LĒSONI 35
Founga ke Fai Ai ʻa e Ngaahi Fili Leleí
ʻOku tau maʻu kotoa ʻa e ngaahi fili ke fai. Ko e lahi ʻo e ngaahi fili ko ení ʻe lava ke kaunga lelei pe kaunga kovi kiate kitautolu mo hotau vahaʻangatae mo Sihová. Ko e fakatātaá, ʻoku tau fili ʻa e feituʻu ʻoku tau nofo aí, founga ke maʻu ai ha paʻanga mo e fili pe te tau mali. ʻI heʻetau fai ʻa e ngaahi fili leleí, ʻoku lava ke tau fiefia ai pea fakahōifuaʻi ʻa Sihova.
1. ʻOku lava fēfē ke tokoniʻi koe ʻe he Tohi Tapú ke ke fai ʻa e ngaahi fili leleí?
Ki muʻa ke fai ha fili, lotu ki he tokoni ʻa Sihová pea kumi ʻi he Tohi Tapú ke sio pe ko e hā ʻene vakai ki aí. (Lau ʻa e Palōveepi 2:3-6.) ʻI he taimi ʻe niʻihi, ʻoku ʻomai ʻe Sihova ha fekau māʻalaʻala. Kapau ko ia, ko e fili lelei taha ke faí ko e talangofua ki ai.
Fēfē kapau ʻoku ʻikai ke ʻi ai ha fekau māʻalaʻala ʻi he Tohi Tapú ʻo tala atu ʻa e meʻa ke ke faí? ʻE kei tataki pē koe ʻe Sihova “ʻi he hala ʻoku totonu ke ke fou aí.” (ʻAisea 48:17) Anga-fēfē? Kumi ki he ngaahi tefitoʻi moʻoni ke ne tataki koe. Ko e ngaahi tefitoʻi moʻoni ʻa e Tohi Tapú ko ha ngaahi moʻoni tefito ʻokú ne fakaeʻa ʻa e ngaahi fakakaukau mo e ngaahi ongoʻi ʻa e ʻOtuá. ʻOku lava ke tau ʻiloʻi ʻa e anga ʻo e ongoʻi ʻa e ʻOtuá fekauʻaki mo ha meʻa ʻi he taimi ʻoku tau lau ai ia ʻi he Tohi Tapú. ʻI heʻetau mahinoʻi ʻa e anga ʻo e ongoʻi ʻa Sihová, ʻe lava ke tau fai ʻa e ngaahi fili ʻoku fakahōifua kiate ia.
2. Ko e hā ʻoku totonu ke ke fakakaukau ki aí ki muʻa ke ke fai ha fili?
ʻOku pehē ʻe he Tohi Tapú: “Ko e tokotaha fakapotopotó ʻokú ne fakakaukauʻi ʻene laka taki taha.” (Palōveepi 14:15) ʻOku ʻuhinga ení ki muʻa ke tau fai ha fili, ʻoku totonu ke tau vaheʻi ha taimi ke fakakaukau fekauʻaki mo ʻetau ngaahi filí. Ki muʻa ke ke fai ʻa e fili taki taha, ʻeke hifo: ‘Ko e hā ʻa e tefitoʻi moʻoni Fakatohitapu ke u ngāueʻaki hení? Ko fē ʻa e fili te ne ʻomai kiate au ʻa e nonga ʻo e ʻatamaí? ʻE kaunga fēfē ʻeku filí ki he niʻihi kehé? Ko e mahuʻinga tahá, ʻe ʻai ai ʻa Sihova ke fiefia?’—Teutalōnome 32:29.
ʻOku maʻu ʻe Sihova ʻa e totonu ke tala mai ʻa e meʻa ʻoku leleí mo e meʻa ʻoku koví. ʻI heʻetau ʻiloʻi lelei ʻene ngaahi laó mo e tefitoʻi moʻoní pea fakapapauʻi ke muimui aí, ʻoku tau akoʻi ai hotau konisēnisí. Ko e konisēnisí ko ʻetau ongo ia ki he tonú mo e halá. (Loma 2:14, 15) Ko ha konisēnisi kuo akoʻi te ne tokoniʻi kitautolu ke fai ʻa e ngaahi fili leleí.
KELI LOLOTO ANGE
Ako ki he anga hono tokoniʻi kitautolu ʻe he tefitoʻi moʻoni Fakatohitapú mo hotau konisēnisí ke fai ha ngaahi fili.
3. Fakaʻatā ʻa e Tohi Tapú ke ne tataki koe
ʻOku anga-fēfē hono tataki kitautolu ʻe he ngaahi tefitoʻi moʻoni Fakatohitapú ʻi he taimi ʻoku tau fai ai ʻa e ngaahi filí? Huluʻi ʻa e VITIOÓ, pea lāulea leva ki he ngaahi fehuʻi hokó.
-
Ko e hā ʻa e tauʻatāina ke fili?
-
Ko e hā naʻe ʻomai ai ʻe Sihova kiate kitautolu ʻa e tauʻatāina ke filí?
-
Ko e hā kuó ne tokonaki mai ke tokoniʻi kitautolu ke ngāueʻaki ʻetau tauʻatāina ke filí ʻi he founga lelei tahá?
Lau ʻa e ʻEfesō 5:15, 16 ke sio ki ha fakatātā ʻo ha tefitoʻi moʻoni Fakatohitapu. Lāulea leva ki he founga te ke “ngāue lelei taha ʻaki ho taimí” ke . . .
-
lau maʻu pē ʻa e Tohi Tapú.
-
hoko ko ha hoa mali, mātuʻa, foha pe ʻofefine lelei ange.
-
maʻu ʻa e ngaahi fakataha ʻa e fakatahaʻangá.
4. Akoʻi ho konisēnisí ke fai ʻa e ngaahi fili leleí
ʻI he taimi ʻoku māʻalaʻala ai ʻa e fekau ʻa e Tohi Tapú ki ha meʻa, ko e fili totonú ʻoku faingofua. Kae fēfē kapau ʻoku ʻikai ha lao fekauʻaki mo ia? Huluʻi ʻa e VITIOÓ, pea lāulea leva ki he fehuʻi hokó.
-
ʻI he vitioó, ko e hā ʻa e ngaahi sitepu naʻe fou ai ʻa e tuofefiné ke akoʻi hono konisēnisí ke fai ha fili ʻe fakahōifua kia Sihova?
Ko e hā ʻoku ʻikai totonu ai ke kole ki he niʻihi kehé ke fai ʻa e ngaahi fili ʻoku totonu ke tau faí? Lau ʻa e Hepelū 5:14, pea lāulea leva ki he ongo fehuʻi ko ení:
-
ʻOku faingofua ange nai ke kole ki he niʻihi kehé ke fai ʻetau filí. Kae kehe, ko e hā ʻoku totonu ke tau fai ʻe kitautolu tonú?
-
Ko e hā ʻoku ala maʻu te ne tokoniʻi koe ke akoʻi ho konisēnisí pea fai ʻa e ngaahi fili leleí?
ʻI he hangē ko ha taha ʻokú ne sio ki ha mape ke ʻilo ʻa e hala totonú, ʻoku tokoniʻi kitautolu ʻe hotau konisēnisí ke fili ʻa e ʻalunga ke fou ai ʻi he moʻuí
5. Fakaʻapaʻapaʻi ʻa e konisēnisi ʻo e niʻihi kehé
Koeʻuhi ko ʻetau kehekehé, te tau fai ʻa e ngaahi fili kehekehe. ʻE lava fēfē ke tau fakahaaʻi ʻa e fakaʻapaʻapa ki he konisēnisi ʻo e niʻihi kehé? Fakakaukau ki ha tuʻunga ʻe ua:
Tuʻunga 1: Ko ha tuofefine ʻokú ne saiʻia ke ʻai ʻa e teuteu tōtuʻa pea hiki ki ha fakatahaʻanga ko e tokolahi ʻo e fanga tuofāfiné ʻoku nau hohaʻa ʻi he sio ki ha taha ʻokú ne teuteu tōtuʻa.
Lau ʻa e Loma 15:1 mo e 1 Kolinitō 10:23, 24, pea lāulea leva ki he ongo fehuʻi ko ení:
-
Makatuʻunga ʻi he ngaahi vēsí ni, ko e hā nai ʻa e fili ʻe fai ʻe he tuofefiné? Ko e hā te ke fai kapau te ke ʻalu mo ha taha ʻoku ʻikai fakaʻatā ia ʻe hono konisēnisí ke fai ha meʻa ka ʻoku fakaʻatā ia ʻe ho konisēnisí?
Tuʻunga 2: ʻOku ʻilo ʻe ha tokoua ʻoku ʻikai fakahalaki ʻe he Tohi Tapú ʻa hono ngāueʻaki feʻunga ʻa e ʻolokaholó, ka ʻokú ne fili ke ʻoua ʻe inu ʻolokaholo. ʻOku fakaafeʻi ia ki ha kiʻi fakatahataha ʻa ia ʻokú ne sio ki ha fanga tokoua ʻoku nau inu ʻolokaholo.
Lau ʻa e Tangata Malanga 7:16 mo e Loma 14:1, 10, pea lāulea leva ki he ongo fehuʻi ko ení:
-
Makatuʻunga ʻi he ngaahi vēsí ni, ko e hā nai ʻa e fili ʻe fai ʻe he tokouá? Ko e hā te ke faí kapau ʻokú ke sio ki ha taha ʻokú ne fai ha meʻa ka ʻoku taʻofi koe ʻe ho konisēnisí mei hono fai iá?
Ko e hā ʻa e ngaahi sitepu ʻokú ne taki atu ke fai ha ngaahi fili lelei?
1. Kole kia Sihova ke ne tokoniʻi koe ke fili ʻa e meʻa ke ke faí.—Sēmisi 1:5.
2. Fai ha fekumi ʻi he Tohi Tapú mo e ʻū tohi makatuʻunga ʻi he Tohi Tapú ke maʻu ʻa e ngaahi tefitoʻi moʻoni ke ngāueʻakí. Te ke toe lava ʻo talanoa ki ha kau Kalisitiane matuʻotuʻa.
3. Sioloto atu ki he kaunga ʻa hoʻo filí ki ho konisēnisí mo e konisēnisi ʻo e niʻihi kehé.
ʻOKU PEHĒ ʻE HE NIʻIHI: “ʻOkú ke maʻu ʻa e totonu ke ke faʻiteliha pē ki he meʻa ke ke fai. ʻOku ʻikai ke u tokanga ki he meʻa ʻoku fakakaukau ki ai ʻa e niʻihi kehé.”
-
Ko e hā ʻoku totonu ai ke tau tokanga ki he ongoʻi ʻa e ʻOtuá pea pehē ki he niʻihi kehé?
FAKANOUNOU
ʻOku tau fai ʻa e ngaahi fili lelei ʻi he taimi ʻoku tau ʻiloʻi ai ʻa e anga ʻo e ongoʻi ʻa Sihova fekauʻaki mo ha meʻa pea fakakaukau leva pe ʻe hoko ʻetau tōʻongá ʻo tokoni ki he niʻihi kehé pe uesia kinautolu.
Fakamanatu
-
ʻE anga-fēfē ke ke fai ʻa e ngaahi fili ʻoku fakahōifua kia Sihová?
-
ʻE anga-fēfē ke ke akoʻi ho konisēnisí?
-
ʻE anga-fēfē hoʻo fakaʻapaʻapaʻi ʻa e konisēnisi ʻo e niʻihi kehé?
AKO LAHI ANGE
ʻE lava fēfē ke ke fai ha ngaahi fili ʻe fakaivimālohiʻi ai ho vahaʻangatae mo e ʻOtuá?
“Fai ʻa e Ngaahi Fili ʻOku Ongoongo-Lelei Ai ʻa e ʻOtuá” (Ko e Taua Leʻo, ʻEpeleli 15, 2011)
Ako lahi ange ki he founga ʻoku ʻomai ai ʻe Sihova ʻa e faleʻí.
Ako ki he meʻa naʻá ne tokoniʻi ha tangata ke fai ha fili faingataʻa.
ʻOku Fakapapauʻi ʻe Sihova ʻa e Meʻa Kotoa Pē ʻOku Leleí (5:46)
Ako lahi ange ki he founga ke fakahōifuaʻi ai ʻa Sihova ʻi he taimi ʻoku ʻikai ke ne ʻomai ai ha fakahinohino māʻalaʻala ki ha meʻa.
“ʻOkú Ke Fiemaʻu Maʻu Pē ha Foʻi Fekau Faka-Tohitapu?” (Ko e Taua Leʻo, Tīsema 1, 2003)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
