiʻi ko Kanisītisí. Hangē ko ia ʻoku nau angaʻakí, ʻoku nau tangutu hifo ʻi he veʻe vaitafé ke fai ʻenau lotu ki he ʻOtua ʻo ʻIsilelí. ʻOku ʻafio hifo ʻa Sihova kiate kinautolu.​—2 Kal. 16:9; Saame 65:2.

² Lolotonga iá, laka hake he kilomita ʻe 800 ʻi he fakahahake ʻo Filipaí, ʻoku mavahe ai ha kulupu ʻo e kau tangata mei he kolo ko Līsitá ʻi he fakatonga ʻo Kalētiá. ʻI ha ngaahi ʻaho ki mui ai, ʻoku nau aʻu ai ki ha hala tanu Loma ʻa ia naʻe huʻu fakahihifo ki he vahefonua nofoʻi lahi taha ʻo e vāhenga ʻo ʻĒsiá. Ko e kau tangatá​—ko Paula, Sailosi, mo Tīmote​—ʻoku nau vēkeveke ke fononga atu ʻi he hala ko iá koeʻuhí ke nau ʻaʻahi ai ki ʻEfesō pea mo e ngaahi kolo kehé ʻa ia ʻoku laui afe ai ʻa e kakai ʻoku fiemaʻu ke nau fanongo ʻo fekauʻaki mo Kalaisi. Neongo ia, naʻa mo e ki muʻa ke lava ke nau kamata ʻa e fononga ko iá, ʻoku taʻofi kinautolu ʻe he laumālie māʻoniʻoní ʻi ha founga ʻoku ʻikai ke fakahaaʻi mai. ʻOku tapui kinautolu ke ʻoua te nau malanga ʻi ʻĒsia. Ko e hā hono ʻuhingá? Ko Sīsū​—fakafou ʻi he laumālie ʻo e ʻOtuá​—ʻokú ne loto ke taki ʻa Paula mo hono ongo kaungāfonongá ʻo fou atu ʻi ʻĒsia Maina, ʻo kolosi atu ʻi he Tahi ʻĪsiní, pea faai atu ai pē ʻo aʻu ki he ngaahi veʻe vaitafe ʻo e kiʻi vaitafe siʻisiʻi ko ia naʻe ui ko Kanisītisí.

³ Ko e anga hono taki ʻe Sīsū ʻa Paula mo hono ongo kaungāfonongá lolotonga ʻa e fononga anga-kehe ko ia ki Masitōniá ʻoku ʻi ai ha ngaahi lēsoni mahuʻinga ai kiate kitautolu ʻi he ʻaho ní. Ko ia ai, tau vakai angé ki ha niʻihi ʻo e ngaahi meʻa naʻe hoko ʻi he lolotonga ʻa e fononga fakamisinale hono ua ʻa Paulá, ʻa ia naʻe kamata ʻi he 49 T.S. nai.

4, 5. (a) Ko e hā naʻe hoko kia Paula mo hono ongo kaungāfonongá ʻi heʻenau ofi atu ki Pitiniá? (e) Ko e hā ʻa e fili naʻe fai ʻe he kau ākongá, pea ko e hā ʻa e olá?

⁴ ʻI hono taʻofi kinautolu mei he malanga ʻi ʻĒsiá, naʻe hanga  fakatokelau ai ʻa Paula mo hono ongo kaungāfonongá ke nau malanga ʻi he ngaahi kolo ʻo Pitiniá. Ke aʻu ki aí, naʻa nau lue nai ʻi ha ngaahi ʻaho ʻi he ngaahi hala naʻe ʻikai tanu ʻi he vahaʻa ʻo e ngaahi vahefonua nofoʻi tōtō holo ʻo Filisia mo Kalētiá. Kae kehe, ʻi he taimi naʻa nau ofi atu ai ki Pitiniá, naʻe toe ngāueʻaki ai ʻe Sīsū ʻa e laumālie māʻoniʻoní ke taʻofi kinautolu. (Ngā. 16:6, 7) ʻI he aʻu mai ki he taimi ko iá, kuo pau pē naʻe puputuʻu ʻa e kau tangatá. Naʻa nau ʻiloʻi ʻa e meʻa ke malangaʻakí pea mo e founga ke malanga aí, ka naʻe ʻikai te nau ʻiloʻi ʻa e feituʻu ke nau malanga aí. Naʻa nau ʻosi tukituki, ʻo hangē ko e laú, ʻi he matapā naʻe taki atu ki ʻĒsiá​—ka naʻe hoko ia ko e koto kulanoa. Naʻa nau ʻosi tukituki ʻi he matapā naʻe taki atu ki Pitiniá​—ka naʻe toe hoko pē ia ko e koto kulanoa. Ka neongo ia, naʻe fakapapauʻi ʻe Paula ke hanganaki tukituki pē kae ʻoua kuó ne maʻu ha matapā ʻa ia ʻe ava mai. Naʻe fai leva ʻe he kau tangatá ha fili ʻa ia naʻe hā ngali fakavalevale nai. Naʻa nau hanga fakahihifo ʻo nau lue he kilomita ʻe 550, ʻo fakalaka atu ʻi he kolo ki he kolo kae ʻoua kuo nau aʻu ki he taulanga ʻo Taloasí, ʻa ia ko e hūʻanga fakanatula ia ki Masitōniá. (Ngā. 16:8) ʻI aí, ko hono tuʻo tolú ia, naʻe tukituki ai ʻa Paula ʻi ha matapā, pea​—ʻio!​—naʻe fakaava lahi mai ia kiate ia.

⁵ Ko e tokotaha tohi Kōsipeli ko Luké, ʻa ia naʻá ne kau mai kia Paula mo hono ongo kaungāfonongá ʻi Taloasi, ʻokú ne fakamatala ki he meʻa naʻe hokó: “ʻI he lolotonga ʻa e poʻulí naʻe hā kia Paula ha vīsone​—ko ha tangata Masitōnia naʻe tuʻu ai ʻo kōlenga kiate ia ʻo pehē: ‘Laka mai ki Masitōnia ʻo tokoniʻi kimautolu.’ ʻI he hili pē ʻene mamata ki he vīsoné, naʻa mau feinga ke ʻalu ki Masitōnia, ʻi he fakamulituku kuo ui kimautolu ʻe he ʻOtuá ke talaki ʻa e ongoongo leleí kiate kinautolu.” a (Ngā. 16:9, 10) Kuo faifai ange eni pea ʻiloʻi ʻe Paula ʻa e feituʻu ke malanga aí. He fiefia moʻoni ē kuo pau naʻe ongoʻi ʻe Paula ʻi he ʻikai te ne foʻi pē ʻi he vaeua ʻo e fonongá! Tuai-e-kemo, naʻe tukufolau ʻa e kau tangata ʻe toko faá ki Masitōnia.

6, 7. (a) Ko e hā ʻa e lēsoni ʻe lava ke tau ako mei he meʻa naʻe hoko ʻi he lolotonga ʻa e fononga ʻa Paulá? (e) Ko e hā ʻa e meʻa ʻe lava ke tau fakapapauʻi mei he hokosia ʻa Paulá?

⁶ Ko e hā ʻa e lēsoni ʻe lava ke tau ako mei he fakamatala ko iá? Fakatokangaʻi ange eni: Naʻe toki kau mai pē ʻa e laumālie ʻo e ʻOtuá ʻi he hili ko ia ʻa e kamata fononga ʻa Paula ki ʻĒsiá, naʻe toki kau mai pē ʻa Sīsū ʻi he hili ko ia ʻa e ofi ʻa Paula ki Pitiniá, pea naʻe toki taki pē ia ʻe Sīsū ki Masitōnia ʻi he hili ko ia ʻa e aʻu ʻa Paula ki Taloasí. Ko Sīsū, ʻi hono tuʻunga ko e ʻUlu ʻo e fakatahaʻangá, te ne fakafeangai mai nai kiate kitautolu ʻi ha tuʻunga meimei tatau ʻi he ʻahó ni. (Kol. 1:18) Hangē ko ʻení, kuo tau fakakaukau nai ʻi ha taimi ʻo fekauʻaki mo e hoko ko ha tāimuʻa pe ko e hiki ki ha feituʻu ʻa ia ʻoku lahi ange ai ʻa e fiemaʻu ki ha kau malanga ʻo e Puleʻangá. Kae kehe, ʻe toki hanga pē nai ʻe Sīsū, fakafou he laumālie ʻo e ʻOtuá, ʻo tataki kitautolú, ʻi he hili ko ia ʻetau laka ʻi ha ngaahi sitepu pau ke aʻusia ai ʻa ʻetau taumuʻá. Ko e hā hono ʻuhingá? Fakakaukau atu ki he fakatātā ko ení: ʻE lava ʻe ha tokotaha fakaʻuli ʻo ʻai ke afe ʻene meʻalelé ki toʻohema pe ki toʻomataʻu ʻo  kapau pē ʻoku ngaʻunu ʻo lele ʻa e meʻalelé. ʻI he tuʻunga meimei tatau, ʻoku tataki kitautolu ʻe Sīsū ʻi hono fakalahi ʻetau ngāue fakafaifekaú, ʻo kapau pē ʻoku tau ngaʻunu atu​—kapau ʻoku tau fai ha feinga moʻoni ke fai ia.

⁷ Kae fēfē kapau ʻoku ʻikai ke ʻi ai ha fua ia ʻo ʻetau ngaahi feingá ʻi he taimi pē ko iá? ʻOku totonu nai ke tau foʻi, ʻo tau fakakaukau ʻoku ʻikai ke tataki kitautolu ʻe he laumālie ʻo e ʻOtuá? ʻIkai. Manatuʻi naʻe fetaulaki foki ʻa Paula mo ha ngaahi fakafaingataʻaʻiaʻanga. Neongo ia, naʻá ne hanganaki kumi ʻo aʻu ʻo ne maʻu ha matapā naʻe fakaava ange. ʻE lava ke tau fakapapauʻi ko ʻetau kītaki ko ia ʻi he kumi ki ha “faingamālie lahi ke fakahoko ai [ʻetau] ngāué” ʻe fakapaleʻi pehē pē.​—1 Kol. 16:9.

8. (a) Fakamatalaʻi angé ʻa e kolo ko Filipaí. (e) Ko e hā ʻa e meʻa fakafiefia naʻe hoko ko e ola ia ʻo e malanga ʻa Paula ʻi ha “feituʻu faiʻanga lotu”?

⁸ ʻI he hili ʻa e aʻu ki he vahefonua ʻo Masitōniá, naʻe fononga ʻa Paula mo hono ngaahi kaungāfonongá ki Filipai​—ko ha kolo ʻa ia ko hono kakaí naʻa nau pōlepoleʻaki ʻenau hoko ko ia ko ha kau tangataʻifonua Lomá. Ki he kau sōtia Loma mālōlō naʻa nau nofo aí, ko e kolonia ko ia ko Filipaí naʻe hangē pē ia ha kiʻi ʻĪtali siʻisiʻí​—ko ha kiʻi Loma siʻi ʻa ia naʻe tuʻu ʻi Masitōnia. ʻI tuʻa ʻi he matapā ʻo e koló, ʻi ha veʻe vaitafe fāsiʻi, naʻe maʻu ai ʻe he kau misinalé ha foʻi feituʻu ʻa ia naʻa nau fakakaukau naʻe ʻi ai “ha feituʻu faiʻanga lotu.” b ʻI he Sāpaté, naʻa nau ʻalu hifo ki he foʻi feituʻu ko iá ʻo nau ʻilo ai ha kau fefine tokotokolahi naʻa nau fakatahataha ai ke nau lotu ki he ʻOtuá. Naʻe tangutu hifo ʻa e kau ākongá ʻo nau talanoa kiate kinautolu. Ko ha fefine ko  hono hingoá ko Litia “naʻá ne fanongo, pea naʻe mātuʻaki fakaava ʻe Sihova hono lotó.” Naʻe ueʻi lahi ʻa Litia ʻe he meʻa naʻá ne ako mei he kau misinalé ʻo ne hoko ai mo hono falé ʻo papitaiso. Naʻá ne ʻai leva ʻa Paula mo hono ngaahi kaungāfonongá ke nau omi ʻo nofo ʻi hono ʻapí. c​—Ngā. 16:13-15.

9. Kuo anga-fēfē ʻa e faʻifaʻitaki ʻa e tokolahi he ʻahó ni ki he faʻifaʻitakiʻanga ʻa Paulá, ʻo iku ai ki he ngaahi tāpuaki ko e hā?

⁹ Fakaʻuta atu ki he fiefia naʻe hoko ʻi he papitaiso ʻa Litiá! He fiefia moʻoni ē kuo pau naʻe hoko kia Paulá ʻi heʻene tali ʻa e fakaafe ange ke ne “laka mai ki Masitōnia” pea ʻi he vakai ʻa Sihova ʻoku feʻungamālie ke ngāueʻaki ia mo hono ngaahi kaungāfonongá ke tali ai ʻa e ngaahi lotu ʻa e kau fefine manavahē-ʻOtua ko iá! ʻI he ʻahó ni, ko e fanga tokoua mo e fanga tuofāfine tokolahi​—kei siʻi mo e taʻumotuʻa, taʻemali mo e ʻosi mali​—ʻoku pehē pē ʻenau hiki ki he ngaahi feituʻu ʻa ia ʻoku lahi ange ai ʻa e fiemaʻu ki ha kau malanga ʻo e Puleʻangá. Ko e moʻoni, ʻoku nau fekuki mo e faingataʻá, ka ʻoku mōlia atu ia ʻi hono fakahoa atu ki he fiemālie ʻoku nau ongoʻí ʻi heʻenau maʻu ko ia ʻa e kakai hangē ko Litiá, ʻa ia ʻoku nau tali ʻa e ngaahi moʻoni ʻo e Tohi Tapú. ʻE lava ke ke fai ha ngaahi fengaʻunuʻaki ʻa ia te ne ʻai koe ke ke malava ʻo “laka mai” ki ha feituʻu ngāue ʻoku lahi ange ai ʻa e fiemaʻú? ʻOku fakatatali mai kiate koe ha ngaahi tāpuaki. Ko e fakatātaá, fakakaukau angé kia Aaron, ko ha tokoua ʻi hono taʻu 20 tupú ʻa ia naʻá ne hiki ki ha feituʻu ʻi ʻAmelika Lotoloto. ʻOkú ne fakaongo mai ʻa e ngaahi ongoʻi ʻa e tokolahi ʻi heʻene pehē: “Ko e ngāue ʻi mulí kuó ne tokoniʻi au ke u tupu fakalaumālie pea ke u ʻunuʻunu ofi ange ai kia Sihova. Pea ʻoku fakalata ʻa e malaʻe malangá​—ʻoku ou fakahoko ha ngaahi ako Tohi Tapu ʻe valu!”

10. Naʻe anga-fēfē ʻa e kau mai ʻa e ngāue fakatēmenioó ʻi hono fakatupunga ʻa e fakafepaki kia Paula mo hono ngaahi kaungāfonongá?

¹⁰ Kuo pau pē naʻe ʻita lahi ʻa Sētane ʻi hono maʻu ko ʻeni ʻe he ongoongo leleí ha fakavaʻe ʻi ha konga ʻo e māmaní ʻa ia naʻe teʻeki ai nai ke poleʻi ai ia mo ʻene fanga tēmenioó. Pea tāneʻineʻi ke kau mai ʻa e ngāue fakatēmenioó ʻi hono fakatupunga ʻa e fakafepaki kia Paula mo hono ngaahi kaungāfonongá! ʻI heʻenau hokohoko atu ʻenau ʻaʻahi ki he feituʻu faiʻanga lotú, naʻe ʻi ai ha taʻahine kaunanga ne uluisino ai ha tēmeniō, ʻa ia naʻá ne maʻu mai ha paʻanga maʻa hono ngaahi ʻeikí mei hono fai ʻo e kikité, naʻá ne hanganaki muimui mai kia Paula mo hono ngaahi kaungāfonongá, ʻo ne kaikaila: “Ko e kau tangatá ni ko e kau tamaioʻeiki ʻa e ʻOtua Fungani Māʻolungá pea ʻoku nau fanongonongo kiate kimoutolu ʻa e ʻalunga ʻo e fakamoʻuí.” ʻOku ngalingali naʻe ʻai ʻe he tēmenioó ʻa e taʻahiné ke ne kailaʻaki ʻa e ngaahi leá ni ke ʻai ke hā ngali ko e ngaahi kikite ʻa e taʻahiné mo e ngaahi akonaki ʻa Paulá ko e haʻu pē mei he matavai tatau. ʻI he founga ko iá, ʻe lava ke afeʻi ai ʻa e tokanga ʻa e faʻahinga naʻe mamatá  mei he kau muimui moʻoni ʻo Kalaisí. Ka naʻe fakasīlongoʻi ʻe Paula ʻa e taʻahiné ʻaki hono kapusi ʻa e tēmenioó.​—Ngā. 16:16-18.

11. Hili hono kapusi ʻa e tēmenioó mei he taʻahiné, ko e hā naʻe hoko kia Paula mo Sailosí?

¹¹ ʻI he taimi naʻe ʻiloʻi ai ʻe he faʻahinga naʻe ʻonautolu ʻa e taʻahine kaunangá kuo mole ʻa ʻenau maʻuʻanga paʻanga faingofuá, naʻa nau teketekelili. Naʻa nau fau atu ʻa Paula mo Sailosi ki he feituʻu faiʻanga fakataú, ʻa ia naʻe fai ai ʻe he kau pulé​—ʻa ia ko e kau ʻōfisa naʻa nau fakafofongaʻi ʻa Lomá​—ʻa e ngaahi meʻa fakaefakamāú. Naʻe feinga ʻa e faʻahinga naʻe ʻonautolu ʻa e taʻahiné ke ʻai ke ongo lelei ki he tomuʻa fehiʻa pea mo e mamahiʻi-fonua ʻa e kau fakamāú, ʻo nau pehē, hangē ko e laú: ‘Ko e ongo Siu ko ʻení ʻokú na fakatupunga ha fakahohaʻa ʻaki ʻena faiakoʻaki ʻa e ngaahi anga ʻa ia ʻe ʻikai lava ke tali ia ʻe kitautolu kau Lomá.’ Tuai-e-kemo naʻe ola ʻa ʻenau ngaahi leá. “Naʻe tutuʻu fakataha hake ʻa e fuʻu kakaí [ʻi he feituʻu faiʻanga fakataú] ke fakafepakiʻi kinaua [ʻa Paula mo Sailosi],” pea naʻe tuʻutuʻuni ʻe he kau pulé ke “tā kinaua ʻaki ha ngaahi vaʻakau.” ʻI he hili iá, naʻe fau atu ʻa Paula mo Sailosi ki he pilīsoné. Naʻe lī ʻe he selá ʻa e ongo tangata lavelavea ko ení ki he pilīsone naʻe tuʻu ʻi lotó pea lokaʻi hona vaʻé ʻi he ʻakau-kīʻí. (Ngā. 16:19-24) ʻI he taimi naʻe tāpuniʻi ai ʻe he selá ʻa e matapaá, ko e fakapoʻuli ʻi he loki pilīsone ko iá naʻe fuʻu matolu ʻaupito ʻo ʻikai ha veiveiua naʻe ʻikai meimei lava ʻa Paula mo Sailosi ke na fesiofaki. Ka neongo iá, naʻe ʻafio hifo ʻa Sihova ki ai.​—Saame 139:12.

12. (a) Naʻe anga-fēfē ʻa e vakai ʻa e kau ākonga ʻa Kalaisí ki he fakatangá, pea ko e hā hono ʻuhingá? (e) Ko e hā ʻa e ngaahi founga ʻo e fakafepakí ʻoku kei ngāueʻaki ʻe Sētane mo hono kau fakafofongá?

¹² ʻI he ngaahi taʻu ki muʻa atú, naʻe tala ai ʻe Sīsū ki heʻene kau muimuí: “Te nau fakatangaʻi mo kimoutolu.” (Sione 15:20) Ko ia ai, ʻi he taimi naʻe laka mai ai ʻa Paula mo hono ngaahi kaungāfonongá ki Masitōniá, naʻa nau ʻosi mateuteu kinautolu ke fehangahangai mo e fakafepakí. ʻI he taimi naʻe haʻaki mai ai ʻa e fakatangá, naʻa nau vakai ki ai, ʻo ʻikai ko ha fakaʻilonga ia ʻo e ʻikai hōifua mai ʻa Sihová, ka ko ha fakahāhā ia ʻo e ʻita ʻa Sētané. ʻI he ʻahó ni, ʻoku kei ngāueʻaki pē ʻe he kau fakafofonga ʻo Sētané ʻa e ngaahi founga meimei tatau mo ia naʻe ngāueʻaki ʻi Filipaí. Ko e kau fakafepaki kākaá ʻoku nau fai ʻa e ngaahi talanoa taʻemoʻoni fekauʻaki mo kitautolu ʻi he ʻapiakó pea ʻi he ngāueʻangá, ʻo nau tafunaki ai ʻa e fakafepakí. ʻI he ngaahi fonua ʻe niʻihi, ko e kau fakafepaki fakalotú ʻoku nau talatalaakiʻi kitautolu ʻi he fakamaauʻangá, ʻo nau pehē, hangē ko e laú: ‘Ko e Kau Fakamoʻoni ko ʻení ʻoku nau fakatupunga ha fakahohaʻa ʻaki ʻenau faiakoʻaki ʻa e ngaahi anga ʻa ia ʻe ʻikai lava ke tali ia ʻe kitautolu “kau tui ki he talatukufakaholó.”’ ʻI he ngaahi feituʻu ʻe niʻihi, ʻoku haha ai pea lī ki pilīsone ʻa hotau ngaahi kaungālotú. Ka neongo ia, ʻoku ʻafio hifo ʻa Sihova ki ai.​—1 Pita 3:12.

13. Ko e hā naʻá ne fakatupunga ʻa e selá ke ne ʻeke: “Ko e hā kuo pau ke u fai ke fakahaofi ai aú?”

¹³ Kuo pau pē naʻe fiemaʻu kia Paula mo Sailosi ha taimi ke na fakaakeake  ai mei he ngaahi meʻa fakalilifu naʻe hoko ʻi he ʻaho ko iá. Kae kehe, ʻi he tuʻapoó, naʻá na ake mai ai mei hona hahá ʻo aʻu ki he tuʻunga naʻá na “lotu . . . mo fakahīkihikiʻi ʻa e ʻOtuá ʻaki ha hiva.” Fakafokifā leva, naʻe luluʻi ʻe ha mofuike ʻa e pilīsoné! Naʻe ʻā hake ʻa e selá, ʻo ne sio ki he ava ʻa e ngaahi matapaá, pea naʻá ne ilifia naʻa kuo hola ʻa e kau pōpulá ia. ʻI heʻene ʻiloʻi ʻe tauteaʻi ia ʻi hono fakaʻatā kinautolu ke nau holá, naʻá ne “unuhi hake ʻene heletaá ʻo ne teu ke ne tāmateʻi pē ia.” Ka naʻe kaila atu ʻa Paula: “ʻOua te ke fai ha meʻa kiate koe, he ʻoku mau ʻi heni kotoa!” Naʻe ʻeke ange ʻe he sela hohaʻatuʻu ko ʻení: “Ongo matāpule, ko e hā kuo pau ke u fai ke fakahaofi ai aú?” Heʻikai lava ʻe Paula mo Sailosi ke na fakahaofi ia; ko Sīsū pē te ne lavá. Ko ia naʻá na tali ange: “Tui ki he ʻEiki ko Sīsuú, pea ʻe fakahaofi koe.”​—Ngā. 16:25-31.

14. (a) Ko e hā ʻa e tokoni naʻe fai ʻe Paula mo Sailosi ki he selá? (e) Ko e hā ʻa e tāpuaki naʻe maʻu ʻe Paula mo Sailosi ʻi heʻena fehangahangai mo e fakatangá ʻi he fiefiá?

¹⁴ Naʻe fai loto-moʻoni nai ʻa e fehuʻi ʻa e selá? Naʻe ʻikai ke hanga ʻe Paula ʻo fehuʻia ʻa e loto-totonu ʻa e tangatá ni. Ko e selá ko ha Senitaile, naʻe ʻikai te ne maheni mo e Folofolá. Ki muʻa ke ne hoko ko ha Kalisitiané, naʻe fiemaʻu ia ke ne ako pea tali ʻa e ngaahi moʻoni Fakatohitapu tefitó. Ko ia naʻe fakamoleki ai ʻe Paula mo Sailosi ha taimi ke na leaʻaki “ʻa e folofola ʻa Sihová kiate ia.” Lolotonga ʻena mātuʻaki nōfoʻi ʻi he faiakoʻaki ʻa e Folofolá, naʻe ngalo nai ai ʻi he ongo tangatá ʻa ʻena felāngaaki mei he ngaahi haha naʻe fai kiate kinauá. Neongo ia, naʻe fakatokangaʻi ʻe he selá ʻa e ngaahi mataʻi lavea loloto ʻi hona tuʻá, pea naʻá ne fufulu hona ngaahi kafó. Naʻá ne hoko leva mo hono falé ʻo “papitaiso . . . ʻo ʻikai toe tatali.” He tāpuaki moʻoni ē naʻe maʻu ʻe Paula mo Sailosí ʻi heʻena fehangahangai mo e fakatangá ʻi he fiefiá!​—Ngā. 16:32-34.

15. (a) Kuo anga-fēfē ʻa e muimui he ʻahó ni ha Kau Fakamoʻoni tokolahi ʻi he faʻifaʻitakiʻanga ʻa Paula mo Sailosí? (e) Ko e hā ʻoku totonu ai ke tau hokohoko atu ʻa e toe ʻaʻahi ki he ngaahi ʻapi ʻo e faʻahinga ʻoku nofo ʻi hotau feituʻú?

¹⁵ Hangē ko Paula mo Sailosí, kuo malangaʻi ʻe he Kau Fakamoʻoni tokolahi he ʻahó ni ʻa e ongoongo leleí lolotonga hono tuku pilīsone kinautolu koeʻuhi ko ʻenau tuí, pea ʻoku maʻu ai ʻa e ngaahi ola lelei. Ko e fakatātaá, ʻi he fonua ʻe taha ʻa ia naʻe tapui ai ʻa ʻetau ngaahi ngāué, ʻi he foʻi taimi ʻe taha ko e pēseti ʻe 40 ʻo e Kau Fakamoʻoni kotoa ʻoku nofo aí naʻa nau ako ʻa e moʻoni ʻo fekauʻaki mo Sihová ʻi he lolotonga ʻenau ʻi he pilīsoné! (ʻAi. 54:17) Fakatokangaʻi ange foki, naʻe kole tokoni ʻa e selá ʻi he toki hili ʻa e tō ʻa e mofuiké. ʻI he tuʻunga meimei tatau, ko e faʻahinga tāutaha ʻe niʻihi he ʻahó ni ʻa ia kuo teʻeki ai ʻaupito ke nau tali ʻa e pōpoaki ʻo e Puleʻangá te nau fai pehē nai ʻi ha hili ha luluʻi fakafokifā ʻa honau foʻi māmani fakafoʻituituí ʻe ha meʻa fakamamahi. ʻI he faitōnunga ʻo ʻaʻahi mo toe ʻaʻahi ki he faʻahinga ʻoku nofo ʻi hotau feituʻú, ʻoku tau fakapapauʻi ai ʻoku tau faingamālie ke tokoniʻi kinautolu.

16. ʻI he ʻaho hili hono haha ʻo Paula mo Sailosí, naʻe anga-fēfē ʻa e liliu ʻa e tuʻungá?

¹⁶ ʻI he pongipongi hili ʻa e hahá, naʻe tuʻutuʻuni ai ʻe he kau pulé ke tukuange  ʻa Paula mo Sailosi. Ka naʻe pehē ʻe Paula: “ʻI he teʻeki ke fai hano fakahalaiaʻí, naʻa nau haha kimaua ʻi he ʻao ʻo e kakaí, neongo ko e ongo Loma kimaua, pea lī ki he pilīsoné. Te nau lī fakafufū koā eni kimaua ki tuʻa? ʻIkai ʻaupito! Tuku ke nau haʻu ʻa kinautolu tonu ʻo fakafeʻao atu kimaua ki tuʻa.” ʻI hono toki ʻiloʻi ko e ongo tangatá ko e ongo tangataʻifonua Lomá, naʻe “manavahētuʻu” ʻa e kau pulé, he naʻa nau maumauʻi ʻa e ngaahi totonu ʻa e ongo tangatá. d Naʻe liliu ʻa e tuʻungá. Naʻe haha ʻa e ongo ākongá ni ʻi he ʻao ʻo e kakaí; ʻi he taimi ko ʻení naʻe fiemaʻu ki he kau pulé ke nau kole fakamolemole ʻi he ʻao ʻo e kakaí. Naʻa nau kōlenga kia Paula mo Sailosi ke na mavahe mei Filipai. Naʻe fai ki ai ʻa e ongo ākongá, ka naʻá na ʻuluaki fakamoleki ha taimi ke fakalototoʻaʻi ai ʻa e kau ākonga foʻou ʻa ia naʻe tupulakí. ʻI he toki hili pē iá, naʻá na mavahe leva.

17. Ko e hā ʻa e lēsoni mahuʻinga ʻe ako ʻe he kau ākonga foʻoú ʻi heʻenau sio ko ia ki he kātaki ʻa Paula mo Sailosí?

¹⁷ Kapau naʻe muʻaki tokaʻi ʻena ngaahi totonu ʻi he tuʻunga ko ha ongo tangataʻifonua Lomá, naʻe mei hao nai ʻa Paula mo Sailosi ʻi he hahá. (Ngā. 22:25, 26) Kae kehe, naʻe mei ʻoatu ai ki he kau ākonga ʻi Filipaí ʻa e fakakaukau ʻo pehē naʻe ngāueʻaki ʻe he ongo tangatá ni ʻa hona tuʻungá ke na hao ai kinaua mei he faingataʻaʻia koeʻuhi ko Kalaisí. Naʻe mei fēfē hono uesia ʻe he meʻa ko iá ʻa e tui ʻa e kau ākonga ʻa ia naʻe ʻikai ko e kau tangataʻifonua Lomá? He ko ē, ʻe ʻikai ke maluʻi kinautolu ia ʻe he laó mei he hahá. Ko ia ai, ʻi hono kātekina ʻa e tauteá, naʻe fakahāhā ai ʻe Paula mo hono kaungāfonongá ki he kau tui foʻoú ʻaki ʻa e faʻifaʻitakiʻanga ko e kau muimui ʻo Kalaisí ʻoku malava ke nau tuʻu mālohi ʻi he malumalu ʻo e fakatangá. ʻIkai ko ia pē, ʻi heʻena kounaʻi ko ia ke ʻiloʻi ʻa hona tuʻunga tangataʻifonuá, naʻe kouna ai ʻe Paula mo Sailosi ʻa e kau pulé ke ʻai ke ʻilo ʻe he kakaí naʻa nau fai ha meʻa taʻefakalao. ʻE hanga leva nai ʻe he meʻa ko iá ʻo taʻofi kinautolu mei haʻanau ngaohikovia ʻa e ngaahi kaungātui ʻo Paulá pea tokonaki mai ai ha tuʻunga ʻo e maluʻi fakalao mei ha ngaahi ʻoho meimei tatau ʻi he kahaʻú.

18. (a) ʻOku anga-fēfē ʻa e faʻifaʻitaki ʻa e kau ʻovasia Kalisitiane he ʻaho ní ki he faʻifaʻitakiʻanga ʻa Paulá? (e) ʻOku anga-fēfē ʻetau “taukapoʻi mo fokotuʻu fakalao ʻa e ongoongo leleí” ʻi hotau ʻahó ni?

¹⁸ ʻI he ʻahó ni, ʻoku fai foki ʻe he kau ʻovasia ʻi he fakatahaʻanga Kalisitiané ha tataki ʻaki ʻenau faʻifaʻitakiʻangá. Pe ko e hā pē ʻoku ʻamanekina ʻe he kau tauhi-sipi Kalisitiané ke fai ʻe honau ngaahi kaungātuí, ʻoku nau loto-lelei mo kinautolu ke fai ia. ʻI he tuʻunga meimei tatau, hangē ko Paulá, ʻoku tau fuatautau fakalelei ʻa e founga mo e taimi ke ngāueʻaki ai ʻa ʻetau ngaahi totonu fakalaó ke maʻu ai ha maluʻí. Kapau ʻe fiemaʻu, ʻoku tau tangi ki he ngaahi fakamaauʻanga fakafeituʻu, fakapuleʻanga pea naʻa mo e ngaahi  fakamaauʻanga fakavahaʻapuleʻangá ke tau maʻu ha maluʻi fakalao ke hokohoko atu ʻetau lotú. Ko ʻetau taumuʻá, ʻoku ʻikai ko e fakalelei fakasōsiale, ka ko hono “taukapoʻi mo fokotuʻu fakalao ʻa e ongoongo leleí,” ʻo hangē ko ia naʻe tohi ʻe Paula ki he fakatahaʻanga ʻi Filipaí ʻi he taʻu nai ʻe hongofulu hili hono tuku pilīsone ia aí. (Fil. 1:7) Neongo ia, tatau ai pē pe ko e hā ʻa e ola ʻe hoko nai ʻi he ngaahi keisi fakaefakamaau peheé, ʻi he hangē ko Paula mo hono ngaahi kaungāfonongá, ʻoku tau fakapapauʻi ke hokohoko atu ʻa hono “talaki ʻa e ongoongo leleí” ki ha feituʻu pē ʻe tataki nai kitautolu ki ai ʻe he laumālie ʻo e ʻOtuá.​—Ngā. 16:10.