1, 2. Ko e hā ʻoku ʻikai ʻohovale ai ʻa Paula ʻi he fakatanga ʻokú ne fehangahangai mo ia ʻi Selusalemá?

 ʻI HONO hamusi ia mei ha fuʻu kakai ʻita ʻi Selusalemá, ʻoku toe tuku pōpula pē ʻa Paula. ʻOku ʻikai ke ʻohovale ʻa e ʻapositolo faivelengá ʻi he fakatanga ʻokú ne fehangahangai mo ia ʻi heni ʻi Selusalemá. Naʻe tala ange kiate ia ke ne ʻamanekina ʻa e “tuku pilīsone mo e ngaahi mamahi” ʻi he kolo ko ʻení. (Ngā. 20:22, 23) Pea lolotonga ʻa e ʻikai ke ne ʻiloʻi pau ʻa e meʻa tofu pē ko ia ʻoku toka mai nai mei muʻá, ʻoku ʻiloʻi ʻe Paula ʻe hokohoko atu ʻene faingataʻaʻia koeʻuhi ko e huafa ʻo Sīsuú.​—Ngā. 9:16.

² Naʻa mo e kau palōfita Kalisitiané naʻa nau fakatokanga kia Paula ʻo pehē ʻe haʻi pea tuku atu ia “ki he nima ʻo e kakai ʻo e ngaahi puleʻangá.” (Ngā. 21:4, 10, 11) Naʻe toki ʻosi atu ʻa e feinga ha fuʻu kakai Siu ke tāmateʻi ia, pea taimi nounou mei ai, naʻe hā ʻo hangē ka “tāmateʻi” ia ʻe he kau mēmipa ʻo e Sanetalimí ʻi heʻenau felāuaki ko e meʻa ʻiate iá. ʻI he taimi ko ʻení ko e ʻapositoló ko ha pōpula ia ʻoku tauhi ʻe he kau sōtia Lomá pea ʻokú ne fehangahangai mo e ngaahi hopo mo e ngaahi tukuakiʻi lahi ange. (Ngā. 21:31; 23:10) Ko e moʻoni, ʻoku fiemaʻu ki he ʻapositolo ko Paulá ha fakalototoʻa!

3. Ko fē ʻoku tau maʻu mei ai ʻa e fakalototoʻa ke tutui atu ʻi heʻetau ngāue fakamalangá?

³ ʻI he taimi ko ʻeni ʻo e ngataʻangá, ʻoku tau ʻiloʻi ko e “faʻahinga kotoa ʻoku nau loto ke moʻui ʻaki ʻa e anga-līʻoa fakaʻotua ʻi he fekauʻaki mo Kalaisi Sīsuú, ʻe fakatangaʻi foki kinautolu.” (2 Tīm. 3:12) ʻI he taimi ki he taimi, ʻoku tau kau mo kitautolu ʻi he fiemaʻu ʻa e fakalototoʻa ke tau tutui atu ʻi heʻetau ngāue fakamalangá. He houngaʻia moʻoni ē ko kitautolu ʻi he ngaahi lea taimi totonu mo fakafiemālie ʻoku tau maʻu fakafou ʻi he ngaahi tohi mo e ngaahi fakataha kuo fokotuʻutuʻu ʻe he “tamaioʻeiki anga-tonu mo potó”! (Māt. 24:45) Kuo fakapapauʻi mai ʻe Sihova kiate kitautolu ʻe ʻikai ʻi ai ha fili ʻe taha ʻo e ongoongo leleí ʻe lavameʻa. ʻE ʻikai te nau fakaʻauha ʻa ʻene kau sevānití ʻi he tuʻunga ko ha kulupú pe ko hono taʻofi ʻenau ngāue fakamalangá. (ʻAi. 54:17;  Sel. 1:19) Kae fēfē nai ʻa e ʻapositolo ko Paulá? Naʻá ne maʻu ha fakalototoʻa ke hokohoko atu ʻa hono fai ha fakamoʻoni fakaʻāulilikí neongo ʻa e fakafepakí? Kapau ko ia, ko e hā ʻa e fakalototoʻa ko iá, pea naʻe anga-fēfē ʻene fakafeangai ki aí?

4, 5. Ko e hā ʻa e fakalototoʻa naʻe maʻu ʻe Paulá, pea ko e hā naʻe taimi tonu aí?

⁴ Naʻe maʻu ʻe he ʻapositolo ko Paulá ʻi he pō hono hoko hili hono fakahaofi ia mei he Sanetalimí ha fakalototoʻa naʻe fiemaʻu lahi. ʻOku tala mai ʻe he fakamatala fakamānavaʻí: “Naʻe tuʻu atu ai ʻa e ʻEikí kiate ia ʻo pehē: ‘Loto-toʻa! He hangē pē ko hoʻo fai ha fakamoʻoni fakaʻāuliliki fekauʻaki mo au ʻi Selusalemá, kuo pau ke ke toe faifakamoʻoni pehē pē foki ʻi Loma.’” (Ngā. 23:11) ʻI he ngaahi lea fakalototoʻa ko ia meia Sīsuú, naʻe fakapapauʻi ai kia Paula ʻa e fakahaofí. Naʻá ne ʻiloʻi te ne hao ʻo ne aʻu ki Loma ʻo maʻu ai ʻa e monū ko e faifakamoʻoni ʻi ai ʻo kau kia Sīsū.

⁵ Ko e fakalototoʻa naʻe ʻoange kia Paulá naʻe taimi tonu. ʻI he ʻaho pē hono hokó, naʻe fai ʻe ha kau tangata Siu laka hake he toko 40 ha “faʻufaʻufono pea nau fuakava ke hoko ha mala kiate kinautolu kapau te nau kai mo inu ki muʻa ke nau tāmateʻi ʻa Paula.” Ko e faʻufaʻufono “fuakava” ko ʻení naʻe fakahaaʻi ai ʻa e mātuʻaki fakapapauʻi ko ia ʻe he kau Siu ko iá ke nau fakapoongi ʻa e ʻapositoló. Kapau naʻe ʻikai ke nau lavameʻa ʻi hono fakahoko ʻenau faʻufaʻú, ko e ola ʻe hoko aí, ko ʻenau tuí ia, ʻe hoko ai kiate kinautolu ha talatuki, pe ko ha mala. (Ngā. 23:12-15) Ko ʻenau palaní, ʻa ia naʻe fakamafaiʻi ʻe he houʻeiki taulaʻeikí mo e kau mātuʻá, ko hono toe fakafoki mai ʻa Paula ki he Sanetalimí ki hano toe fakafehuʻi lahi ange, ke hangē pē hano ʻomi ke toe fakapapauʻi ke tonu ange ʻa e ngaahi meʻa fekauʻaki mo iá. Ka ʻi he halá, ʻe taliʻi ai ʻe he kau faʻufaʻufonó ke ʻohofi ʻa Paula ʻo tāmateʻi ia.

6. Naʻe anga-fēfē hono fakaeʻa ʻa e faʻufaʻu ke tāmateʻi ʻa Paulá, pea ko e hā ʻa e faʻifaʻitakiʻanga ʻe lava ke maʻu ʻe he fānau ʻi he ʻaho ní ʻi he fakamatala ko ʻení?

⁶ Kae kehe, naʻe fanongo ʻa e ʻilamutu ia ʻo Paulá ʻi he faʻufaʻu ko ʻení peá ne fakahā ia kia Paula. Ko ia naʻe ʻai ai ʻe Paula ʻa e kiʻi talavoú ni ke ne fakahā ʻa e meʻa ko iá ki he ʻeikitau Loma ko Kalautiasi Lisiasí. (Ngā. 23:16-22) Ko e moʻoni ʻoku ʻofa ʻa Sihova ʻi he kau talavou ʻoku nau hangē ko e ʻilamutu ko eni ʻo Paula ʻoku ʻikai tala mai hono hingoá, ʻo nau fakamuʻomuʻa loto-toʻa ʻa e lelei maʻá e kakai ʻa e ʻOtuá ʻi haʻanautolú tonu mo nau fakahoko faitōnunga ha faʻahinga meʻa pē ʻoku nau lavá ke pouaki ʻa e ngaahi meʻa ʻo e Puleʻangá.

7, 8. Ko e hā ʻa e ngaahi fokotuʻutuʻu naʻe fai ʻe Kalautiasi Lisiasi koeʻuhi ke malu ai ʻa Paulá?

⁷ ʻI hono tala atu pē ko ia ʻa e faʻufaʻu naʻe fai kia Paulá, naʻe hanga leva ʻe Kalautiasi Lisiasi, ʻa ia naʻá ne ʻeikitau ki ha kau tangata ʻe toko 1,000, ʻo ne fekauʻi ke ʻai ha kau kaʻate fakakautau ʻe toko 470​—ʻa ia ko e kau sōtia, kau  tangata toʻo tao, mo e kau tangata heka hoosi​—ke nau mavahe mei Selusalema ʻi he pō ko iá ʻo fakafononga malu atu ʻa Paula ki Sesalia. ʻI he aʻu pē ki aí, ʻe tuku atu ia kia Kōvana Filike. a Neongo ko Sesaliá, ʻa e kolomuʻa fakapuleʻanga faka-Loma ʻo Siuteá, naʻe ʻi ai ha kakai Siu tokolahi naʻe nofo ai, naʻe meimei ko e tokolahi taha ne nau nofoʻi iá ko e kau Senitaile. Ko e ngaahi tuʻunga maʻumaʻuluta naʻe ʻi aí naʻe kehe ia mei he tuʻunga naʻe māʻunga hoko ʻi Selusalemá, ʻa ia naʻe fakahāhā ai ʻe he tokolahi ʻa e ongoʻi tomuʻa fehiʻa fakalotú pea nau kau ʻi he ngaahi fakamoveuveú. Naʻe toe hoko foki ʻa Sesalia ko e ʻuluʻiʻapitanga tefito ia ʻo e ngaahi kongakau fakakautau Loma ʻi Siuteá.

⁸ ʻI he muimui ʻo fakatatau ki he lao ʻa Lomá, naʻe ʻave ai ʻe Lisiasi ha tohi kia Filike ʻo fakamatalaʻi ai ʻa e keisí. Naʻe lave ai ʻa Lisiasi ʻo pehē ʻi hono ʻiloʻi ko ia ko Paulá ko ha tangataʻifonua Lomá, naʻá ne fakahaofi ai ʻa Paula ʻi he teu ke “fakapoongi ia” ʻe he kau Siú. Naʻe pehē ʻe Lisiasi naʻe ʻikai te ne ʻilo ha halaia ʻe taha ʻa Paula ʻi ha meʻa “ʻoku tuha mo e maté pe ko e tuku pilīsoné,” ka koeʻuhí ko ha faʻufaʻufono naʻe fai kia Paula, naʻá ne ʻave ai ia kia Filike koeʻuhí ke lava ʻa e kōvaná ʻo fanongo ki he kau talatalaakí pea fai ai ha fakamaau ʻi he meʻa ko iá.​—Ngā. 23:25-30.

9. (a) Naʻe anga-fēfē hono maumauʻi ʻa e ngaahi totonu ʻa Paula ʻi he tuʻunga ko ha tangataʻifonua Lomá? (e) Ko e hā ʻe lava nai ai ke tau ngāueʻaongaʻaki ʻetau ngaahi totonu ʻi he tuʻunga ko e kau tangataʻifonua ʻo ha fonuá?

⁹ Naʻe lea moʻoni ʻa Lisiasi ʻi he meʻa naʻá ne tohí? Naʻe ʻikai ke moʻoni fakaʻaufuli. ʻOku hā ngali naʻá ne feinga ke ʻai ʻa ia tonu ke ne mātuʻaki hā lelei atu. Naʻe ʻikai moʻoni ke ne fai ʻe ia ʻa e fakahaofi ʻo Paulá koeʻuhí ko ʻene ʻiloʻi hake ko e ʻapositoló ko ha tangataʻifonua Lomá. ʻIkai ko ia pē, naʻe ʻikai ke lave ʻa Lisiasi ia ki heʻene fekau ko ia ke ʻai ʻa Paula ʻo “haʻi ia ʻaki ha sēini ʻe ua” peá ne toe ʻoatu mo e tuʻutuʻuni ki mui ai “ke fakaʻeke ia ʻaki hano haha.” (Ngā. 21:30-34; 22:24-29) Naʻe maumauʻi ai ʻe Lisiasi ʻa e ngaahi totonu ʻa Paula ʻi he tuʻunga ko ha tangataʻifonua Lomá. ʻI he ʻahó ni, ʻoku ngāueʻaki ʻe Sētane ʻa e loto-māfana tōtuʻa fakalotu ʻa e kau fakafepakí ke tafunaki ai ʻa e fakatangá, pea ʻe lava pē ke tau hokosia hano maumauʻi ʻa ʻetau ngaahi tauʻatāina fakasiviliané. Ka ʻi he hangē ko Paulá, ʻoku faʻa lava ʻa e kakai ʻa e ʻOtuá ke nau ngāueʻaongaʻaki ʻa e ngaahi totonu kuo ʻoange kiate kinautolu ʻi he tuʻunga ko e kau tangataʻifonua ʻo ha fonua pea kumi ki ha maluʻi ʻi he malumalu ʻo e laó.

10. Ko e hā ʻa e ngaahi tukuakiʻi mafatukituki naʻe fai kia Paulá?

¹⁰ ʻI Sesalia, naʻe “leʻohi malu [ʻa Paula] ʻi he palasi ʻo Hēlotá” ke talitali ai ki he aʻu mai mei Selusalema ʻa e kau talatalaakí. (Ngā. 23:35) ʻI he ʻaho  ʻe nima ki mui ai, naʻa nau haʻu​—ko e Taulaʻeiki Lahi ko ʻAnanaiá, ko ha fakafofonga taukapo ko hono hingoá ko Tetulō, pea mo ha kulupu ko e kau mātuʻa. Naʻe ʻuluaki fakahīkihikiʻi ʻe Tetulō ʻa Filike ʻi he meʻa naʻá ne fai maʻá e kau Siú, ʻa ia ʻoku hā mahino ko ʻene fakahekehekeʻi ʻe ia ʻa Filike ke ne leleiʻia ange ʻiate ia. b Hili iá, ʻi heʻene hoko atu ki he keisi naʻe lolotonga fai ha ngāue ki aí, naʻe lave ai ʻa Tetulō kia Paula ko ha “kiʻi manu maumau mo fakatupu angatuʻu ʻi he lotolotonga ʻo e kau Siu kotoa ʻi he māmani kuo nofoʻí pea ko ha takimuʻa ia ʻo e kulupu lotu mavahe ʻa e kau Nāsaletí. Naʻá ne toe feinga foki ke taʻefakatoputapuʻi ʻa e temipalé, ko ia naʻa mau puke ia.” Ko e kau Siu kehé naʻa nau “kau mai . . . ʻi he ʻoho atu ʻo fakamatematē ko e moʻoni ʻa e ngaahi meʻá ni.” (Ngā. 24:5, 6, 9) Ko e fakatupu angatuʻu, takimuʻa ʻi ha kulupu lotu mavahe fakatuʻutāmaki, pea mo hono ʻuliʻi ʻa e temipalé​—ko e ngaahi tukuakiʻi mafatukituki eni ʻe lava ke iku atu ia ki ha tautea mate.

11, 12. Naʻe anga-fēfē hono fakahalaki ʻe Paula ʻa e ngaahi tukuakiʻi naʻe fai kiate iá?

¹¹ Naʻe fakaʻatā leva ʻa Paula ke ne lea. “ʻOku ou loto-lelei . . . ke u lea atu ʻo fai hoku taukapo ʻoʻokú,” ko ʻene kamatá ia. Naʻá ne fakaʻikaiʻi fakaʻaufuli ʻa e ngaahi tukuakiʻí. Naʻe ʻikai ke ʻuliʻi ʻe he ʻapositoló ʻa e temipalé, pea naʻe ʻikai te ne feinga ke fakatupu angatuʻu. Naʻá ne fakahaaʻi ʻo pehē ko hono moʻoní naʻe ʻikai te ne ʻi Selusalema ʻi ha “ngaahi taʻu lahi” pea naʻá ne haʻu mo ha “ngaahi foaki ʻofa”​—ʻa ia ko e ngaahi tokoni ki he kau Kalisitiane ʻa ia naʻa nau masiva ʻangoʻango tupu nai mei he hongé mo e fakatangá. Naʻe fakamatematē ʻa Paula ʻo pehē ki muʻa ke ne hū ki he temipalé, naʻá ne ʻosi fai ʻa e “fakamaʻa fakaeouaú” pea naʻá ne feinga fakamākukanga ke ne “tauhi maʻu ha konisēnisi ʻataʻatā ʻi he ʻao ʻo e ʻOtuá mo e tangatá.”​—Ngā. 24:10-13, 16-18.

¹² Kae kehe, naʻe fakahaaʻi totonu ʻe Paula naʻá ne fai ha ngāue toputapu ki he ʻOtua ʻo ʻene fanga kuí ʻo “fakatatau ki he ʻalunga ko ia ʻoku nau ui ko ha kulupu lotu mavahé.” Ka naʻá ne fakamatematē ʻo pehē naʻá ne tui ki he “ngaahi meʻa kotoa pē ʻoku tohi ʻi he Laó pea ʻi he ngaahi tohi ʻa e Kau Palōfitá.” Pea hangē ko ia naʻe maʻu ʻe hono kau talatalaakí, naʻá ne maʻu ʻa e ʻamanaki ʻo ha “toetuʻu fakatouʻosi ʻa e māʻoniʻoní mo e taʻemāʻoniʻoní.” Naʻe poleʻi leva ʻe Paula ʻa hono kau talatalaakí: “Tuku ki he kau tangata ʻoku ʻi hení ke nau lea tonu mai pe ko e hā haʻaku hala kuo nau ʻilo, lolotonga ia ʻeku tuʻu atu ko eni ʻi he ʻao ʻo e Sanetalimí, tuku kehe ʻa e meʻa ko eni ʻe taha ʻa ia naʻá ku kalangaʻaki lolotonga ʻeku tuʻu ʻi honau lotolotongá: ‘Ko e toetuʻu ʻa e kau maté kuo fakamāuʻi ai au he ʻahó ni ʻi homou ʻaó!’”​—Ngā. 24:14, 15, 20, 21.

13-15. Ko e hā ʻe lava ai ke tau vakai kia Paula ko ha faʻifaʻitakiʻanga lelei ia ʻo hono fai ha fakamoʻoni loto-toʻa ʻi he ʻao ʻo e kau maʻu mafai fakamāmaní?

 ¹³ Naʻe fokotuʻu ʻe Paula ha faʻifaʻitakiʻanga lelei kiate kitautolu ke tau muimui ai kapau ʻe ʻi ai ha taimi kuo ʻomi ai kitautolu ki he ʻao ʻo e kau maʻu mafai fakamāmaní koeʻuhí ko ʻetau lotú pea tukuakiʻi loi kitautolu ʻo fekauʻaki mo ha ngaahi meʻa hangē ko e pehē ʻoku tau hoko ko e kau fakamaveuveu, kau feinga angatuʻu, pe ko e ngaahi mēmipa ʻo ha “kulupu lotu mavahe fakatuʻutāmaki.” Naʻe ʻikai ke fakahekeheke ʻa Paula ia ki he kōvaná, ʻo ne ngāueʻaki ha ngaahi lea fakahekeheke ʻo hangē ko Tetuloó. Naʻe nonga pē ʻa Paula mo anga-fakaʻapaʻapa. ʻI ha founga fakapotopoto, naʻá ne ʻoange ʻa e fakamoʻoni mahino mo moʻoni. Naʻe lave ʻa Paula ʻo pehē ko e “kau Siu . . . mei he vahefonua ʻo ʻĒsiá” ʻa ia naʻa nau tukuakiʻi ia ki hono ʻuliʻi ʻa e temipalé naʻe ʻikai te nau ʻi ai pea ʻi heʻene tuʻu fakalaó, ʻoku totonu ke malava ke ne fehangahangai mo kinautolu mo fanongo ʻi heʻenau ngaahi tukuakiʻí.​—Ngā. 24:18, 19.

¹⁴ Ko e meʻa naʻe maeʻeeʻa tahá, naʻe ʻikai ke tauholomui ʻa Paula mei hono ʻoatu ʻa e fakamoʻoni ʻo fekauʻaki mo ʻene ngaahi tuí. ʻI ha loto-toʻa, naʻe toe fakahaaʻi ʻe he ʻapositoló ʻa ʻene tui ki he toetuʻú, ʻa e ʻīsiu ko ia naʻá ne langaʻi ha fuʻu felāuaki ʻi he taimi naʻá ne ʻi he ʻao ai ʻo e Sanetalimí. (Ngā. 23:6-10) ʻI heʻene taukapó, naʻe fakamamafaʻi ai ʻe Paula ʻa e ʻamanaki ʻo e toetuʻú. Ko e hā hono ʻuhingá? Koeʻuhí naʻe faifakamoʻoni ʻa Paula ʻo fekauʻaki mo Sīsū mo ʻene toetuʻu mei he maté​—ko ha meʻa ia naʻe ʻikai ke tali ʻe he kau fakafepaki ko iá. (Ngā. 26:6-8, 22, 23) ʻIo, ko e ʻīsiu ʻo e toetuʻú​—pea ko hono moʻoní, ko e tui kia Sīsū pea ki heʻene toetuʻú​—ʻa e meʻa naʻe tefito ai ʻa e fekīhiakí.

 ¹⁵ Hangē ko Paulá, ʻe lava ke tau fai ha fakamoʻoni loto-toʻa pea ʻe lava ke tau maʻu ʻa e fakaivimālohi mei he meʻa naʻe tala ʻe Sīsū ki heʻene kau ākongá: “ʻE fehiʻanekinaʻi kimoutolu ʻe he kakai kotoa pē koeʻuhi ko hoku hingoá. Ka ko e tokotaha kuó ne kātaki ʻo aʻu ki he ngataʻangá ʻe fakahaofi.” ʻOku totonu nai ke tau hohaʻa ʻo fekauʻaki mo e meʻa ke tau leaʻakí? ʻIkai, he naʻe ʻomai ʻe Sīsū ʻa e fakapapau ko ʻení: “ʻI heʻenau ʻave kimoutolu ʻo tuku atu ki he fakamaauʻangá, ʻoua te mou tomuʻa loto-moʻua pe ko e hā te mou leaʻakí; kae ʻilonga ha meʻa ʻe ʻoatu kiate kimoutolu ʻi he houa ko iá, leaʻaki ia, he ʻoku ʻikai ko kimoutolu ia ʻoku leá, ka ko e laumālie māʻoniʻoní.”​—Mk. 13:9-13.

16, 17. (a) Naʻe anga-fēfē ʻa e fakafeangai ʻa Filike ki he hopo ʻa Paulá? (e) Ko e hā nai naʻe hoko ai ʻa Filike ʻo tailiilí, ka ko e hā ʻa e ʻuhinga naʻe hokohoko atu ai ʻa ʻene sio kia Paulá?

¹⁶ Naʻe ʻikai ko e ʻuluaki taimi eni kia Kōvana Filike ke ne fanongo ai ʻo fekauʻaki mo e ngaahi tui faka-Kalisitiané. ʻOku pehē ʻe he fakamatalá: “ʻI hono ʻiloʻi lelei ʻe Filike ʻa e ngaahi moʻoniʻi meʻa fekauʻaki mo e ʻAlunga ʻo e ʻEikí [ko e kupuʻi lea eni naʻe fakamatalaʻiʻaki ʻa e muʻaki lotu faka-Kalisitiané], naʻe kamata ke ne taʻofi kinautolu ʻo ne pehē: ‘Ko fē pē taimi ʻe aʻu mai ai ʻa Lisiasi ko e ʻeikitaú, te u toki fai ai ha tuʻutuʻuni ʻi he ngaahi meʻa ko eni ʻoku fekauʻaki mo kimoutolú.’ Pea naʻá ne ʻoatu ʻa e tuʻutuʻuni ki he ʻōfisa fakakautaú ke tuku pōpula ʻa Paula kae ʻoange haʻane kiʻi tauʻatāina, pea fakaʻatā ʻa hono kakaí ke nau tokangaʻi ʻa ʻene ngaahi fiemaʻú.”​—Ngā. 24:22, 23.

¹⁷ ʻI ha ngaahi ʻaho ki mui ai, naʻe fai ai ʻe Filike, mo hono uaifi ko Telusilá, ʻa ia ko ha fefine Siu, ha fekau ke ʻomi ʻa Paula peá ne “fanongo kiate ia ʻi heʻene lea ʻo fekauʻaki mo e tui kia Kalaisi Sīsuú.” (Ngā. 24:24) Kae kehe, ʻi he taimi naʻe lea ai ʻa Paula ʻo fekauʻaki mo e “māʻoniʻoní mo e mapuleʻi-kitá pea mo e fakamaau ka hoko maí, naʻe tailiili ai ʻa Filike,” ʻo mahalo pē koeʻuhí ko e ngaahi meʻa ko iá naʻá ne fakahohaʻasi ʻa hono konisēnisí ko e meʻa ʻi he ʻalunga fulikivanu naʻá ne muia ʻi heʻene moʻuí. Ko ia naʻá ne tuku atu ʻa Paula ke ʻalu, ʻo ne pehē: “Ke ke mavahe atu ā he taimí ni, ka ʻi haʻaku maʻu ha faingamālié te u toe fekau atu ke ke haʻu.” Naʻe sio ʻa Filike kia Paula ʻi ha ngaahi taimi lahi ki mui ai, ʻo ʻikai koeʻuhí ko haʻane loto ke ako ʻa e moʻoní, ka koeʻuhí naʻá ne ʻamanaki ʻe ʻoange ʻe Paula kiate ia ha totongi fufū.​—Ngā. 24:25, 26.

18. Ko e hā naʻe lea ai ʻa Paula kia Filike mo hono uaifí ʻo fekauʻaki mo e “māʻoniʻoní mo e mapuleʻi-kitá pea mo e fakamaau ka hoko maí”?

¹⁸ Ko e hā naʻe lea ai ʻa Paula kia Filike mo hono uaifí ʻo fekauʻaki mo e “māʻoniʻoní mo e mapuleʻi-kitá pea mo e fakamaau ka hoko maí”? Manatuʻi, naʻá na loto ke ʻiloʻi ʻa e meʻa naʻe fiemaʻu ʻe he “tui kia Kalaisi Sīsuú.” Ko Paula, ʻa ia naʻá ne ʻiloʻi ʻa hona puipuituʻa ʻo e ʻulungaanga taʻetāú, anga-fakamamahí, mo e fakamaau taʻetotonú, naʻá ne ʻai ʻo hā mahino ʻa e meʻa  naʻe fiemaʻu mei he kotoa ʻo e faʻahinga te nau hoko ko e kau muimui ʻo Sīsuú. Ko e meʻa naʻe leaʻaki ʻe Paulá naʻe fakahaaʻi ai ʻa e kehekehe lahi ʻi he vahaʻa ʻo e ngaahi tuʻunga māʻoniʻoni ʻa e ʻOtuá pea mo e ʻalunga moʻui naʻe muia ʻe Filike mo hono uaifí. Naʻe totonu ke tokoniʻi kinaua ʻe he meʻá ni ke na sio ko e faʻahinga kotoa ʻo e tangatá ʻoku nau moʻuaʻaki ke fai ha fakamatala ki he ʻOtuá ʻi he fekauʻaki mo e meʻa ʻoku nau fakakaukau ki aí, leaʻakí, mo ia ʻoku nau faí, pea ko e meʻa naʻe mahuʻinga ange ia ʻi he fakamaau ʻe fai ʻo fekauʻaki mo Paulá ko e fakamaau ko ia naʻá na fehangahangai mo ia ʻi he ʻao ʻo e ʻOtuá. Tāneʻineʻi ke “tailiili ai ʻa Filike”!

19, 20. (a) ʻI heʻetau ngāue fakafaifekaú, ʻoku totonu ke fēfē ʻetau fakafeangai ki he kakai ʻoku hā mai ʻoku nau mahuʻingaʻia ka ʻoku nau kumi moʻoni kinautolu ki heʻenau ʻalunga siokitá? (e) ʻOku anga-fēfē ʻetau ʻiloʻi ko Filiké naʻe ʻikai ko ha kaumeʻa ia kia Paula?

¹⁹ ʻI heʻetau ngāue fakafaifekaú, te tau maʻu nai ai ha kakai ʻoku nau hangē ko Filiké. Te nau ʻuluaki hā mai nai ʻoku nau fakahāhā ha mahuʻingaʻia ʻi he moʻoní, ka ʻoku nau kumi moʻoni kinautolu ki heʻenau ʻalunga siokitá. ʻOku totonu ke tau tokanga telia ʻa e faʻahinga peheé. Neongo ia, hangē ko Paulá, ʻe lava ke tau talanoa fakapotopoto ange kiate kinautolu ʻo fekauʻaki mo e ngaahi tuʻunga māʻoniʻoni ʻa e ʻOtuá. Mahalo ʻe maongo ai ʻa e moʻoní ki honau lotó. Kae kehe, kapau ʻe hoko ʻo hā mahino mai ʻoku ʻikai haʻanau taumuʻa ʻe taha ke siʻaki ha ʻalunga angahalaʻia, ʻoku tau tuku ai pē kinautolu ka tau kumi kitautolu ki he faʻahinga ʻa ia ko hono moʻoní ʻoku nau kumi ki he moʻoní.

²⁰ ʻI he tuʻunga ʻo Filiké, ko e tuʻunga totonu ʻo hono lotó naʻe fakaeʻa ia ʻi he ngaahi lea ko ení: “ʻI he ʻosi atu ha taʻu ʻe ua mei ai, naʻe fetongi ʻa Filike ʻe Pōsio Fesito; pea koeʻuhi naʻe loto ʻa Filike ke ne maʻu ʻa e leleiʻia ʻa e kau Siú, naʻá ne kei tuku pōpula pē ʻa Paula.” (Ngā. 24:27) Ko Filiké naʻe ʻikai ko ha kaumeʻa moʻoni ia kia Paula. Naʻe ʻiloʻi ʻe Filike ko e kau muimui ʻo e “ʻAlunga ʻo e ʻEikí” naʻe ʻikai ko ha kau feinga angatuʻu pe ko ha kau feinga liukava. (Ngā. 19:23) Naʻá ne toe ʻiloʻi foki naʻe ʻikai ke maumauʻi ʻe Paula ia ha lao ʻe taha ʻa Loma. Neongo ia, naʻe tauhi pōpula ʻe Filike ʻa e ʻapositoló koeʻuhí ke ne “maʻu ʻa e leleiʻia ʻa e kau Siú.”

21. Ko e hā naʻe hoko kia Paula ʻi he hili ʻa e hoko ʻa Pōsio Fesito ko e kōvaná, pea ko e hā ʻoku ʻikai ha veiveiua naʻe hokohoko atu hono maʻu mei ai ʻe Paula ʻa e fakaivimālohí?

²¹ Hangē ko ia ʻoku hā ʻi he veesi fakaʻosi ʻo e Ngāue vahe 24, naʻe kei hoko pē ʻa Paula ko ha pōpula ʻi he taimi naʻe fetongi ai ʻe Pōsio Fesito ʻa Filike ʻi he tuʻunga ko e kōvaná. Naʻe kamata ai ha ngaahi fakamaau ʻeke hokohoko, pea naʻe tuku atu ai ʻa Paula ki he kau maʻu mafai kehekehe. Ko e moʻoni, ko e ʻapositolo loto-toʻa ko ʻení naʻe “ʻoatu [ia] ki he ʻao ʻo e ngaahi tuʻi mo e kau kōvana.” (Luke 21:12) Hangē ko ia te tau sio ki aí, te ne fai ha fakamoʻoni ʻamui ange ki he tokotaha pule mafai lahi taha ʻo hono ʻahó. ʻI he kotoa ʻo e ngaahi meʻa ko iá, naʻe ʻikai ʻaupito ke ueʻi ai ʻa e tui ʻa Paulá. ʻOku ʻikai ha veiveiua naʻe hokohoko atu ʻene maʻu ʻa e fakaivimālohi mei he ngaahi lea ʻa Sīsū: “Loto-toʻa!”