ʻOku tau saiʻia kotoa ke fili ʻa e vala ke tau tuí mo e founga ke tau teuteu aí. Kapau ʻoku tau muimui ki ha ngaahi tefitoʻi moʻoni Fakatohitapu faingofua, ʻe lava ke tau fili ke tui ʻa e vala ʻoku tau saiʻia aí pea toe fakahōifua kia Sihova. Tau lāulea angé ki ha niʻihi ʻo e ngaahi tefitoʻi moʻoni ko iá.

1. Ko e hā ʻa e ngaahi tefitoʻi moʻoni te ne tokoniʻi kitautolu ke fili ʻa e vala mo e teuteu ke ʻaí?

ʻOku totonu ke tau “teuʻaki ʻa e kofu ʻoku feʻunga ke ʻai, fakataha mo e anga-fakanānā mo e fakakaukau lelei,” pea tauhi maʻu ha fōtunga hā mai ʻoku maʻa ʻo tapua atu ai ʻetau “anga-līʻoa ki he ʻOtuá.” (1 Tīmote 2:9, 10) Lāulea ki he ngaahi tefitoʻi moʻoni ko eni ʻe fā: (1) ʻOku totonu ke feʻungamālie mo taau hotau valá. Mahalo pē kuó ke sio ai ʻi he ngaahi fakataha ʻa e kakai ʻa Sihová, ʻoku tau ʻai vala ʻi he ngaahi founga kehekehe. Ka ko hotau valá mo e founga ʻetau ʻai ʻulú ʻoku fakahaaʻi maʻu pē ai ʻa e fakaʻapaʻapa ki hotau ʻOtuá. (2) ʻI heʻetau ʻai vala ʻi he anga-fakanānaá ʻoku ʻuhingá ʻoku ʻikai ke tau ʻai vala ʻi ha founga ʻoku fakatupunga ai ʻa e niʻihi kehé ke maʻu ha ngaahi fakakaukau hala pe tohoakiʻi mai ʻa e tokanga tōtuʻa kiate kitautolu. (3) ʻOku tau fakahāhā ʻa e fakakaukau leleí ʻi he ʻikai ke tau muimui ʻi he sitaila vala mo e teuteu kotoa ʻoku manakoa he taimí ni. (4) Ko hotau fōtunga hā maí ʻoku totonu maʻu pē ke ne tapua atu ʻa e “anga-līʻoa ki he ʻOtuá,” ʻo fakahaaʻi ai ki he niʻihi kehé ʻoku tau lotu ki he ʻOtua moʻoní.​—1 Kolinitō 10:31.

2. Ko e hā ʻoku lelei ai ke tau fakakaukau ki hotau fanga tokouá mo e fanga tuofāfiné ʻi heʻetau fili hotau valá?

Lolotonga ʻoku tau maʻu ʻa e tauʻatāina ke fili ʻa e vala ke tau tuí, ʻoku totonu ke tau fakakaukau pe ʻe uesia ʻa e niʻihi kehé ʻi heʻetau ʻai valá. ʻOku tau fai hotau lelei tahá ke ʻoua ʻe fakalotomamahiʻi ha taha, ka ʻi hono kehé, ʻoku tau feinga ke fakahōhōʻiaʻi hotau “kaungāʻapí ki ha lelei kiate ia, ke langa hake ai ia.”​—Lau ʻa e Loma 15:1, 2.

3. ʻE lava fēfē ʻe hotau fōtunga hā maí ʻo tohoakiʻi mai ʻa e niʻihi kehé ki he lotu moʻoní?

ʻOku tau feinga maʻu pē ke ʻai e vala taau ʻi he taimi kotoa pē, kae tautefito ʻi hono maʻu ʻa e ngaahi fakataha ʻa e fakatahaʻangá mo e kau atu ʻi he ngāue fakamalangá. ʻOku ʻikai ke tau loto ke fakaleluʻi e tokanga ʻa e kakaí mei he ongoongo lelei mahuʻinga ʻoku tau ʻoatú. ʻI hono kehé, ʻoku tau loto ke ʻai hotau fōtunga hā maí ke tohoakiʻi ʻa e kakaí ki he ʻOtua ʻoku tau lotu ki aí pea ke “ʻai ke teungaʻia . . . ʻa e akonaki ʻa hotau Fakamoʻuí.”​—Taitusi 2:10.

 KELI LOLOTO ANGE

4. Ko ha fōtunga hā mai taau ʻoku fakahaaʻi ai ʻa e fakaʻapaʻapa kia Sihova

Ko e hā ʻa e ʻuhinga mahuʻinga taha kiate kitautolu ke tokanga ai ki hotau fōtunga hā maí? Lau ʻa e Saame 47:2, pea lāulea leva ki he ngaahi fehuʻi ko ení:

• ʻI heʻetau manatuʻi ʻoku tau fakafofongaʻi ʻa Sihová ʻoku totonu ke tākiekina fēfē ai ʻa e anga ʻetau ʻai valá?

• ʻOkú ke fakakaukau ʻoku mahuʻinga ke tau tokanga ki hotau fōtunga hā maí ʻi heʻetau maʻu ʻa e ngaahi fakatahá mo kau atu ʻi he ngāue fakamalangá? Ko e hā hono ʻuhingá?

 5. Founga hono fai ʻa e ngaahi fili lelei fekauʻaki mo e ʻai valá mo e teuteú

Huluʻi ʻa e VITIOÓ.

Tatau ai pē pe naʻe totongi mamafa pe maʻamaʻa hotau valá, ʻoku totonu ke maʻa mo feʻungamālie mo e tuʻunga ʻoku tau ʻi aí. Lau ʻa e 1 Kolinitō 10:24 mo e 1 Tīmote 2:9, 10. Lāulea leva ki he ʻuhinga ʻoku fiemaʻu ai ke tau fakaʻehiʻehi mei hono tui ʻa e vala ʻoku . . .

• ʻikai maʻa mo maau.

• fuʻu manoʻonoʻo, aata pe fakatupunga ʻa e ngaahi fakakaukau hala ʻi he niʻihi kehé.

Neongo ʻoku ʻikai muimui ʻa e kau Kalisitiané ki he Lao ʻa Mōsesé, ka ʻoku fakahaaʻi ai ʻa e anga ʻo e fakakaukau ʻa Sihová. Lau ʻa e Teutalōnome 22:5, pea lāulea leva ki he fehuʻi ko ení:

• Ko e hā ʻoku totonu ai ke tau fakaʻehiʻehi mei he ʻai vala mo e teuteu ʻokú ne ʻai ʻa e tangatá ke hā mai hangē ha fefiné, pe fefiné ke hā mai hangē ha tangatá?

Lau ʻa e 1 Kolinitō 10:32, 33 mo e 1 Sione 2:15, 16, pea lāulea leva ki he ngaahi fehuʻi ko ení:

• Ko e hā ʻoku totonu ai ke tau tokanga ki hotau fōtunga hā maí naʻa fakalotomamahiʻi ai ha niʻihi ʻi hotau koló pe ʻi he fakatahaʻangá?

• Ko e hā ʻa e sitaila vala pe teuteu ʻoku anga-maheni ʻi he feituʻu ʻokú ke nofo aí?

• ʻOkú ke fakakaukau nai ʻoku ʻikai feʻungamālie ki ha Kalisitiane ʻa e niʻihi ʻo e ngaahi sitaila vala ko iá? Ko e hā hono ʻuhingá?

 FAKANOUNOU

ʻI heʻetau fai ʻa e ngaahi fili lelei ʻi he fekauʻaki mo hotau fōtunga hā maí, ʻoku tau fakahāhaaʻi ai ʻetau fakaʻapaʻapa kia Sihova mo e niʻihi kehé.

Fakamanatu

• Ko e hā ʻoku mahuʻinga ai kia Sihova ʻetau ʻai valá mo e teuteú?

• Ko e hā ʻa e ngaahi tefitoʻi moʻoni ʻoku totonu ke ne tataki ʻetau ngaahi fili fekauʻaki mo hotau fōtunga hā maí?

• ʻE anga-fēfē hono tākiekina ʻe hotau fōtunga hā maí ʻa e anga ʻo e vakai ʻa e niʻihi kehé ki he lotu moʻoní?