LĒSONI 01
ʻE Lava Fēfē ke Tokoniʻi Koe ʻe he Tohi Tapú?
ʻOku meimei ko kitautolu kotoa ʻoku ʻi ai ʻetau ngaahi fehuʻi fekauʻaki mo e moʻuí, faingataʻaʻiá, maté pea mo e kahaʻú. ʻOku tau toe hohaʻa foki fekauʻaki mo e ngaahi meʻa fakaʻahó, hangē ko e ngāue ke maʻu ha paʻanga feʻunga ke tokonaki maʻá e fāmilí pe ko hono maʻu ha fāmili fiefia. ʻOku ʻiloʻi ʻe he kakai tokolahi ʻoku ʻikai ngata pē ʻi hono tokoniʻi kinautolu ʻe he Tohi Tapú ke maʻu ʻa e tali ki he ngaahi fehuʻi lalahi ʻi he moʻuí ka ʻokú ne toe ʻoange kiate kinautolu ʻa e ngaahi faleʻi ʻaonga ki he moʻui fakaʻahó. ʻOkú ke fakakaukau ʻe lava ke tokoniʻi ʻe he Tohi Tapú ha taha ʻokú ke ʻiloʻi?
1. Ko e hā ʻa e ngaahi fehuʻi ʻe niʻihi ʻoku tali ʻe he Tohi Tapú?
ʻOku tali ʻe he Tohi Tapú ʻa e ngaahi fehuʻi mahuʻinga ko ení: Naʻe anga-fēfē kamata ʻa e moʻuí? Ko e hā ʻoku tau ʻi heni aí? Ko e hā ʻoku faingataʻaʻia ai ʻa e kakai faileleí? Ko e hā ʻoku hoko ʻi he taimi ʻoku mate ai ha taha? Kapau ʻoku loto ʻa e tokotaha kotoa ke maʻu ʻa e melinó, ko e hā ʻoku lahi fau ai ʻa e taú? Ko e hā ʻe hoko ki he foʻi māmaní ʻi he kahaʻú? ʻOku fakalototoʻaʻi kitautolu ʻe he Tohi Tapú ke kumi ʻa e tali ki he ngaahi fehuʻi ko ení, pea kuo mātuʻaki fiemālie ʻa e laui miliona ʻi he ngaahi tali ʻoku maʻu aí.
2. ʻE lava fēfē ke tokoniʻi kitautolu ʻe he Tohi Tapú ke fiefia ʻi heʻetau moʻui fakaʻahó?
ʻOku ʻomai ʻe he Tohi Tapú kiate kitautolu ʻa e faleʻi lelei. Ko e fakatātaá, ʻokú ne akoʻi ʻa e ngaahi fāmilí ki he founga ke maʻu ai ʻa e fiefia moʻoní. ʻOku ʻomai ai ʻa e faleʻi ki he founga ke fekuki ai mo e loto-mafasiá pea mo e founga ke fiefia ai ʻi heʻetau ngāué. Te ke ako ki he meʻa ʻoku akoʻi ʻe he Tohi Tapú fekauʻaki mo e ngaahi kaveinga ko ení pea mo e meʻa lahi ange ʻi heʻetau lāulea fakataha ki he fakamatala ko ení. Te ke hoko nai ai ʻo loto-tatau “ko e potu Folofola kotoa pē [meʻa kotoa ʻi he Tohi Tapú] . . . ʻoku ʻaonga.”—2 Tīmote 3:16.
ʻOku ʻikai fetongi ʻe he tohi ko ení ʻa e Tohi Tapú. ʻI hono kehé, ʻoku fakalototoʻaʻi ai koe ke ke sivisiviʻi tonu ʻa e Tohi Tapú. Ko ia ai, ʻoku mau fakalototoʻaʻi koe ke lau ʻa e ngaahi konga Tohi Tapu ʻoku hā ʻi he ngaahi lēsoni ko ení pea fakahoa ia mo e meʻa ʻokú ke akó.
KELI LOLOTO ANGE
Lāulea ki he founga kuo tokoniʻi ai ʻe he Tohi Tapú ʻa e kakaí, founga ʻe lava ke ke fiefia ai hono lau iá mo e ʻuhinga ʻoku lelei ai ke ke maʻu ha tokoni ke mahinoʻi ai iá.
3. ʻOku lava ʻe he Tohi Tapú ʻo tataki kitautolu
Ko e Tohi Tapú ʻoku hangē ia ha kasa ʻoku ulo kakaha. ʻOku lava ke tau ngāueʻaki ʻa e Tohi Tapú ke ne fakahaaʻi mai ʻa e founga ke tau fai ai ʻa e ngaahi fili leleí pea ke tokoniʻi kitautolu ke ʻiloʻi ʻa e ngaahi meʻa ʻoku toka mei muʻá.
Lau ʻa e Saame 119:105, pea lāulea leva ki he ongo fehuʻi ko ení:
-
Naʻe anga-fēfē vakai ʻa e tokotaha-tohi-saame ko ení ki he Tohi Tapú?
-
ʻOku anga-fēfē hoʻo vakai ki he Tohi Tapú?
4. ʻOku lava ʻe he Tohi Tapú ʻo tali ʻetau ngaahi fehuʻí
Naʻe ʻilo ʻe ha fefine ʻoku maʻu ʻi he Tohi Tapú ʻa e tali ki he ngaahi fehuʻi naʻá ne hohaʻa ki ai ʻi ha laui taʻu. Huluʻi ʻa e VITIOÓ, pea lāulea leva ki he ongo fehuʻi ko ení.
-
ʻI he vitioó, ko e hā naʻe fehuʻia ʻe he fefiné?
-
Naʻe anga-fēfē tokoni kiate ia ʻa hono ako ʻa e Tohi Tapú?
ʻOku fakalototoʻaʻi kitautolu ʻe he Tohi Tapú ke tau ʻeke fehuʻi. Lau ʻa e Mātiu 7:7, pea lāulea leva ki he fehuʻi ko ení:
-
Ko e hā ha ngaahi fehuʻi ʻokú ke maʻu ʻe lava nai ke tali ʻe he Tohi Tapú?
5. ʻE lava ke ke fiefia ʻi hono lau ʻa e Tohi Tapú
Ko e kakai tokolahi ʻoku nau fiefia ʻi hono lau ʻa e Tohi Tapú pea ʻoku nau maʻu ʻaonga mei ai. Huluʻi ʻa e VITIOÓ, pea lāulea leva ki he ongo fehuʻi ko ení.
-
ʻI he vitioó, naʻe anga-fēfē ongoʻi ʻa e toʻutupú fekauʻaki mo e lautohí?
-
Ko e hā ʻoku kehe ai ʻenau ongoʻi he taimí ni ki hono lau ʻa e Tohi Tapú?
ʻOku pehē ʻe he Tohi Tapú ʻoku lava ke ne ʻomai kiate kitautolu ʻa e fakahinohino ke maʻu ai ʻa e fakafiemālié mo e ʻamanakí. Lau ʻa e Loma 15:4, pea lāulea leva ki he fehuʻi ko ení:
-
ʻOkú ke saiʻia ʻi he talaʻofa ʻa e Tohi Tapú fekauʻaki mo e fakafiemālié mo e ʻamanakí?
6. ʻOku lava ke tokoniʻi kitautolu ʻe he niʻihi kehé ke mahinoʻi ʻa e Tohi Tapú
Tānaki atu ki heʻenau lau pē ʻe kinautolu ʻenau Tohi Tapú, kuo ʻiloʻi ʻe he tokolahi ko e lāulea ki ai mo e niʻihi kehé ʻoku ʻaonga. Lau ʻa e Ngāue 8:26-31, pea lāulea leva ki he fehuʻi ko ení:
-
ʻE lava fēfē ke tau mahinoʻi ʻa e Tohi Tapú?—Sio ki he veesi 30 mo e 31.
Naʻe fiemaʻu ʻe he tangata ʻItiopeá ha tokoni ke mahinoʻi ʻa e Folofolá. Ko e kakai tokolahi ʻi he ʻahó ni ʻoku nau ʻiloʻi ʻoku ʻaonga ʻa e lāulea ki he Tohi Tapú mo e niʻihi kehé
ʻOKU PEHĒ ʻE HE NIʻIHI: “Ko hono ako ʻa e Tohi Tapú ʻoku fakamole taimi.”
-
Ko e hā haʻo lau? Ko e hā hono ʻuhingá?
FAKANOUNOU
ʻOku ʻomai ʻe he Tohi Tapú ʻa e faleʻi ki he moʻui fakaʻahó, tali ʻa e ngaahi fehuʻi mahuʻinga pea ʻomai ʻa e fakafiemālie mo e ʻamanaki ki he kakaí.
Fakamanatu
-
Ko e hā ʻa e faʻahinga faleʻi ʻe lava ke tau maʻu ʻi he Tohi Tapú?
-
Ko e hā ʻa e ngaahi fehuʻi ʻe niʻihi ʻoku tali ʻe he Tohi Tapú?
-
Ko e hā ʻokú ke saiʻia ke ako mei he Tohi Tapú?
AKO LAHI ANGE
Vakai ki he founga ʻoku ʻaonga ai ʻa e faleʻi ʻa e Tohi Tapú ʻi he ʻaho ní.
“Ngaahi Akonaki ʻa e Tohi Tapú—Poto Tuʻuloa” (Ko e Taua Leʻo Fika 1 2018)
Sio ki he founga naʻe tokoniʻi ai ʻe he Tohi Tapú ha tangata ʻa ia naʻá ne fāinga mo ʻene ngaahi ongoʻí talu mei heʻene kei siʻí.
Sivisiviʻi ʻa e ngaahi faleʻi ʻaonga ʻa e Tohi Tapú ki he moʻui fakafāmilí.
“Fakapulipuli ʻe 12 ʻo e Fāmili Lavameʻá” (ʻĀ Hake! Fika 2 2018)
Sio ki he founga hono fakamāʻalaʻala ʻe he Tohi Tapú ha maʻuhala anga-maheni fekauʻaki mo e tokotaha ʻokú ne puleʻi moʻoni ʻa e māmaní.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
