1, 2. Ko e hā ʻokú ne ʻomai ʻa e ʻapositolo ko Paulá ki Selusalemá, pea ko e hā ʻa e ngaahi pole te ne fehangahangai mo ia aí?

 SELUSALEMA! ʻOku toe luelue atu eni ʻa Paula ʻi hono ngaahi hala fāsiʻi moʻumoʻua mo kakaiʻiá. ʻOku ʻikai mo ha toe kolo ʻi he māmaní ʻe makehe pehē ʻi he hisitōlia ʻo e ngaahi feangainga ʻa Sihova mo hono kakaí. Ko e tokolahi taha ʻo hono kakaí ʻoku nau laukau ʻaki ʻa e kuohili lāngilangiʻia ko iá. ʻOku ʻiloʻi ʻe Paula ko e kau Kalisitiane tokolahi heni ʻoku fuʻu lahi ʻenau falala ki he kuohilí, ʻo ʻikai ke nau laka ki muʻa fakataha mo e ngaahi taumuʻa fakalakalaka ʻa Sihová. Ko ia ʻoku sio ai ʻa Paula ki ha tuʻunga ʻo ha fiemaʻu fakalaumālie ʻo tānaki atu ki he fiemaʻu fakamatelie ʻa ia naʻá ne ueʻi ia​—ʻi he taimi naʻá ne kei ʻi ʻEfesō aí​—ke ne fili ke toe ʻaʻahi ki he fuʻu kolo lahí ni. (Ngā. 19:21) Neongo ʻa e ʻamanaki atu ki ha fakatuʻutāmakí, naʻá ne fai pau pē ki heʻene taumuʻá.

² Ko e hā leva ʻe fehangahangai ʻa Paula mo ia ʻi Selusalemá? Ko ha pole ʻe taha ʻe hoko mai ia mei he kau muimui ʻo Kalaisí, ko e niʻihi ʻo kinautolu ʻoku nau hohaʻa koeʻuhi ko ha ngaahi talanoa sasala ʻo fekauʻaki mo Paula. Ko ha ngaahi pole lahi ange ʻe hoko mai ia mei he ngaahi fili ʻo Kalaisí. Te nau kamataʻi ha ngaahi tukuakiʻi loi ʻo Paula, haha ia, pea fakamanamanaʻi ke tāmateʻi ia. Ko e ngaahi fuʻu longoaʻa ko ení ʻe toe ʻoange ai kia Paula ha faingamālie ke ne fai ha taukapo. Ko ʻene anga-fakatōkilaló, loto-toʻá, mo e tuí ʻi heʻene fekuki mo e ngaahi pole ko iá ʻoku ʻomai ai ha faʻifaʻitakiʻanga lelei moʻoni ki he kau Kalisitiane ʻi he ʻaho ní. Tau vakai angé ki he anga ʻo ʻene peheé.

3-5. (a) Ko e hā ʻa e fakataha naʻe kau ki ai ʻa Paula ʻi Selusalemá, pea ko e hā naʻe fai ki ai ʻa e lāuleá? (e) Ko e hā ʻa e ngaahi lēsoni ʻe lava ke tau maʻu mei he fakataha ʻa Paula mo e kau mātuʻa ʻi Selusalemá?

³ ʻI he ʻaho hono hoko hili ʻenau aʻu ki Selusalemá, naʻe ʻalu ai ʻa Paula mo hono ngaahi kaungāfonongá ke sio ki he kau mātuʻa fua fatongia  ʻi he fakatahaʻangá. ʻOku ʻikai ha lave ia ʻi he fakamatalá ki he kau ʻapositolo naʻe kei moʻuí; mahalo nai ʻi he taimi ko ení naʻa nau ʻosi hiki kotoa kinautolu ke ngāue ʻi he ngaahi feituʻu kehe ʻo e māmaní. Kae kehe, ko Sēmisi ko e tokoua ʻo Sīsuú naʻá ne kei ʻi ai pē. (Kal. 2:9) Ngalingali ko Sēmisi naʻe sea ʻi he fakatahá ʻi he taimi “naʻe ʻi ai kotoa ʻa e kau mātuʻá” fakataha mo Paulá.​—Ngā. 21:18.

⁴ Naʻe feʻiloaki ʻa Paula mo e kau mātuʻá “peá ne kamata fakamatala fakaikiiki ʻo fekauʻaki mo e ngaahi meʻa naʻe fai ʻe he ʻOtuá ʻi he lotolotonga ʻo e ngaahi puleʻangá fakafou ʻi heʻene ngāue fakafaifekaú.” (Ngā. 21:19) ʻOku lava ke tau sioloto atu ki he fakalototoʻa moʻoni ʻa e meʻa ko iá. ʻOku pehē pē mo ʻetau fiefia he ʻahó ni ʻi he fanongo ki he fakalakalaka ʻa e ngāué ʻi he ngaahi fonua kehé.​—Pal. 25:25.

⁵ ʻOku ngalingali pē naʻe aʻu ki ha tuʻunga naʻe lave ai ʻa Paula ki he ngaahi tokoni naʻe haʻu mo ia mei ʻIulopé. Ko e tokanga naʻe fakahāhā ʻe he fanga tokoua ʻi he ngaahi feituʻu mamaʻó kuo pau pē naʻá ne fakamāfanaʻi ʻa e loto ʻo e faʻahinga naʻe fanongo kia Paulá. He ko ē, ʻi he fakafeangai ki he līpooti naʻe fai ʻe Paulá, ʻoku pehē ʻe he fakamatalá: “Naʻe kamata ke nau [kau mātuʻá] fakalāngilangiʻi ʻa e ʻOtuá”! (Ngā. 21:20a) ʻI he tuʻunga meimei tatau, ko e tokolahi ʻi he ʻahó ni ʻa ia ʻoku nau kātekina ʻa e ngaahi fakatamakí pe ngaahi mahaki mafatukitukí ʻoku maongo loloto ki honau lotó ʻa e taimi ʻoku ʻoatu ai ʻe honau ngaahi kaungātuí ha tokoni taimi totonu mo ha ngaahi lea fakalototoʻá.

6. Ko e hā ʻa e palopalema naʻe fakahaaʻi ange kia Paulá?

⁶ Naʻe fakahaaʻi ange leva ʻe he kau mātuʻá kia Paula naʻe ʻi ai ha palopalema ʻi Siutea naʻe fekauʻaki mo ia fakafoʻituitui. Naʻa nau pehē: “Vakai ange, tokoua, ki he toko laui afe lahi ʻo e kau tui ʻi he lotolotonga ʻo e kau Siú, pea ʻoku nau mamahiʻi kotoa ʻa e Laó. Ka kuo nau fanongo ʻi ha talanoa fekauʻaki mo koe kuó ke akoʻi ki he kotoa ʻo e kau Siu ʻi he lotolotonga ʻo e ngaahi puleʻangá ha meʻa ʻoku ʻalu kehe ia meia Mōsese, ʻo tala ange ke ʻoua ʻe kamu ʻenau fānaú pe muimui ʻi he ngaahi tōʻonga tukufakaholó.” a​—Ngā. 21:20e, 21.

7, 8. (a) Ko e hā ʻa e fakakaukau hala naʻe maʻu ʻe he kau Kalisitiane tokolahi ʻi Siuteá? (e) Ko e hā naʻe ʻikai ke hoko ai ʻa e fakakaukau hala ʻa e kau Kalisitiane Siu ʻe niʻihi ʻo hangē ko ha tafoki ʻo fakafepaki ki he moʻoní?

⁷ Ko e hā naʻe kei mamahiʻi ai ʻe he kau Kalisitiane tokolahi ʻa e Lao ʻa Mōsesé, ʻi he laka hake eni he taʻu ʻe 20 mei hono fakataʻeʻaongaʻí? (Kol. 2:14)  ʻI he 49 T.S. ko e kau ʻapositolo mo e kau mātuʻa ko ia naʻe fakataha ʻi Selusalemá naʻa nau ʻave ha tohi ki he ngaahi fakatahaʻangá ʻo fakamatalaʻi ai ko e kau tui mei he lotolotonga ʻo e ngaahi puleʻangá naʻe ʻikai fiemaʻu ke nau fakamoʻulaloa ki he kamú pea hoko ʻo ʻi he malumalu ʻo e Lao ʻa Mōsesé. (Ngā. 15:23-29) Kae kehe, ko e tohi ko iá naʻe ʻikai fai ai ha lave ki he kau tui Siú, ʻa ia ko honau tokolahi naʻe ʻikai te nau mahinoʻi ko e Lao ʻa Mōsesé naʻe ʻikai ke kei ngāueʻaki ia.

⁸ Naʻe hanga nai ʻe he fakakaukau hala ko iá ʻo ʻai ʻa e kau tui Siu ko iá ke ʻikai te nau taau ke hoko ko e kau Kalisitiane? ʻIkai. Naʻe ʻikai ke pehē ia naʻa nau hoko ki muʻa ko ha kau lotu ʻo e ngaahi ʻotua panganí pea naʻa nau hokohoko atu eni ʻa e muimui ki he ngaahi tōʻonga fakalotu ʻo ʻenau tui ki muʻá. Ko e Lao ʻa ia naʻe mātuʻaki mahuʻinga ki he kau tui Siu ko iá naʻe ʻoange iá ʻe Sihova tonu. Naʻe ʻikai ha meʻa ia ai naʻe fakatēmeniō pe hala. Ka ko e Lao ko iá naʻe fekauʻaki ia mo e fuakava motuʻá, lolotonga ia ko e kau Kalisitiané naʻa nau ʻi he malumalu kinautolu ʻo e fuakava foʻoú ʻi he taimi ko ení. Ko hono tauhi ko ia ʻo e fuakava Laó naʻe ʻikai ke toe fiemaʻu ia ʻi he taimi ko ení ʻi he lotu maʻá. Ko e kau Kalisitiane Hepelū ko ia naʻa nau mamahiʻi ʻa e Laó naʻe ʻikai te nau maʻu ʻa e mahinó mo ha falala ki he fakatahaʻanga Kalisitiané. Naʻe fiemaʻu ke ʻomai ʻenau fakakaukaú ke fehoanaki mo e fakaeʻa fakalakalaka mai ʻo e moʻoní. b​—Sel. 31:31-34; Luke 22:20.

9. Ko e hā naʻe akoʻi ʻe Paula fekauʻaki mo e Lao ʻa Mōsesé?

⁹ Fēfē ʻa e ngaahi talanoa sasala ʻo pehē naʻe akoʻi ʻe Paula ʻa e kau Siu ʻi he lotolotonga ʻo e ngaahi puleʻangá “ke ʻoua ʻe kamu ʻenau fānaú pe muimui ʻi he ngaahi tōʻonga tukufakaholó”? Ko Paulá ko ha ʻapositolo ia ki he kau Senitailé, pea naʻá ne pouaki ki he kau Senitailé ʻa e fili ko ia naʻe ʻikai fiemaʻu ki he kau Senitailé ia ke nau moʻulaloa ki he Laó. Naʻá ne toe fakaeʻa foki ʻa e fehālaaki ko ia ki ha taha pē naʻe feinga ke ne fakalotoʻi ʻa e kau tui Senitailé ke nau hoko ʻo kamu ko ha fakaʻilonga ia ʻo e moʻulaloa ki he Lao ʻa Mōsesé. (Kal. 5:1-7) Naʻe toe malangaʻi foki ʻe Paula ʻa e ongoongo leleí ki he kau Siu ʻi he ngaahi kolo naʻe ʻaʻahi ki aí. ʻOku pau pē naʻá ne fakamatala ki he faʻahinga fie fanongó naʻe ʻai ʻe he pekia ʻa Sīsuú ke ʻikai toe fiemaʻu ʻa e Laó pea ko e māʻoniʻoní naʻe maʻu ia fakafou ʻi he tuí, kae ʻikai ko e ngaahi ngāue ʻo e Laó.​—Loma 2:28, 29; 3:21-26.

10. Ko e hā ʻa e fakakaukau mafamafatatau naʻe maʻu ʻe Paula ʻi he ngaahi meʻa fekauʻaki mo e Laó pea mo e kamú?

¹⁰ Ka neongo ia, naʻe fakahāhā ʻe Paula ʻa ʻene mahinoʻi ʻa e faʻahinga naʻa nau ongoʻi fiemālie ʻi hono tauhi ʻa e ngaahi tōʻonga faka-Siu ʻe niʻihi, ʻo hangē ko e fakaʻehiʻehi mei hono fai ha ngāue ʻi he Sāpaté pe ko e fakaʻehiʻehi mei ha faʻahinga meʻakai pau. (Loma 14:1-6) Pea naʻe ʻikai te ne fokotuʻu ha ngaahi tuʻutuʻuni fekauʻaki mo e kamú. Ko e moʻoni, naʻe ʻai ʻe Paula ke kamu ʻa Tīmote koeʻuhí ke ʻoua ʻe veiveiua ʻa e kau Siú ʻo kau kia Tīmote, ʻa ia ko ʻene tamaí ko ha Kalisi. (Ngā. 16:3) Ko e kamú naʻe hoko ia ko ha fili fakafoʻituitui. Naʻe tala ange ʻe Paula ki he kau Kalētiá: “ʻOku ʻikai hano ʻaonga ʻoʻona ʻo e kamú pe taʻekamú, ka ko e tui ʻoku ngāue fakafou ʻi he ʻofá.” (Kal. 5:6) Kae kehe, ke hoko ʻo kamu koeʻuhí ke fakamoʻulaloa ai ki he Laó pe ko  hono ʻai ʻa e tōʻonga ko iá ke pehē ʻoku fiemaʻu pau ia koeʻuhí ke maʻu ai ʻa e hōifua ʻa Sihová, ʻe fakahaaʻi ai ʻa e ʻikai maʻu ha tuí.

11. Ko e hā ʻa e faleʻi naʻe ʻoange ʻe he kau mātuʻá kia Paulá, pea ko e hā naʻe kau nai ki ai ʻi hono fakahoko iá? (Sio foki ki he fakamatala ʻi laló.)

¹¹ Ko ia, neongo ko e ngaahi talanoa sasalá ko ha mioʻi lahi ia, naʻe kei hohaʻa pē ʻa e kau tui Siú ia ʻi he fekauʻaki mo e meʻa ko iá. ʻI he ʻuhinga ko iá, naʻe ʻoange ai ʻe he kau mātuʻá kia Paula ʻa e fakahinohino ko ení: “ʻOku ʻi ai haʻamau kau tangata ʻe toko fā ʻa ia kuo nau fai ha fuakava. ʻAlu mo e kau tangatá ni pea fakamaʻa fakaeouau koe fakataha mo kinautolu pea fua ʻenau ngaahi fakamolé, koeʻuhi ke lava ke tele ai honau ʻulú. ʻE ʻilo leva ai ʻe he tokotaha kotoa ko e koto launoa pē ʻa e talanoa naʻe tala holo fekauʻaki mo koé, ka ʻokú ke ʻaʻeva totonu pea ʻokú ke tauhi foki ʻa e Laó.” c​—Ngā. 21:23, 24.

12. Naʻe anga-fēfē hono fakahāhā ʻe Paula ha laumālie ngaofengofua mo feongoongoi ʻi heʻene fakafeangai ki he faleʻi ʻa e kau mātuʻa Selusalemá?

 ¹² Naʻe mei lava pē ke fakafisingaʻi ʻe Paula ia ʻo pehē ko e palopalema moʻoní ia, naʻe ʻikai ko e ngaahi talanoa sasala ʻo fekauʻaki mo iá, ka ko hono mamahiʻi ko ia ʻe he kau tui Siu ko iá ʻa e Lao ʻa Mōsesé. Ka naʻá ne loto-lelei ke hoko ʻo ngaofengofua, kehe pē ke ʻoua te ne fakangaloku ai ʻa e ngaahi tefitoʻi moʻoni fakaʻotuá. Naʻá ne tohi ki muʻa atu: “Ki he faʻahinga ʻi he malumalu ʻo e laó naʻá ku hoko ʻo hangē ha taha ʻi he malumalu ʻo e laó, neongo ko au tonu ʻoku ʻikai te u ʻi he malumalu ʻo e laó, koeʻuhí ke u maʻu mai ai ʻa e faʻahinga ʻi he malumalu ʻo e laó.” (1 Kol. 9:20) ʻI he taimi ko ení, naʻe ngāue ai ʻa Paula ʻo feongoongoi mo e kau mātuʻa Selusalemá peá ne hoko ʻo “ʻi he malumalu ʻo e laó.” ʻI heʻene fai peheé, naʻá ne fokotuʻu ai ha faʻifaʻitakiʻanga lelei kia kitautolu he ʻaho ní ke tau ngāue ʻo feongoongoi mo e kau mātuʻá pea ʻoua ʻe vilitaki ke fai ʻa e ngaahi meʻá ʻi heʻetau founga pē ʻa kitautolú.​—Hep. 13:17.

13. (a) Ko e hā naʻe fakatupunga ai ʻe ha kau Siu ʻe niʻihi ha fuʻu longoaʻa ʻi he temipalé? (e) Naʻe anga-fēfē ʻa hono haofakiʻi ʻa e moʻui ʻa Paulá?

¹³ Naʻe ʻikai ke lelei ʻa e ngaahi meʻá ʻi he temipalé. ʻI he ofi ke kakato ʻa e ngaahi ʻaho ʻo e fuakava naʻe faí, naʻe fakatokangaʻi atu ʻe he kau Siu mei ʻĒsiá ʻa Paula, ʻo nau tukuakiʻi hala ia ki hono ʻomi ʻa e kau Senitailé ki he temipalé, pea naʻe langaʻi ai ha moveuveu. Kapau naʻe ʻikai ke kau mai ʻa e ʻeikitau Lomá ki he meʻa ne hokó, naʻe mei haha ai ʻa Paula ki he mate. Hangē ko ia ne hokó, naʻe puke pōpula ia ʻe he ʻeikitau Lomá. Mei he ʻaho ko iá, ʻe feʻunga mo e taʻu laka hake he faá kia Paula ke ne toe maʻu mai ai ʻa ʻene tauʻatāiná. Pea ko e fakatuʻutāmaki leva naʻe hoko ʻi he taimi ko iá kia Paulá naʻe teʻeki ai ke ʻosi atu ia. ʻI he taimi ne ʻeke ange ai ʻe he ʻeikitaú ki he kau Siú ʻa e ʻuhinga naʻa nau ʻohofi ai ʻa Paulá, naʻa nau kalangaʻaki ʻa e ngaahi tukuakiʻi kehekehe. ʻI he fuʻu longoaʻa ne hokó, naʻe ʻikai lava ke mahinoʻi ʻe he ʻeikitaú ha meʻa ʻe taha. Faai atu pē, naʻe pau ai ke ʻave ʻa Paula tonu mei he tuʻunga naʻe hokó. ʻI he teu ke hū atu ʻa Paula mo e kau sōtia Lomá ki he ʻapitanga ʻo e kau sōtiá, naʻe pehē ai ʻe Paula ki he ʻeikitaú: “ʻOku ou kole atu kiate koe, fakaʻatā muʻa au ke u lea ki he kakaí.” (Ngā. 21:39) Naʻe fai ki ai ʻa e ʻeikitaú, pea naʻe hoko atu leva ʻa Paula ʻo taukapoʻi loto-toʻa ʻene tuí.

14, 15. (a) Ko e hā naʻe fakamatalaʻi ʻe Paula ki he kau Siú? (e) Ko e hā ʻa e ongo sitepu naʻe foua ʻe he ʻeikitau Lomá ke ʻilo ai ki he ʻuhinga ʻo e ʻita ʻa e kau Siú?

¹⁴ “Fanongo mai ki heʻeku taukapo,” ko e kamata ia ʻa Paulá. (Ngā. 22:1) Naʻe lea ʻa Paula ki he fuʻu kakaí ʻi he lea faka-Hepeluú, ʻa ia naʻe ʻai ai kinautolu ke nau kiʻi fakalongolongo hifo. Naʻá ne fai ha fakamatala fakahangatonu ki he ʻuhinga naʻá ne hoko ai he taimi ko ʻení ko ha muimui ʻo Kalaisí. ʻI he fai peheé, naʻe lave pōtoʻi ai ʻa Paula ki ha ngaahi meʻa ʻa ia naʻe lava pē ke toe vakaiʻi ʻe he kau Siú kapau naʻa nau fie vakaiʻi. Naʻe ako ʻa Paula ʻi he  veʻe vaʻe ʻo e tangata ongoongoa ko Kāmelielí pea naʻá ne fakatangaʻi ʻa e kau muimui ʻo Kalaisí, ʻo hangē ko ia naʻe ʻiloʻi nai ʻe he niʻihi naʻe ʻi aí. Kae kehe, ʻi heʻene fononga ki Tāmasikusí, naʻá ne maʻu ai ha vīsone ʻo fekauʻaki mo Kalaisi kuo toetuʻú, ʻa ia naʻe lea mai kiate ia. Naʻe sio ʻa e ngaahi kaungāfononga ʻo Paulá ki ha maama ngingila pea naʻa nau fanongo ki ha leʻo, ka naʻe ʻikai te nau mahinoʻi ʻa e ngaahi lea naʻe lea mai ʻakí. (Ngā. 9:7; 22:9) ʻI he hili iá, naʻe pau ki hono ngaahi kaungāfonongá ke nau taki ʻa Paula ki Tāmasikusi, ʻa ia naʻá ne kui tupu mei he vīsoné. ʻI aí naʻe hanga ai ʻe ʻAnanaia, ko ha tangata naʻe ʻiloʻi ʻe he kau Siu ʻo e feituʻu ko iá, ʻo toe fakafoki fakaemana mai ʻa e malava ʻa Paula ke sió.

¹⁵ Naʻe hoko atu leva ʻa Paula ʻo fakamatala ʻo pehē ʻi he hili ʻene foki ki Selusalemá, naʻe hā ai ʻa Sīsū kiate ia ʻi he temipalé. ʻI he foʻi taimi ko ʻení, naʻe hoko ai ʻa e kau Siú ʻo ʻita lahi, pea naʻa nau kaikaila leʻo-lahi: “Toʻo atu ʻa e faʻahinga tangata ko ʻení mei he māmaní, he ʻoku ʻikai tuha ia ke moʻui!” (Ngā. 22:22) Ke fakahaofi ʻa Paulá, naʻe tuʻutuʻuni ai ʻa e ʻeikitaú ke ʻave ia ki he ʻapitanga ʻo e kau sōtiá. ʻI heʻene fakapapauʻi ke ʻiloʻi ʻa e ʻuhinga ʻo e ʻita ʻa e kau Siú ʻia Paulá, naʻe fekauʻi ai ia ʻe he ʻeikitaú ke ne teuteu atu ki hono fakaʻeke ia ʻaki hano haha. Ka naʻe ngāueʻaongaʻaki ʻe Paula ha maluʻanga  fakalao naʻe malava ke ne ngāueʻaki pea naʻá ne fakahaaʻi ko ha tangataʻifonua Loma ia. Ko e kau lotu ʻa Sihova ʻi he ʻaho ní kuo nau ngāueʻaki meimei tatau ʻa e ngaahi maluʻanga fakalao ʻoku nau ala maʻú ke taukapoʻiʻaki ʻa e tuí. (Sio ki he puha “ Lao ʻo Lomá mo e Kau Tangataʻifonua Lomá” pea mo e “ Ngaahi Faitau Fakalao ʻi Onopōní.”) ʻI he fanongo ʻo kau ki he tuʻunga tangataʻifonua Loma ʻo Paulá, naʻe ʻiloʻi ai ʻe he ʻeikitaú ʻe fiemaʻu ia ke ne kumi ki ha toe founga ʻe taha ke maʻu mai ai ha toe fakamatala lahi ange. ʻI he ʻaho hono hokó, naʻá ne ʻomi ai ʻa Paula ki he ʻao ʻo ha fakataha ʻa e Sanetalimí naʻe fokotuʻutuʻu makehe, ʻa ia ko e fakamaauʻanga lahi ʻa e kau Siú.

16, 17. (a) Fakamatalaʻi angé ʻa e meʻa naʻe hoko ʻi he taimi naʻe lea ai ʻa Paula ki he Sanetalimí. (e) ʻI he taimi naʻe taaʻi ai iá, naʻe anga-fēfē hono fokotuʻu ʻe Paula ha faʻifaʻitakiʻanga ʻi he anga-fakatōkilaló?

¹⁶ ʻI he kamata ʻo ʻene taukapó ʻi he ʻao ʻo e Sanetalimí, naʻe pehē ʻe Paula: “Kau tangata, fanga tokoua, ʻoku malava ke u lea ʻi he ʻao ʻo e ʻOtuá, ʻoku tala mai ʻe hoku konisēnisí kuo ʻikai te u fai ha meʻa ʻe taha ʻoku hala ʻo aʻu mai ki he ʻahó ni.” (Ngā. 23:1) Naʻe ʻikai lava ke ne toe hoko atu. ʻOku pehē ʻe he fakamatalá: “ʻI he meʻá ni naʻe tuʻutuʻuni ai ʻe he taulaʻeiki lahi ko ʻAnanaiá ki he faʻahinga naʻe tuʻu ʻi hono tafaʻakí ke paaʻi ʻa hono ngutú.” (Ngā. 23:2) Ko ha anga taʻefakaʻapaʻapa moʻoni ia! Pea ko ha fakahaaʻi moʻoni ia ʻo e tomuʻa fehiʻá, ke lau ʻa Paula ko ha tokotaha loi ki muʻa ia ke fai ha fanongo ki ha faʻahinga fakamoʻoni! Tāneʻineʻi ke tali ʻa Paula: “ʻE hanga ʻe he ʻOtuá ʻo taaʻi koe, ʻa e holisi vali hina ko koé. ʻOkú ke nofo hifo koā ke fakamāuʻi au ʻo fakatatau ki he Laó, pea ʻi he taimi tatau pē ʻokú ke maumauʻi ʻa e Laó ʻi hoʻo tuʻutuʻuni ke taaʻi aú?”​—Ngā. 23:3.

¹⁷ Ko e niʻihi naʻe tuʻu aí naʻa nau moʻutāfuʻua​—ʻo ʻikai ʻi he tokotaha naʻá ne taaʻi ʻa Paulá ka ʻi he anga ʻo e tali ʻa Paulá! Naʻa nau ʻeke anga-fefeka ange: “ʻOkú ke laukovi koā ki he taulaʻeiki lahi ʻa e ʻOtuá?” ʻI he tali ki aí, naʻe ʻoange ʻe Paula kiate kinautolu ha lēsoni ʻi he anga-fakatōkilaló pea ʻi he fakaʻapaʻapa ki he Laó. Naʻá ne pehē: “Fanga tokoua, naʻe ʻikai te u ʻilo ko ha taulaʻeiki lahi ia. He kuo tohi, ‘Kuo pau ke ʻoua te ke lea kovi ki ha pule ʻo ho  kakaí.’” d (Ngā. 23:4, 5; ʻEki. 22:28) Naʻe ngāueʻaki leva ʻe Paula he taimi ko ʻení ha founga fakafeangai ia ʻe taha. ʻI hono ʻiloʻi ko e Sanetalimí naʻe faʻuʻaki ia ha kau Fālesi mo ha kau Sātusí, naʻá ne pehē: “Kau tangata, fanga tokoua, ko ha Fālesi au, ko ha hako au ʻo e kau Fālesí. Kuo fakamāuʻi au koeʻuhi ko e ʻamanaki ʻo e toetuʻu ʻa e kau maté.”​—Ngā. 23:6.

18. Ko e hā naʻe ui ai ʻe Paula ʻa ia tonu ko ha Fālesí, pea te tau ngāueʻaki fēfē nai ʻa e fakaʻuhinga meimei tatau ʻi he ngaahi tuʻunga ʻe niʻihi?

¹⁸ Ko e hā naʻe ui ai ʻe Paula ʻa ia tonu ko ha Fālesí? Koeʻuhí ‘ko ha hako ia ʻo e kau Fālesí’ mei ha fāmili naʻe kau ki he kulupu lotu mavahe ko iá. Ko ia ai, naʻe kei vakai ai ʻa e tokolahi kiate ia ʻi he tuʻunga ko iá. e Ka, naʻe lava fēfē ke fakafekauʻaki ʻe Paula ʻa ia tonu ki he tui ʻa e kau Fālesí ki ha toetuʻú? Fakatatau ki he fakamatalá, naʻe tui ʻa e kau Fālesí ʻoku ʻi ai ha konga ia ʻi he tangatá ʻoku moʻui atu pē ia ʻi he hili ʻa e maté pea ko e konga ko iá  ʻa ia ʻo e faʻahinga māʻoniʻoní ʻe toe moʻui ia ʻi ha ngaahi sino fakaetangata. Naʻe ʻikai ke tui ʻa Paula ia ki he ngaahi fakakaukau peheé. Naʻá ne tui ki he toetuʻú ʻo hangē ko ia naʻe akoʻi ʻe Sīsuú. (Sione 5:25-29) Neongo ia, naʻe loto-tatau ʻa Paula mo e kau Fālesí naʻe ʻi ai ha ʻamanaki ʻo e moʻui ʻi he kahaʻú ʻi he hili ʻa e maté​—ʻo kehe ia mei he kau Sātusí, ʻa ia naʻe ʻikai te nau tui ki ha moʻui ʻi he kahaʻú. ʻE lava ke tau ngāueʻaki ʻa e fakaʻuhinga meimei tatau ʻi he taimi ʻoku tau talanoa ai mo e kau Katoliká pe kau Palotisaní. ʻE lava ke tau pehē ange, ʻi he hangē ko kinautolú, ʻoku tau tui ki he ʻOtuá. Ko e moʻoni, te nau tui nai ki he Tolu-Tahaʻi-ʻOtuá lolotonga ia ʻetau tui ʻa kitautolu ki he ʻOtua ʻo e Tohi Tapú. Neongo ia, ʻoku tau tui tatau ai ʻoku ʻi ai ha ʻOtua.

19. Ko e hā naʻe hoko ai ʻo maveuveu ʻa e fakataha ʻa e Sanetalimí?

¹⁹ Ko e fakamatala ʻa Paulá naʻá ne fakamavaeuaʻi ʻa e Sanetalimí. ʻOku pehē ʻe he fakamatalá: “Naʻe mapuna hake ai ha fuʻu longoaʻa, pea ko e niʻihi ʻo e kau sikalaipe ʻo e faʻahi ʻa e kau Fālesí naʻa nau tuʻu hake ʻo kamata fakakikihi fefeka, ʻo pehē: ‘ʻOku ʻikai te mau ʻilo ha hala ʻi he tangatá ni, naʻa kuo lea kiate ia ha laumālie pe ko ha ʻāngelo​—.’” (Ngā. 23:9) Ko e fakahuʻunga tofu pē ko ia ʻo pehē mahalo naʻe lea ha ʻāngelo kia Paulá naʻe fakaliliʻa lahi ai ʻa e kau Sātusí, ʻa ia naʻe ʻikai te nau tui ki he kau ʻāngeló! (Sio ki he puha “ Kau Sātusí mo e Kau Fālesí.”) Naʻe hoko ʻa e fuʻu longoaʻá ʻo lahi ʻaupito ʻo toe hanga ai ʻe he ʻeikitau Lomá ʻo fakahaofi ʻa e ʻapositoló. (Ngā. 23:10) Neongo ia, naʻe kei ʻi he tuʻunga fakatuʻutāmaki pē ʻa Paula. Ko e hā ʻe hoko he taimi ko ʻení ki he ʻapositoló ni? Te tau ʻilo ʻa e meʻa lahi ange ʻo kau ki ai ʻi he vahe hono hokó.