1-6. Fakamatala ki ha hokosia ʻa ha Kau Fakamoʻoni naʻa nau malanga ʻi he malumalu ʻo e ngaahi tuʻunga kehekehe lahi.

 KO Rebecca, ko ha Fakamoʻoni kei taʻu siʻi ʻa Sihova ʻi Kana, naʻá ne vakai ki he ʻapiako naʻá ne ako aí ko ʻene vāhenga-ngāue fakamalangá ia. Naʻá ne faʻo maʻu pē ʻi heʻene kato akó ha tohi Fakatohitapu. ʻI he lolotonga ʻa e taimi mālōloó, naʻá ne kumi ai ki ha ngaahi faingamālie ke fai ha fakamoʻoni ki hono ngaahi kaungāakó. Naʻe kamata ai ʻe Rebecca ha ngaahi ako Tohi Tapu mo e tokolahi ʻo hono ngaahi kaungākalasí.

² ʻI he motu ko Matakesikaá, ʻa ia ʻoku ofi pē ʻi he matāfanga fakahahake ʻo ʻAfiliká, naʻe lue maʻu pē ai ha ongo tāimuʻa ʻe toko ua ʻi he kilomita ē ʻe 25 ʻi he ʻea vevela fakatalopikí ke na aʻu ai ki ha kolo ʻoku tuʻu mavahe. Naʻá na fakahoko ai ha ngaahi ako Tohi Tapu lahi mo e faʻahinga mahuʻingaʻiá.

³ Ke aʻu ki he kakai ʻoku nofo takatakai ʻi he vaitafe Palakueí mo Palaná, naʻe ngāue ai ʻa e Kau Fakamoʻoni ʻi Palakueí fakataha mo e kau ngāue pole mei he ngaahi fonua kehe ʻe 15 ke langa ha vaka vaitafe. Ko e vaka toni ʻe 45 ko ʻení ʻoku lava ke nofo ai ʻo aʻu ki he kakai ʻe toko 12. Mei he ʻapi ʻoku tētē takai holo ko ení, naʻe fakamafola ai ʻe he kau malanga faivelenga ʻo e Puleʻangá ʻa e ongoongo leleí ki he ngaahi feituʻu naʻe ʻikai mei lava ke fai ha aʻu ia ki ai.

⁴ ʻI he Tokelau Mamaʻó, naʻe ngāue ʻaonga ʻaki ai ʻe he Kau Fakamoʻoni ʻi ʻAlasikaá ha faingamālie makehe ke nau malanga ʻi he lolotonga ʻa e faʻahitaʻu māfaná ʻa ia ʻoku tokolahi ai ʻa e kau folau ʻeveʻevá. ʻI hono ʻomi ʻe he ʻea māfana angé ʻa e ngaahi vaka meili ʻoku fonu ai ʻa e kau ʻeveʻeva ʻaʻahi mai mei he ngaahi fonua lahi kehekehe, naʻe tuʻu atu ai ʻa e Kau Fakamoʻoni fakalotofonuá ʻi he uafú ʻo fakaʻaliʻali atu ha ngaahi tohi Fakatohitapu ʻoku hā fakatupu tokanga ʻi ha ngaahi lea kehekehe lahi. ʻI he feituʻu tatau pē ko iá, ʻoku fakamoʻoniʻi ai ʻa e mahuʻinga taʻehanotatau ʻo ha vakapuna ʻi heʻene aʻu ki he ngaahi kolo tuʻu mavahé, ʻo fakaʻatā ai ʻa e ongoongo leleí ke mafola ʻo aʻu ki he ngaahi komiunitī Aleut, Athabascan, Tsimshian, mo e Tlingit.

⁵ Ko Larry, ʻi Tekisisi, ʻi ʻAmelika, naʻe ʻi ai hono vāhenga-ngāue makehe​—ʻa  ia ko e fale tauhiʻanga mahaki ʻa ia naʻá ne nofo aí. Neongo ʻoku fakangatangata pē ia ki he heka salioté tupu mei ha fakatamaki naʻe hoko, naʻe hanganaki femoʻuekina pē ʻa Larry ia. Naʻá ne vahevahe atu ki he niʻihi kehé ʻa e pōpoaki ʻo e Puleʻangá, ʻo kau ai ʻa ʻene ʻamanaki makatuʻunga he Tohi Tapú ʻa ia ʻi he malumalu ʻo e pule ʻa e Puleʻangá ʻe ʻi ai ʻa e ʻaho te ne toe lava ai ʻo lue.​—ʻAi. 35:5, 6.

⁶ Ke maʻu ha ʻasemipilī ʻi he feituʻu fakatokelau ʻo Mienimaá, naʻe folau vaka tahi ʻaho tolu ai ha kulupu ʻo e Kau Fakamoʻoni mei Mandalay. ʻI he vēkeveke ke malangaʻi ʻa e ongoongo leleí, naʻa nau ʻave ha ngaahi tohi Fakatohitapu, ʻa ia naʻa nau tuʻuaki atu ia ki honau ngaahi kaungāpāsesé. ʻI he taimi kotoa pē naʻe tuʻu ai ʻa e vaká ʻi ha kolo lahi pe kiʻi kolo, naʻe hopo ʻa e kau malanga vēkeveke ko ʻení pea nau ō fakavave atu ʻi he feituʻu ko iá ʻo tuʻuaki atu ʻa e ngaahi tohí. ʻI he taimi tatau, ko e kau pāsese foʻou ko ia ne nau heka hake ki he vaká, naʻe hoko ia ko ha toe “vāhenga-ngāue foʻou” ki he kau malanga ʻo e Puleʻangá ʻi heʻenau foki mai ki he vaká.

7. ʻI he ngaahi founga fē ʻoku faifakamoʻoni ai ʻa e kau lotu ʻa Sihová ʻo fekauʻaki mo e Puleʻanga ʻo e ʻOtuá, pea ko e hā ʻa ʻenau taumuʻá?

⁷ Hangē ko e fanga tokoua mo e fanga tuofāfine naʻe lave ki ai ʻi he ngaahi fakatātā ʻe niʻihi ko ʻení, ko e kau lotu faivelenga ʻa Sihova takatakai ʻi he māmaní ʻoku nau “fakamoʻoni fakaʻāuliliki fekauʻaki mo e Puleʻanga ʻo e ʻOtuá.” (Ngā. 28:23) ʻOku nau ʻalu mei he fale ki he fale, fakalea ki he kakai ʻi he halá, faitohi kiate kinautolu, pea talanoa kiate kinautolu ʻi he telefoní. Tatau ai pē pe ʻoku nau heka ʻi ha pasi, luelue ʻi ha paʻake, pe kiʻi mālōlō ʻi he feituʻu ʻoku nau ngāue paʻanga aí, ʻoku nau kumi vēkeveke ki he faingamālie kotoa pē ke fai ai ha fakamoʻoni fekauʻaki mo e Puleʻanga ʻo e ʻOtuá. Ko e ngaahi founga tofu pē ko ia ʻoku nau fai ai iá ʻoku kehekehe nai, ka ko e taumuʻá ʻoku tatau pē​—ko e malangaʻi ʻa e ongoongo leleí ʻi ha feituʻu pē ʻa ia ʻe lava ke maʻu ai ʻa e kakaí.​—Māt. 10:11.

8, 9. (a) Ko e hā ko ha mana ai ʻa e tupu lahi ʻa e ngāue malangaʻi ʻo e Puleʻangá? (e) Ko e hā ʻa e fehuʻi fakatupu tokanga ʻoku langaʻi haké, pea ko e hā ʻoku fiemaʻu ke tau faí ke maʻu ai ʻa e tali ki aí?

⁸ Siʻi tokotaha lautohi, ʻokú ke kau ʻi he lotolotonga ʻo e kau fanongonongo tokolahi ʻo e Puleʻangá ʻa ia ʻoku nau longomoʻui he taimí ni ʻi he ngaahi fonua laka hake he 235? Kapau ko ia, ʻoku ʻi ai leva hoʻo kaunga ki he tupu lahi fakatoʻoaloto ʻo e ngāue malangaʻi ʻo e Puleʻangá! Ko e meʻa kuo lavaʻi ʻi he malaʻe ngāue ʻi māmani lahí ko ha mana ia. Neongo ʻa e ngaahi fakafaingataʻaʻiaʻanga fakamanavaheé mo e ngaahi polé​—naʻa mo e ngaahi fakataputapui fakapuleʻangá mo e fakatanga fakahangatonú​—ʻoku fai ʻe he Kau Fakamoʻoni ʻa Sihová ha fakamoʻoni fakaʻāuliliki fekauʻaki mo e Puleʻanga ʻo e ʻOtuá ki he kakai ʻo e ngaahi puleʻanga kotoa pē.

⁹ Ko ha fehuʻi fakatupu tokanga leva ke fakakaukau ki aí, Ko e hā kuo ʻikai malava ai ʻe ha fakafaingataʻaʻiaʻanga, naʻa mo e fakafepaki ʻa Sētané, ke ne  taʻofi ʻa e ngaʻunu ki muʻa ʻa e ngāue malangaʻi ʻo e Puleʻangá? Ke tali ʻa e fehuʻi ko iá, ʻoku fiemaʻu ia ke fakafoki ʻetau vakaí ki he ʻuluaki senituli T.S. He ko eni, ko kitautolu Kau Fakamoʻoni ʻa Sihova ʻi onopōní ʻoku tau hokohoko atu ʻa e ngāue ʻa ia naʻe kamataʻi ʻi he taimi ko iá.

10. Naʻe līʻoa ʻe Sīsū ʻa ia tonu ki he hā, pea ko e hā naʻá ne ʻiloʻi ʻo fekauʻaki mo e ngāue ko ʻení?

¹⁰ Ko e Tokotaha-Fokotuʻu ʻo e fakatahaʻanga Kalisitiané, ʻa Sīsū Kalaisi, naʻá ne līʻoa ʻa ia tonu ki hono malangaʻi ʻa e ongoongo lelei ʻo e Puleʻanga ʻo e ʻOtuá; naʻá ne moʻuiʻaki ʻa e ngāue ko iá. ʻI he taimi ʻe taha naʻá ne fakamatala ai: “Kuo pau foki ke u talaki ʻa e ongoongo lelei ʻo e Puleʻanga ʻo e ʻOtuá ki he ngaahi kolo kehé, koeʻuhi ko e meʻa ʻeni naʻe fekauʻi mai ai aú.” (Luke 4:43) Naʻe ʻiloʻi ʻe Sīsū naʻá ne kamataʻi ha ngāue ʻa ia ʻe ʻikai lava ke ne ʻosiki kotoa ʻe ia tokotaha pē. ʻI ha taimi nounou ki muʻa ke ne pekiá, naʻá ne tomuʻa tala ai ko e pōpoaki ʻo e Puleʻangá ʻe malangaʻi ia “ʻi he kotoa ʻo e ngaahi puleʻangá.” (Mk. 13:10) Ka ʻe anga-fēfē hono fakahoko ení, pea ʻe fakahoko ia ʻe hai?

11. Ko e hā ʻa e fekau mafatukituki naʻe ʻoange ʻe Sīsū ki heʻene kau ākongá, pea ko e hā ʻa e tokoni te nau maʻú ʻi heʻenau fakahoko ʻa e fekau ko iá?

¹¹ ʻI he hili ʻene pekiá mo ʻene toetuʻú, naʻe hā ai ʻa Sīsū ki heʻene kau ākongá ʻo ne ʻoange kiate kinautolu ʻa e fekau mafatukituki ko ʻení: “Ko ia ai, mou ō ʻo ngaohi ko e kau ākonga ʻa e kakai ʻo e ngaahi puleʻanga kotoa pē, ʻo papitaiso kinautolu ʻi he huafa ʻo e Tamaí mo e ʻAló mo e laumālie māʻoniʻoní, pea akoʻi kinautolu ke nau tauhi ʻa e ngaahi meʻa kotoa pē kuó u fekau atu kiate kimoutolú. Pea vakai, ʻoku ou ʻiate kimoutolu ʻi he ʻaho kotoa pē ʻo aʻu ki he fakaʻosiʻosi ʻo e fokotuʻutuʻu lolotongá.” (Māt. 28:19, 20) Ko e ngaahi foʻi lea “ʻoku ou ʻiate kimoutolu” ʻoku fakahaaʻi ai ʻe maʻu ʻe he kau ākongá ʻa ʻene poupoú ʻi he ngāue fakamalangá mo e ngaohi-ākongá. ʻE fiemaʻu kiate kinautolu ʻa e tokoni ko iá, he naʻe tomuʻa tala ʻe Sīsū ʻe “fehiʻanekinaʻi [kinautolu] ʻe he ngaahi puleʻangá kotoa.” (Māt. 24:9) Naʻe lava ke ʻamanekina ʻe he kau ākongá ha toe tokoni ʻe taha. Ki muʻa siʻi pē ke ʻalu hake ʻa Sīsū ki hēvaní, naʻá ne tala ange kiate kinautolu ʻe fakaivimālohiʻi kinautolu ʻe he laumālie māʻoniʻoní ke nau hoko ko ʻene kau fakamoʻoni “ki he feituʻu taupotu taha ʻo e māmaní.”​—Ngā. 1:8.

12. Ko e hā ʻa e ngaahi fehuʻi mahuʻinga ʻoku malanga haké, pea ko e hā ʻoku mātuʻaki mahuʻinga ai ke tau ʻiloʻi ʻa e ngaahi tali ki aí?

¹² ʻOku malanga hake leva ha ngaahi fehuʻi mahuʻinga: Naʻe vakai fakamātoato nai ʻa e kau ʻapositolo ʻa Sīsuú mo e kau ākonga kehe he ʻuluaki senitulí ki he ngāue naʻe fekauʻi angé? Naʻe faifakamoʻoni fakaʻāuliliki nai ʻa e kiʻi kulupu ko ʻeni ʻo e kau tangata mo e kau fefine Kalisitiané ʻo fekauʻaki mo e Puleʻanga ʻo e ʻOtuá naʻa mo e ʻi he uhouhonga ʻo e fakatanga kakahá? Naʻa nau maʻu moʻoni nai ʻa e tokoni fakahēvani mo e poupou ʻa e laumālie māʻoniʻoni ʻo Sihová ʻi heʻenau ngāue ngaohi-ākongá? Ko e ngaahi  fehuʻi ko ʻení mo e ngaahi fehuʻi ʻoku fekauʻaki mo ia ʻoku tali ia ʻi he tohi Tohi Tapu ʻa Ngāué. ʻOku mātuʻaki mahuʻinga ke tau ʻiloʻi ʻa e ngaahi tali ki aí. Ko e hā hono ʻuhingá? Naʻe talaʻofa ʻe Sīsū ko e ngāue naʻá ne fekauʻí ʻe hokohoko atu ia “ʻo aʻu ki he fakaʻosiʻosi ʻo e fokotuʻutuʻu lolotongá.” Ko ia ko e fekau ko ʻení ʻoku kau ki ai ʻa e kotoa ʻo e kau Kalisitiane moʻoní, ʻo kau ai ʻa kitautolu ko ia ʻoku tau moʻui ʻi he taimi ko ʻeni ʻo e ngataʻangá. Ko ia ai, ʻoku ʻi ai ʻetau mahuʻingaʻia lahi ʻaupito ʻi he lēkooti fakahisitōlia ʻa ia ʻoku maʻu ʻi he tohi ʻa Ngāué.

13, 14. (a) Ko hai naʻá ne hiki ʻa e tohi ʻa Ngāué, pea naʻe anga-fēfē hono maʻu ʻe he tokotaha-tohí ʻa ʻene fakamatalá? (e) Ko e hā ʻoku ʻi loto ʻi he tohi ʻa Ngāué?

¹³ Ko hai naʻá ne hiki ʻa e tohi ʻa Ngāué? Ko e tohí ʻiate ia tonu ʻoku ʻikai ʻaupito ke ne tala mai ʻe ia pe ko hai ʻa hono tokotaha-tohí, ka ko e ngaahi lea kamatá ʻokú ne fakamahino mai ko e tokotaha-tohi ʻo e tohi ʻa Ngāué ko e toe tokotaha-tohi pē ia ʻo e Kōsipeli ʻa Luké. (Luke 1:1-4; Ngā. 1:1, 2) Ko ia ai, talu mei fuoloa, ko Luke, ʻa ia ko ha ‘toketā ʻofeina’ pea ko ha faihisitōlia fakamākukanga, kuo fai e fakakaukau ko ia ʻa e tokotaha-tohi ʻo e tohi ʻa Ngāué. (Kol. 4:14) Ko e tohí ni ʻokú ne kāpui ha vahaʻa taimi ko e taʻu nai ʻe 28, mei he ʻalu hake ʻa Sīsū ʻi he 33 T.S. ki he tuku pilīsone ʻo e ʻapositolo ko Paulá ʻi Loma ʻi he 61 T.S. nai. Ko e moʻoniʻi meʻa ko ia ʻo e fetongi ʻe Luke mei he “nau” ki he “mau” ʻi heʻene hiki fakamatalá ʻoku fakahuʻunga mei ai naʻá ne ʻi ai tonu ʻi he ngaahi meʻa lahi naʻe hoko ʻa ia ʻokú ne fakamatala ki aí. (Ngā. 16:8-10; 20:5; 27:1) ʻI he tuʻunga ko ha tokotaha faifakatotolo fakaʻāulilikí, ʻoku pau pē naʻe maʻu fakahangatonu ʻe Luke ʻene fakamatalá meia Paula, Panepasa, Filipe, pea mo e niʻihi kehe ʻoku lave ki ai ʻi he lēkōtí.

¹⁴ Ko e hā ʻoku ʻi loto ʻi he tohi ʻa Ngāué? Ki muʻa atú, ʻi heʻene Kōsipelí, naʻe tohi ai ʻa Luke ʻo fekauʻaki mo e ngaahi meʻa naʻe leaʻaki mo fai ʻe Sīsuú. Kae kehe, ʻi he tohi ia ʻa Ngāué, ʻoku fakamatala ai ʻa Luke ia ki he meʻa naʻe leaʻaki mo fai ʻe he kau muimui ʻo Sīsuú. Ko ia ai, ko e tohi ʻa Ngāué ʻoku fekauʻaki ia mo e kakai naʻa nau lavaʻi ha ngāue makehe atu, neongo ko e tokolahi ʻo kinautolu naʻe vakai ki ai ʻa e kakai mei tuʻá ko e kau “taʻeako mo lāuvale.” (Ngā. 4:13) Ko hono fakanounoú, ʻoku tala mai ʻe he lēkooti fakamānavaʻi ko ʻení ʻa e anga hono fokotuʻu mo e anga ʻo e tupu ʻa e fakatahaʻanga Kalisitiané. ʻOku fakahaaʻi mai ʻe he tohi ʻa Ngāué ʻa e anga ʻo e malanga ʻa e kau Kalisitiane he ʻuluaki senitulí​—ko ʻenau ngaahi foungá mo e anga ʻenau fakakaukaú. (Ngā. 4:31; 5:42) ʻOkú ne fakamamafaʻi mai ʻa e ngafa ʻo e laumālie māʻoniʻoní ʻi hono fakamafola ʻa e ongoongo leleí. (Ngā. 8:29, 39, 40; 13:1-3; 16:6; 18:24, 25) ʻOku fakaeʻa mai ʻe he tohi ʻa Ngāué ʻa e kaveinga tefito ʻo e Tohi Tapú, ʻa ia ʻoku kau ki ai ʻa e fakamāʻoniʻoniʻi ʻa e huafa ʻo e ʻOtuá fakafou ʻi hono Puleʻangá ʻi he malumalu ʻo Kalaisí, pea ʻokú ne fakahaaʻi mai ʻa e mafola lavameʻa ʻa e pōpoaki ʻo e Puleʻangá ʻi he uhouhonga ʻo e fakafepaki kakahá.​—Ngā. 8:12; 19:8; 28:30, 31.

15. ʻI he ngaahi founga fē te tau maʻu ʻaonga ai mei hono sivisiviʻi ʻa e tohi ʻa Ngāué?

 ¹⁵ Ko e moʻoni, ʻoku fakatoʻoaloto mo fakatupu tui mālohi ke sivisiviʻi ʻa e tohi Tohi Tapu ʻa Ngāué! Kapau te tau fakakaukauloto ki he faʻifaʻitakiʻanga ʻo e loto-toʻa mo e faivelenga ʻa e muʻaki kau muimui ʻo Kalaisí, ʻe maongo ia ki hotau lotó. ʻE ueʻi ai kitautolu ke tau faʻifaʻitaki ki he tui ʻa hotau fanga tokoua mo e fanga tuofāfine ʻi he ʻuluaki senitulí. Te tau hoko ai ʻo mateuteu lelei ange ke fakahoko ʻa e ngāue ne fekauʻi mai kiate kitautolu ke tau “ō ʻo ngaohi . . . ākonga.” Ko e tohi ko eni ʻokú ke lau he taimi ní kuo faʻufaʻu ia ke ne tokoniʻi koe ke ke ako fakamākukanga ʻa e tohi ʻa Ngāué.

16. Ko e hā ʻa e taumuʻa ʻe tolu ʻo e tohi ko ʻení?

¹⁶ Ko e hā ʻa e taumuʻa fakalūkufua ʻo e tohi ko ʻení? Ko e taumuʻa ʻe tolu ʻo e tohí ni (1) ke fakaivimālohiʻi ʻetau tuipau ko Sihová fakafou ʻi hono laumālie māʻoniʻoní ʻokú ne poupou mai ki he ngāue malangaʻi ʻo e Puleʻangá mo e ngaohi-ākongá, (2) ke langaʻi ʻa ʻetau faivelenga ki he ngāue fakafaifekaú ʻaki hono sivisiviʻi ʻa e faʻifaʻitakiʻanga ʻa e kau muimui ʻo Kalaisi ʻi he ʻuluaki senitulí, pea (3) ke fakalolotoʻi ʻa ʻetau fakaʻapaʻapa ki he kautaha ʻa Sihová pea mo e faʻahinga ʻoku nau takimuʻa ʻi he ngāue fakamalangá pea ʻi hono tokangaʻi ʻa e ngaahi fakatahaʻangá.

17, 18. ʻOku anga-fēfē hono fokotuʻutuʻu ʻa e tohí ni, pea ko e hā ʻa e ngaahi tafaʻaki ʻe fakamoʻoniʻi ʻene ʻaonga ki he ako Tohi Tapu fakafoʻituituí?

¹⁷ ʻOku anga-fēfē hono fokotuʻutuʻu ʻa e tohí ni? Te ke fakatokangaʻi ʻoku vahevahe ia ki he ngaahi konga ʻe valu, ʻa ia ko e konga taki taha ʻokú ne kāpui ʻe ia ha konga ʻo e tohi ʻa Ngāué. ʻOku ʻikai ko e taumuʻa ia ʻo e ngaahi vahe hono hokó ke tokonaki mai ha lāulea fakafoʻi veesi ʻo fekauʻaki mo e tohi Ngāué, ka ke ʻomai ʻa e ngaahi lēsoni mei he ngaahi meʻa naʻe hoko ʻa ia ʻoku fakamatala ki ai ʻa e tohi Tohi Tapu ko iá pea mo tokoniʻi kitautolu ke tau sio ki he founga ʻe lava ke tau ngāueʻaki  fakafoʻituitui ai ʻa e ngaahi poini ʻoku tau ako mei aí. ʻI he kamataʻanga ʻo e vahe taki taha, ʻoku ʻi ai ha kiʻi fakamatala ai ʻokú ne tala mai ʻa e poini tefito ʻo e vahe ko iá pea mo ha konga Tohi Tapu ʻa ia ʻokú ne fakahaaʻi mai ʻa e konga ʻi he tohi ʻa Ngāué ʻa ia ʻe fai ki ai ʻa e lāuleá.

¹⁸ ʻOku ʻi ai mo e toe ngaahi tafaʻaki kehe ʻo e tohí ni ʻa ia ʻe fakamoʻoniʻi ʻa ʻene ʻaonga ki he ako Tohi Tapu fakafoʻituituí. Ko e ngaahi fakatātā fakaʻofoʻofa ʻokú ne fakahaaʻi ʻa e ngaahi meʻa fakafiefia naʻe hoko ʻi he tohi ʻa Ngāué te ne tokoniʻi koe ke ke sioloto atu ki he meʻa naʻe hokó ʻi hoʻo fakakaukauloto ko ia ki he fakamatala Fakatohitapú. Ko e ngaahi vahe lahi ʻoku ʻi loto ai ʻa e ngaahi puha ʻa ia ʻokú ne ʻomai ha toe ngaahi fakamatala fakalahi ʻoku ʻaonga. ʻOku tokonaki mai ʻe he ngaahi puha ʻe niʻihi ha puipuituʻa ʻo ha tokotaha ʻi he Tohi Tapú ʻa ia ko ʻene tuí ʻoku taau ke faʻifaʻitaki ki ai. ʻOku ʻomai ʻe he puha ʻe niʻihi ʻa e ngaahi fakaikiiki lahi ange fekauʻaki mo ha ngaahi feituʻu, ngaahi meʻa ne hoko, ngaahi anga-fakafonua, pe faʻahinga kehe naʻe lave ki ai ʻi he tohi ʻa Ngāué.

19. Ko e hā ʻa e sivisiviʻi-kita ʻoku totonu ke tau fai ʻi he taimi ki he taimi?

¹⁹ Ko e tohí ni ʻe lava ke ne tokoniʻi koe ke ke fai ha sivisiviʻi-kita faitotonu. Tatau ai pē pe ko e hā ʻa e lōloa ʻo hoʻo hoko ko e tokotaha malanga ʻo e Puleʻangá, ʻoku lelei ke ke kiʻi tuʻu hifo ʻi he taimi ki he taimi ʻo vakaiʻi ange ʻa e ngaahi meʻa ʻokú ke fakamuʻomuʻa ʻi hoʻo moʻuí pea mo e anga hoʻo vakai ki he ngāue fakafaifekau faka-Kalisitiané. (2 Kol. 13:5) ʻEke hifo kiate koe: ‘ʻOku ou tauhi maʻu nai ha ongoʻi ʻo e fakavavevavé ʻi heʻeku ngāue fakafaifekaú? (1 Kol. 7:29-31) ʻOku ou malangaʻi ʻa e ongoongo leleí fakataha mo e tuipau mo e faivelenga? (1 Tes. 1:5, 6) ʻOku ou kau nai ʻi he kakato taha ʻe ala lavá ʻi he ngāue fakamalangá mo e ngaohi-ākongá?’​—Kol. 3:23.

20, 21. Ko e hā ʻoku fuʻu fakavavevave ai ʻa e ngāue naʻe fekauʻi mai kiate kitautolú, pea ko e hā ʻoku totonu ko ʻetau fakapapaú ia?

²⁰ Tuku ke tau manatuʻi maʻu pē kuo fekauʻi kitautolu ke tau fakahoko ha ngāue mahuʻinga​—ke malanga mo ngaohi ākonga. ʻI he ʻosi atu ʻa e ʻaho taki taha, ʻoku ʻalu ke toe lahi ange ai ʻa e tuʻunga fakavavevave ʻo e fekau ko iá. Ko e ngataʻanga ʻo e fokotuʻutuʻu lolotonga ko ení ʻoku tuʻunuku vave mai. Kuo ʻikai ʻaupito ha taimi ki muʻa ʻe lahi peheni ai ʻa e ngaahi moʻui ʻa ia ʻoku ʻi he tuʻunga fakatuʻutāmakí. ʻOku ʻikai ke tau ʻiloʻi pe ko e toko fiha ʻa e faʻahinga hehema totonu ʻoku kei toe ʻa ia te nau tali nai ʻa ʻetau pōpoakí. (Ngā. 13:48) Ka ko hotau fatongiá ia ke tokoniʻi ʻa e faʻahinga peheé ki muʻa ke fuʻu tōmuí.​—1 Tīm. 4:16.

²¹ ʻOku mātuʻaki mahuʻinga leva, ke tau faʻifaʻitaki ki he faʻifaʻitakiʻanga ʻa e kau malanga faivelenga ʻo e Puleʻangá ʻi he ʻuluaki senitulí. Fakatauange ke ueʻi koe ʻi hoʻo ako fakamākukanga ʻa e tohí ni ke ke malanga ai fakataha mo e faivelenga mo e loto-toʻa mātuʻaki lahi ange ia ʻi ha toe taimi ki muʻa. Pea fakatauange ke fakaivimālohiʻi ai hoʻo fakapapau ke hokohoko atu hoʻo “fakamoʻoni fakaʻāuliliki fekauʻaki mo e Puleʻanga ʻo e ʻOtuá.”​—Ngā. 28:23.