LĒSONI 15
Ko Hai ʻa Sīsū?
Ko Sīsuú ko e taha ia ʻi he kakai ʻiloa taha ʻi he hisitōliá. ʻOku ʻiloʻi ʻe he tokolahi ʻa e hingoa ʻo Sīsuú, ka ʻoku ʻikai ke nau fuʻu ʻilo lahi fekauʻaki mo ia, pea ko e tokolahi ʻoku nau maʻu ʻa e ngaahi fakakaukau kehekehe fekauʻaki pe ko hai moʻoni ʻa Sīsū. Ko e hā ʻoku leaʻaki ʻe he Tohi Tapú fekauʻaki mo iá?
1. Ko hai ʻa Sīsū?
Ko Sīsuú ko ha ʻāngelo mālohi ia ʻoku nofo ʻi hēvani. Naʻe fakatupu ia ʻe Sihova ko e ʻOtuá ki muʻa ʻi he meʻa kotoa pē. ʻI he ʻuhinga ko iá, ʻoku ui ai ia “ko e ʻuluaki fakatupu ia ʻi he meʻa fakatupu kotoa pē.” (Kolose 1:15) ʻOku lave ʻa e Tohi Tapú fekauʻaki mo Sīsū ko e “ʻAlo tofu-pē-taha-ne-fakatupú” ʻe he ʻOtuá koeʻuhi ko Sīsū pē naʻe fakatupu fakahangatonu ʻe Sihová. (Sione 3:16) Naʻe ngāue fakataha ʻa Sīsū mo ʻene Tamaí, ʻa Sihova, ʻo tokoni kiate Ia ke fakatupu ʻa e ngaahi meʻa kehe kotoa pē. (Lau ʻa e Palōveepi 8:30.) ʻOku hokohoko atu ʻa Sīsū ke fiefia ʻi hono vahaʻangatae vāofi mo Sihová. ʻOkú ne ngāue mateaki ko e tangata-lea ʻa e ʻOtuá ko e “Folofolá” ʻo ʻoatu ʻEne ngaahi pōpoakí mo e fakahinohinó.—Sione 1:14.
2. Ko e hā naʻe haʻu ai ʻa Sīsū ki māmaní?
ʻI he taʻu nai ʻe 2,000 kuo maliu atú naʻe fakahoko ai ʻe Sihova ha mana. Naʻá ne ngāueʻaki ʻa hono laumālie māʻoniʻoní ke hiki hifo ʻa Sīsū ki he manava ʻo e tāupoʻou ko Melé. ʻI he foungá ni, naʻe fanauʻi mai ai ʻa Sīsū ko ha tangata. (Lau ʻa e Luke 1:34, 35.) Naʻe haʻu ʻa Sīsū ki māmani ke hoko ko e Mīsaia naʻe talaʻofá, pe Kalaisí, pea ke fakahaofi ʻa e faʻahinga ʻo e tangatá. a Ko hono kotoa ʻo e ngaahi meʻa naʻe tomuʻa tala ʻe Sihova ʻi he Tohi Tapú ʻo fekauʻaki mo e Mīsaiá naʻe fakahoko moʻoni ia ʻia Sīsū. Naʻe tokoniʻi heni ʻa e kakaí ke nau ʻiloʻi ko Sīsū “ʻa e Kalaisí, ko e ʻAlo ʻo e ʻOtua moʻuí.”—Mātiu 16:16.
3. ʻOku ʻi fē ʻa Sīsū he taimí ni?
ʻI he hili ʻa e pekia ʻa Sīsuú, naʻe fokotuʻu hake ia ʻe he ʻOtuá ko ha ʻāngelo peá ne foki ki hēvani. ʻI hēvani, “naʻe hakeakiʻi ai ia ʻe he ʻOtuá ki ha tuʻunga māʻolunga.” (Filipai 2:9) ʻI he taimi ní ʻoku maʻu ʻe Sīsū ha mafai lahi, ʻo fika ua hake pē kia Sihova tonu.
KELI LOLOTO ANGE
Ako lahi ange fekauʻaki pe ko hai moʻoni ʻa Sīsū pea mo e ʻuhinga ʻoku mahuʻinga ai ʻa e ako ʻo fekauʻaki mo iá.
4. Ko Sīsuú ʻoku ʻikai ko e ʻOtua Māfimafi-Aoniú ia
ʻOku akoʻi ʻe he Tohi Tapú neongo ko Sīsū ko ha ʻāngelo mālohi ʻi hēvani, ʻokú ne talangofua ki hono ʻOtuá mo e Tamaí, ʻa Sihova. Ko e hā ʻoku tau lea pehē ai? Huluʻi ʻa e VITIOÓ ke sio ki he meʻa ʻoku akoʻi mai ʻe he Tohi Tapú fekauʻaki mo e faikehekehe ʻo Sīsū mei he ʻOtua māfimafi-aoniú.
Ko e ngaahi konga Tohi Tapu hokó te ne tokoniʻi kitautolu ke tau mahinoʻi ʻa e faikehekehe ʻo Sihova mo Sīsuú. Lau ʻa e konga Tohi Tapu taki taha pea lāulea leva ki he ngaahi fehuʻi hokó.
Lau ʻa e Luke 1:30-32.
-
Naʻe anga-fēfē hono fakamatalaʻi ʻe he ʻāngeló ʻa e faikehekehe ʻi he vahaʻa ʻo Sīsū mo Sihova ko e ʻOtuá “ʻa e Fungani Māʻolunga”?
Lau ʻa e Mātiu 3:16, 17.
-
ʻI he papitaiso ʻo Sīsuú, ko e hā naʻe leaʻaki ʻe he leʻo mei hēvaní?
-
ʻOkú ke fakakaukau ko e leʻo ia ʻo hai?
Lau ʻa e Sione 14:28.
-
Ko hai ʻoku taʻumotuʻa angé mo maʻu ʻa e mafai lahi angé, ko e tamaí pe fohá?
-
Naʻe ui ʻe Sīsū ʻa Sihova ko ʻene Tamai. Ko e hā ʻoku akoʻi mai heni kiate kitautolú?
Lau ʻa e Sione 12:49.
-
ʻOku fakakaukau ʻa Sīsū ʻokú ne tatau tofu pē mo ʻene Tamaí? Ko e hā haʻo fakakaukau?
5. Fakamoʻoniʻi ʻe Sīsū ko ia ʻa e Mīsaiá
ʻOku lahi ʻa e ngaahi kikite ʻi he Tohi Tapú naʻá ne tokoniʻi ʻa e kakaí ke nau ʻiloʻi ʻa e Mīsaiá, ʻa e tokotaha fili ʻa e ʻOtuá ʻa ia te ne fakahaofi ʻa e faʻahinga ʻo e tangatá. Huluʻi ʻa e VITIOÓ ke ako ki he niʻihi ʻo e ngaahi kikite naʻe fakahoko ʻe Sīsū ʻi heʻene ʻi māmaní.
Lau ʻa e ngaahi kikite ko eni ʻa e Tohi Tapú, pea lāulea leva ki he ngaahi fehuʻi hokó:
Lau ʻa e Maika 5:2 ke ʻilo pe naʻe fanauʻi ʻa e Mīsaiá ʻi fē. b
-
Naʻe fakahoko ʻa e kikite ko ení ʻi hono fanauʻi ʻa Sīsuú?—Mātiu 2:1.
Lau ʻa e Saame 34:20 mo e Sākalaia 12:10 ke sio ki he meʻa naʻe tomuʻa tala ʻe he Tohi Tapú fekauʻaki mo e pekia ʻa e Mīsaiá.
-
Naʻe hoko ʻa e ongo kikite ko ení?—Sione 19:33-37.
-
ʻOkú ke fakakaukau naʻe lava ʻe Sīsū ke tākiekina hono fakahoko ha taha ʻo e kikite ko ení?
-
Ko e hā ʻoku fakamoʻoniʻi atu heni kiate koe fekauʻaki mo Sīsuú?
6. ʻOku tau maʻu ʻaonga mei he ako fekauʻaki mo Sīsuú
ʻOku pehē ʻe he Tohi Tapú ʻoku mātuʻaki mahuʻinga ke ako fekauʻaki mo Sīsū mo e meʻa ʻoku fiemaʻu ʻe he ʻOtuá ke ne faí. Lau ʻa e Sione 14:6 mo e 17:3, pea lāulea leva ki he fehuʻi ko ení:
-
Ko e hā ʻoku mātuʻaki mahuʻinga ai ke ako fekauʻaki mo Sīsuú?
Naʻe fakaava ʻe Sīsū ʻa e hala ke hoko ai ʻo kaumeʻa mo e ʻOtuá. Naʻá ne akoʻi ʻa e moʻoni fekauʻaki mo Sihová, pea fakafou ʻiate ia ʻoku lava ai ke tau maʻu ʻa e moʻui taʻengatá
ʻOKU PEHĒ ʻE HE NIʻIHI: “ʻOku ʻikai ke tui ʻa e Kau Fakamoʻoni ʻa Sihová kia Sīsū.”
-
ʻE fēfē haʻo tali?
FAKANOUNOU
Ko Sīsuú ko ha ʻāngelo mālohi. Ko e ʻAlo ia ʻo e ʻOtuá pea mo e Mīsaiá.
Fakamanatu
-
Ko e hā ʻoku ui ai ʻa Sīsū “ko e ʻuluaki fakatupu ia ʻi he meʻa fakatupu kotoa pē”?
-
Ko e hā naʻe fai ʻe Sīsū ki muʻa ke ne haʻu ki māmaní?
-
ʻOku anga-fēfē ʻetau ʻilo ko Sīsuú ko e Mīsaiá?
AKO LAHI ANGE
Ako lahi ange ki he ʻuhinga ʻoku tau ʻiloʻi ai ko Sīsū ʻa e Mīsaiá.
“ʻOku Fakamoʻoniʻi ʻe he Ngaahi Kikite Faka-Mīsaiá ko Sīsū ʻa e Mīsaiá?” (Kupu ʻi he uepisaití)
Kumi ʻi he Tohi Tapú pe ko e hā ʻa e vahaʻangatae ʻo e ʻOtuá mo Sīsuú.
“Ko e Hā ʻOku Ui Ai ʻa Sīsū ko e ʻAlo ʻo e ʻOtuá?” (Kupu ʻi he uepisaití)
Vakaiʻi ʻa e ʻuhinga ko e Tolu-Tahaʻi-ʻOtuá ʻoku ʻikai ko ha akonaki ʻa e Tohi Tapú.
Lau ʻa e anga e liliu ʻa e moʻui ʻo ha fefine hili ʻene sivisiviʻi ʻa e meʻa ʻoku leaʻaki ʻe he Tohi Tapú fekauʻaki mo Sīsuú.
a ʻI he Lēsoni 26 mo e 27 ʻe lāulea ai ki he ʻuhinga ʻoku fiemaʻu ke fakahaofi ai ʻa e faʻahinga ʻo e tangatá mo e founga ʻoku fakahaofi ai kitautolu ʻe Sīsuú.
b Sio ki he Fakamatala ʻi he Ngataʻangá 2 ki ha kikite naʻe tomuʻa tala ai ʻa e taimi tofu pē ʻe hā ai ʻa e Mīsaiá ʻi he māmaní.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
