Na‘e tomu‘a tala ‘e he Tohi Tapú ‘i he hili ‘a e pekia ‘a Kalaisí, ‘e tupu hake ai ha kau faiako loi ‘i he ha‘oha‘onga ‘o e mu‘aki kau Kalisitiané ‘o nau fakamele‘i ‘a e mo‘oni ‘o e Tohi Tapú. (Ngāue 20:29, 30) ‘I he faai mai ‘a e taimí, ko e me‘a tofu pē ia na‘e hokó. Na‘a nau fio ‘a e ngaahi akonaki ‘a Sīsuú mo e ngaahi fakakaukau fakalotu fakapanganí, pea na‘e tupu mei ai ha founga lotu faka-Kalisitiane loi. (2 Tīmote 4:3, 4) ‘E lava fēfē ke tau fakapapau‘i ‘oku tau ma‘u he ‘ahó ni ‘a e mahino totonu ki he me‘a ‘oku ako‘i mo‘oni ‘e he Tohi Tapú?

Hoko mai ‘a e taimi ke fakae‘a ai ‘e Sihova ‘a e mo‘oní. Na‘á ne tomu‘a tala ‘i he lolotonga ‘a e ‘taimi ‘o e ngata‘angá ‘e lahi ‘aupito ‘a e ‘ilo mo‘oní.’ (Taniela 12:4) ‘I he 1870, na‘e ‘ilo‘i ai ‘e ha ki‘i kulupu ‘o e kau kumi ki he mo‘oní ko e lahi ‘o e ngaahi tokāteline ‘a e ngaahi siasí na‘e ‘ikai Fakatohitapu. Ko ia ai, na‘a nau kamata ke kumi ki hano mahino‘i ‘o e ngaahi mu‘aki akonaki ‘a e Tohi Tapú, pea na‘e tāpuaki‘i kinautolu ‘e Sihova ‘aki ha mahino fakalaumālie.

Ako fakalelei ‘e he kau tangata loto-mo‘oní ‘a e Tohi Tapú. Ko e Kau Ako Tohi Tapu tōtōivi ko iá, hangē ko ia na‘e ui‘aki ‘a e Kau Fakamo‘oni ‘a Sihová, na‘a nau fekumi ki ha founga ‘o e akó ‘a ē ‘oku mau kei ngāue‘aki he ‘aho ní. Na‘a nau lāulea fakakaveinga ki he Tohi Tapú. ‘I he‘enau a‘u ki ha konga Tohi Tapu na‘e faingata‘a ke mahino‘i, na‘a nau kumi ki ha ngaahi veesi kehe ke fakamatala‘i ia. ‘I he‘enau a‘u ki ha fakamulituku na‘e feongoongoi mo e toenga ‘o e Folofolá, na‘a nau tohi‘i ia. ‘I hono tuku ‘a e Tohi Tapú ke ne faka‘uhinga‘i pē ‘a ia tonú, na‘a nau toe ‘ilo ai ‘a e mo‘oni fekau‘aki mo e huafa pea mo e Pule‘anga ‘o e ‘Otuá, ko ‘ene taumu‘a ki he fa‘ahinga ‘o e tangatá mo e māmaní, ko e tu‘unga ‘o e kau maté, mo e ‘amanaki ‘o e toetu‘ú. Ko ‘enau fekumí na‘e fakatau‘atāina‘i ai kinautolu mei he ngaahi tui mo e ngaahi tō‘onga hala lahi.​—Sione 8:31, 32.

‘I he a‘u mai ki he 1879 na‘e ‘ilo ai ‘e he Kau Ako Tohi Tapú kuo hoko ‘a e taimi ke ‘ai ai ‘a e mo‘oní ke ‘ilolahia. Ko ia ‘i he ta‘u ko iá, na‘a nau kamata fa‘u ai ‘a e makasini ‘a ia ‘oku mau kei pulusi he ‘ahó ni, Ko e Taua Le‘o ‘Oku Fanongonongo Ai ‘a e Pule‘anga ‘o Sihová. ‘Oku mau vahevahe atu he taimí ni ‘a e ngaahi mo‘oni Fakatohitapú ki he kakai ‘i he ngaahi fonua ‘e 240 ‘i he ngaahi lea ‘e 750 tupu. Kuo te‘eki ha taimi ki mu‘a ‘e mātu‘aki mafolalahia ai ‘a e ‘ilo mo‘oní!

• Hili ‘a e pekia ‘a Kalaisí, ko e hā na‘e hoko ki he mo‘oni ‘o e Tohi Tapú?

• Ko e hā kuó ne ‘ai kimautolu ke mau malava ‘o toe ‘ilo ‘a e mo‘oni mei he Folofola ‘a e ‘Otuá?