LĒSONI 47
ʻOkú Ke Mateuteu ke Hoko ʻo Papitaiso?
Kuó ke ako ʻa e ngaahi meʻa lahi fekauʻaki mo Sihova ʻi hoʻo ako ʻa e Tohi Tapú. Ngalingali kuó ke fai ʻa e ngaahi liliu ʻe niʻihi ke ngāueʻaki ʻa e meʻa kuó ke akó. Kae mahalo ʻoku ʻi ai ha ʻuhinga ʻokú ke kei ongoʻi ai ʻoku ʻikai ke ke mateuteu ke fakatapui koe kia Sihova pea hoko ʻo papitaisó. ʻE lāulea ʻi he lēsoni ko ení ki ha ngaahi fakafaingataʻaʻiaʻanga anga-maheni ki he papitaisó mo e founga ʻe lava ke ke ikuʻi ai kinautolú.
1. Ko e hā ʻa e lahi ʻo e ʻilo ʻokú ke fiemaʻú ki muʻa ke ke papitaisó?
Ke hoko ʻo papitaisó, ʻoku fiemaʻu ke ke maʻu “ha ʻilo totonu ki he moʻoní.” (1 Tīmote 2:4) ʻOku ʻikai ʻuhinga ení ʻoku fiemaʻu ke ke ʻilo ʻa e tali ki he fehuʻi Fakatohitapu kotoa ki muʻa ke ke papitaiso. Naʻa mo e kau Kalisitiane kuo nau ʻosi papitaiso ʻi ha vahaʻa taimi loloá ʻoku kei hokohoko atu ʻenau ako fekauʻaki mo Sihová. (Kolose 1:9, 10) Ka ʻoku fiemaʻu ke ke maʻu ha mahino tefito ki he ngaahi akonaki Fakatohitapú. Ko e kau mātuʻa ʻi he fakatahaʻangá te nau tokoniʻi koe ke ke mahinoʻi pe ʻokú ke maʻu ha ʻilo feʻunga.
2. Ko e hā ʻa e ngaahi sitepu ke ke fou ai ki muʻa ke ke papitaisó?
Ki muʻa ke ke hoko ʻo papitaisó, kuo pau ke ke “fakatomala pea tafoki.” (Lau ʻa e Ngāue 3:19.) ʻOku ʻuhinga ení ko hoʻo ongoʻi fakaʻiseʻisa moʻoni ki ha angahala kuó ke fakahoko peá ke kole kia Sihova ke ne fakamolemoleʻi koe. ʻOkú ke toe talitekeʻi fakaʻaufuli ha tōʻonga kovi pē pea fakapapauʻi ke moʻui ʻi ha founga ʻoku fakahōifua ki he ʻOtuá. Tānaki atu ki aí, ʻokú ke kamata maʻu ʻa e ngaahi fakatahá pea malanga mo e fakatahaʻangá ko ha tokotaha malanga teʻeki papitaiso.
3. Ko e hā ʻoku ʻikai totonu ai ke ke fakaʻatā ʻa e ilifiá ke ne taʻofi koe?
ʻOku ilifia ʻa e niʻihi naʻa ʻikai lava ke nau fakahoko ʻa e meʻa naʻa nau talaʻofa kia Sihova te nau faí. Ko e moʻoni, ʻoku ʻi ai ʻa e ngaahi taimi ʻe niʻihi te ke fai ha fehālaaki, ʻo hangē pē ko e kau tangata mo e kau fefine faitōnunga ʻi he Tohi Tapú. Kae manatuʻi, ʻoku ʻikai ʻamanekina ʻe Sihova ʻene kau lotú ke haohaoa. (Lau ʻa e Saame 103:13, 14) ʻOkú ne hōifua ʻi hoʻo fai ho lelei tahá! Te ne tokoniʻi koe. Ko e moʻoni, ʻoku fakapapauʻi mai ʻe Sihova heʻikai ha meʻa te ne “fakamavaheʻi kitautolu mei” heʻene ʻofá.—Lau ʻa e Loma 8:38, 39.
KELI LOLOTO ANGE
Sio ki he ngaahi founga ʻe lava ke ke ikuʻi ha fakafaingataʻaʻiaʻanga pē ki he papitaisó ʻaki ʻa e hoko ʻo ʻiloʻi lelei ange ʻa Sihova pea tali ʻene tokoní.
4. Hoko ʻo ʻiloʻi lelei ange ʻa Sihova
Ko e hā hono lahi ʻo e fiemaʻu ke ke ʻiloʻi ʻa Sihová ki muʻa ke ke papitaisó? ʻOku fiemaʻu ke ke ʻilo feʻunga ia pea ʻe ueʻi ai koe ke ʻofa kiate ia pea loto ke fakahōifuaʻi ia. Huluʻi ʻa e VITIOÓ pea sio ki he anga ʻo e hoko ʻa e kau ako Tohi Tapu takatakai he māmaní ʻo fai ení. Lāulea leva ki he fehuʻi hokó.
-
ʻI he vitioó, ko e hā naʻá ne tokoniʻi ʻa e niʻihi ko ení ke teuteu ki he papitaisó?
Lau ʻa e Loma 12:2, pea lāulea leva ki he ongo fehuʻi ko ení:
-
ʻOku ʻi ai haʻo veiveiua fekauʻaki mo e meʻa ʻoku akoʻi ʻe he Tohi Tapú pe kapau ʻoku akoʻi ʻe he Kau Fakamoʻoni ʻa Sihová ʻa e moʻoní?
-
Kapau ko ia, ko e hā ʻe lava ke ke fai fekauʻaki mo iá?
5. Ikuʻi ʻa e fakafaingataʻaʻiaʻanga ki he papitaisó
ʻI heʻetau fili ke fakatapui kitautolu kia Sihova pea hoko ʻo papitaisó, ʻoku tau fehangahangai kotoa mo e ngaahi faingataʻa. Ke sio ki ha fakatātā, huluʻi ʻa e VITIOÓ, pea lāulea leva ki he ongo fehuʻi hokó.
-
ʻI he vitioó, ko e hā ʻa e ngaahi fakafaingataʻaʻiaʻanga naʻe fiemaʻu ke ikuʻi ʻe Narangerel ke tauhi kia Sihová?
-
Naʻe anga-fēfē hono tokoniʻi ia heʻene ʻofa kia Sihová ke ikuʻi ʻa e ngaahi fakafaingataʻaʻiaʻanga ko iá?
Lau ʻa e Palōveepi 29:25 mo e 2 Tīmote 1:7, pea lāulea leva ki he fehuʻi ko ení:
-
Ko e hā ʻokú ne ʻomai ʻa e loto-toʻa ke ikuʻi ʻa e ngaahi fakafaingataʻaʻiaʻangá?
6. Falala ki he tokoni ʻa Sihová
ʻE tokoniʻi koe ʻe Sihova ke ke lavameʻa. Huluʻi ʻa e VITIOÓ, pea lāulea leva ki he ongo fehuʻi hokó.
-
ʻI he vitioó, ko e hā naʻá ne ʻai ha tokotaha ako Tohi Tapu ke toumoua mei he hoko ʻo papitaisó?
-
Ko e hā naʻá ne ako ʻo tokoniʻi ai ia ke fakaivimālohiʻi ʻene falala kia Sihová?
Lau ʻa e ʻAisea 41:10, 13, pea lāulea leva ki he fehuʻi ko ení:
-
Ko e hā ʻoku lava ai ke ke tuipau ʻe lava ke ke fakahoko hoʻo talaʻofa naʻá ke fai ʻi hoʻo fakatapuí?
7. Fakalahi hoʻo houngaʻia ki he ʻofa ʻa Sihová
Ko e lahi ange hoʻo fakakaukau ki he ʻofa ʻa Sihova ʻiate koé, ko e lahi ange ia hoʻo houngaʻia ʻiate ia pea lahi ange mo hoʻo holi ke tauhi kiate ia ʻo taʻengatá. Lau ʻa e Saame 40:5, pea lāulea leva ki he fehuʻi ko ení:
-
Ko e hā ʻa e ngaahi tāpuaki meia Sihova ʻokú ke houngaʻia lahi aí?
Naʻe ʻofa ʻa e palōfita ko Selemaiá ʻia Sihova mo ʻene folofolá, peá ne houngaʻia lahi ʻi he ngafa makehe ko e fataki ʻa e huafa ʻo Sihová. Naʻá ne pehē: “Naʻe hoko ʻa hoʻo folofolá ko e fiefiaʻanga kiate au mo e nēkenekaʻanga ʻo hoku lotó, he kuo uiʻaki au ho huafá, ʻe Sihova ko e ʻOtua.” (Selemaia 15:16) Tali ʻa e ngaahi fehuʻi ko ení:
-
Ko e hā ko ha monū makehe ai ke hoko ko e taha ʻo e Kau Fakamoʻoni ʻa Sihová?
-
ʻOkú ke loto ke hoko ʻo papitaiso ko e taha ʻo e Kau Fakamoʻoni ʻa Sihová?
-
ʻOku ʻi ai ha meʻa ʻokú ne taʻofi koe mei hono fai iá?
-
Ko e hā ʻokú ke fakakaukau ʻoku fiemaʻu ke ke fai ke aʻu ki he taumuʻa ko e papitaisó?
ʻOKU PEHĒ ʻE HE NIʻIHI: “ʻOku ou fakakaukau heʻikai lava ke u moʻuiʻaki ʻa e fatongia ko ha tokotaha papitaiso.”
-
Ko e anga ia ʻo hoʻo ongoʻí?
FAKANOUNOU
ʻI he tokoni ʻa Sihová, ʻe lava ke ke ikuʻi ha fakafaingataʻaʻiaʻanga pē ki he papitaisó.
Fakamanatu
-
Ko e hā ʻa e lahi ʻo e ʻilo Fakatohitapu ʻokú ke fiemaʻú ki muʻa ke ke hoko ʻo papitaisó?
-
Ko e hā ʻa e ngaahi liliu ʻoku fiemaʻu ke ke faí ki muʻa ke ke hoko ʻo papitaisó?
-
Ko e hā ʻoku ʻikai totonu ai ke ke fakaʻatā ʻa e ilifiá ke ne taʻofi koe?
AKO LAHI ANGE
Fakakaukau ki he meʻa ʻoku totonu ko e makatuʻunga ia ki hoʻo fili ke hoko ʻo papitaisó.
“ʻOkú Ke Mateuteu ke Papitaiso?” (Ko e Taua Leʻo, Maʻasi 2020)
Ako ki he founga ke ikuʻi ha ngaahi fakafaingataʻaʻiaʻanga te ne taʻofi nai koe.
“Ko e Hā ʻOkú Ne Taʻofi Au mei he Papitaisó?” (Ko e Taua Leʻo, Maʻasi 2019)
Sio ki hono ikuʻi lavameʻa ʻe ha tangata ha ngaahi fakafaingataʻaʻiaʻanga lalahi kae lava ke ne hoko ʻo papitaiso.
ʻI he kamatá, naʻe toumoua ha tangata ko Ataa ke hoko ʻo papitaiso. Sio ki he meʻa naʻá ne fakatuipauʻi ia ke fai ʻa e fili mahuʻinga ko ení.
Te Ke Fie Vakai Foki ki Heni
NGAAHI FEHUʻI ʻOKU TOUTOU ʻEKE
Ko e Hā ʻa e Polokalama Ako Tohi Tapu ʻOku Fai ʻe he Kau Fakamoʻoni ʻa Sihová?
ʻI he polokalama ako fetalanoaʻaki taʻetotongi ʻa e Kau Fakamoʻoni ʻa Sihová, ʻe lava ke ke ngāueʻaki ai ha faʻahinga liliu Tohi Tapu pē. Ongoʻi tauʻatāina ke fakaafeʻi ʻa e kotoa ho fāmilí pe kaumeʻá ke kau fakataha mo koe.
