1. Fakamatalaʻi angé ʻa e ʻatimosifia ʻo e Kātoanga ʻo e Penitekosí.

 KO E ngaahi hala ʻo Selusalemá ʻoku fonu mo ngaʻuta ʻi he fiefiá. a ʻOku ʻalu hake ʻa e kohú mei he ʻōlita he temipalé lolotonga ia hono hivaʻi ʻe he kau Līvaí ʻa e Hālelí (ʻa ia ko e Saame 113 ki he 118), ʻo ngalingali ne nau hivaʻi fetāliaki ia. ʻOku fonu ʻa e ngaahi halá ʻi he kau ʻaʻahi maí. Ko ʻenau omi mei he ngaahi feituʻu mamaʻo ʻo hangē ko ʻĪlami, Mesopotēmia, Kapatōsia, Ponitō, ʻIsipite, pea mo Loma. b Ko e hā ʻa e kātoanga ʻoku faí? Ko e Penitekosí, ʻa ia ʻoku toe ui “koe aho bolobolo oe uluaki fua.” (Nōm. 28:26, PM) Ko e kātoanga fakataʻu ko ʻení ʻokú ne fakaʻilongaʻi ʻa e ngataʻanga ʻo e utu-taʻu ʻo e paʻalé pea mo e kamataʻanga ʻo e utu-taʻu ʻo e uité. Ko ha ʻaho fakafiefia ia.

2. Ko e hā ʻa e ngaahi meʻa fakaofo ʻoku hoko ʻi he Penitekosi ʻo e 33 T.S.?

² ʻI he hoko nai ʻa e hivá ʻi he pongipongi mokomoko lelei ko ʻeni ʻo e faʻahitaʻu failau ʻi he 33 T.S., ʻoku hoko ai ha meʻa ʻa ia ʻe fai ai ʻa e fakaofoʻia ʻi he ngaahi senituli ka hoko maí. Fakafokifā pē, ʻoku ongo mai mei he langí ha “longoaʻa . . . ʻo hangē ko e mumuhu mai ʻa ha fuʻu matangi mālohí,” pe “uulu mai . . . o hage ha tuoni matagi malohi aubito.” (Ngā. 2:2; Paaki Motuʻa) ʻOku ongona ʻa e fuʻu longoaʻá ʻi he falé kotoa ʻa ia kuo fakatahataha ai ha kau ākonga ʻa Sīsū ʻe toko 120 nai. Ko hono hokó, ʻoku hoko ha meʻa fakaofo. ʻOku hā mai ha ngaahi uloʻi afi ʻoku hangē ha ngaahi ʻeleló, ʻo nau taki taha nofoʻia ʻa e tokotaha taki taha ʻo e kau ākongá. ʻOku hoko leva ai ʻa e kau ākongá ʻo “fonu . . . ʻi he laumālie māʻoniʻoní” pea kamata ke nau lea ʻi he ngaahi lea muli! ʻI he mavahe ʻa e kau ākongá mei he falé, ko e kau ʻaʻahi mai ko ia ʻoku nau fetaulaki mo ia ʻi he ngaahi hala ʻo Selusalemá ʻoku nau ofoofo, he ko ē ʻoku malava ke lea ange ʻa e kau ākongá kiate kinautolu! Ko e moʻoni, ʻoku fanongo ʻa e tokotaha taki taha kiate kinautolu ʻoku nau “lea mai ʻaki ʻa ʻenau taki taha lea.”​—Ngā. 2:1-6.

3. (a) Ko e hā ʻe lava ai ke ui ʻa e Penitekosi ʻo e 33 T.S. ko ha maka-maile ia ʻi he hisitōlia ʻo e lotu moʻoní? (e) Naʻe anga-fēfē ʻa e fekauʻaki ʻa e lea ʻa Pitá pea mo hono ngāueʻaki ʻa e “ngaahi kī ʻo e Puleʻanga”?

 ³ Ko e fakamatala fakaueʻiloto ko ʻení ʻoku fakamatala ai ki ha maka-maile ʻi he lotu moʻoní​—ʻa ia ko hono fokotuʻu ʻa e puleʻanga ko ʻIsileli fakalaumālié, ʻa e fakatahaʻanga ʻo e kau Kalisitiane paní. (Kal. 6:16) Ka ʻoku toe ʻi ai ha meʻa lahi ange. ʻI he taimi naʻe lea ai ʻa Pita ki he fuʻu kakaí ʻi he ʻaho ko iá, naʻá ne ngāueʻaki ʻa e ʻuluaki kī ʻo e “ngaahi kī [ʻe tolu] ʻo e Puleʻanga,” ʻa ia ko e kī taki taha te ne fakaava mai ha ngaahi monū makehe ki ha toe faʻahinga kakai kehe. (Māt. 16:18, 19) Ko e ʻuluaki kī ko ʻení naʻá ne ʻai ai ke malava ki he kau Siú mo e kau ului Siú ke nau tali ʻa e ongoongo leleí pea hoko ʻo pani ʻe he laumālie māʻoniʻoni ʻo e ʻOtuá. c Te nau hoko ai ko ha konga ʻo ʻIsileli fakalaumālie, pea ʻi heʻene peheé, te nau maʻu ai ʻa e ʻamanaki ko e pule ko e ngaahi tuʻi mo e kau taulaʻeiki ʻi he Puleʻanga Faka-Mīsaiá. (Fkh. 5:9, 10) Faai atu pē, ʻe fakalahi atu ai ʻa e monū ko iá ʻo aʻu ki he kau Samēliá pea hoko leva ki he kau Senitailé. Ko e hā ʻe lava ke ako ʻe he kau Kalisitiane he ʻaho ní mei he ngaahi meʻa mahuʻinga naʻe hoko ʻi he Penitekosi ʻo e 33 T.S.?

4. ʻOku anga-fēfē ʻa e hoko ʻa e fakatahaʻanga Kalisitiane ʻi onopōní ko ha fakalahi ia ʻo e fakatahaʻanga naʻe faʻu ʻi he 33 T.S.?

⁴ Ko e fakatahaʻanga Kalisitiané naʻe kamataʻaki ia ha kau ākonga ʻe toko 120 nai ʻa ia naʻa nau “kātoa pē ʻi he feituʻu ʻe taha”​—ko ha loki ʻi ʻolunga​—pea naʻe paniʻaki kinautolu ʻa e laumālie māʻoniʻoní. (Ngā. 2:1) ʻI he fakaʻosinga ʻo e ʻaho ko iá, ko e kau mēmipa ʻo e fakatahaʻanga ko iá ne papitaisó naʻe laui afe honau tokolahí. Pea ko e kamataʻanga pē ia ʻo e tupu ʻo ha kautaha ʻa ia ʻoku hokohoko atu ʻene tupu lahí ʻo aʻu mai ki he ʻahó ni! ʻIo, ko ha kulupu ʻo e kakai tangata  mo e kakai fefine manavahē-ʻOtua​—ʻa ia ko e fakatahaʻanga Kalisitiane ʻi onopōní​—ʻoku fakafou ai ʻa e hoko ʻa e “ongoongo lelei . . . ʻo e Puleʻangá” ʻo “malangaʻi ia ʻi he kotoa ʻo e māmani kuo nofoʻí ko ha fakamoʻoni ki he ngaahi puleʻanga kotoa pē” ki muʻa ke ngata ʻa e fokotuʻutuʻu lolotongá ni.​—Māt. 24:14.

5. Ko e hā ʻa e tāpuaki ʻe hoko mai mei he feohi mo e fakatahaʻanga Kalisitiané, fakatouʻosi ʻi he ʻuluaki senitulí pea mo e ʻahó ni?

⁵ Ko e fakatahaʻanga Kalisitiané ʻe toe hoko foki ia ko ha matavai ʻo e fakaivimālohi fakalaumālie ki hono kau mēmipá, fakatouʻosi ʻa e faʻahinga ʻoku kau ki he kau paní pea ki mui ai, ko e faʻahinga ʻoku kau ki he “fanga sipi kehe.” (Sione 10:16) Naʻe fakahaaʻi ʻe Paula ʻene houngaʻia ki he fetokoniʻaki naʻe fakahoko ʻe he kau mēmipa ʻo e fakatahaʻangá ʻi heʻene tohi ki he kau Kalisitiane ʻi Lomá: “ʻOku ou fakaʻamu ke u sio kiate kimoutolu, ke u ʻoatu ha meʻaʻofa fakalaumālie kiate kimoutolu koeʻuhi ke ʻai ai kimoutolu ke mou tuʻu mālohi; pe, ʻikai ko ia pē, ka ke tau fefakalototoʻaʻaki fakafou ʻi he tui ʻa e tokotaha taki taha, fakatouʻosi haʻamoutolú tui mo haʻakú.”​—Loma 1:11, 12.

6, 7. ʻOku anga-fēfē hono fakahoko ʻe he fakatahaʻanga Kalisitiane ʻi he ʻaho ní ʻa e fekau naʻe tuku mai ʻe Sīsū ke malanga ki he kotoa ʻo e ngaahi puleʻangá?

⁶ ʻI he ʻahó ni, ʻoku maʻu ʻe he fakatahaʻanga Kalisitiané ʻa e ngaahi taumuʻa tatau mo ia naʻá ne maʻu ʻi he ʻuluaki senitulí. Naʻe ʻoange ʻe Sīsū ki heʻene kau ākongá ha ngāue faingataʻa kae fakafiefia ʻaupito ke nau fakahoko. Naʻá ne tala ange kiate kinautolu: “Ngaohi ko e kau ākonga ʻa e kakai ʻo e ngaahi puleʻanga kotoa pē, ʻo papitaiso kinautolu ʻi he huafa ʻo e Tamaí mo e ʻAló mo e laumālie māʻoniʻoní, pea akoʻi kinautolu ke nau tauhi ʻa e ngaahi meʻa kotoa pē kuó u fekau atu kiate kimoutolú.”​—Māt. 28:19, 20.

⁷ Ko e fakatahaʻanga Kalisitiane ʻo e Kau Fakamoʻoni ʻa Sihová ko e kautaha ia ʻoku fakafou ai ʻa hono fakahoko ʻo e ngāue ko iá ʻi he ʻaho ní. Ko e moʻoni, ko ha pole ia ke aʻu ki he kakai ʻo e ngaahi lea  kehekehe. Ka neongo ia, kuo faʻu ʻe he Kau Fakamoʻoni ʻa Sihová ʻa e fakamatala makatuʻunga ʻi he Tohi Tapú ʻi he ngaahi lea ʻoku laka hake ʻi he 1,000. Kapau ʻokú ke lolotonga feohi longomoʻui mo e fakatahaʻanga Kalisitiané pea ʻokú ke kau ʻi he ngāue malangaʻi ʻo e Puleʻangá mo e ngaohi-ākongá, ʻoku ʻi ai ʻa e ʻuhinga ke ke fiefia ai. ʻOku lau koe ʻi he lotolotonga ʻo e kiʻi tokosiʻi ʻi he māmaní ʻi he ʻahó ni ʻoku nau maʻu ʻa e monū ʻo e faifakamoʻoni fakaʻāuliliki ki he huafa ʻo Sihová!

8. Ko e hā ʻa e tokoni ʻoku tau maʻu fakafou ʻi he fakatahaʻanga Kalisitiané?

⁸ Ke tokoniʻi koe ke ke kātaki fakataha mo e fiefia lolotonga ʻa e ngaahi taimi fakalilifu ko ení, kuo tokonaki mai ʻe Sihova ko e ʻOtuá ha feohiʻanga fakamāmanilahi ʻo e fanga tokoua. Naʻe tohi ʻa Paula ki he kau Kalisitiane Hepeluú: “Tuku ke tau fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí, ʻo ʻoua ʻe liʻaki ʻa ʻetau fakataha fakatahatahá, ʻo hangē ko ia ʻoku angaʻaki ʻe he niʻihi, kae fefakalototoʻaʻaki, pea toe ʻāsili angé ʻi hoʻomou sio ko ia ki he fakaofiofi mai ʻa e ʻahó.” (Hep. 10:24, 25) Ko e fakatahaʻanga Kalisitiané ko ha tokonaki ia meia Sihova koeʻuhí ke ke lava ai ʻo fakalototoʻaʻi ʻa e niʻihi kehé pea toe fakalototoʻaʻi foki ai mo koe. Nofo ofi ki ho fanga tokoua mo e fanga tuofāfine fakalaumālié. ʻOua ʻaupito naʻa liʻaki ʻa e fakatahataha fakataha ʻi he ngaahi fakataha faka-Kalisitiané!

9, 10. Kuo anga-fēfē hono fakafaingamālieʻi ʻe he niʻihi ʻa kinautolu tonu ke nau aʻu ai ki he faʻahinga ʻoku lea ʻi ha lea kehé?

⁹ Fakaʻuta atu ki he fuʻu fiefia kuo pau pē naʻe mapuna hake ʻi he feohi ko ia naʻe fai ʻa ia naʻe tuifio ai ʻa e kau Siú mo e kau  uluí ʻi he Penitekosi ʻo e 33 T.S. Ko e tokolahi taha ʻo e faʻahinga naʻe ʻi aí ʻoku ngalingali pē naʻe lava ke nau lea ʻi ha lea naʻe anga-maheni ki ai ʻa e tokotaha kotoa, mahalo pē ko e lea faka-Kalisí pe faka-Hepeluú. Ka ʻi he taimi ia ko ení, “naʻe fanongo ʻa e tokotaha taki taha [ki he kau ākongá] ki heʻenau lea mai ʻaki ʻa ʻenau taki taha lea.” (Ngā. 2:6) ʻOku pau pē naʻe maongo ki he kau fanongo ko iá ke fanongo ki he ongoongo leleí ʻi heʻenau lea tuʻufonuá. Ko e moʻoni, ko e kau Kalisitiane ʻi he ʻaho ní ʻoku ʻikai ke nau maʻu ʻa e meʻaʻofa ʻo ha malava fakaemana ke lea ʻi he ngaahi lea mulí. Kae kehe, ko e tokolahi kuo nau fakafaingamālieʻi kinautolu ke nau fakamafola atu ʻa e pōpoaki ʻo e Puleʻangá ki he kakai ʻo e ngaahi kulupu fakafonua kotoa pē. Anga-fēfē? Kuo ako ʻe he niʻihi ha lea foʻou koeʻuhí ke nau lava ai ʻo ngāue ʻi ha fakatahaʻanga lea muli ofi mai, pe naʻa mo haʻanau hiki ki ha fonua muli. Ko e meʻa ʻoku faʻa hokó, ʻoku nau fakatokangaʻi ʻoku maongo lahi ʻa ʻenau ngaahi feinga ko iá ki he faʻahinga ʻoku fanongo kiate kinautolú.

¹⁰ Fakakaukau angé kia Christine, ʻa ia naʻá ne kau ki ha kalasi ako lea faka-Kusalati fakataha mo ha Kau Fakamoʻoni kehe ʻe toko fitu. ʻI he taimi naʻá ne fetaulaki ai mo hano kaungāngāue naʻe lea ʻi he lea faka-Kusalatí, naʻá ne lea fakafeʻiloaki atu ki he kiʻi fefiné ʻi heʻene lea tuʻufonuá. Naʻe maongo ia ki he fefiné peá ne loto ai ke ʻiloʻi pe ko e hā ʻa e ʻuhinga naʻe fai ai ʻe Christine ʻa e feinga ke ako ʻa e lea faingataʻa hangē ko e lea faka-Kusalatí. Naʻe malava ʻe Christine ke ne fai ha fakamoʻoni lelei. Naʻe pehē ange ʻe he kiʻi fefiné kia Christine: “Kuo pau pē ʻoku ʻi ai moʻoni ha meʻa mahuʻinga ke ke leaʻaki.”

11. ʻE lava fēfē ke tau mateuteu ke malangaʻi ʻa e pōpoaki ʻo e Puleʻangá ki he kakai ʻo e ngaahi kulupu lea kehé?

¹¹ Ko e moʻoni, ʻoku ʻikai te tau lava kotoa ke ako ha lea kehe. Neongo ia, ʻe lava ke tau mateuteu ke malangaʻi ʻa e pōpoaki ʻo e Puleʻangá ki he kakai ʻo e ngaahi  kulupu lea kehé. Anga-fēfē? Ko e founga ʻe taha ko hono ngāueʻaki ʻa e JW Language^® app ke ako ha lea fakafeʻiloaki faingofua ʻi ha lea ʻoku anga-maheni hono ngāueʻaki ʻi ho feituʻú. ʻE lava foki ke ke ako mo ha ngaahi kupuʻi lea ʻe niʻihi ʻi he lea ko iá ʻa ia te ne langaʻi nai ʻa e mahuʻingaʻia ʻa e faʻahinga ʻoku nau leaʻaki iá. Tataki kinautolu ki he jw.org, pea mahalo te ke fakahaaʻi kiate kinautolu ʻa e ngaahi vitiō mo e ʻū tohi kehekehe ʻoku ala maʻu ʻi heʻenau leá. ʻI hono ngāueʻaki ʻa e ngaahi meʻangāue ko iá ʻi heʻetau ngāue fakafaifekaú, te tau maʻu nai ai ʻa e fiefia tatau mo ia naʻe maʻu ʻe hotau fanga tokoua ʻi he ʻuluaki senitulí ʻi he taimi naʻe ofoofo ai ʻa e kakai mei he ngaahi fonua mulí ke fanongo ki he ongoongo leleí ʻi heʻenau “taki taha lea.”

12. (a) Naʻe anga-fēfē ʻa e lave ʻa e palōfita ko Sioelí ki he meʻa fakaemana naʻe hoko ʻi he Penitekosi ʻo e 33 T.S.? (e) Ko e hā naʻe fai ai ha ʻamanaki ki hono fakahoko ʻi he ʻuluaki senitulí ʻa e kikite ʻa Sioelí?

¹² “Naʻe tuʻu hake ʻa Pita” ke lea ki he fuʻu kakaí ʻa ia naʻa nau omi mei he ngaahi fonua kehekehé. (Ngā. 2:14) Naʻá ne fakamatalaʻi ki he tokotaha kotoa naʻe fanongó ko e malava fakaemana ko ia ke lea ʻi he ngaahi lea kehekehé naʻe foaki mai ia ʻe he ʻOtuá ʻi hono fakahoko ʻa e kikite naʻe leaʻaki ʻe Sioelí: “Te u lilingi hoku Laumalie ki he kakano kotoa.” (Sioeli 2:28) Ki muʻa ʻi he ʻalu hake ʻa Sīsū ki hēvaní, naʻá ne tala ange ki heʻene kau ākongá: “Te u kole ki he Tamaí pea te ne foaki atu kiate kimoutolu ha toe tokoni ʻe taha,” ʻa ia naʻe fakahaaʻi ʻe Sīsū “ko e laumālie.”​—Sione 14:16, 17.

13, 14. Naʻe anga-fēfē ʻa e feinga ʻa Pita ke aʻu ki he loto ʻo e faʻahinga naʻe fanongo kiate iá, pea ʻe lava fēfē ke tau faʻifaʻitaki ki heʻene foungá?

¹³ Ko e fakaʻosiʻosi ʻo e ngaahi lea ʻa Pita ki he fuʻu kakaí naʻe mālohi: “Tuku ke ʻilo fakapapau ʻe he fale kotoa ʻo ʻIsilelí naʻe fakatou ʻai ia ʻe he ʻOtuá ko e ʻEiki mo e  Kalaisi, ʻa e Sīsū ko eni ʻa ia naʻa mou tautau ʻi he ʻakaú.” (Ngā. 2:36) Ko e moʻoni, ko e tokolahi taha ʻo e kau fanongo kia Pitá naʻe ʻikai te nau ʻi ai tonu fakafoʻituitui ʻi he taimi naʻe tāmateʻi ai ʻa Sīsū ʻi he ʻakau fakamamahí. Ka ʻi honau tuʻunga ko ha puleʻangá naʻa nau kaunga fakalūkufua ai ki he foʻi ngāue ko ení. Kae fakatokangaʻi naʻe lea ʻa Pita ki hono kaungā-Siú ʻi he anga-fakaʻapaʻapa pea naʻe maongo ki honau lotó. Ko e taumuʻa ʻa Pitá ke ueʻi ʻa e faʻahinga naʻe fanongo kiate iá ke nau fakatomala, ʻo ʻikai ko hono fakahalaiaʻi kinautolu. Naʻe ʻita ʻa e fuʻu kakai naʻe fanongó ʻi he ngaahi lea ʻa Pitá? ʻIkai ʻaupito. ʻI hono kehé, ‘naʻe mahuhuhuhu e loto’ ʻo e kakaí. Naʻa nau ʻeke: “Ko e hā te mau faí?” Ko e lea anga-fakaʻapaʻapa ʻa Pitá ʻoku ngalingali naʻá ne fakahoko ha ngafa ʻi heʻene aʻu ki he loto ʻo e tokolahi, ʻo ueʻi ai kinautolu ke nau fakatomalá.​—Ngā. 2:37.

¹⁴ ʻE lava ke tau faʻifaʻitaki ki he founga ʻa Pitá ʻi hono ʻai ko ia ke hoko ʻo maongo ki he lotó. ʻI he faifakamoʻoni ki he niʻihi kehé, ʻoku ʻikai fiemaʻu ia ke tau fakakikihiʻi ʻa e foʻi fakakaukau taʻefakatohitapu kotoa pē ʻe fakahaaʻi nai ʻe he tokotaha-ʻapí. ʻI hono kehé, ʻe lelei ke fakatuʻunga ʻetau fetalanoaʻakí ʻi he ngaahi meʻa ʻa ia ʻe lava ke tau loto-tatau aí. Kapau te tau fokotuʻu ha makatuʻunga te tau loto-tatau ai mo e tokotaha ʻoku fanongo mai kia kitautolú, ʻe lava leva ai ke tau fakaʻuhinga anga-fakapotopoto mei he Folofola ʻa e ʻOtuá. ʻI he taimi ʻoku faʻa fakahoko atu ai ʻa e ngaahi moʻoni ʻo e Tohi Tapú ʻi ha founga lelei peheé, ko e faʻahinga loto-totonú ʻoku mātuʻaki ngalingali ange ai te nau fai mai ha tali lelei.

15. (a) Ko e hā ʻa e lea naʻe fai ʻe Pitá, pea ko e hā ʻa e tali naʻe fai ki aí? (e) Ko e hā naʻe lava ai ki he laui afe naʻe fanongo ki he ongoongo leleí ʻi he Penitekosí ke nau taau ke papitaiso ʻi he ʻaho tatau pē ko iá?

¹⁵ ʻI he ʻaho fakatoʻoaloto ʻo e Penitekosi ʻo e 33 T.S., naʻe pehē ʻe Pita ki he kau Siu mo e kau ului naʻe fie fanongó: “Fakatomala, pea tuku ki he tokotaha taki taha ʻo kimoutolu ke papitaiso.” (Ngā. 2:38) Ko hono olá, naʻe papitaiso ʻa e  toko 3,000 nai, ngalingali ʻi ha ngaahi vai ʻi Selusalema pe ofi ki ai. d Ko ha foʻi tōʻonga eni naʻe fai ʻi he loto-ʻoho? ʻOku hoko nai ʻa e fakamatala ko ení ko ha sīpinga ia ki he kau ako Tohi Tapú pea ki he fānau ʻa e ngaahi mātuʻa Kalisitiané ke nau fakavave ai ki he papitaisó ki muʻa ia ke nau mateuteu ki aí? Mole ke mamaʻo. Manatuʻi, ko e kau Siu mo e kau ului Siu ko ia naʻe papitaiso ʻi he ʻaho ʻo e Penitekosi ʻo e 33 T.S. ko e kau ako vēkeveke kinautolu ʻo e Folofola ʻa e ʻOtuá, pea ko ha konga kinautolu ʻo ha puleʻanga ʻa ia ne ʻosi fakatapui kia Sihova. ʻIkai ko ia pē, naʻa nau ʻosi fakahāhā ʻe kinautolu ʻenau faivelengá​—ʻi he ngaahi tuʻunga ʻe niʻihi, ʻaki ʻenau fai ʻa e ngaahi fononga mamaʻo ke nau ʻi he kātoanga fakataʻu ko ení. ʻI he hili hono tali ʻa e ngaahi moʻoni mātuʻaki mahuʻinga ʻo fekauʻaki mo e ngafa ʻo Sīsū Kalaisi ʻi hono fakahoko ʻa e taumuʻa ʻa e ʻOtuá, naʻa nau mateuteu leva ke hokohoko atu ʻa e tauhi ki he ʻOtuá​—ka ʻi he taimi ko ení ʻi he tuʻunga ko ha kau muimui ʻosi papitaiso ʻo Kalaisi.

16. Naʻe anga-fēfē hono fakahāhā ʻe he kau Kalisitiane ʻi he ʻuluaki senitulí ha laumālie feilaulauʻi-kitá?

¹⁶ Ko hono moʻoní, ko e tāpuaki ʻa Sihová naʻe ʻi he kulupu ko iá. ʻOku pehē ʻe he fakamatalá: “Ko e faʻahinga kotoa naʻe hoko ʻo tuí naʻa nau fakatahataha ʻo fevahevaheʻaki ʻi he ngaahi meʻa kotoa pē, pea naʻa nau fakatau atu ʻenau ngaahi koloá mo honau ngaahi ʻapí pea nau vahevahe atu ʻa e ngaahi meʻa naʻe maʻu aí ki he tokotaha kotoa, ʻo fakatatau ki he meʻa naʻe fiemaʻu ʻe he tokotaha taki taha.” e (Ngā. 2:44, 45) Ko e moʻoni, ʻoku loto ʻa e kau Kalisitiane moʻoni kotoa pē ke faʻifaʻitaki ki he laumālie anga-ʻofa mo feilaulauʻi-kita ko iá.

17. Ko e hā ʻa e ngaahi sitepu ʻoku fiemaʻu pau ki ha taha ke ne taau ai ki he papitaisó?

¹⁷ Ko e fakatapui mo e papitaiso ʻa e Kalisitiané ʻoku kau ki ai ʻa e ngaahi sitepu Fakatohitapu ʻoku fiemaʻu pau. Kuo pau ki ha tokotaha ke ne maʻu ʻa e ʻilo ki he Folofola ʻa e ʻOtuá. (Sione 17:3) ʻOku fiemaʻu ke ne ngāueʻi ʻa e tuí pea kuo pau ke ne fakatomalaʻi hono ʻalunga ʻi he kuohilí, ʻo fakahāhā ha ongoʻi fakaʻiseʻisa moʻoni ʻi he meʻa ko iá. (Ngā. 3:19) Hili iá kuo pau ke ne liliu, pe tafoki, pea kamata fakahoko ʻa e ngaahi ngāue totonu ʻa ia ʻoku fehoanaki mo e finangalo ʻo e ʻOtuá. (Loma 12:2; ʻEf. 4:23, 24) Ko e ngaahi sitepu ko ení ʻoku hoko atu ai ʻa ʻene fai ha fakatapui ki he ʻOtuá ʻi he lotu pea toki papitaiso leva.​—Māt. 16:24; 1 Pita 3:21.

18. Ko e hā ʻa e monū ʻoku fakaava atu ki he kau ākonga ʻosi papitaiso ʻa Kalaisí?

¹⁸ Ko ha ākonga ʻosi fakatapui mo papitaiso koe ʻa Sīsū Kalaisi? Kapau ko ia, hoko ʻo houngaʻia ʻi he monū ʻa ia kuo fakaaʻu atu kiate koé. ʻI he hangē ko e kau ākonga ʻi he ʻuluaki senitulí ʻa ia ne nau fonu ʻi he laumālie māʻoniʻoní, ʻe lava ke ngāueʻaki koe ʻi ha founga mālohi ke ke faifakamoʻoni fakaʻāuliliki mo fai ʻa e finangalo ʻo Sihová!