1, 2. (a) Ko e hā ʻa e ngaahi tuʻunga ʻoku ʻi ai ʻa Paulá? (e) Ko e hā ʻa e fehuʻi ʻoku malanga hake ʻi he fekauʻaki mo e tangi ʻa Paula kia Sisá?

 ʻOKU kei fai pē hono leʻohi malu ʻo Paula ʻi Sesaliá. ʻI he taʻu ʻe ua ki muʻá ʻi he taimi naʻá ne foki ai ki Siuteá, ʻi ha ngaahi ʻaho pē mei ai naʻe feinga ai ʻa e kau Siú ke tāmateʻi ia ʻo ʻikai toe siʻi hifo ʻi he tuʻo tolú. (Ngā. 21:27-36; 23:10, 12-15, 27) ʻI he aʻu mai ki he taimi ko ení, kuo ʻikai ke lavameʻa hono ngaahi filí, ka ʻoku ʻikai pē ke nau foʻi kinautolu. ʻI he sio ʻa Paula ʻe faai atu pē nai ʻo tuku atu ia ki honau ʻaofinimá, ʻokú ne tala ange ki he Kōvana Loma ko Fesitó: “ʻOku ou tangi au kia Sisa!”​—Ngā. 25:11.

² Naʻe poupouʻi ʻe Sihova ʻa e fili ʻa Paula ke tangi ki he ʻemipola ʻo Lomá? Ko e tali ki aí ʻoku mahuʻinga ia kiate kitautolu, ʻa ia ʻoku tau fai ha fakamoʻoni fakaʻāuliliki fekauʻaki mo e Puleʻanga ʻo e ʻOtuá ʻi he taimi ko eni ʻo e ngataʻangá. ʻOku fiemaʻu ke tau ʻilo pe naʻe fokotuʻu ai ʻe Paula ha sīpinga kiate kitautolu ke tau muimui ai “ʻi hono taukapoʻi mo fokotuʻu fakalao ʻa e ongoongo leleí.”​—Fil. 1:7.

3, 4. (a) Ko e hā naʻe tuʻu mei mui ʻi he kole ʻa e kau Siú ke ʻomai ʻa Paula ki Selusalemá, pea naʻe anga-fēfē ʻene hao mei he maté? (e) ʻOku anga-fēfē hono tokoniʻi ʻe Sihova ʻene kau sevāniti ʻi onopōní, ʻo hangē ko ia naʻá ne fai kia Paulá?

³ ʻI he hili ʻa e ʻaho ʻe tolu ʻo e hoko ko e kōvana Loma foʻou ʻo Siuteá, naʻe ʻalu ai ʻa Fesito ki Selusalema. a Naʻá ne fanongo ai ʻi hono hanga ʻe he houʻeiki taulaʻeikí mo e kau tangata tuʻu-ki-muʻa ʻo e kau Siú ʻo talatalaakiʻi ʻa Paula ki ha ngaahi hia mamafa. Naʻa nau ʻiloʻi ko e kōvana foʻoú naʻe ʻi he malumalu ʻo e tenge ke ne tauhi ke ne melino mo kinautolu pea mo e kotoa ʻo e kau Siú. Ko ia ai, naʻa nau fai ha kole kia Fesito maʻanautolu: ʻOmai ʻa Paula ki Selusalema, pea hopoʻi ia ai. Kae kehe, naʻe ʻi ai ha palani fulikivanu naʻe tuʻu mei mui ʻi he kole ko ení. Naʻe faʻufaʻu ʻa e ngaahi fili ko iá ke tāmateʻi ʻa Paula ʻi he hala ko ia mei Sesalia ki Selusalemá. Naʻe ʻikai ke tali ʻe Fesito ʻenau kolé, ʻo ne pehē: “Tuku ki he faʻahinga ʻoku maʻu mafai ʻi homou haʻohaʻongá . . . ke nau  ʻalu hifo mo au [ki Sesalia] ʻo talatalaakiʻi ia kapau moʻoni kuo fai ʻe he tangatá ha meʻa naʻe hala.” (Ngā. 25:5) Ko ia ai, ko ha toe taimi eni ne hao ai ʻa Paula mei he maté.

⁴ ʻI he lolotonga ʻa e kotoa ʻo e ngaahi hopo ʻa Paulá, naʻe tokoniʻi ia ʻe Sihova fakafou ʻi he ʻEiki ko Sīsū Kalaisí. Manatuʻi naʻe fakafou ʻi ha vīsone, naʻe tala ai ʻe Sīsū ki heʻene ʻapositoló: “Loto-toʻa!” (Ngā. 23:11) ʻI he ʻahó ni, ʻoku toe fehangahangai mo e kau sevāniti ʻa e ʻOtuá pea mo e ngaahi fakafaingataʻaʻiaʻanga mo e ngaahi fakamanamana. ʻOku ʻikai ke maluʻi kitautolu ia ʻe Sihova mei he faingataʻa kotoa pē, ka ʻokú ne ʻomai kiate kitautolu ʻa e poto mo e mālohi ke tau kātekinaʻaki. ʻE lava ke tau falala maʻu pē ki he “mālohi ʻoku mahulu atu ia ʻi he tuʻunga anga-mahení” ʻa ia ʻoku tokonaki mai ʻe hotau ʻOtua ʻofá.​—2 Kol. 4:7.

5. Naʻe anga-fēfē ʻa e fakafeangai ʻa Fesito kia Paulá?

⁵ ʻI ha ngaahi ʻaho ki mui, naʻe “nofo hifo [ʻa Fesito] ʻi he nofoʻanga fakamāú” ʻi Sesalia. b Naʻe tuʻu ʻi hono ʻaó ʻa Paula pea mo e kau talatalaakiʻi ʻo Paulá. ʻI he tali ki heʻenau ngaahi tukuakiʻi taʻeʻiai hano makatuʻungá, naʻe pehē ʻe Paula: “Kuo teʻeki ai te u fai ha faʻahinga angahala ki he Lao ʻa e kau Siú pe ki he temipalé pe kia Sisa.” Naʻe tonuhia ʻa e ʻapositoló mo tuha ke  fakatauʻatāinaʻi. Ko e hā ʻa e fili ʻe fai ʻe Fesitó? ʻI he loto ke maʻu ʻa e leleiʻia ʻa e kau Siú, naʻá ne ʻeke kia Paula: “ʻOkú ke loto ke ke ʻalu hake ki Selusalema pea fakamāuʻi koe ʻi ai ʻi hoku ʻaó ʻi he ngaahi meʻá ni?” (Ngā. 25:6-9) Ko ha foʻi fokotuʻu ngali vale moʻoni ē! Kapau naʻe toe fakafoki ʻa Paula ki Selusalema, ʻe hoko ai hono kau talatalaakí ko e kau fakamaau ia kiate iá pea te ne fehangahangai moʻoni ai mo e maté. ʻI he meʻá ni, naʻe fili ai ʻe Fesito ia ʻa e meʻa ʻe lelei fakapolitikalé kae tuku ʻa e fakamaau totonu moʻoní ia. Ko ha kōvana ki muʻa, ʻa Ponitō Pailato, naʻá ne fai ʻa e meʻa meimei tatau ʻi ha meʻa naʻe fekauʻaki mo ha tokotaha pōpula naʻe mahuʻinga mamaʻo ange. (Sione 19:12-16) Ko e kau fakamaau ʻi onopōní te nau fakavaivai nai mo kinautolu ki he tenge fakapolitikalé. Ko ia ai, ʻoku ʻikai totonu ke tau ʻohovale ʻi he taimi ʻoku fai ai ʻe he ngaahi fakamaauʻangá ʻi he ngaahi hopo ʻoku kau ki ai ʻa e kakai ʻa e ʻOtuá ha fili ʻoku fepaki ia mo e ngaahi fakamoʻoní.

6, 7. Ko e hā naʻe tangi ai ʻa Paula kia Sisá, pea ko e hā ʻa e sīpinga naʻá ne fokotuʻu ai maʻá e kau Kalisitiane moʻoni he ʻaho ní?

⁶ Ko e holi ʻa Fesito ke ne fakahōhōʻiaʻi ʻa e kau Siú naʻe lava ke ʻai ai ʻa Paula ke ne ʻi ha tuʻunga fakatuʻutāmaki fakatupu mate. Ko ia ai, naʻe ngāueʻaki ʻe Paula ha totonu naʻá ne maʻu ʻi he tuʻunga ko ha tangataʻifonua Lomá. Naʻá ne tala ange kia Fesito: “ʻOku ou tuʻú ni ʻi he ʻao ʻo e nofoʻanga fakamaau ʻo Sisá, ʻa ia ʻoku totonu ke fakamāuʻi ai aú. Kuo ʻikai te u fai ha meʻa ʻoku hala ki he kau Siú, hangē foki ko ia ʻokú ke ʻilo lelei ki aí. . . . ʻOku ou tangi au kia Sisa!” ʻI hono fai pē ha tangi pehē, naʻe ʻikai faʻa lava ke toe liliu ia. Naʻe fakamamafaʻi ʻeni ʻe Fesito, ʻi heʻene pehē: “Ko Sisa kuó ke tangi ki aí; ko Sisa te ke ʻalu ki aí.” (Ngā. 25:10-12) ʻI he tangi ki ha mafai fakalao māʻolunga angé, naʻe fokotuʻu ai ʻe Paula ha sīpinga ki he kau Kalisitiane moʻoni he ʻaho ní. ʻI he taimi ʻoku feinga ai ʻa e kau fakafepakí ke “faʻu ha kovi ʻi he hingoa ʻo e laó,” ʻoku ngāueʻaongaʻaki ʻe he Kau Fakamoʻoni ʻa Sihová ʻa e ngaahi tokonaki fakalaó ke taukapoʻi ʻa e ongoongo leleí. c​—Saame 94:20.

⁷ Ko ia, ʻi he hili hono tuku pōpula ʻo laka hake he taʻu ʻe ua ki he ngaahi hia naʻe ʻikai te ne fakahokó, naʻe ʻoange kia Paula ʻa e faingamālie ke fakahoko ʻene hopó ʻi Loma. Kae kehe, ki muʻa ke ne mavahé, naʻe fiemaʻu ʻe ha toe pule ʻe taha ke sio kiate ia.

8, 9. Ko e hā naʻe ʻaʻahi ai ʻa Tuʻi ʻAkilipa ki Sesaliá?

⁸ ʻI he hili atu ha ngaahi ʻaho mei he fanongo ʻa Fesito ki he tangi ʻa Paula kia Sisá, naʻe fai ʻe Tuʻi ʻAkilipa mo hono tuofefine ko Pelenaisé ha “ʻaʻahi ke fakahaaʻi ʻena fakaʻapaʻapa” ki he kōvana foʻoú. d ʻI he taimi ʻo e kau Lomá, naʻe angaʻaki ʻe he kau maʻu mafaí hono fai ha ngaahi ʻaʻahi pehē ki he kau kōvana ne toki fakanofo foʻoú. ʻI he talamonū kia Fesito ʻi hono fakanofo iá,  ʻoku ʻikai ha veiveiua naʻe feinga ʻa ʻAkilipa ke fakafefekaʻi ha ngaahi vā fakapolitikale mo fakafoʻituitui ʻa ia ʻe lava ke ʻaonga ia ʻi he kahaʻú.​—Ngā. 25:13.

⁹ Naʻe talanoa ʻa Fesito ki he tuʻí ʻo fekauʻaki mo Paula, pea naʻe mahuʻingaʻia ai ʻa ʻAkilipa. ʻI he ʻaho hono hokó, naʻe tangutu hifo ai ʻa e ongo pulé ni ʻi he nofoʻanga fakamāú. Ka ko hona mafaí mo hona ngeiá naʻe halaʻatā haʻane maongo ange ʻaʻana ʻi he ngaahi lea naʻe ʻamanaki ke leaʻaki ʻe he tokotaha pōpula ko ia naʻe ʻi hona ʻaó.​—Ngā. 25:22-27.

10, 11. Naʻe anga-fēfē hono fakahāhā ʻe Paula ʻa e fakaʻapaʻapa kia ʻAkilipá, pea ko e hā ʻa e ngaahi fakaikiiki fekauʻaki mo e kuohili ʻo Paulá naʻe fakahaaʻi ʻe he ʻapositoló tonu ki he tuʻí?

¹⁰ Naʻe fakamālō anga-fakaʻapaʻapa ʻa Paula kia Tuʻi ʻAkilipa ki he faingamālie ke fakahoko atu ha taukapo kiate iá, ʻo fakahaaʻi ʻene lāuʻilo ko e tuʻí ko ha tokotaha mataotao ia ʻi he kotoa ʻo e ngaahi anga pea pehē ki he ngaahi fekīhiaki ʻi he lotolotonga ʻo e kau Siú. Naʻe fakamatala leva ʻa Paula ki heʻene moʻui he kuohilí: “Naʻá ku moʻui ko ha Fālesi ʻi he lotu mavahe ʻa ia ʻoku tauhi tuʻutuʻuni lahi tahá.” (Ngā. 26:5) ʻI he tuʻunga ko ha Fālesí, naʻe ʻamanaki ai ʻa Paula ki he haʻu ʻa e Mīsaiá. Pea ko eni, ʻi he tuʻunga ko ha Kalisitiané, naʻá ne fakahaaʻi loto-toʻa ai ʻa Sīsū Kalaisi ko e tokotaha ia naʻe fai ʻa e tatali fuoloa ki aí. Ko ha tui ia naʻá ne taha ai mo hono kau talatalaakí​—ʻa ia, ko e ʻamanaki ki he fakahoko ʻo e talaʻofa ʻa e ʻOtuá ki heʻenau fanga kuí​—ʻa e  ʻuhinga naʻe hopoʻi ai ʻa Paula ʻi he ʻaho ko iá. Naʻe ʻai ʻe he tuʻungá ni ʻa ʻAkilipa ke ne toe mahuʻingaʻia lahi ange ʻi he meʻa naʻe pau ke leaʻaki ʻe Paulá. e

¹¹ ʻI heʻene manatuʻi ʻo ne fakamatala ki heʻene ngaohikoviʻi ʻi he kuohilí ʻa e kau Kalisitiané, naʻe pehē ʻe Paula: “Naʻa mo au tonu, naʻá ku tuipau ʻoku totonu ke u fai ha ngaahi ngāue lahi ʻo fakafepakiʻi ʻa e huafa ʻo Sīsū ko e Nāsaletí. . . . Koeʻuhi ko ʻeku mātuʻaki ʻita teketekelili ʻiate kinautolú [ʻa e kau muimui ʻo Kalaisí], naʻá ku ʻalu ʻo fakatangaʻi kinautolu ʻo aʻu ki he ngaahi kolo mamaʻó.” (Ngā. 26:9-11) Naʻe ʻikai ko ha talanoa fakalahi eni ʻa Paula. Naʻe ʻilo ʻa e kakai tokolahi ki he fakamālohi naʻá ne fai ki he kau Kalisitiané. (Kal. 1:13, 23) ‘Ko e hā naʻe lava ke ne liliuʻi ha tangata pehē?’ Ko e fifili nai ia ʻa ʻAkilipá.

12, 13. (a) Naʻe anga-fēfē hono fakamatalaʻi ʻe Paula ʻa ʻene tafokí? (e) Naʻe anga-fēfē ʻa e hoko ʻa Paula ʻo “ʻaka ki he meʻa māsilá”?

¹² Naʻe ʻomai ʻe he ngaahi lea hono hoko ʻa Paulá ʻa e talí: “ʻI heʻeku fononga ki Tāmasikusi fakataha mo e mafai pea mo ha fekau mei he houʻeiki taulaʻeikí, naʻá ku mamata ʻi he hoʻatā mālié ʻi he halá, ʻe hoʻo ʻAfio, ki ha maama ʻoku ngingila ange ia ʻi he laʻaá ʻoku tapa mai mei he langí ʻo huhulu takatakai ʻiate au pea mo e faʻahinga naʻe fononga fakataha mo aú. Pea ʻi heʻemau tō kotoa ki he kelekelé, naʻá ku fanongo ki ha leʻo ʻoku pehē mai kiate au ʻi he lea faka-Hepeluú:  ‘ʻE Saula, ʻe Saula, ko e hā ʻokú ke fakatangaʻi ai aú? Ko e hanganaki ʻaka ki he meʻa māsilá ʻokú ke faingataʻaʻia aí.’ Ka naʻá ku pehē: ‘Ko hai koe, Tangataʻeiki?’ Pea naʻe pehē mai ʻe he ʻEikí: ‘Ko Sīsū au, ʻa ia ʻokú ke fakatangaʻí.’” f​—Ngā. 26:12-15.

¹³ Ki muʻa ʻi he hoko ʻa e meʻa fakaemana ko ení, naʻe hoko ʻa Paula ʻo “ʻaka ki he meʻa māsilá” ʻi he ʻuhinga fakaefakatātā. ʻI he hangē tofu pē ko ha lavea taʻetotonu ʻa ha monumanu ngāue ʻi haʻane ʻaka ki he muiʻi meʻa mata māsila ʻo ha tao fakateka pulu, naʻe fakalaveaʻi fakalaumālie ʻe Paula ʻa ia tonu ʻaki ʻene fakataleʻi ʻa e finangalo ʻo e ʻOtuá. ʻI he hā kia Paula ʻi he hala ki Tāmasikusí, naʻe hanga ai ʻe Sīsū ne toetuʻú ʻo ʻai ʻa e tangata loto-totonu ka ʻoku hā mahino naʻe takihalaʻi ko ʻení ke liliu ʻene fakakaukaú.​—Sione 16:1, 2.

14, 15. Ko e hā naʻe leaʻaki ʻe Paula ʻo fekauʻaki mo e ngaahi liliu naʻá ne fai ʻi heʻene moʻuí?

 ¹⁴ Naʻe fai ʻe Paula ha ngaahi fuʻu liliu lahi moʻoni ʻi heʻene moʻuí. ʻI he lea kia ʻAkilipá, naʻá ne pehē: “Naʻe ʻikai te u talangataʻa au ki he vīsone ko ia naʻe hā mei he langí, ka naʻá ku muʻa ki he faʻahinga ʻi Tāmasikusí pea hili iá ki he faʻahinga ʻi Selusalemá, pea ki he kotoa ʻo e fonua ʻo Siuteá, pea pehē ki he ngaahi puleʻangá, ʻo ʻoatu ʻa e pōpoaki ko ia ʻoku totonu ke nau fakatomala pea tafoki ki he ʻOtuá ʻaki hono fai ʻa e ngaahi ngāue ʻoku tuha mo e fakatomalá.” (Ngā. 26:19, 20) ʻI he laui taʻu, naʻe fakahoko ai ʻe Paula ʻa e fekau naʻe ʻoange kiate ia ʻe Sīsū Kalaisi ʻi he vīsone naʻá ne maʻu ʻi he hoʻatā mālie ko iá. Ko e hā hono olá? Ko e faʻahinga naʻa nau tali ʻa e ongoongo lelei naʻe malangaʻi ʻe Paulá naʻa nau fakatomala mei honau ʻulungaanga taʻetaau mo taʻefaitotonú pea nau tafoki ki he ʻOtuá. Naʻe hoko ʻa e faʻahinga peheé ko e kau tangataʻifonua lelei, ʻo tokoni mo fakahāhā ʻa e fakaʻapaʻapa ki he laó mo e tuʻunga māú.

¹⁵ Kae kehe, naʻe ʻikai mahuʻinga ʻa e ngaahi ʻaonga ia ko iá ʻi he vakai ʻa e kau fakafepaki Siu ʻo Paulá. Naʻe pehē ʻe Paula: “Ko e ʻuhinga eni naʻe puke ai au ʻe he kau Siú ʻi he temipalé pea nau feinga ke tāmateʻi aú. Kae kehe, koeʻuhi kuó u hokosia ʻa e tokoni ʻoku mei he ʻOtuá, ʻoku ou hokohoko atu ai ʻo aʻu mai ki he ʻahó ni ʻa e faifakamoʻoni fakatouʻosi ki he iiki mo e lalahi.”​—Ngā. 26:21, 22.

16. ʻE anga-fēfē nai haʻatau faʻifaʻitaki kia Paula ʻi he taimi ʻoku tau lea ai ki he kau fakamāú mo e kau pulé ʻo fekauʻaki mo ʻetau ngaahi tuí?

¹⁶ ʻI he tuʻunga ko e kau Kalisitiane moʻoní, kuo pau ke tau “mateuteu maʻu pē ke fai ha taukapo” fekauʻaki mo ʻetau tuí. (1 Pita 3:15) ʻI he lea ki he kau fakamāú mo e kau pulé ʻo fekauʻaki mo ʻetau ngaahi tuí, te tau ʻilo nai ʻe ʻaonga lahi ke tau faʻifaʻitaki ki he founga naʻe ngāueʻaki ʻe Paula ʻi heʻene lea kia ʻAkilipa mo Fesitó. ʻI hono tala ange anga-fakaʻapaʻapa kiate kinautolu ʻa e anga hono hanga ʻe he ngaahi moʻoni ʻo e Tohi Tapú ʻo liliu ʻa e ngaahi moʻuí ki he lelei angé​—ʻa ʻetau moʻuí tonu pea pehē ki he moʻui ʻa e faʻahinga ʻoku nau tali ʻetau pōpoakí​—ʻe lava ke tau aʻu ai ki he loto ʻo e kau maʻu mafai māʻolungá ni.

17. Naʻe anga-fēfē ʻa e fakafeangai ʻa Fesito ki he taukapo ʻa Paulá, pea ko e hā ʻa e faʻahinga fakakaukau meimei tatau ʻoku mātā ʻi he ʻaho ní?

¹⁷ ʻI heʻena fanongo ki he fakamoʻoni fakatupu fakalotoʻi ʻa Paulá, naʻe ueʻi mālohi ai ʻa e ongo pulé ni. Fakatokangaʻi ange ʻa e meʻa naʻe hokó: “Pea ʻi he leaʻaki ʻe Paula ʻa e ngaahi meʻá ni ʻi heʻene taukapó, naʻe lea leʻo-lahi atu ʻa Fesito: ‘ʻOku ʻalu ke ke fakasesele, Paula! Kuo ʻai koe ʻe he ako lahí ke ke fakasesele!’” (Ngā. 26:24) ʻOku lava ke fakahaaʻi mai ʻe he tōlili ʻa Fesitó ha faʻahinga fakakaukau ʻa ia ʻoku mātā naʻa mo e ʻi he ʻahó ni. ʻI he vakai ʻa e kakai  tokolahi, ko e faʻahinga ko ia ʻoku nau akoʻi ʻa e meʻa ʻoku lea moʻoni ʻaki ʻe he Tohi Tapú ko ha kau loto-māfana tōtuʻa ia. Ko e kau poto fakaemāmaní ʻoku faʻa faingataʻa kiate kinautolu ke nau tali ʻa e akonaki ʻa e Tohi Tapú ʻo fekauʻaki mo e toetuʻu ʻa e kau maté.

18. Naʻe anga-fēfē ʻa e tali ʻa Paula kia Fesitó, ʻo taki atu ai ki he tali ko e hā meia ʻAkilipá?

¹⁸ Ka naʻe ʻi ai ha tali ʻa Paula ki he kōvaná: “ʻOku ʻikai ke u fakasesele, ʻe ʻEiki Fesito, ka ʻoku ou leaʻaki ʻa e ngaahi lea ʻo e moʻoní pea ʻi he ʻatamai lelei. Ko hono moʻoní, ko e tuʻí ʻa ia ʻoku ou lea mātuʻaki tauʻatāina ki aí ʻokú ne ʻafioʻi lelei ʻa e ngaahi meʻá ni . . . ʻE Tuʻi ʻAkilipa, ʻokú ke tui ki he Kau Palōfitá? ʻOku ou ʻilo ʻokú ke tui ki ai.” Naʻe tali mai ʻe ʻAkilipa: “ʻI ha kiʻi taimi nounou pē kuó ke mei fakatuipauʻi ai au ke u hoko ko ha Kalisitiane.” (Ngā. 26:25-28) Ko e ngaahi leá ni, pe naʻe fai loto-moʻoni pe ʻikai, ʻoku hā mei ai naʻe maongo loloto ki he tuʻí ʻa e fakamoʻoni ʻa Paulá.

19. Ko e hā ʻa e fili naʻe fai ʻe Fesito mo ʻAkilipa ʻi he fekauʻaki mo Paulá?

¹⁹ Naʻe tuʻu hake leva ʻa ʻAkilipa mo Fesito, ʻo fakaʻilongaʻi ai kuo lava ʻenau tālangá. “ʻI heʻenau mavahé, naʻe kamata ke nau fepehēʻaki: ‘ʻOku ʻikai fai ʻe he tangatá ni ha meʻa ke ne tuha ai mo e maté pe ko e tuku pilīsoné.’ Naʻe pehē ange leva ʻe ʻAkilipa kia Fesito: ‘Naʻe mei lava pē ke tuku ange ʻa e tangatá ni ka ne taʻeʻoua ʻene tangi kia Sisá.’” (Ngā. 26:31, 32) Naʻá na ʻiloʻi ko ha tangata tonuhia naʻe tuʻu ʻi hona ʻaó. Mahalo pē ʻe lelei ange eni ʻa e anga ʻo ʻena vakai ki he kau Kalisitiané.

20. Ko e hā ʻa e ngaahi ola naʻe hoko ʻi he faifakamoʻoni ʻa Paula ki he ongo maʻu mafai māʻolungá?

²⁰ Naʻe ʻikai ha taha ia ʻi he ongo pule maʻu mafai lahi ʻi he fakamatalá ni ʻoku hā mai naʻá ne tali ʻa e ongoongo lelei ʻo e Puleʻanga ʻo e ʻOtuá. Naʻe fakapotopoto nai ʻa e hā ʻa e ʻapositolo ko Paulá ʻi he ʻao ʻo e ongo tangatá ni? Ko e tali ki aí ko e ʻio. Ko e hoko ko ia ʻa Paula ʻo “ʻoatu . . . ki he ʻao ʻo e ngaahi tuʻi mo e kau kōvana” ʻi Siuteá naʻe iku ʻo aʻu atu ai ha faifakamoʻoni ki he ngaahi feituʻu ʻo e puleʻanga Lomá ʻa ia ne ʻikai nai mei ala fai ha aʻu ia ki ai ʻi he taimi ko iá. (Luke 21:12, 13) ʻIkai ko ia pē, ko ʻene ngaahi hokosiá mo e faitōnunga ʻi he malumalu ʻo e ʻahiʻahí naʻe fakalototoʻaʻi ai ʻa hono fanga tokoua mo e fanga tuofāfine ʻi he tuí.​—Fil. 1:12-14.

21. ʻI he tuiaki atu ʻi he ngāue ʻo e Puleʻangá, ko e hā ʻa e ngaahi ola lelei ʻe lava ke tau mātā aí?

²¹ ʻOku hoko ʻa e meʻa tatau pē ʻi he ʻahó ni. ʻI he tuiaki atu ʻi he ngāue ʻo e Puleʻangá neongo ʻa e ngaahi ʻahiʻahí mo e fakafepakí, ʻe lava ke tau mātā ai ha ngaahi ola lelei lahi. Te tau fai nai ai ha fakamoʻoni ki ha kau maʻu mafai ʻa ia ʻoku faingataʻa nai ke fai ha aʻu ki ai. ʻE hoko nai ʻetau kātaki faitōnungá ko ha matavai ia ʻo ha fakalototoʻa ki hotau fanga tokoua mo e fanga tuofāfine Kalisitiané, ʻo ueʻi ai kinautolu ke nau fakahāhā ha loto-toʻa mātuʻaki lahi ange ʻi he ngāue ko ia ko hono fai ha fakamoʻoni fakaʻāuliliki fekauʻaki mo e Puleʻanga ʻo e ʻOtuá.