‘Oku fakamatala ‘a e Tohi Tapú ki he kulupu ‘e ua ‘o e kau tangata Kalisitiane ‘a ia ‘oku nau tokanga‘i ‘a e ngaahi fatongia ‘i he fakataha‘angá—ko e ‘kau mātu‘a mo e kau sevāniti fakafaifekau.’ (Filipai 1:1) ‘I he tu‘unga lahi, ‘oku ‘i ai ha fanga tokoua tokolahi pehē ‘oku nau tauhi ‘i he fakataha‘anga taki taha. Ko e hā ‘a e ngāue ‘oku fai ‘e he kau sevāniti fakafaifekaú ke tau ma‘u ‘aonga mei aí?

‘Oku nau tokoni ki he kulupu ‘o e kau mātu‘á. Ko e kau sevāniti fakafaifekaú ko e kau tangata fakalaumālie, alafalala‘anga mo ngāue mālohi, ko e ni‘ihi ‘oku nau kei si‘i ange, pea ko e ni‘ihi ‘oku nau ta‘umotu‘a ange. ‘Oku nau tokanga‘i ‘a e ngaahi ngāue mahu‘inga ka ‘oku fa‘a fai tu‘uma‘u fakaekautahá mo e ngaahi ngāue fakaesino ‘a ia kuo pau ke fakahoko ‘i he fakataha‘angá. ‘Oku faka‘atā ai heni ‘a e kau mātu‘á ke nau tokangataha ki he ngaahi fatongia fakafaiakó mo fakatauhisipí.

‘Oku nau fai ‘a e ngaahi ngāue ‘aonga. ‘Oku vahe‘i ‘a e kau sevāniti fakafaifekau ‘e ni‘ihi ke nau hoko ko e kau fakanofonofo ke nau talitali lelei ‘a e tokotaha kotoa ‘oku a‘u mai ki he ngaahi fakatahá. ‘Oku tokanga‘i nai ‘e he ni‘ihi ‘a e naunau fakale‘olahí, ko e tufaki ‘o e ‘ū tohí, ko e pa‘anga ‘a e fakataha‘angá, pea mo hono vahe‘i ‘a e feitu‘u ngāue fakamalangá ki he ngaahi mēmipa ‘o e fakataha‘angá. ‘Oku nau toe tokoni ki hono tokanga‘i ‘a e Fale Fakataha‘angá. ‘E kole ange nai ‘e he kau mātu‘á kiate kinautolu ke nau fai ha tokoni ki he kau ta‘umotu‘á. Ko e hā pē ‘a e ngaahi fatongia ‘oku ‘oange ki he kau sevāniti fakafaifekaú, ko ‘enau loto-lelei ke fakahoko ení ‘oku nau ma‘u ai ‘a e faka‘apa‘apa ‘a e tokotaha kotoa.—1 Tīmote 3:13.

‘Oku nau fokotu‘u ha fa‘ifa‘itaki‘anga lelei ‘i he tu‘unga ko e kau tangata Kalisitiane. ‘Oku fili ‘a e kau sevāniti fakafaifekaú koe‘uhí ko honau ngaahi ‘ulungaanga lelei fakalaumālié. ‘I he taimi ‘oku nau fai ai ‘a e ngaahi konga ‘i he ngaahi fakatahá, ‘oku nau ‘ai ai ke mālohi ‘a ‘emau tuí. ‘I he takimu‘a he ngāue fakamalangá, ‘oku nau faka‘ai‘ai ke mau toe faivelenga ange. Koe‘uhí ko ‘enau fie ngāue fāitahá, ‘oku nau pouaki ai ‘a e fiefia mo e fā‘ūtaha. (‘Efesō 4:16) ‘I he faai mai ‘a e taimí, ‘e lava nai ai ke nau taau foki ke ngāue ko ha kau mātu‘a.

• Ko e kau tangata fēfē ‘a e kau sevāniti fakafaifekaú?

• ‘Oku anga-fēfē tokoni ‘a e kau sevānití ki he fakataha‘angá ke lele leleí?