1. Ko e hā ʻa e ngaahi faitatau ʻi he vahaʻa ʻo e muʻaki kau Kalisitiané mo e Kau Fakamoʻoni ʻa Sihova ʻi he ʻaho ní?

 NAʻA NAU faifakamoʻoni faivelenga. Naʻe ueʻi mālohi kinautolu ʻe honau lotó ke nau tali ʻa e tokoni mo e tataki ʻa e laumālie māʻoniʻoní. Naʻe ʻikai ke fakasīlongoʻi kinautolu ʻe he fakatangá. Pea naʻe ʻiate kinautolu ʻa e tāpuaki fakakoloa ʻa e ʻOtuá. Naʻe hoko moʻoni kotoa ʻeni ki he muʻaki kau Kalisitiané, ʻo hangē tofu pē ko ʻene hoko moʻoni eni ki he Kau Fakamoʻoni ʻa Sihova ʻi he ʻaho ní.

2, 3. Ko e hā ʻoku tautautefito ʻene taau ke fakatokangaʻi ʻo fekauʻaki mo e tohi ʻa Ngāué?

² Kuo pau pē kuo fakalototoʻaʻi koe ʻe he ngaahi fakamatala fakatupu tui mālohi ʻoku maʻu ʻi he tohi Fakatohitapu ʻa e Ngaahi Ngāue ʻa e Kau ʻApositoló, ʻa ia ʻoku fonu ai ʻa e ngaahi meʻa kehekehe naʻe hoko! Ko ha tohi laulōtaha ia, he ko e hisitōlia pē ia ʻe taha ʻo e muʻaki lotu faka-Kalisitiané naʻe fakamānavaʻi fakaʻotuá.

³ ʻOku ʻasi ʻi he tohi ʻa Ngāué ʻa e ngaahi hingoa ʻo e faʻahinga tāutaha ʻe toko 95 mei he ngaahi fonua ʻe 32, ngaahi kolo lalahi ʻe 54, pea mo e ngaahi motu ʻe 9. Ko ha talanoa fakatoʻoaloto ia ʻo fekauʻaki mo ha kakai​—ʻa e kakai lāuvale, kau lotu loi hīkisia, kau politiki loto-pōlepole, kau fakatanga tōlili. Kae hiliō he meʻa kotoa, ʻoku fekauʻaki ia mo ho fanga tokoua mo e fanga tuofāfine ʻi he ʻuluaki senitulí, ʻa ia naʻe ʻikai ngata pē ʻi heʻenau fetaulaki mo e ngaahi pole anga-maheni ʻo e moʻuí ka naʻa nau toe malangaʻi faivelenga foki ʻa e ongoongo leleí.

4. Ko e hā ʻoku tau maʻu ai ha fehokotaki makehe mo e faʻahinga tāutaha hangē ko e ʻapositolo ko Paulá, Tāpaita, pea mo e kau fakamoʻoni faitōnunga kehe ʻo e kuonga muʻá?

⁴ Kuo meimei taʻu ʻeni ʻe 2,000 talu mei he ngaahi ngāue ʻa e ongo ʻapositolo faivelenga ko Pita mo Paulá, ko e toketā ʻofeina ko Luké, ko Panepasa nima-homo, ko Sitīveni loto-toʻa, ko Tāpaita loto-ʻofa, ko Litia anga-talitali kakai, pea mo e fuʻu tokolahi kehe ʻo e kau fakamoʻoni faitōnunga. Ka neongo ia, ʻoku tau maʻu ha fehokotaki makehe  mo kinautolu. Ko e hā hono ʻuhingá? Koeʻuhí ʻoku tau maʻu ʻa e fekau tatau ko e ngaohi ākongá. (Māt. 28:19, 20) He tāpuaki moʻoni ia kiate kitautolu ke tau kau atu ki ai!

5. Ko fē naʻe kamata ke fakahoko ai ʻe he muʻaki kau muimui ʻo Sīsuú ʻa e fekau naʻe ʻoange kiate kinautolú?

⁵ Fakakaukau atu ki he fekau naʻe ʻoange ʻe Sīsū ki heʻene kau muimuí. “Te mou maʻu ʻa e mālohi ʻi he ʻalu hifo kiate kimoutolu ʻa e laumālie māʻoniʻoní,” ko ʻene leá ia, “pea te mou hoko ko e kau fakamoʻoni kiate au ʻi Selusalema, ʻi he kotoa ʻo Siuteá mo Samēlia, pea ki he feituʻu taupotu taha ʻo e māmaní.” (Ngā. 1:8) ʻUluakí, naʻe fakaivia ʻe he laumālie māʻoniʻoní ʻa e kau ākongá ke nau hoko ko e kau fakamoʻoni “ʻi Selusalema.” (Ngā. 1:1–8:3) Ko hono hokó, ʻi he malumalu ʻo e tataki ʻa e laumālié, naʻa nau faifakamoʻoni “ʻi he kotoa ʻo Siuteá mo Samēlia.” (Ngā. 8:4–13:3) Hili iá naʻe kamata leva ke nau ʻave ʻa e ongoongo leleí “ki he feituʻu taupotu taha ʻo e māmaní.”​—Ngā. 13:4–28:31.

6, 7. ʻI hono fakahoko ʻetau ngāue fakafaifekaú, ko e hā ʻa e lelei ʻoku tau maʻu ne ʻikai maʻu ia ʻe hotau ngaahi kaungātui ʻi he ʻuluaki senitulí?

⁶ Naʻe ʻikai ke maʻu ʻe ho ngaahi kaungātui ʻi he ʻuluaki senitulí ʻa e Tohi Tapú fakakātoa ke ngāueʻaki ʻi heʻenau ngāue ko e faifakamoʻoní. Naʻe ʻikai ke ala maʻu ʻa e Kōsipeli ʻa Mātiú ia tuku kehe ʻene toki aʻu mai ki he 41 T.S. Ko e niʻihi ʻo e ngaahi tohi ʻa Paulá naʻe hiki ia ki muʻa pea toki kakato ʻa e tohi ʻa Ngāué, ʻi he 61 T.S. nai. Ka naʻe ʻikai ke maʻu ʻe he muʻaki kau Kalisitiané ha ngaahi tatau fakafoʻituitui ʻo e Tohi Tapu Māʻoniʻoní kakato pe ko ha ngaahi tohi kehekehe ke tuku ʻi he kakai mahuʻingaʻiá. Ki muʻa ke hoko ko ha kau ākonga ʻa Sīsuú, naʻe ʻosi fanongo ʻa e kau Kalisitiane Siú ia ki hono lau ʻa e Ngaahi Konga Tohi Tapu Faka-Hepeluú ʻi he sinakoké. (2 Kol. 3:14-16) Ka neongo ia, naʻe kei fiemaʻu pē ke nau hoko ko ha kau ako tōtōivi, koeʻuhí ʻoku pau pē naʻe fiemaʻu kiate kinautolu ke nau lea maʻuloto mai ʻaki ha ngaahi konga tohi.

⁷ ʻI he ʻahó ni, ko e tokolahi taha ʻo kitautolú ʻoku tau maʻu ha tatau fakafoʻituitui ʻo e Tohi Tapú pea mo ha ngaahi tohi Fakatohitapu lahi fau. ʻOku tau ngaohi ākonga ʻaki hono talaki ʻa e ongoongo leleí ʻi he ngaahi fonua ʻe 240 pea ʻi he ngaahi lea lahi.

8, 9. (a) Naʻe fakamafeia ʻe he laumālie māʻoniʻoní ʻa e kau ākonga ʻa Sīsuú ke nau fai ʻa e hā? (e) Ko e hā ʻoku tokonaki mai ʻe he tamaioʻeiki anga-tonú ʻi he tokoni ʻa e laumālie ʻo e ʻOtuá?

⁸ ʻI he taimi naʻe fekau atu ai ʻe Sīsū ʻene kau ākongá ke nau hoko ko e kau fakamoʻoní, naʻá ne tala ange kiate kinautolu: “Te mou maʻu ʻa e mālohi ʻi he ʻalu hifo kiate kimoutolu ʻa e laumālie māʻoniʻoní.” ʻI he malumalu ʻo e tataki ʻa e laumālie, pe ivi ngāue ʻo e ʻOtuá, ʻe faai atu pē ʻo hoko ʻa e kau muimui ʻo Sīsuú ko e kau fakamoʻoni ʻi he kotoa ʻo e foʻi māmaní. Fakafou ʻi he laumālie māʻoniʻoní, naʻe fai ai ʻe Pita mo Paula ʻa e ngaahi fakamoʻui mahaki, kapusi tēmeniō,  pea aʻu ki hono fokotuʻu hake ʻa e maté! Kae kehe, ko e mālohi naʻe maʻu fakafou ʻi he laumālie māʻoniʻoní naʻe ʻi ai hono taumuʻa mahuʻinga ange. Naʻá ne fakamafeia ʻa e kau ʻapositoló mo e kau ākonga kehé ke nau ʻoatu ʻa e ʻilo totonu ʻa ia ʻe maʻu ai ʻa e moʻui taʻengatá.​—Sione 17:3.

⁹ ʻI he ʻaho ʻo e Penitekosi ʻo e 33 T.S., naʻe lea ai ʻa e kau ākonga ʻa Sīsuú “ʻi he ngaahi lea kehekehe, ʻo hangē tofu pē ko ia naʻe ʻai ʻe he laumālié ke nau leaʻakí.” Naʻa nau fai ai ha fakamoʻoni fekauʻaki “mo e ngaahi meʻa fisifisimuʻa ʻa e ʻOtuá.” (Ngā. 2:1-4, 11) ʻOku ʻikai ke tau lea fakaemana kitautolu ʻi ha ngaahi lea kehekehe ʻi he ʻahó ni. Kae kehe, ʻi he tokoni ʻa e laumālie ʻo e ʻOtuá, ʻoku tokonaki mai ai ʻe he tamaioʻeiki anga-tonú ʻa e ngaahi tohi Fakatohitapu ʻi he ngaahi lea lahi. Ko e fakatātaá, ʻoku laui miliona ʻa e ngaahi tatau ʻo e Taua Leʻo mo e ʻĀ Hake! ʻoku pulusi ʻi he māhina kotoa pē, pea ko ʻetau uepisaití, ʻa e jw.org, ʻoku ʻomai ai ʻa e ʻū tohi mo e ngaahi vitiō makatuʻunga ʻi he Tohi Tapú laka hake ʻi he lea ʻe 1,000. Ko e kotoa ʻo e meʻá ni ʻokú ne fakamafeia kitautolu ke tau fanongonongo ʻa e “ngaahi meʻa fisifisimuʻa ʻa e ʻOtuá” ki he kakai ʻo e ngaahi puleʻanga, ngaahi matakali, mo e ngaahi lea kotoa pē.​—Fkh. 7:9.

10. Talu mei he 1989, ko e hā kuo lava ʻo fakahoko ʻi he fekauʻaki mo e liliu ʻo e Tohi Tapú?

¹⁰ Talu mei he 1989 mo e tō ʻa e fakamamafa ʻa e tamaioʻeiki anga-tonú ki hono ʻai ʻa e Liliu Tohi Tapu ʻo e Māmani Foʻoú ʻo e Tohi Tapu Māʻoniʻoní ke ala maʻu ʻi ha ngaahi lea lahi. Kuo ʻosi liliu ʻa e Tohi Tapú ni ki ha ngaahi lea laka hake ʻi he 200, pea kuo pulusi ha ngaahi tatau ʻe laui hongofulu miliona​—pea ʻoku toe ʻi ai mo e ngaahi tatau lahi ange ʻoku lolotonga pulusi. Ko e ʻOtuá pē mo hono laumālié kuo lava ai ke lavameʻa ʻa e ngaahi feingá ni.

11. Ko e hā kuo lava ʻi he fekauʻaki mo e liliu ʻo e ʻū tohi ʻa e Kau Fakamoʻoní?

¹¹ Ko e ngāue liliu leá ʻoku fai ia ʻe he laui afe ʻo e kau ngāue pole Kalisitiane ʻi he ngaahi fonua laka hake ʻi he 150. ʻOku ʻikai totonu ke tau ʻohovale ʻi he meʻá ni, he ʻoku ʻikai ha toe kautaha kehe ʻi he māmaní ʻe tataki ʻe he laumālie māʻoniʻoní ʻi he “fakamoʻoni fakaʻāuliliki” ʻi māmani lahi ʻo fekauʻaki mo Sihova ko e ʻOtuá, ko ʻene Tuʻi Faka-Mīsaiá, pea mo e Puleʻanga fakahēvani kuo ʻosi fokotuʻú!​—Ngā. 28:23.

12. Naʻe anga-fēfē ʻa e malava ʻa Paula mo e kau Kalisitiane kehé ke fai ʻa e ngāue ko e faifakamoʻoní?

¹² ʻI he taimi naʻe faifakamoʻoni ai ʻa Paula ki he kau Siu mo e kau Senitaile ʻi ʻAniteoke ʻi Pisitiá, “ko e faʻahinga . . . naʻe hehema totonu ki he moʻui taʻengatá naʻa nau hoko ko e kau tui.” (Ngā. 13:48) Hangē ko ia ʻoku fakaʻosiʻaki ʻe Luke ʻi he tohi ʻa Ngāué, ko Paula ʻokú ne “malangaʻaki ʻa e Puleʻanga ʻo e ʻOtuá . . . ʻaki ʻa e lea tauʻatāina mātuʻaki lahi moʻoni, ʻo ʻikai taʻofia.” (Ngā. 28:31) ʻOku faifakamoʻoni ʻa e ʻapositoló ʻi fē? ʻI Loma tonu​—ko e kolomuʻa ʻo ha puleʻanga hau ʻi he māmaní! Tatau ai pē pe naʻe fakafou ʻi ha ngaahi malanga pe ʻi ha ngaahi founga kehe, naʻe fai ʻe he muʻaki kau muimui ʻo Sīsuú ʻa ʻenau ngāue fakaefakamoʻoní kotoa ʻi he tokoni mo e tataki ʻa e laumālie māʻoniʻoní.

13. Ko e hā ʻoku totonu ai ke tau lotu ʻi he taimi ʻoku tau hokosia ai ha fakatangá?

¹³ ʻI he taimi naʻe hokosia ai ʻe he muʻaki kau ākonga ʻa Sīsuú ʻa e fakatangá, naʻa nau kōlenga kia Sihova ki ha loto-toʻa. Ko e hā ʻa e olá? Naʻa nau fonu ʻi he laumālie māʻoniʻoní pea fakaivia ai kinautolu ke nau leaʻaki ʻa e folofola ʻa e ʻOtuá ʻi he loto-toʻa. (Ngā. 4:18-31) ʻOku tau lotu foki mo kitautolu ki ha poto mo ha mālohi ke hanganaki faifakamoʻoni neongo ʻa e fakatangá. (Sēm. 1:2-8) Koeʻuhi ʻoku tāpuakiʻi kitautolu ʻe he ʻOtuá mo tokoniʻi ʻe hono laumālié, ʻoku tau tuiaki atu ʻi he ngāue ʻo e Puleʻangá. ʻOku halaʻatā ha meʻa te ne taʻofi ʻa e ngāue ko e faifakamoʻoní​—ʻo ʻikai lava ʻe ha fakafepaki kakaha pe ko ha fakatanga anga-fakamanu. ʻI he taimi ʻoku fakatangaʻi ai kitautolú, ʻoku fiemaʻu moʻoni ke tau lotu ʻo kole ʻa e laumālie māʻoniʻoní pea ki ha poto mo e loto-toʻa ke talaki ʻa e ongoongo leleí.​—Luke 11:13.

14, 15. (a) Ko e hā naʻe hoko ko ha ola ia ʻo e “fakatanga naʻe malanga hake ʻi he fekauʻaki mo Sitīvení”? (e) ʻI hotau taimí, naʻe anga-fēfē ʻa e hoko ʻa e kakai tokolahi ʻi Saipīlia ʻo ako ʻa e moʻoní?

¹⁴ Naʻe fai ʻe Sitīveni ha faifakamoʻoni loto-toʻa ki muʻa ke ne fetaulaki mo e mate ʻi he nima ʻo hono filí. (Ngā. 6:5; 7:54-60) ʻI he “fuʻu fakatanga” ko ia naʻe malanga hake ʻi he taimi ko iá, naʻe movete ʻa e kotoa ʻo e kau ākongá ki he kotoa ʻo Siutea mo Samēliá tuku kehe pē ʻa e kau ʻapositoló. Ka naʻe ʻikai ke taʻofi ʻe he meʻa ia ko iá ʻa e ngāue ko e faifakamoʻoní. Naʻe ʻalu ʻa Filipe ki Samēlia “ke ne malangaʻaki ʻa e Kalaisí” pea naʻá ne fai ia ʻo mātuʻaki ola lelei ʻaupito. (Ngā. 8:1-8, 14, 15, 25) ʻIkai ko ia pē, ʻoku tala mai kiate kitautolu: “Ko e faʻahinga ko ia naʻe movete atu tupu mei he fakatanga naʻe malanga hake ʻi he fekauʻaki mo Sitīvení naʻa nau ʻalu atu ʻo aʻu ki Finisia, Saipalo, mo ʻAniteoke, ka naʻa nau leaʻaki ʻa e folofolá ki he kau Siú pē. Kae kehe, naʻe omi ha kau tangata ʻe niʻihi mei honau lotolotongá mei Saipalo mo Sailine ki ʻAniteoke pea nau kamata lea ki he kakai lea faka-Kalisí, ʻo talaki ʻa e ongoongo lelei ʻo e ʻEiki ko Sīsuú.” (Ngā. 11:19, 20) ʻI he taimi ko iá, naʻe hanga ai ʻe he fakatangá ia ʻo ʻai ke mafola ʻa e pōpoaki ʻo e Puleʻangá.

¹⁵ ʻI hotau taimí, naʻe hoko ha meʻa meimei tatau ʻi he Sovieti ʻIunioni ki muʻá. Tautefito ʻi he 1950 tupú, naʻe fakaheeʻi ai ʻa e laui afe ʻo e Kau Fakamoʻoni ʻa Sihová ki Saipīlia. Koeʻuhi naʻa nau movete atu ʻi he ngaahi feituʻu nofoʻi kehekehe, naʻe mafola hokohoko atu ai pē ʻa e ongoongo leleí ʻi he fuʻu feituʻu lahi ko iá. Naʻe halaʻatā ha founga ne mei lava ke maʻu ai ʻe ha fuʻu Kau Fakamoʻoni tokolahi pehē fau ʻa e paʻanga naʻe fiemaʻu ke fononga nai ai ʻi he mamaʻo ko e kilomita ʻe 10,000 ke fanongonongo ʻa e ongoongo leleí! Kae kehe, ko e puleʻangá tonu naʻá ne ʻave kinautolu ki he fonua ko iá. “ʻI he ʻosi angé,” ko e lea ia ʻa ha tokoua ʻe taha, “ko e kau maʻu mafaí tonu naʻa nau ʻai ke malava ai ʻa e laui afe ʻo e kakai loto-totonu ʻi Saipīliá ke nau hoko ʻo ʻiloʻi ʻa e moʻoní.”

16, 17. Ko e hā ʻa e fakamoʻoni ʻoku ʻomai ʻe he tohi ʻa Ngāué ʻo fekauʻaki mo hono tāpuakiʻi ʻe Sihova ʻa e ngāue ko e faifakamoʻoní?

¹⁶ Naʻe ʻikai toe fehuʻia ʻa e ʻi he muʻaki kau Kalisitiané ʻa e tāpuaki ʻa Sihová.  Naʻe fai ʻe Paula mo e niʻihi kehé ʻa e toó mo e fuʻifuʻí, “ka ko e ʻOtuá naʻá ne hanganaki ʻai ia ke tupú.” (1 Kol. 3:5, 6) Ko e ngaahi fakamatala ʻi he tohi ʻa Ngāué ʻoku ʻomai ai ʻa e fakamoʻoni ʻo ha tupu pehē koeʻuhí ko hono tāpuakiʻi ʻe Sihova ʻa e ngāue ʻa ia ko e faifakamoʻoní. Ko e fakatātaá, “naʻe hokohoko atu ai pē ʻa e mafola ʻa e folofola ʻa e ʻOtuá, pea naʻe mātuʻaki tupulekina ai pē ʻa e tokolahi ʻo e kau ākongá ʻi Selusalema.” (Ngā. 6:7) ʻI he mafola atu ʻa e ngāue fakaefakamoʻoní, “ko e fakatahaʻanga ʻi he kotoa ʻo Siutea mo Kāleli mo Samēliá naʻa nau hokosia ha vahaʻa taimi ʻo e nonga, kuo langa hake kinautolu; pea ʻi he ʻaʻeva ʻa e fakatahaʻangá ʻi he manavahē [anga-ʻapasia] kia Sihová pea ʻi he fakafiemālie ʻa e laumālie māʻoniʻoní, naʻe tupu fakautuutu ai pē.”​—Ngā. 9:31.

¹⁷ ʻI ʻAniteoke Sīlia, naʻe fanongo fakatouʻosi ʻa e kau Siu mo e kakai lea faka-Kalisí ʻi he moʻoní mei ha kau fakamoʻoni loto-toʻa. “ʻIkai ngata aí,” ko e lau ia ʻa e fakamatalá, “ko e toʻukupu ʻo Sihová naʻe ʻiate kinautolu, pea naʻe hoko ha fuʻu tokolahi ko e kau tui ʻo nau tafoki ki he ʻEikí.” (Ngā. 11:21) ʻI he fekauʻaki mo ha toe laka ki muʻa lahi ange ʻi he fuʻu kolo ko iá, ʻoku tau lau: “Ko e folofola ʻa Sihová naʻe fakautuutu ai pē ʻene tupú mo ʻene mafolá.” (Ngā. 12:24) Pea ʻi he ngāue fakaefakamoʻoni fakaʻāuliliki ʻa Paula mo ha niʻihi kehe ʻi he lotolotonga ʻo e kau Senitailé, “naʻe tupu mo kaukaua ai pē ʻa e folofola ʻa Sihová ʻi ha tuʻunga mālohi.”​—Ngā. 19:20.

18, 19. (a) Ko e hā ʻoku tau ʻilo ai “ko e toʻukupu ʻo Sihová” ʻoku ʻiate kitautolú? (e) ʻOmai angé ha fakatātā ʻoku hā ai ʻoku tokoniʻi ʻe Sihova ʻene kakaí.

¹⁸ “Ko e toʻukupu ʻo Sihová” ʻoku ʻikai toe fehuʻia ʻa ʻene toe ʻiate kitautolu ʻi he ʻaho ní. Ko e ʻuhinga ia ʻoku hoko ai ʻa e fuʻu tokolahi ko e kau tuí pea nau fakaʻilongaʻi ʻenau fakatapui ki he ʻOtuá ʻaki ʻenau papitaisó. ʻIkai ngata aí, ko e tokoni pē mo e tāpuaki ʻa e ʻOtuá ʻoku tau malava ai ke kātekina ʻa e fakafepaki fefeká​—ʻi he taimi ʻe niʻihi, ko e fakatanga kakahá​—pea tau fakahoko lavameʻa ai ʻetau ngāue fakafaifekaú, ʻo hangē pē ko ia naʻe fai ʻe Paula mo e muʻaki kau Kalisitiane kehé. (Ngā. 14:19-21) ʻE tokoniʻi maʻu pē kitautolu ʻe Sihova ko e ʻOtuá. Ko hono “nima taʻengata” ʻoku ʻikai matukutuku ʻene tokoniʻi kitautolu ʻi he kotoa ʻo hotau ngaahi ʻahiʻahí. (Teu. 33:27) ʻAi ke tau toe manatuʻi foki, koeʻuhí ko hono huafa lahí, heʻikai ʻaupito ai ke liʻaki ʻe Sihova ʻene kakaí.​—1 Sām. 12:22; Saame 94:14.

¹⁹ Ke fakatātaaʻi: Koeʻuhí ko e hanganaki faifakamoʻoni ʻa Tokoua Harald Abt, naʻe ʻave ai ia ʻe he kau Nasí ki he kemi fakamamahi Sachsenhausen he lolotonga ʻa e Tau II ʻa Māmaní. ʻI Mē 1942 naʻe ʻalu ai ʻa e kau polisi fufū Kesitapó ki he ʻapi ʻo hono uaifí, ko Elsa, ʻo ʻave ʻena kiʻi taʻahiné, pea puke pōpula ai mo Elsa. Naʻe ʻave ʻa e fefiné ni ki he ngaahi kemi kehekehe. “Ko hoku ngaahi taʻu ʻi he ngaahi kemi fakamamahi Siamané naʻá ne akoʻi mai kiate au ha lēsoni tuʻu-ki-muʻa,” ko e lau ia ʻa Tuofefine Abt. “ʻA ia, ko e lahi moʻoni ko ē ʻo e lava ke fakaivimālohiʻi koe ʻe he laumālie ʻo Sihová ʻi he taimi ʻokú ke tofanga ai ʻi ha ʻahiʻahi mātuʻaki lahi moʻoni! Ki muʻa ke puke pōpula aú, naʻá ku lau ʻa e tohi ʻa ha tuofefine naʻe pehē ai ʻi he tofanga ʻi ha ʻahiʻahi kakahá ʻoku hanga ʻe he  laumālie ʻo Sihová ʻo fakatupunga ha nonga ke hoko mai kiate koe. Naʻá ku fakakaukau au kuo pau pē ko haʻane kiʻi fakalahi eni ia ʻaʻana. Ka ʻi he taimi naʻá ku foua ai ʻe au tonu ʻa e ngaahi ʻahiʻahí, naʻá ku ʻiloʻi ai ko e meʻa naʻá ne leaʻakí naʻe moʻoni. ʻOku hoko moʻoni pehē pē ia. ʻOku faingataʻa ke sioloto atu ki he meʻa ko iá, kapau kuo teʻeki ai ke ke hokosia ia. Ka naʻe hoko moʻoni ia kiate au.”    

20. Ko e hā naʻe fai ʻe Paula he lolotonga hono tuku pōpula ia ʻi ha falé, pea ko e hā ʻa e fakalototoʻa ʻoku lava ke fai ʻe he meʻá ni ki he niʻihi ʻo hotau fanga tokouá mo e fanga tuofāfiné?

²⁰ ʻOku fakaʻosiʻaki ʻe he tohi ʻa Ngāué ʻa e faivelenga ʻa Paula ʻi he “malangaʻaki ʻa e Puleʻanga ʻo e ʻOtuá.” (Ngā. 28:31) Koeʻuhí naʻe tuku pōpula ia ʻi ha fale, naʻe ʻikai ai te ne tauʻatāina ke faifakamoʻoni mei he fale ki he fale ʻi Loma. Ka neongo ia, naʻá ne hanganaki faifakamoʻoni ki he tokotaha kotoa pē naʻe haʻu kiate iá. ʻI he ʻahó ni, ko e niʻihi ʻo siʻotau fanga tokouá mo e fanga tuofāfiné ʻoku nau nofo fale pē, ʻo mahalo ko ha toka mohenga nai, pe ko haʻanau nofo ʻi ha ngaahi ʻapi tauhiʻanga vaivai koeʻuhi ko e taʻumotuʻá, puké, pe ngāvaivaí. Neongo ia, ko ʻenau ʻofa ki he ʻOtuá pea mo ʻenau holi ke faifakamoʻoní ʻoku kei mālohi ai pē. ʻOku tau lotu maʻanautolu pea ʻoku lelei ke tau kole ke hanga ʻe heʻetau Tamai fakahēvaní ʻo ʻai ke nau lava ʻo fetuʻutaki mo e faʻahinga ʻoku nau fakaʻamua ange mai ke ako fekauʻaki mo ia pea mo ʻene ngaahi taumuʻa fakaofó.

21. Ko e hā ʻoku totonu ai ke tau faifakamoʻoni fakataha mo ha ongoʻi ʻo e fakavavevavé?

²¹ ʻOku lava ʻa e tokolahi taha ʻo kitautolu ke kau ʻi he ngāue fakafaifekau fale-ki-he-falé pea ʻi he ngaahi tafaʻaki kehe ʻo e ngāue ngaohi-ākongá. Ko ia ʻai ke tau taki taha fai ʻa e meʻa kotoa pē te tau malavá ke fakakakato hotau ngafa ko e kau fanongonongo ʻo e Puleʻangá, ʻo kau ʻi he faifakamoʻoni “ki he feituʻu taupotu taha ʻo e māmaní.” Ko e ngāué ni kuo pau ke fai ia fakataha mo ha ongoʻi ʻo e fakavavevave, he ko e “fakaʻilonga” ʻo e ʻi heni ʻa Kalaisí ʻoku hā mahino mai ia. (Māt. 24:3-14) ʻOku ʻikai ha toe taimi ke fakamoleki noa. ʻI he lolotongá ni, ʻoku tau “femoʻuekina ai pē ʻi he ngāue ʻa e ʻEikí.”​—1 Kol. 15:58.

22. Ko e hā ʻoku totonu ke tau fakapapauʻi ke faí ʻi heʻetau tatali atu ki he ʻaho ʻo Sihová?

²² ʻI heʻetau tatali atu ki he “hoko mai ʻa e ʻaho lahi mo fakamanavahē ʻo Sihová,” ʻai ke tau fakapapauʻi ke hokohoko atu hono fai ha fakamoʻoni loto-toʻa mo faitōnunga. (Sioeli 2:31) Te tau kei maʻu pē ha kakai tokolahi ʻo hangē ko e kau Pēleá ʻa ia “naʻa nau tali mātuʻaki loto-vēkeveke ʻa e folofola ʻa e ʻOtuá.” (Ngā. 17:10, 11) Ko ia ai, fakatauange ke tau faifakamoʻoni kae ʻoua kuo tau toki fanongo ki he ngaahi leá ni: “Mālō e ngāue, tamaioʻeiki lelei mo faitōnunga!” (Māt. 25:23) Kapau te tau faivelenga ʻi hono fai ʻetau tafaʻakí ʻi he ngāue ngaohi-ākonga ʻi he ʻaho ní pea tau faitōnunga ai pē kia Sihova, ko e moʻoni te tau fiefia ʻi he kotoa ʻo ʻitānití he naʻa tau maʻu ʻa e tāpuaki ʻo e kau ʻi he “fakamoʻoni fakaʻāuliliki” fekauʻaki mo e Puleʻanga ʻo e ʻOtuá!