Ko e akonaki Fakatohitapu tefito ‘oku lāulea ki ai ‘i he Fale Fakataha‘angá ‘oku fakahangataha ia ki he Pule‘anga ‘o e ‘Otuá​—‘a e kaveinga ‘o e ngāue fakafaifekau ‘a Sīsuú.​—Luke 8:1.

Ko e ngaahi senitā ia ‘o e lotu mo‘oní ‘i he koló. ‘Oku fakahoko mei he feitu‘u ko iá hono malanga‘i ‘a e ongoongo lelei ‘o e Pule‘angá. (Mātiu 24:14) ‘Oku kehekehe ‘a e lahi mo e sīpinga ‘o e ngaahi Fale Fakataha‘angá, ka ko e kotoa ‘o kinautolú ko e ngaahi langa lahi fe‘unga pē, ‘a ia ‘e lava ke ngāue‘aki ‘e he fakataha‘anga ‘e taha pe lahi ange. ‘I he ngaahi ta‘u ki mui ní, kuo mau langa ai ‘a e ngaahi Fale Fakataha‘anga fo‘ou ‘e laui mano (ko ha ‘avalisi ‘o e nima he ‘aho taki taha) koe‘uhí ke ‘alu fakataha mo e tupulaki ‘i he‘emau ngaahi fakataha‘angá. ‘Oku malava fēfē ‘a e me‘á ni?​—Mātiu 19:26.

‘Oku langa ia ‘aki ‘a e ngaahi tokoni kuo ‘ai ki ha pa‘anga tefito. Ko e ngaahi tokoni ko ení ‘oku ‘ave ia ki he ‘ōfisi va‘á koe‘uhí ke lava ‘o ‘ai ke ala ma‘u ‘e he ngaahi fakataha‘anga ‘oku nau fiema‘u ke langa pe fulihi ‘a e sīpinga ‘o ha Fale Fakataha‘anga.

‘Oku langa ia ‘e he kau ngāue pole ta‘etotongi mei he ngaahi tu‘unga kehekehe ‘o e mo‘uí. ‘I he ngaahi fonua lahi, kuo fokotu‘utu‘u maau ai ‘a e Ngaahi Kulupu Langa Fale Fakataha‘anga. Ko e ngaahi timi langa ‘o e kau sevāniti mo e kau ngāue pole ‘oku nau hiki mei he fakataha‘anga ‘e taha ki hono hokó ‘i loto ‘i ha fonua, na‘a mo e ngaahi feitu‘u mama‘o, ke tokoni ki he ngaahi fakataha‘anga fakalotofonuá ‘i hono langa honau ngaahi Fale Fakataha‘angá. ‘I he ngaahi fonua kehé, kuo fakanofo ‘a e Kau Fakamo‘oni taau ke nau tokanga‘i ‘a hono langa mo hono fakalelei‘i ‘o e ngaahi Fale Fakataha‘anga ‘i ha feitu‘u kuo ‘osi vahe‘i ki ai. Neongo ‘oku pole ha kau tangata pōto‘i ngāue tokolahi mei he feitu‘ú ke nau fai ‘a e ngāué ‘i he feitu‘u langa kotoa pē, ko e ngaahi mēmipa ‘o e fakataha‘anga fakalotofonuá ‘oku nau kau ‘i he konga lahi taha ‘o e kau ngāue polé. Ko e laumālie ‘o Sihová pea mo e ngaahi feinga ‘aufuatō ‘a hono kakaí ‘oku ‘ai ai ke malava ‘a e me‘a kotoa ko ení.​—Saame 127:1; Kolose 3:23.

• ‘Oku malava fēfē ke langa ‘a e ngaahi Fale Fakataha‘anga takatakai ‘i he māmaní kotoa?