LĒSONI 16
Ko e Hā Naʻe Fai ʻe Sīsū ʻi Heʻene ʻi Māmaní?
ʻOku fakakaukau ʻa e kakai tokolahi ko Sīsuú ko ha kiʻi pēpē ʻi he ʻaiʻanga kai ʻo e manú, ko ha palōfita poto, pe ko ha tangata tei mate. Ka ʻe lava ke tau ako lahi ange fekauʻaki mo ia mei he ako ki heʻene moʻui ʻi māmaní? ʻE lāulea ʻa e lēsoni ko ení ki he niʻihi ʻo e ngaahi meʻa mahuʻinga taha naʻe fai ʻe Sīsuú pea mo e founga te nau tokoniʻi ai koé.
1. Ko e hā ʻa e ngāue mahuʻinga taha ʻa Sīsuú?
Ko e ngāue tefito naʻe fai ʻe Sīsuú ko hono “talaki ʻa e ongoongo lelei ʻo e Puleʻanga ʻo e ʻOtuá.” (Lau ʻa e Luke 4:43.) Naʻá ne malangaʻi ʻa e ongoongo lelei ʻe fokotuʻu ʻe he ʻOtuá ha puleʻanga, pe founga-pule, ʻa ia te ne solova ʻa e palopalema kotoa ʻa e faʻahinga ʻo e tangatá. a ʻI he taʻu ʻe tolu mo e konga, ko Sīsuú naʻá ne ngāue mālohi ʻaupito ke tala ki he kakaí ʻa e pōpoaki fakalototoʻa ko ení.—Mātiu 9:35.
2. Ko e hā ʻa e ʻuhinga naʻe fakahoko ai ʻe Sīsū ʻa e ngaahi maná?
ʻOku fakamatalaʻi ʻe he Tohi Tapú ʻa e “ngaahi ngāue māfimafiʻia mo e ngaahi meʻa fakaofo pea mo e ngaahi mana naʻe fakahoko ʻe he ʻOtuá fakafou” ʻia Sīsū. (Ngāue 2:22) ʻI he mālohi ʻo e ʻOtuá naʻe malava ʻe Sīsū ke mapuleʻi ha fuʻu matangi, fafanga ʻa e laui afe, fakamoʻui ʻa e puké, pea aʻu ʻo fokotuʻu hake mo e maté. (Mātiu 8:23-27; 14:15-21; Maʻake 6:56; Luke 7:11-17) Ko e mana ʻa Sīsuú naʻe māʻalaʻala ai ko e ʻOtuá naʻá ne fekauʻi mai iá. Naʻe toe fakahaaʻi ai ʻoku maʻu ʻe Sihova ʻa e mālohi ke solova ʻa e kotoa hotau ngaahi palopalemá.
3. Ko e hā ʻe lava ke tau ako mei he founga moʻui ʻa Sīsuú?
Naʻe talangofua maʻu pē ʻa Sīsū kia Sihova. (Lau ʻa e Sione 8:29.) Naʻe fai ʻe Sīsū ʻa e meʻa kotoa naʻe kole ange ʻe heʻene Tamaí. Naʻá ne fai eni ʻi he kotoa ʻene moʻui ʻi he māmaní, neongo naʻe feinga ʻa e tokolahi ke taʻofi ia. Naʻá ne fakamoʻoniʻi ʻoku malava ʻa e faʻahinga ʻo e tangatá ke tauhi ki he ʻOtuá, naʻa mo e ʻi he ngaahi tuʻunga faingataʻá. Naʻe tuku mai ʻe Sīsū “ha faʻifaʻitakiʻanga kiate” kitautolu ke tau “muimui ofi ʻi hono topuvaʻé.”—1 Pita 2:21.
KELI LOLOTO ANGE
Fakakaukau ki he meʻa naʻe fai ʻe Sīsū ke vahevahe atu ʻa e ongoongo leleí mo hono fakahoko ʻa e ngaahi maná.
4. Naʻe vahevahe atu ʻe Sīsū ha ongoongo lelei
Naʻe lue ʻa Sīsū ʻi he maile ʻe lauingeau ʻi ha ngaahi hala efua, ʻi hono vahevahe ʻa e ongoongo leleí ki he kakai tokolahi taha naʻe ala lavá. Lau ʻa e Luke 8:1, pea lāulea leva ki he ongo fehuʻi ko ení:
-
Naʻe malanga pē ʻa Sīsū ki he kakai naʻe haʻu ke fanongo kiate iá?
-
Naʻe lahi fēfē ʻa e feinga ʻa Sīsū ke maʻu ʻa e kakaí?
Naʻe tomuʻa tala ʻe he ʻOtuá ko e Mīsaiá te ne vahevahe ʻa e ongoongo leleí. Lau ʻa e ʻAisea 61:1, 2, pea lāulea leva ki he ongo fehuʻi ko ení:
-
Naʻe anga-fēfē hono fakahoko ʻe Sīsū ʻa e kikite ko ení?
-
ʻOkú ke fakakaukau ʻoku fiemaʻu ki he kakai ʻi he ʻaho ní ke fanongo ki he ongoongo leleí?
5. Naʻe akoʻi ʻe Sīsū ʻa e ngaahi lēsoni mahuʻinga
Tānaki atu ki hono malangaʻi ʻa e ongoongo lelei fekauʻaki mo e Puleʻanga ʻo e ʻOtuá, naʻe akoʻi ʻe Sīsū ʻa e ngaahi lēsoni ʻaonga. Fakakaukau ki ha ngaahi fakatātā ʻe niʻihi mei heʻene Malanga ʻiloa ʻi he Moʻungá. Lau ʻa e Mātiu 6:14, 34, mo e 7:12, pea lāulea leva ki he ongo fehuʻi ko ení:
-
Ko e hā ʻa e faleʻi ʻaonga naʻe ʻoange ʻe Sīsū ʻi he ngaahi veesi ko ení?
-
ʻOkú ke fakakaukau ʻoku kei ʻaonga ʻa e faleʻi ko ení ki he kakai he ʻaho ní?
6. Naʻe fakahoko ʻe Sīsū ʻa e ngaahi mana
Naʻe ʻoange ʻe Sihova ʻa e mālohi kia Sīsū ke ne fakahoko ʻa e ngaahi mana lahi. Lau ʻa e Maʻake 5:25-34 pe huluʻi ʻa e VITIOÓ ke sio ki ha fakatātā. Lāulea leva ki he ongo fehuʻi hokó.
-
Ko e hā naʻe tui ki ai ʻa e fefine puké?
-
Ko e hā ʻoku maongo kiate koe fekauʻaki mo e mana ko ení?
Lau ʻa e Sione 5:36, pea lāulea leva ki he fehuʻi ko ení:
-
Ko e hā naʻe fakamoʻoniʻi ʻe he ngaahi mana ʻa Sīsuú fekauʻaki mo iá?
Naʻá ke ʻiloʻi?
Ko e lahi taha ʻo e fakamatala fekauʻaki mo Sīsuú ʻoku lēkooti ia ʻi he ngaahi tohi ʻe fā ʻi he Tohi Tapú, ʻa ia ʻoku ui ko e ngaahi Kōsipelí—Mātiu, Maʻake, Luke mo Sione. Ko e tokotaha hiki Kōsipeli taki taha naʻe kehe ʻene fakamatalaʻi ʻa Sīsuú. ʻI hono fakatahaʻi ení ʻokú ne ʻomai ʻa e foʻi ʻata fakatoʻoaloto ʻo e moʻui ʻa Sīsuú.
-
MĀTIU
Naʻe ʻuluaki hiki ʻe Mātiu ʻene Kōsipelí. ʻOku tala mai ai ʻa e ngaahi meʻa naʻe akoʻi ʻe Sīsuú, kae tautefito ki he meʻa naʻá ne akoʻi fekauʻaki mo e Puleʻanga ʻo e ʻOtuá.
-
MAʻAKE
Naʻe tohi ʻe Maʻake ʻa e Kōsipeli nounou tahá. ʻOku fonu ia ʻi he ngaahi talanoa fakaueʻiloto.
-
LUKE
ʻOkú ne tala mai kiate kitautolu hono fakamahuʻingaʻi ʻe Sīsū ʻa e lotú mo e founga ʻene fakafeangai ki he kakai fefiné.
-
SIONE
ʻOkú ne tala mai kiate kitautolu ʻa e ngaahi meʻa lahi naʻe leaʻaki ʻe Sīsū ki hono ngaahi kaungāmeʻa ofí mo e niʻihi kehé. ʻOku tokoniʻi heni kitautolu ke ʻiloʻi pe ko e tokotaha fēfē ʻa Sīsū.
ʻOKU PEHĒ ʻE HE NIʻIHI: “Naʻe haʻu ʻa Sīsū ke foaki ʻene moʻuí maʻá e kakai.”
-
ʻOkú ke fakakaukau ko e ʻuhinga pē ia naʻe haʻu ai ʻa Sīsū ki māmaní?
FAKANOUNOU
Naʻe malanga ʻa Sīsū fekauʻaki mo e Puleʻanga ʻo e ʻOtuá, fakahoko ʻa e ngaahi mana, pea talangofua kia Sihova ʻi he meʻa kotoa.
Fakamanatu
-
Ko e hā ʻa e ngāue mahuʻinga taha naʻe fai ʻe Sīsū ʻi heʻene ʻi māmaní?
-
Ko e hā ʻoku fakamoʻoniʻi ʻe he ngaahi mana ʻa Sīsuú?
-
Ko e hā ʻa e ngaahi lēsoni ʻaonga naʻe akoʻi ʻe Sīsuú?
AKO LAHI ANGE
Ko e hā ʻa e kaveinga naʻe malangaʻi lahi taha ʻe Sīsuú?
“Puleʻanga ʻo e ʻOtuá—Ko ʻEne ʻUhinga kia Sīsuú” (Ko e Taua Leʻo, Nōvema 1, 2014)
Vakai angé ki he ʻuhinga ʻoku lava ai ke tau tui ko e ngaahi mana ʻa Sīsuú naʻe hoko moʻoni.
“Ko e Ngaahi Mana ʻa Sīsuú—Ko e Hā ʻe Lava Ke Ke Akó?” (Ko e Taua Leʻo, Siulai 15, 2004)
Lau fekauʻaki mo e liliu ʻa ha tangata ʻi heʻene ako ʻa e feilaulauʻi-kita ʻa Sīsuú.
Sio ki he lisi hokohoko lelei ʻo e ngaahi meʻa mahuʻinga naʻe fai ʻe Sīsuú.
a Ko e Lēsoni 31-33 ʻe lāulea lahi ange ai ki he Puleʻanga ʻo e ʻOtuá.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
