Na‘e fanongo ‘a ‘Ivi ki he ngatá ‘o ne kai ‘a e fua‘i‘akaú. ‘I he hili iá, na‘á ne ‘oange ha konga kia ‘Ātama, pea na‘á ne kai ia.

Ko e me‘a na‘á na faí na‘e hala​—ko ha angahala ia. Na‘e ‘ai ‘e he ‘Otuá ke na mavahe mei hona ‘api Palataisí.

Na‘e faingata‘a ‘a e mo‘uí kiate kinaua pea mo ‘ena fānaú. Na‘á na tupu ‘o motu‘a peá na mate. Na‘e ‘ikai te na ‘alu ki he nofo‘anga laumālié; na‘e ngata ‘a ‘ena mo‘uí.

‘Oku tau maté koe‘uhi ‘oku tau ha‘u kotoa meia ‘Ātama mo ‘Ivi. Ko e kau maté ‘oku ‘ikai malava ke nau sio pe fanongo pe fai ha me‘a ‘e taha.​—Tangata Malanga 9:5, 10.

Na‘e ‘ikai ‘uhinga ‘a Sihova ke mate ‘a e kakaí. ‘E vavé ni ke ne fakafoki mai ki he mo‘uí ‘a e fa‘ahinga ‘oku mohe ‘i he maté. Kapau te nau fanongo kiate ia, te nau mo‘ui ta‘engata.