LĒSONI 37
Meʻa ʻOku Leaʻaki ʻe he Tohi Tapú Fekauʻaki mo e Ngāué mo e Paʻangá
Kuó ke ongoʻi lōmekina nai fekauʻaki mo e ngāué pe paʻangá? ʻOku lava ke faingataʻa hono tokangaʻi ʻetau ngaahi fiemaʻú pea toe tauhi ʻaufuatō kia Sihova. ʻOku ʻomai ʻe he Tohi Tapú ʻa e faleʻi fakapotopoto ʻoku lava ke ne tokoniʻi kitautolu.
1. Ko e hā ʻoku leaʻaki ʻe he Tohi Tapú fekauʻaki mo e ngāué?
ʻOku loto mai ʻa e ʻOtuá ke tau fiefia ʻi heʻetau ngaué. ʻOku pehē ʻe he Tohi Tapú “ʻoku ʻikai ha meʻa ʻe lelei ange ki ha tangata ka ke ne . . . maʻu ha fiefia ʻi heʻene ngāue mālohí.” (Tangata Malanga 2:24) ʻOku ngāue mālohi ʻa Sihova. ʻI he taimi ʻoku tau faʻifaʻitaki ai kiate iá ʻo kīvoi ʻi he ngāué, ʻoku tau fakahōifua kiate ia pea fiefia ai.
ʻOku mahuʻinga ʻa e ngāué. Ka ʻoku ʻikai ʻaupito totonu ke tau fakaʻatā ia ke mahuʻinga ange ia ʻi heʻetau lotu kia Sihová. (Sione 6:27) ʻOkú ne talaʻofa mai kapau te tau fakamuʻomuʻa ia, te ne ʻomai ʻetau ngaahi fiemaʻu ki he moʻuí.
2. Ko e hā ʻa e vakai totonu ki he paʻangá?
ʻOku pehē ʻe he Tohi Tapú “ko e paʻangá ko ha maluʻanga,” ka ʻoku toe fakatokanga mai ʻoku ʻikai ko e paʻangá pē ʻa e meʻa ʻoku tau fiemaʻu ke fiefiá. (Tangata Malanga 7:12) Ko ia ai, ʻoku akoʻi kitautolu ke ʻoua ʻe ʻofa ki he paʻangá kae fiemālie pē ʻi he ngaahi meʻa ʻoku tau maʻú. (Lau ʻa e Hepelū 13:5.) ʻI heʻetau fiemālie pē ʻi he meʻa ʻoku tau maʻú, te tau hao ai mei he holi feifeitamaki maʻu pē ki ha meʻa lahi ange. ʻOku tau fakaʻehiʻehi mei ha moʻua ʻikai fiemaʻu. (Palōveepi 22:7) ʻOku tau hao ai mei he fakatuʻutāmaki ʻo e pelepaʻangá pea mo e tuli ʻi he kākā ke tuʻumālie vavé.
3. ʻE anga-fēfē haʻatau ngāueʻaki nima-homo ʻetau paʻangá?
Ko Sihová ko ha ʻOtua nima-homo pea ʻoku tau faʻifaʻitaki kiate ia ʻi he taimi ʻoku tau “nima-homo, mateuteu ke fai ha vahevahe atu.” (1 Tīmote 6:18) ʻOku lava ke tau ngāueʻaki taʻesiokita ʻetau paʻangá ʻaki hono poupouʻi ʻa e fakatahaʻangá pea tokoniʻi ʻa e niʻihi ʻoku ʻi ai ʻenau fiemaʻú, tautefito ki hotau kaungālotú. ʻOku fakamahuʻingaʻi lahi ʻe Sihova ʻo ʻikai ko e lahi ʻetau foakí, ka ko e fakaueʻiloto ʻetau foakí. ʻI heʻetau foaki nima-homo mei he lotó, te tau fiefia ai pea tau fakahōifuaʻi mo Sihova.—Lau ʻa e Ngāue 20:35.
KELI LOLOTO ANGE
Sio ki he ngaahi ʻaonga ʻa hono maʻu ʻa e fakakaukau totonu fekauʻaki mo e ngāué pea fiemālie pē ai.
4. Fakalāngilangiʻi ʻa Sihova ʻi hoʻo fakahoko hoʻo ngāué
Ko hotau vahaʻangatae mo Sihová ʻoku totonu ke ne tākiekina ʻetau vakai ki he ngāué. Huluʻi ʻa e VITIOÓ, pea lāulea leva ki he ongo fehuʻi hokó.
-
ʻI he vitioó, ko e hā naʻe maongo kiate koe fekauʻaki mo e fakakaukau mo e tōʻonga ʻa Soni ʻi heʻene ngāueʻangá?
-
Ko e hā naʻá ne fai ke tauhi ʻa e ngāué ʻi hono feituʻu totonú?
Lau ʻa e Kolose 3:23, 24, pea lāulea leva ki he fehuʻi ko ení:
-
Ko e hā ʻoku mahuʻinga ai kiate kitautolu ke ngāue mālohí?
ʻOku mahuʻinga ʻa e ngāué. Ka ʻoku ʻikai ʻaupito totonu ke tau fakaʻatā ia ke hoko ʻo mahuʻinga ange ʻi heʻetau lotu kia Sihová
5. ʻOku ʻaonga kiate kitautolu ʻa e loto-toponó
ʻOku feinga ʻa e kakai tokolahi ke tānaki mai ʻa e paʻanga lahi taha ʻoku ala lavá. Ka ʻoku kehe ʻa e faleʻi ia ʻoku ʻomai ʻe he Tohi Tapú. Lau ʻa e 1 Tīmote 6:6-8, pea lāulea leva ki he fehuʻi ko ení:
-
Ko e hā ʻoku fakaʻaiʻai kitautolu ʻe he Tohi Tapú ke tau faí?
Naʻa mo ʻetau maʻu ha meʻa siʻisiʻi pē, ʻoku lava ke tau fiefia. Huluʻi ʻa e VITIOÓ, pea lāulea leva ki he fehuʻi hokó.
-
Neongo hono maʻu ʻa e paʻanga siʻisiʻí, ko e hā ʻokú ne ʻai ʻa e ngaahi fāmili ko ení ke fiefiá?
Kae fēfē kapau ʻoku lahi ʻetau ngaahi meʻá pea kei loto pē ke maʻu ʻa e meʻa lahi ange? Naʻe fakatātaaʻi ʻe Sīsū ʻa e fakatuʻutāmaki ʻo e meʻá ni. Lau ʻa e Luke 12:15-21, pea lāulea leva ki he fehuʻi ko ení:
-
Ko e hā kuó ke ako mei he talanoa fakatātā ʻa Sīsuú?—Sio ki he veesi 15.
Lau ʻa e Palōveepi 10:22 mo e 1 Tīmote 6:10. Lāulea leva ki he ngaahi fehuʻi ko ení:
-
Ko e hā ʻoku mahuʻinga angé, ko hono maʻu ha vahaʻangatae mo Sihova pe ko hono maʻu ha paʻanga lahi? Ko e hā hono ʻuhingá?
-
Ko e hā ʻa e palopalema ʻoku tupu mei he tuli ki he paʻangá?
6. ʻE tokangaʻi ʻe Sihova ʻetau ngaahi fiemaʻú
Ko e ngaahi palopalema ʻi he ngāué mo e paʻangá ʻe ʻahiʻahiʻi ai ʻetau tui pe ʻoku tau falala kia Sihova. Huluʻi ʻa e VITIOÓ ke sio ki he anga ʻetau fakafeangai ki he ʻahiʻahiʻi ko eni ʻo e tuí, pea lāulea leva ki he ongo fehuʻi hokó.
-
ʻI he vitioó, ko e hā ʻa e ngaahi palopalema naʻe fehangahangai mo e tokouá?
-
Ko e hā ʻa e meʻa naʻá ne fai ke fehangahangai lavameʻa mo e ngaahi palopalemá?
Lau ʻa e Mātiu 6:25-34, pea lāulea leva ki he fehuʻi ko ení:
-
Ko e hā ʻoku talaʻofa mai ʻe Sihova te ne faí ki he faʻahinga ʻoku nau fakamuʻomuʻa iá?
ʻOKU PEHĒ ʻE HE NIʻIHI: “ʻOku fiemaʻu ke u ngāue mālohi ke tokangaʻi hoku fāmilí. Ka heʻikai lava ke u maʻu ʻa e ngaahi fakataha ʻa e fakatahaʻangá ʻi he uike kotoa.”
-
Ko e hā ʻa e konga Tohi Tapu ʻokú ne fakatuipauʻi koe ʻe tokonaki ʻe Sihova hoʻo ngaahi fiemaʻú kapau te ke fakamuʻomuʻa hoʻo lotu kiate iá?
FAKANOUNOU
ʻOku mahuʻinga ʻa e ngāué mo e paʻangá, ka ʻoku ʻikai ʻaupito totonu ke na fakahohaʻasi kitautolu mei he tauhi kia Sihová.
Fakamanatu
-
Ko e hā te ne tokoniʻi koe ke maʻu ha vakai totonu ki he ngāué?
-
ʻOku ʻaonga fēfē kiate koe ʻa e loto-toponó?
-
ʻE lava fēfē ke ke fakahaaʻi hoʻo falala ki he ngaahi talaʻofa ʻa Sihova ke tokonaki maʻa hono kakaí?
AKO LAHI ANGE
Sio pe ʻoku pehē ʻe he Tohi Tapú ʻoku kovi ʻa e paʻangá.
“Ko e Paʻangá ʻa e Aka ʻo e Kovi Kotoa Pē?” (Kupu ʻi he uepisaití)
Ako ki he founga te tau ngāueʻaki ʻetau paʻangá ke fakahōifua ki he ʻOtuá.
“Ko e Hā ʻOku Leaʻaki ʻe he Tohi Tapú Fekauʻaki mo e Foakí?” (Kupu ʻi he uepisaití)
ʻOku fakatuʻutāmaki ʻa e pelepaʻangá?
“Ko e Vakai ʻa e Tohi Tapú—Pelepaʻanga” (Toʻo mei he ʻĀ Hake!)
Sio ki he meʻa naʻá ne ueʻi ha tangata ke tuku ʻa e pelepaʻangá mo e kaihaʻá.
“Naʻá Ku Manako ʻi he Lova Hōsí” (Toʻo mei he Ko e Taua Leʻo)
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
