Kuó ke fakatokanga‘i ‘i he ngaahi fakatātā he polosiuá ni ‘a e anga ‘o e teunga lelei ‘a e Kau Fakamo‘oni ‘a Sihová ‘i he taimi ‘oku nau ma‘u ai ‘enau ngaahi fakataha ‘i he fakataha‘angá? Ko e hā ‘oku mau tokanga pehē ai ki homau valá mo e teuteú?

Ke fakahaa‘i ‘a e faka‘apa‘apa ki homau ‘Otuá. Ko e mo‘oni ia ‘oku sio fakalaka atu ‘a e ‘Otuá ‘i homau fōtunga hā mai ‘i tu‘á. (1 Sāmiuela 16:7) Kae kehe, ‘i he‘emau fakatahataha mai ke lotu kiate iá, ko ‘emau holi loto-mo‘oní ia ke fakahaa‘i ‘a e faka‘apa‘apa fakatou‘osi kiate ia pea ki homau ngaahi kaungālotú. Kapau ‘e fiema‘u ke mau tu‘u ‘i he ‘ao ‘o ha fakamaau ‘i he fakamaau‘angá, ngalingali te mau tokanga ki homau fōtunga hā maí koe‘uhí ko ‘emau faka‘apa‘apa ia ki hono tu‘ungá. ‘Oku pehē pē, ko e anga ‘emau hā ‘i he‘emau ngaahi fakatahá ‘oku fakahaa‘i ai ‘emau fakahīkihiki ki he “Fakamaau ‘o māmaní kotoa,” ‘a Sihova ko e ‘Otuá, pea ki he feitu‘u ko ia ‘oku mau lotu ai kiate iá.​—Sēnesi 18:25.

Ke tapua atu ‘a e ngaahi tu‘unga ‘oku mau mo‘ui‘akí. ‘Oku fakalototo‘a‘i ‘e he Tohi Tapú ‘a e kau Kalisitiané ke nau ‘ai vala “fakataha mo e anga-fakanānā mo e fakakaukau lelei.” (1 Tīmote 2:9, 10) Ko e ‘ai vala “fakataha mo e anga-fakanānā” ‘oku ‘uhingá ke faka‘ehi‘ehi mei he vala ‘a ia ‘e tohoaki‘i mai nai ai ha tokanga kia kimautolu ‘i he hoko ‘o fiehā, faka‘ai‘ai ki he fehokotaki fakasino, pe fakatelefua. Pehē foki, ko hono ma‘u ‘a e “fakakaukau lelei” ‘oku tokoni ia kiate kimautolu ke fili ‘a e vala lelei ‘a ia ‘oku ‘ikai ke ‘ai‘ainoa‘ia pe fu‘u tōtu‘a. Ko e ngaahi tefito‘i mo‘oni ko ení ‘oku kei faka‘atā mai ai ke fai ha ngaahi fili fakafo‘ituitui lahi kehekehe. ‘I he ‘ikai ha leá, ko ‘emau hā lelei mo faka‘ofo‘ofá ‘e lava ke ‘teunga‘ia ai ‘a e akonaki ‘a hotau Fakamo‘uí’ pea “fakalāngilangi‘i ai ‘a e ‘Otuá.” (Taitusi 2:10; 1 Pita 2:12) ‘I he teunga lelei ki he ngaahi fakatahá, ‘oku mau tākiekina ai ‘a e anga ‘o e vakai mai ‘a e ni‘ihi kehé ki he lotu ‘a Sihová.

‘Oua ‘e ‘ai ho valá ke ne ta‘ofi koe mei ho‘o ha‘u ki he Fale Fakataha‘angá. Ko hotau valá ‘oku ‘ikai fiema‘u ia ke totongi mamafa pe ‘asi makehe ke hoko ai ‘o taau, ma‘a mo matamatalelei.

• ‘Oku mahu‘inga fēfē ‘a e anga ‘o ‘etau ‘ai valá ‘i he taimi ‘oku tau lotu ai ki he ‘Otuá?

• Ko e hā ‘a e ngaahi tefito‘i mo‘oni ‘okú ne tataki ‘etau ngaahi fili ‘i he valá mo e teuteú?