1-3. (a) Ko e hā ʻa e meʻa naʻe hoko ʻokú ne fakamanamanaʻi ke fakamavahevaheʻi ʻa e muʻaki fakatahaʻanga Kalisitiané? (e) ʻE anga-fēfē nai haʻatau maʻu ʻaonga mei hono ako ʻa e fakamatala ko eni ʻi he tohi ʻa Ngāué?

 KUO toki fokí ni mai eni ʻa Paula mo Panepasa fakataha mo e fiefia lahi ki he kolo Sīlia ko ʻAniteoké mei heʻena ʻuluaki fononga fakamisinalé. ʻOkú na hākahaka he kuo hanga ʻe Sihova ʻo “fakaava ki he ngaahi puleʻangá ʻa e matapā ki he tuí.” (Ngā. 14:26, 27) Ko e moʻoni, kuo talanoaʻi fiefia holo ʻi ʻAniteoke tonu ʻa e ongoongo leleí pea ko ha “fuʻu tokolahi” ʻo e kau Senitailé kuo tānaki mai ki he fakatahaʻanga ʻi aí.​—Ngā. 11:20-26.

² Ko e ongoongo fakafiefia ʻo fekauʻaki mo e tupulaki ko ení ʻoku vave ʻene aʻu ki Siuteá. Ka ʻi he ʻikai ke ne ʻomai ʻa e fiefia ki he tokotaha kotoa, ʻoku hanga ʻe he meʻa ko eni naʻe hokó ʻo ʻai ke tuʻu-ki-muʻa ʻa e fakakikihi hokohoko ʻo fekauʻaki mo e kamú. Ko e hā ʻa e vahaʻangatae ʻoku totonu ke ʻi he vahaʻa ʻo e kau tui Siú mo e kau tui ʻikai-Siú, pea ʻoku totonu ke fēfē ʻa e vakai ʻa e kau tui ʻikai-Siú ki he Lao ʻa Mōsesé? ʻOku fakatupunga ʻe he ʻīsiú ni ha felāuaki ʻa ia ʻoku hoko ʻo mātuʻaki mafatukituki ʻo ne fakamanamanaʻi ai ke māvahevahe ʻa e fakatahaʻanga Kalisitiané ʻo nau fakafaʻafaʻahi. ʻE fakaleleiʻi fēfē ʻa e meʻá ni?

³ ʻI heʻetau vakai ki he fakamatala ko eni ʻi he tohi ʻa Ngāué, te tau ako ai ha ngaahi lēsoni lahi mātuʻaki mahuʻinga. ʻE tokoniʻi nai kitautolu ʻe he ngaahi lēsoni ko ení ke tau ngāue fakapotopoto ai ʻo ka malanga hake ʻi hotau ʻahó ni ha ngaahi ʻīsiu te ne ala fakatupunga ha māvahevahe.

4. Ko e hā ʻa e fakakaukau hala naʻe pouaki ʻe he kau tui ʻe niʻihi, pea ko e hā ʻa e fehuʻi ʻoku langaʻi hake ʻe he meʻá ni?

⁴ Naʻe tohi ʻe he ākonga ko Luké: “Naʻe ʻalu hifo [ki ʻAniteoke] ha kau tangata ʻe niʻihi mei Siutea ʻo kamata ke akoʻi ki he fanga tokouá: ‘Ka ʻikai ke mou kamu ʻo fakatatau ki he lao ʻa Mōsesé, ʻe ʻikai lava ke fakahaofi kimoutolu.’” (Ngā. 15:1) ʻOku ʻikai ke fakahaaʻi mai ia pe ko e “kau tangata . . . mei Siutea” ko ení ko ha kau Fālesi kinautolu ki muʻa ke nau tafoki mai ki he lotu faka-Kalisitiané. Pe naʻe pehē pe ʻikai, ʻoku hā  ngali naʻe tākiekina kinautolu ʻe he fakakaukau ʻa e kulupu lotu mavahe Siu ko ia ʻa ia naʻa nau pipiki tōtuʻa ki he laó. ʻIkai ko ia pē, ʻoku hangehangē naʻa nau taukaveʻi hala ko ʻenau leá maʻá e kau ʻapositoló pea mo e kau mātuʻa ʻi Selusalemá. (Ngā. 15:23, 24) Neongo ia, ko e hā naʻe kei pouaki ai ʻe he kau tui Siú ʻa e kamú hili ia ha fuʻu taʻu ē ʻe 13 nai hono hanga ʻe he ʻapositolo ko Pitá, ʻi hono tataki ʻe he ʻOtuá, ʻo talitali lelei ʻa e kau Senitaile taʻekamú ki he fakatahaʻanga Kalisitiané? a​—Ngā. 10:24-29, 44-48.

5, 6. (a) Ko e hā naʻe loto nai ai ʻa e kau Kalisitiane Siu ʻe niʻihi ke pīkitai ki he kamú? (e) Naʻe hoko ʻa e fuakava ʻo e kamú ko ha konga ia ʻo e fuakava mo ʻĒpalahamé? Fakamatalaʻi. (Sio ki he fakamatala ʻi laló.)

⁵ ʻOku lahi nai ʻa e ngaahi ʻuhinga ki aí. Ko e ʻuhinga ʻe taha, naʻe fokotuʻu ʻa e kamu ʻo e kakai tangatá ʻe Sihova tonu, pea naʻe hoko ia ko ha fakaʻilonga ʻo ha vahaʻangatae makehe pea mo ia. ʻI hono fokotuʻu ia ki muʻa ʻi he fuakava Laó ka naʻe toki hoko ia ki mui ko ha konga ʻo e Laó, naʻe kamata ʻa e kamú ʻia ʻĒpalahame pea mo hono falé. b (Liv. 12:2, 3) ʻI he malumalu ʻo e Lao ʻa Mōsesé, naʻa mo e kau mulí naʻe pau ke kamu kinautolu ki muʻa ke lava ke nau maʻu ha ngaahi monū pau, ʻo hangē ko e kau ʻi hono kai ʻo e Pāsová. (ʻEki. 12:43, 44, 48, 49) Ko e moʻoni, ʻi he ʻatamai ʻo e kau Siú, ke taʻekamu ha tangata naʻe fai ʻa e vakai ia ki ai ʻokú ne taʻemaʻa, mo fehiʻanekinaʻi.​—ʻAi. 52:1.

⁶ Ko ia, naʻe fiemaʻu ʻa e tui mo e anga-fakatōkilalo ʻi he tafaʻaki ʻa e kau tui Siú ke nau fengaʻunuʻaki ki he foʻi moʻoni naʻe fakahaaʻi foʻou maí. Ko e fuakava Laó naʻe fetongi ia ʻe he fuakava foʻoú, ko ia ko e fanauʻi mai ko ha Siú naʻe ʻikai ke ne kei ʻai ai pē ha taha ke ʻotomētiki pē ʻene hoko ko ha mēmipa ia ʻo e kakai ʻa e ʻOtuá. Pea ki he kau Kalisitiane Siu naʻa nau nofo ʻi he ngaahi komiunitī Siú​—ʻo hangē ko ia ko e kau tui ʻi Siuteá​—naʻe fiemaʻu kiate kinautolu ʻa e loto-toʻa ke nau fakahaaʻi ʻa e tui kia Kalaisí pea ke nau tali ʻi he tuʻunga ko honau ngaahi kaungātui ʻa e kau Senitaile ko ia naʻe ʻikai ke kamú.​—Sel. 31:31-33; Luke 22:20.

7. Ko e hā ʻa e moʻoni naʻe ʻikai ke mahinoʻi ʻe he ‘kau tangata mei Siuteá’?

⁷ Ko e moʻoni, kuo ʻikai ke liliu ʻa e ngaahi tuʻunga ia ʻa e ʻOtuá. Ko e fakamoʻoni ʻo e meʻá ni ko e moʻoniʻi meʻa ko ia, ʻoku maʻu ʻe he fuakava foʻoú ʻa e laumālie ʻo e Lao ʻa Mōsesé. (Māt. 22:36-40) Ko e fakatātaá, ʻi he fekauʻaki mo e kamú, naʻe tohi ʻa Paula ki mui: “Ko ha Siu ia ʻa ia ʻoku Siu ʻi loto, pea ko ʻene kamú ko e kamu ʻo e lotó ʻi he laumālie, ʻo ʻikai ʻi ha lao kuo tohi.” (Loma 2:29; Teu. 10:16) Ko e ‘kau tangata mei Siuteá’ naʻe ʻikai te nau mahinoʻi ʻa e moʻoni ko ení ka naʻa nau fakamatematē ʻo pehē naʻe ʻikai ʻaupito ke tāmateʻi ʻe he ʻOtuá ia ʻa e lao ʻo e kamú. Te nau fanongo nai ki he fakaʻuhingá?

8. Ko e hā naʻe ʻave ai ʻa e ʻīsiu ʻo e kamú ki he kulupu pule ʻi Selusalemá?

⁸ Naʻe hoko atu ʻe Luke: “ʻI he hili ha felāuaki mo e fakakikihi lahi ʻa Paula mo Panepasa pea mo kinautolú [ʻa e kau tangata naʻa nau ʻalu hifo “mei Siutea”], naʻe fokotuʻutuʻu ai kia Paula, Panepasa, pea mo ha niʻihi ke nau ʻalu hake ki he kau ʻapositoló pea mo e kau mātuʻa ʻi Selusalemá ke ʻeke fekauʻaki mo e fakakikihí ni.” c (Ngā. 15:2) Naʻe tapua mai ʻe he “felāuaki mo e fakakikihi” ko ení ʻa e ngaahi ongoʻi mālohi mo e ngaahi tuipau fefeka fakatouʻosi ʻi he ongo faʻahí, pea naʻe ʻikai lava ʻe he fakatahaʻanga ʻi ʻAniteoké ke solova ia. Koeʻuhí ke maʻu ʻa e melinó mo e fāʻūtahá, naʻe fokotuʻutuʻu fakapotopoto ai ʻe he fakatahaʻangá ke ʻave ʻa e fehuʻí “ki he kau ʻapositoló pea mo e kau mātuʻa ʻi Selusalemá,” ʻa ia naʻe faʻuʻaki ʻa e kulupu pulé. Ko e hā ʻe lava ke tau ako mei he kau mātuʻa ʻi ʻAniteoké?

9, 10. ʻI he founga fē naʻe fokotuʻu ai ʻe he fanga tokoua ʻi ʻAniteoké pea pehē kia Paula mo Panepasa ha faʻifaʻitakiʻanga lelei kiate kitautolu he ʻaho ní?

⁹ Ko e lēsoni mahuʻinga ʻe taha ʻoku tau akó ko e fiemaʻu ko ia ke tau falala ki he kautaha ʻa e ʻOtuá. Fakakaukau angé: Naʻe ʻiloʻi ʻe he fanga tokoua ʻi ʻAniteoké ko e kulupu pulé naʻe faʻu ʻataʻatā ʻaki pē ia ʻa e kau Kalisitiane mei he puipuituʻa Siu. Neongo ia, naʻa nau falala ki he kulupu ko iá ke ne solova ʻa e fehuʻi fekauʻaki mo e kamú ʻo fehoanaki mo e Folofolá. Ko e hā hono ʻuhingá? Naʻe maʻu ʻe he fakatahaʻangá ʻa e loto-falala ʻe tataki ʻe Sihova ʻa e ngaahi meʻá fakafou ʻi hono laumālie māʻoniʻoní pea mo e ʻUlu ʻo e fakatahaʻanga Kalisitiané, ʻa Sīsū Kalaisi. (Māt. 28:18, 20; ʻEf. 1:22, 23) ʻI he taimi ʻoku malanga hake ai ha ngaahi ʻīsiu mafatukituki he ʻahó ni, tuku ke tau faʻifaʻitaki ki he faʻifaʻitakiʻanga lelei ʻa e kau tui ʻi ʻAniteoké ʻaki ʻa e falala ki he kautaha ʻa e ʻOtuá mo hono Kulupu Pule ʻo e kau Kalisitiane paní.

¹⁰ ʻOku toe fakamanatu mai foki kiate kitautolu ʻa e mahuʻinga ʻo e anga-fakatōkilaló pea mo e kātakí. Naʻe fakanofo fakafoʻituitui ʻa Paula mo Panepasa ʻe he laumālie māʻoniʻoní ke na ʻalu atu ki he ngaahi puleʻangá, ka neongo ia naʻe ʻikai te na ngāueʻaki ʻa e mafai ko iá ke solovaʻaki ʻa e ʻīsiu ʻo e kamú ʻi he taimi pē ko iá ʻi ʻAniteoke. (Ngā. 13:2, 3) ʻIkai ko ia pē, naʻe tohi ʻa Paula ki mui ai: “Naʻá ku ʻalu haké [ki Selusalema] koeʻuhí ko ha meʻa fakahā”​—ʻo fakahaaʻi ha tataki fakaʻotua ʻi he meʻá ni. (Kal. 2:2) ʻOku feinga ʻa e kau mātuʻa ʻi he ʻaho ní ke maʻu ʻa e fakakaukau anga-fakatōkilalo mo e kātaki tatau, ʻi he taimi ʻoku malanga hake ai ha ngaahi fehuʻi te ne ala fakatupunga ha māvahevahe. ʻI he ʻikai hoko ʻo fakakikihí, ʻoku nau hanga kia Sihova ʻaki hono vakaiʻi ʻa e Folofolá pea mo e fakahinohino mo e tataki ʻoku ʻomai ʻe he tamaioʻeiki anga-tonú.​—Fil. 2:2, 3.

11, 12. Ko e hā ʻoku mahuʻinga ai ke tatali kia Sihová?

 ¹¹ ʻI he ngaahi tuʻunga ʻe niʻihi, ʻe fiemaʻu nai ke tau tatali kia Sihova ke ne ʻomai ha fakamaama ʻi he fekauʻaki mo ha meʻa pau. Manatuʻi ko e fanga tokoua ʻi he taimi ʻo Paulá naʻe pau ke nau tatali ʻo aʻu ki he 49 T.S. nai​—ko e taʻu nai ia ʻe 13 mei he taimi ʻo hono pani ʻo Koliniusi ʻi he 36 T.S.​—ki muʻa pea toki ʻomai ʻe Sihova ʻa e fakaleleiʻanga ki he ʻīsiu ko ia pe ʻoku totonu ke kamu ʻa e kau Senitailé. Ko e hā naʻe fuoloa pehē aí? Mahalo pē naʻe fiemaʻu ʻe he ʻOtuá ke fakaʻatā ha taimi feʻunga ki he kau Siu loto-totonú ke nau feʻunuʻaki ai ki ha liliu lahi pehē ʻi he anga ʻo ʻenau vakaí. He ko ē, ko hono fakangata ʻo e fuakava kamu taʻu ʻe 1,900 ʻa ia naʻe fai mo ʻenau kui ʻofeina ko ʻĒpalahamé naʻe ʻikai ko ha kiʻi meʻa siʻisiʻi ia!​—Sione 16:12.

¹² Ko ha monū ē ke hoko ʻo akoʻi mo fakafuo ʻe heʻetau Tamai fakahēvani kātaki mo anga-leleí! ʻOku lelei maʻu pē mo ʻaonga maʻu pē kiate kitautolu ʻa hono ngaahi olá. (ʻAi. 48:17, 18; 64:8) Ko ia tuku ke ʻoua ʻaupito naʻa tau vilitaki loto-pōlepole ke fai pē ki heʻetau ngaahi fakakaukau ʻatautolú pe fakafeangai ʻikai lelei ki he ngaahi liliu fakaekautahá pe ki he ngaahi fakamatala fakatonutonu ʻo fekauʻaki mo ha ngaahi potu folofola pau. (Koh. 7:8) Kapau ʻokú ke ʻiloʻi naʻa mo ha kiʻi fakaʻilonga pē ʻo ha hehema pehē ʻiate koe, fēfē ke ke fakalaulauloto mo faʻa lotu ʻo fekauʻaki mo e ngaahi tefitoʻi moʻoni taimi totonu ʻoku maʻu ʻi he Ngāue vahe 15? d

13. ʻE lava fēfē ke tau tapua atu ʻa e kātaki ʻa Sihová ʻi heʻetau ngāue fakafaifekaú?

¹³ ʻE malanga hake nai ʻa e fiemaʻu ko ia ke kātakí ʻi he taimi ʻoku tau ako ai ʻa e Tohi Tapú mo e kakai ʻoku  faingataʻa kiate kinautolu ke nau liʻaki ʻa e ngaahi tui hala pe ko e ngaahi tōʻonga taʻefakatohitapu kuo nau koloaʻakí. ʻI he ngaahi tuʻunga peheé, ʻe fiemaʻu nai ke tau fakaʻatā ha taimi feʻunga ke ngāue mai ai ʻa e laumālie ʻo e ʻOtuá ki he loto ʻo e tokotaha akó. (1 Kol. 3:6, 7) Pehē foki, ʻoku lelei ke tau lotu ʻo fekauʻaki mo e meʻa ko iá. Pe ko e hā pē ʻa e tuʻungá pea ʻi he taimi totonu, ʻe tokoniʻi kitautolu ʻe he ʻOtuá ke tau ʻiloʻi ʻa e ʻalunga fakapotopoto ke tau fou aí.​—1 Sio. 5:14.

14, 15. Naʻe anga-fēfē hono fakaʻapaʻapaʻiaʻi ʻe he fakatahaʻanga ʻi ʻAniteoké ʻa Paula, Panepasa pea mo e kau fononga kehé, pea naʻe anga-fēfē ʻa e hoko moʻoni ʻa ʻenau fonongá ko ha tāpuaki ia ki he kaungātuí?

¹⁴ ʻOku hoko atu ʻa e fakamatala ʻa Luké: “ʻI he hili hano fakafeʻao atu ʻa e kau tangatá ni ʻe he fakatahaʻangá ʻi ha konga ʻo e fonongá, naʻa nau hoko atu ʻo fou ʻi Finisia mo Samēlia, ʻo nau fakamatala fakaikiiki ki he kamata ke lotu ki he ʻOtuá ʻa e kakai ʻo e ngaahi puleʻangá pea ʻi he fanongo ki he meʻá ni naʻe fiefia lahi ai ʻa e fanga tokouá kotoa.” (Ngā. 15:3) Ko hono fakafeʻao ko ia ʻe he fakatahaʻangá ʻa Paula, Panepasa pea mo e kau fononga kehé ʻi ha konga ʻo e fonongá ko ha tōʻonga ia ʻo e ʻofa faka-Kalisitiané ʻa ia naʻa nau fakaʻapaʻapaʻiaʻi ai ʻa e faʻahingá ni, ʻo fakahaaʻi ai naʻe fakaʻamu ʻa e fakatahaʻangá ke maʻu ʻe he faʻahingá ni ʻa e tāpuaki ʻa e ʻOtuá. Ko ha toe faʻifaʻitakiʻanga lelei ē naʻe fokotuʻu mai ʻe he fanga tokoua ʻi ʻAniteoké kiate kitautolú! ʻOkú ke fakaʻapaʻapaʻiaʻi ʻa ho fanga tokoua mo ho fanga tuofāfine fakalaumālié, “tautefito ki he faʻahinga [kau mātuʻá] ʻoku nau ngāue mālohi ʻi he leá mo e faiakó”?​—1 Tīm. 5:17.

¹⁵ ʻI heʻenau fonongá, naʻe hoko moʻoni ʻa e kau fonongá ko ha tāpuaki ia ki honau ngaahi kaungā-Kalisitiane ʻi Finisia mo Samēliá ʻi heʻenau vahevahe “fakaikiiki” atu kiate kinautolu ʻa e ngaahi hokosia ʻi he fekauʻaki mo e ngāue fakamalanga ko ia ʻi he feituʻu Senitailé. Naʻe kau nai ʻi he kau fanongó ʻa e kau tui Siu ʻa ia naʻa nau hola mai ki he ongo feituʻú ni ʻi he hili ʻa e mate fakamāʻata ʻa Sitīvení. ʻOku pehē pē ʻi he ʻahó ni, ko e ngaahi līpooti ʻo e tāpuaki ʻa Sihova ʻi he ngāue ngaohi-ākongá ko ha matavai ia ʻo e fakalototoʻa ki hotau fanga tokouá, tautautefito ki he faʻahinga ʻoku nau tofanga ʻi he ngaahi ʻahiʻahí. ʻOkú ke maʻu ʻaonga kakato mei he ngaahi līpooti peheé ʻaki hono maʻu ʻa e ngaahi fakataha faka-Kalisitiané, ngaahi ʻasemipilií, mo e ngaahi fakataha-lahí pea pehē ki hono lau ʻa e ngaahi hokosia mo e ngaahi talanoa ki he moʻuí ʻa ia kuo pulusi ʻi heʻetau ʻū tohí pe ʻi he jw.org?

16. Ko e hā ʻokú ne fakahaaʻi mai ko e kamú naʻe hoko ia ko ha ʻīsiu lahí?

¹⁶ ʻI he hili ha fononga fakatonga ʻi ha kilomita nai ʻe 550, naʻe faifai pē ʻo aʻu ʻa e faʻahinga naʻe fekauʻi atu mei ʻAniteoké ki he feituʻu naʻa nau taumuʻa ki aí. Naʻe tohi ʻe Luke: “ʻI heʻenau aʻu ki Selusalemá, naʻe talitali lelei kinautolu ʻe he fakatahaʻangá mo e kau ʻapositoló mo e kau mātuʻá, pea naʻá na  fakamatala ki he ngaahi meʻa lahi kuo fai ʻe he ʻOtuá fakafou ʻia kinauá.” (Ngā. 15:4) Kae kehe, ʻi he tali ki aí, “ko ha niʻihi ʻo e faʻahinga ʻi he kulupu lotu ʻa e kau Fālesí ʻa ia kuo nau hoko ko e kau tuí naʻa nau tuʻu hake mei honau nofoʻangá ʻo nau pehē: ‘ʻOku fiemaʻu ke kamu kinautolu mo fekau ke nau tauhi ʻa e Lao ʻa Mōsesé.’” (Ngā. 15:5) ʻOku hā mahino, ko e fehuʻi fekauʻaki mo e kamu ʻo e kau Kalisitiane ʻikai-Siú naʻe hoko ia ko ha ʻīsiu lahi, pea naʻe fiemaʻu ke solova ia.

17. Ko hai naʻe faʻuʻaki ʻa e kulupu pule ʻi Selusalemá, pea ko e hā naʻe fakakau nai ai ki ai ʻa e “kau mātuʻá”?

¹⁷ “Ko e potó ʻoku ʻa e faʻahinga ia ʻoku kumi faleʻí,” ko e lau ia ʻa e Palōveepi 13:10 (NW). ʻI he fehoanaki mo e tefitoʻi moʻoni fakapotopoto ko iá, “naʻe fakatahataha mai ʻa e kau ʻapositoló mo e kau mātuʻá ke vakaiʻi [ʻa e fehuʻi fekauʻaki mo e kamú].” (Ngā. 15:6) Naʻe ngāue “ʻa e kau ʻapositoló mo e kau mātuʻá” ʻi ha founga fakaefakafofonga maʻá e fakatahaʻanga Kalisitiané fakakātoa, ʻo hangē pē ko ia ʻoku fai ʻe he Kulupu Pulé ʻi he ʻaho ní. Ko e hā naʻe ngāue fakataha ai ʻa e “kau mātuʻá” mo e kau ʻapositoló? Manatuʻi naʻe ʻosi tāmateʻi ʻa e ʻapositolo ia ko Sēmisí, pea ʻi ha vahaʻa taimi nai, naʻe tuku pilīsone ai ʻa e ʻapositolo ko Pitá. ʻE tofanga nai ʻa e kau ʻapositolo kehé ʻi ha ngaahi ikuʻanga meimei tatau? Ko e kei ʻi ai ko ia ha kau tangata taau kehe kuo paní ʻe tokoni ia ke fakapapauʻi ʻa e kei hokohoko maau atu pē ʻa hono tokangaʻi ʻo e tākangá.

18, 19. Ko e hā ʻa e ngaahi lea mālohi naʻe leaʻaki ʻe Pitá, pea ko e hā ʻa e fakamulituku naʻe totonu ke aʻu ki ai ʻa ʻene kau fanongó?

¹⁸ Naʻe hoko atu ʻa Luke: “ʻI he hili ha lāulea lahi, naʻe mālanga hake ʻa Pita ʻo ne pehē . . . : ‘Kau tangata, fanga tokoua, ʻoku mou ʻilo lelei mei he ngaahi ʻaho ki muʻá naʻe fai ai ʻe he ʻOtuá ʻa e fili mei homou lotolotongá, ʻe fakafou ʻi hoku ngutú ʻa e fanongo ʻa e kakai ʻo e ngaahi puleʻangá ki he folofola ʻo e ongoongo leleí pea nau tui. Pea ko e ʻOtuá, ʻa ia ʻokú ne ʻafioʻi ʻa e lotó, naʻá ne  ʻomai ha fakamoʻoni ʻaki ʻene foaki kiate kinautolu ʻa e laumālie māʻoniʻoní, ʻo hangē pē foki ko ia naʻá ne fai kiate kitautolú. Pea naʻe ʻikai ʻaupito te ne fakafaikehekeheʻi kitautolu mo kinautolu, ka naʻá ne fakamaʻa honau lotó koeʻuhi ko ʻenau tuí.’” (Ngā. 15:7-9) Fakatatau ki ha maʻuʻanga fakamatala ʻe taha, ko e foʻi lea faka-Kalisi naʻe liliu ko e “lāulea lahi” ʻi he veesi 7 ʻoku toe ʻuhinga ia “ki ha fekumi; ko ha fakafehuʻi.” ʻOku hā mai mei ai, naʻe maʻu ʻe he fanga tokouá ha ngaahi fekehekeheʻaki loto-totonu ʻi he fakakaukaú, ʻa ia naʻa nau fakahaaʻi tauʻatāina.

¹⁹ Naʻe fakamanatu ʻe he ngaahi lea mālohi ʻa Pitá ki he tokotaha kotoa, ko iá naʻá ne ʻi ai tonu ʻi he taimi naʻe hoko ai ʻa e ʻuluaki kau Senitaile taʻekamú​—ʻa Koliniusi mo hono falé​—ʻo pani ʻe he laumālie māʻoniʻoní ʻi he 36 T.S. Ko ia kapau naʻe fakangata ʻe Sihova ia ʻa hono fai ha fakafaikehekehe ʻi he vahaʻa ʻo e Siú mo e ʻikai-Siú, ʻi he mafai fē leva ke fai ai ʻe he faʻahinga ʻo e tangatá ha fakafaikehekehe? ʻIkai ngata aí, ko e tui kia Kalaisí, ʻo ʻikai ko e fai pau ki he Lao ʻa Mōsesé, ʻoku fakamaʻa ai ʻa e loto ʻo ha tokotaha tui.​—Kal. 2:16.

20. Naʻe anga-fēfē hono ‘ʻahiʻahiʻi ʻa e ʻOtuá’ ʻe he kau pouaki ʻo e kamú?

²⁰ Makatuʻunga ʻi he fakamoʻoni taʻealafakakikihiʻi fakatouʻosi ʻa e folofola ʻa e ʻOtuá pea mo e laumālie māʻoniʻoní, naʻe fakamulitukuʻaki ai ʻe Pita: “Ko ia ko e hā ʻoku mou ʻahiʻahiʻi ai he taimí ni ʻa e ʻOtuá ʻaki hono hilifaki ha kavenga mamafa ki he kau ākongá ʻa ia naʻe ʻikai malava ʻe heʻetau fanga kuí pe ko kitautolu ke fuá? ʻI hono kehé, ʻoku tau tui ʻe fakahaofi kitautolu fakafou ʻi he ʻofa maʻataʻatā ʻa e ʻEiki ko Sīsuú ʻo hangē pē ko kinautolú.” (Ngā. 15:10, 11) Ko hono moʻoní, ko e kau pouaki ʻo e kamú naʻa nau ‘ʻahiʻahiʻi ʻa e ʻOtuá,’ pe ‘siviʻi ʻa ʻene kātakí,’ ʻo hangē ko ia ko hono fakalea ʻe ha liliu ʻe taha. Naʻa nau feinga ke hilifaki ki he kau Senitailé ha lao ʻa ia naʻe ʻikai lava ʻe he kau Siú tonu ke nau tauhi kakato pea ko ia ai naʻe fakahalaiaʻi ai ʻe he meʻa ko iá kinautolu ki he mate. (Kal. 3:10) ʻI hono kehé, naʻe totonu ki he kau fanongo Siu ʻa Pitá ke nau fakamālōʻia ʻa e ʻofa maʻataʻatā ʻa e ʻOtuá ʻa ia naʻe fakahaaʻi mai fakafou ʻia Sīsuú.

21. Ko e hā naʻe tānaki atu ʻe Panepasa mo Paula ki he lāulea naʻe faí?

²¹ ʻOku hā mahino, naʻe maongo loloto ʻa e ngaahi lea ʻa Pitá, he “naʻa nau fakalongolongo kotoa.” ʻI he hili iá, naʻe fakamatala ʻa Panepasa mo Paula “ki he ngaahi mana lahi mo e ngaahi meʻa fakaofo lahi naʻe fai ʻe he ʻOtuá fakafou ʻiate kinaua ʻi he lotolotonga ʻo e ngaahi puleʻangá.” (Ngā. 15:12) Faai atu pē, naʻe aʻu leva ʻa e kau ʻapositoló mo e kau mātuʻá ki ha tuʻunga ke fai hano vakaiʻi ʻa e kotoa ʻo e fakamoʻoní pea fai ha fili ʻe tapua mahino atu ai ʻa e finangalo ʻo e ʻOtuá ʻi he fekauʻaki mo e kamú.

22-24. (a) ʻOku anga-fēfē ʻa e muimui ʻa e Kulupu Pule ʻi he ʻaho ní ki he faʻifaʻitakiʻanga ʻa e muʻaki kulupu pulé? (e) ʻE lava fēfē ke fakahāhā ʻe he kau mātuʻá kotoa ʻa e fakaʻapaʻapa ki he mafai fakateokalatí?

²² ʻOku pehē pē ʻi he ʻahó ni, ʻi he taimi ʻoku fakataha ai ʻa e kau mēmipa ʻo e Kulupu Pulé, ʻoku nau vakai ki he Folofola ʻa e ʻOtuá ki ha tataki pea lotu  tōtōivi ʻo kole ʻa e laumālie māʻoniʻoní. (Saame 119:105; Māt. 7:7-11) ʻI he taumuʻa ko iá, ʻoku maʻu tokamuʻa ai ʻe he mēmipa taki taha ʻo e Kulupu Pulé ha ʻāsenita koeʻuhi ke ne malava ai ʻo fai ha fakakaukau mo ha lotu fekauʻaki mo e ngaahi meʻa ko iá. (Pal. 15:28) ʻI heʻenau fakatahá, ʻoku fakahaaʻi tauʻatāina mo anga-fakaʻapaʻapa ai ʻe he fanga tokoua pani ko ení ʻa ʻenau fakakaukaú. ʻOku ngāueʻaki maʻu pē ʻa e Tohi Tapú ʻi he lolotonga ʻa e ngaahi lāulea ʻoku nau faí.

²³ Ko e kau mātuʻa ʻi he fakatahaʻangá ʻoku totonu ke nau faʻifaʻitaki ki he faʻifaʻitakiʻanga ko iá. Pea ka ʻosi ha lāulea ʻi ha fakataha ʻa e kau mātuʻá ʻoku kei tuʻu pē ʻo teʻeki ai ke solova ha meʻa mafatukituki, ʻe lava ke fetuʻutaki ʻa e kulupu ʻo e kau mātuʻá ki he ʻōfisi vaʻa ʻi honau feituʻú pe ko hono kau fakafofonga kuo fakanofó, ʻo hangē ko e kau ʻovasia sēketí. ʻE lava leva ke faitohi ʻa e vaʻá ki he Kulupu Pulé ʻo ka fiemaʻu.

²⁴ ʻIo, ʻoku tāpuakiʻi ʻe Sihova ʻa e faʻahinga ʻoku nau fakaʻapaʻapaʻi ʻa e fokotuʻutuʻu fakateokalatí pea ʻoku nau fakahāhā ʻa e anga-fakatōkilaló, mateakí pea mo e kātakí. Hangē ko ia te tau sio ki ai ʻi he vahe hono hokó, ko e ngaahi pale ʻoku foaki mai ʻe he ʻOtuá ki he fai peheé ko e melino moʻoni, lakalakaimonū fakalaumālie, mo e fāʻūtaha faka-Kalisitiane.