ʻI he malí ʻoku faʻu ai ha fāmili foʻou. Neongo te ke ʻofa mo fakaʻapaʻapa maʻu pē ki hoʻo ongo mātuʻá, ka ʻi he taimí ni ko ho hoá ʻa e tokotaha mahuʻinga taha kiate koe ʻi he māmaní. ʻOku hoko nai eni ʻo faingataʻa ke tali ʻe he niʻihi ʻi ho kāingá. Ka ʻe lava ke tokoniʻi koe ʻe he ngaahi tefitoʻi moʻoni ʻi he Tohi Tapú ke ke hoko ai ʻo mafamafatatau, koeʻuhí ke ke lava ai ʻo tauhi maʻu ʻa e melino mo ho kāingá ʻi he taimi tatau ʻokú ke ngāue mālohi ke langa hake ho vahaʻangatae fakafāmili foʻoú.

MEʻA ʻOKU LEAʻAKI ʻE HE TOHI TAPÚ: “Fakaʻapaʻapaʻiaʻi hoʻo tamaí mo hoʻo faʻeé.” (ʻEfesō 6:2) Tatau ai pē pe ko e hā ho taʻumotuʻá, ʻoku fiemaʻu maʻu pē ke ke fakaʻapaʻapaʻiaʻi mo tokaʻi hoʻo ongo mātuʻá. Hoko ʻo ʻiloʻi foki ko ho hoá ko e foha pe ʻofefine ia, pea ʻoku fiemaʻu ke ne tokanga ki heʻene ongo mātuʻá. “Ko e ʻofá ʻoku ʻikai te ne meheka,” ko ia ʻoua ʻaupito te ke hohaʻa ʻi he vahaʻangatae ʻoku maʻu ʻe ho hoá mo kinautolú.—1 Kolinitō 13:4; Kalētia 5:26.

MEʻA ʻE LAVA KE KE FAÍ:

• Fakaʻehiʻehi mei hono fai ha ngaahi talanoa fakalahi hangē ko ení, “ʻOku tuku hifo maʻu pē au ʻe ho fāmilí” pe “ʻOku ʻikai ʻaupito saiʻia hoʻo faʻē ʻi ha meʻa ʻoku ou fai”

• Feinga ke sio ki he ngaahi meʻá mei he anga ʻo e vakai ki ai ho hoá

MEʻA ʻOKU LEAʻAKI ʻE HE TOHI TAPÚ: “ʻE tukuange ʻe he tangata ʻene tamai mo ʻene faʻe, kae pikitai ki hono uaifi: pea te na hoko ko e kakano pe taha.” (Sēnesi 2:24) ʻI he taimi ʻokú ke mali aí, ʻoku ongoʻi nai ʻe hoʻo ongo mātuʻá ʻokú na kei tokangaʻi koe, pea te na loto nai ke na toe kau lahi ange ʻi hoʻo nofo malí ʻi he meʻa ʻoku totonu ke na ngata aí.

Ko e meʻa pē ʻa koe mo ho hoá ke mo fokotuʻu ha ngaahi fakangatangata te mo loto-tatau ki ai pea fakahaaʻi anga-ʻofa ia kia kinautolu ke nau ʻiloʻi. ʻE lava ke ke lea moʻoni mo hangatonu kae ʻoua ʻe hoko ʻo anga-kovi. (Palōveepi 15:1) Ko e anga-fakatōkilaló, anga-maluú, mo e kātakí te ne tokoniʻi koe ke ke langa hake ha vahaʻangatae māfana mo ho ngaahi kāingá pea hokohoko atu ʻa e “fekātakiʻaki ʻi he ʻofa.”—ʻEfesō 4:2.

MEʻA ʻE LAVA KE KE FAÍ:

• Kapau ʻokú ke hohaʻa ki he lahi ʻo e kau mai ʻa e ngaahi kāingá ʻi hoʻo moʻui fakafāmilí, lāulea ki ai mo ho hoá ʻi he taimi ʻoku tokamālie ai ʻa e meʻa kotoa

• Hoko ʻo felotoi ʻi he founga te mo fakaleleiʻi ai ʻa e ngaahi meʻa ko iá