LĒSONI 28
Fakahāhā ʻa e Houngaʻia ki he Meʻa Kuo Fai ʻe Sihova mo Sīsū Maʻaú
Ko e hā hoʻo ongoʻí ʻi he taimi ʻoku ʻoatu ai ʻe ha kaumeʻa kiate koe ha meʻaʻofa makehe? Ko e moʻoni, ʻokú ke fiefia lahi pea te ke loto ke fakahāhā ki ho kaumeʻá ʻokú ke houngaʻia ʻi he meʻaʻofá. Kuo ʻomai ʻe Sihova mo Sīsū kiate kitautolu ʻa e meʻaʻofa lahi taha kuo faifai ange pea tau maʻú, ʻa e huhuʻí. ʻE lava fēfē ke tau fakahaaʻi ʻoku tau houngaʻia ai?
1. Ko e hā ha founga ke tau fakahāhā ai ʻa e houngaʻia ki he meʻa kuo fai maʻa kitautolu ʻe he ʻOtuá mo Kalaisí?
ʻOku talaʻofa ʻa e Tohi Tapú “ko e tokotaha kotoa pē ʻokú ne ngāueʻi ʻa e tui” kia Sīsuú ʻoku lava ke ne moʻui taʻengata. (Sione 3:16) ʻOku ʻuhinga ki he hā ʻa e ngāueʻi ʻo e tuí? ʻOku ʻuhinga ia ki he meʻa lahi ange ʻi he tui pē kia Sīsuú. ʻOku toe fiemaʻu ke tau fakahāhaaʻi ʻetau tuí ʻi he ngaahi fili ʻoku tau faí mo e ngaahi meʻa ʻoku tau fakahokó. (Sēmisi 2:17) ʻOku tau fakahaaʻi ʻetau tuí ʻaki ʻa e meʻa ʻoku tau faí mo e meʻa ʻoku tau leaʻakí, pea fakaivimālohiʻi ai hotau vahaʻangatae mo Sīsū mo ʻene Tamaí, ʻa Sihova.—Lau ʻa e Sione 14:21.
2. Ko e hā ʻa e kātoanga makehe te ne tokoniʻi kitautolu ke fakahāhaaʻi ʻetau houngaʻia ki he meʻa naʻe fai ʻe Sihova mo Sīsuú?
ʻI he efiafi ki muʻa ke pekia ʻa Sīsuú, naʻá ne tala ange ki hono kau muimuí fekauʻaki mo ha founga ke nau fakahāhā ai ʻa e houngaʻia ki heʻene feilaulaú. Naʻá ne kamataʻi ha kātoanga makehe, ʻa ia ʻoku ui ʻe he Tohi Tapú ko e “Kai Efiafi ʻa e ʻEikí,” pea ʻoku toe ʻiloa ko e Fakamanatu ʻo e Pekia ʻa Kalaisí. (1 Kolinitō 11:20) Naʻe fokotuʻu ia ʻe Sīsū koeʻuhi ke hoko ʻene kau ʻapositoló, mo e kau Kalisitiane moʻoni kotoa hili kinautolú, ʻo manatuʻi naʻá ne foaki ʻene moʻuí maʻa kitautolu. Ko ia ai, naʻe fekauʻi ʻe Sīsū: “Hanganaki fai eni ko hoku fakamanatu.” (Luke 22:19) ʻI hoʻo maʻu ʻa e fakamanatú, ʻokú ke fakahaaʻi ai hoʻo houngaʻia ki he ʻofa lahi ʻa Sihova mo Sīsū ʻiate kitautolú.
KELI LOLOTO ANGE
Ako ki he founga lahi ange ke fakahaaʻi ai ʻa e houngaʻia ki he ʻofa lahi kuo fakahaaʻi atu ʻe Sihova mo Sīsuú. Fakakaukau atu ki he ʻuhinga ʻoku mātuʻaki mahuʻinga ai ʻa e Fakamanatu ʻo e pekia ʻa Kalaisí.
3. Ko e hā te tau fai ke fakahaaʻi ai ʻetau houngaʻiá?
Sioloto atu ki ha taha ʻokú ne fakahaofi koe ʻi haʻo meimei melemo. ʻE vave pē ha ngalo ʻiate koe ʻa e meʻa naʻá ne fai maʻaú? Pe te ke kumi ki ha founga ke fakahaaʻi kiate ia ʻokú ke houngaʻia ʻi he meʻa naʻá ne faí?
ʻOku tau maʻu ʻa e faingamālie ke moʻui taʻengatá koeʻuhí ko e anga-lelei ʻa Sihová. Lau ʻa e 1 Sione 4:8-10, pea lāulea leva ki he ongo fehuʻi ko ení:
-
Ko e hā ko ha meʻaʻofa makehe ai ʻa e feilaulau ʻa Sīsuú?
-
ʻOku anga-fēfē hoʻo ongoʻí fekauʻaki mo e meʻa kuo fai maʻau ʻe Sihova mo Sīsuú?
ʻOku lava fēfē ke tau fakahāhā ʻetau houngaʻia ki he meʻa kuo fai ʻe Sihova mo Sīsū maʻa kitautolú? Lau ʻa e 2 Kolinitō 5:15 mo e 1 Sione 4:11; 5:3. Hili hono lau ʻa e konga Tohi Tapu taki taha, lāulea ki he fehuʻi ko ení:
-
Fakatatau ki he konga Tohi Tapu ko iá, ko e hā ʻoku lava ke tau faí ke fakahaaʻi ai ʻetau houngaʻiá?
4. Faʻifaʻitaki kia Sīsū
Ko e founga ʻe taha ke fakahāhā ai ʻetau houngaʻiá ko e faʻifaʻitaki kia Sīsū. Lau ʻa e 1 Pita 2:21, pea lāulea leva ki he fehuʻi ko ení:
-
ʻI he ngaahi founga fē ʻe lava ke ke muimui ofi ai ʻi he topuvaʻe ʻo Sīsuú?
Naʻe ʻofa ʻa Sīsū ʻi he Folofola ʻa e ʻOtuá, malangaʻi ʻa e ongoongo leleí pea tokoniʻi mo e niʻihi kehé
5. Maʻu ʻa e kātoanga ʻo e Fakamanatu ʻo e pekia ʻa Kalaisí
Ke sio ki he meʻa naʻe hoko lolotonga hono fuofua kātoangaʻi ʻa e Kai Efiafi ʻa e ʻEikí, lau ʻa e Luke 22:14, 19, 20. Lāulea leva ki he ongo fehuʻi ko ení:
-
Ko e hā naʻe hoko ʻi he Kai Efiafi ʻa e ʻEikí?
-
Ko e hā ʻoku fakafofongaʻi ʻe he maá mo e uainé?—Sio ki he veesi 19 mo e 20.
Naʻe loto ʻa Sīsū ki heʻene kau ākongá ke nau kātoangaʻi ʻa e Kai Efiafi ʻa e ʻEikí tuʻo taha he taʻu ʻi he ʻaho tofu pē naʻá ne pekia aí. Ko ia, ko e Kau Fakamoʻoni ʻa Sihová ʻoku nau fakatahataha tuʻo taha he taʻu ke fakamanatu ʻa e pekia ʻa Kalaisí ʻo fakatatau ki heʻene fekaú. Huluʻi ʻa e VITIOÓ ke ako fekauʻaki mo e fakataha mahuʻinga ko ení. Lāulea leva ki he fehuʻi hokó.
-
Ko e hā ʻoku hoko ʻi he Fakamanatú?
Ko e maá mo e uainé ʻokú na fakafofongaʻi ha meʻa. ʻOku fakafofongaʻi ʻe he maá ʻa e sino fakaetangata haohaoa ʻo Sīsuú ʻa ia naʻá ne feilaulauʻi koeʻuhi ko kitautolú. ʻOku fakafofongaʻi ʻe he uainé hono taʻataʻá
ʻOKU PEHĒ ʻE HE NIʻIHI: “Ko e meʻa pē ʻoku fiemaʻu ke ke fai ka ke moʻuí ko e tui pē kia Sīsū.”
-
ʻE lava fēfē ke ke ngāueʻaki ʻa e Sione 3:16 mo e Sēmisi 2:17 ke fakahaaʻi ʻoku fiemaʻu ʻa e meʻa lahi ange?
FAKANOUNOU
ʻOku tau fakahāhaaʻi ʻa e houngaʻia ki he meʻa naʻe fai ʻe Sīsū maʻa kitautolú ʻaki hono ngāueʻi ʻa e tui kiate iá pea maʻu ʻa e Fakamanatu ʻo ʻene pekiá.
Fakamanatu
-
ʻOku ʻuhinga ki he hā hono ngāueʻi ʻa e tui kia Sīsuú?
-
Te ke fakahaaʻi fēfē hoʻo houngaʻia kia Sihova mo Sīsū ʻi he meʻa kuó na fai maʻaú?
-
Ko e hā ʻoku mātuʻaki mahuʻinga ai ke maʻu ʻa e Fakamanatu ʻo e pekia ʻa Kalaisí?
AKO LAHI ANGE
Ko e hā ʻoku ueʻi kitautolu ke tau faí ʻe he pekia ʻa Kalaisi?
Naʻá Ne Ngāueʻaki Hono Sinó ke Fakalāngilangiʻi ʻa Sihova (9:28)
Ako lahi ange fekauʻaki mo e tuí pea mo e founga ke tau fakahāhā ai iá.
“Ngāueʻi Hoʻo Tui ki he Ngaahi Talaʻofa ʻa Sihová” (Ko e Taua Leʻo, ʻOkatopa 2016)
ʻI he talanoa “ʻOku Ou Ongoʻi Maʻa, Longomoʻui mo Kakato,” sio ki he founga hono fakaleleiʻi ʻa e moʻui ʻa ha fefine ʻi heʻene mahinoʻi ʻa e feilaulau ʻa Kalaisi maʻaná.
“Liliu ʻe he Tohi Tapú ʻa e Moʻuí” (Toʻo mei he Ko e Taua Leʻo)
Sio angé ki he ʻuhinga ko e tokosiʻi pē ʻoku nau maʻu ʻinasi ʻi he Fakamanatú.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
