KO E loto-moʻuá ʻokú ne uesia ʻa e tokotaha kotoa—naʻa mo e kakai ʻa e ʻOtuá. Naʻe tohi ʻa e tokotaha-tohi-sāmé ʻo pehē ʻoku “lahi ʻa e hohaʻa ʻi hoku loto.” (Saame 94:19) Pea naʻe pehē ʻe Sīsū ʻi he lolotonga ʻa e taimi ʻo e ngataʻangá, ʻe lava ke ʻai ʻe he “ngaahi loto-moʻua ʻo e moʻuí” ke mātuʻaki faingataʻa ʻa e tauhi kia Sihová. (Luke 21:34) Kae fēfē koe? ʻOku lōmekina koe ʻe he palopalema fakapaʻangá, palopalema fakafāmilí, pe hohaʻa ki he moʻui leleí? ʻE lava fēfē ke tokoniʻi koe ʻe Sihova ke ke fekuki mo ia?

Heʻikai lava ke tau fekuki mo e loto-moʻuá ʻia kitautolu pē. ‘ʻOku lōmia kitautolu ʻi he founga kotoa pē,’ ko e tohi ia ʻa e ʻapositolo ko Paulá. ‘ʻOku tau hēhētuʻu . . . ; ʻoku lī kitautolu ki lalo.’ Kae kehe, naʻá ne toe pehē ʻoku ʻikai ke tau “fihiatuʻu ʻo taʻelava ai ha ngaue takai holo,” ʻo ‘ʻikai ʻaupito ke taʻeʻiai hatau haoʻanga,’ pea “ʻikai fakaʻauha.” Ko e hā te ne tokoniʻi kitautolu ke kātakí? Ko e “mālohi ʻoku mahulu atu ia ʻi he tuʻunga anga-mahení”—ʻa e mālohi mei hotau ʻOtua māfimafi-aoniú, ʻa Sihova.—⁠2 Kolinitō 4:7-9.

Fakakaukauloto ki he founga naʻá ke maʻu ai ʻa e “mālohi ʻoku mahulu atu ia ʻi he tuʻunga anga-mahení” ʻi he kuohilí. ʻOkú ke manatuʻi ha malanga fakalototoʻa naʻá ne fakalolotoʻi hoʻo houngaʻia ki he ʻofa mateaki ʻa Sihová? Naʻe mālohi ange hoʻo tui ki he ngaahi talaʻofa ʻa Sihová ʻi he taimi naʻá ke akoʻi ai ʻa e niʻihi kehé fekauʻaki mo e ʻamanaki ʻo e Palataisí? ʻI heʻetau maʻu ʻa e ngaahi fakataha faka-Kalisitiané mo vahevahe atu ʻetau tuí ki he niʻihi kehé, ʻoku tau maʻu ai ʻa e mālohi ke kātekina ʻa e ngaahi loto-moʻua ʻo e moʻuí pea tau maʻu ai ʻa e nonga ʻo e ʻatamaí koeʻuhí ke tau lava ai ʻo tauhi fiefia kia Sihova.

Ko hono moʻoní, te ke ongoʻi nai ʻoku tohoakiʻi koe ʻe he ngaahi meʻa kehekehe ʻi he taimi pē taha. Ko e fakatātaá, ʻoku kole mai ʻe Sihova ke tau fuofua kumi ki he Puleʻangá pea tauhi maʻu ha founga-tuʻumaʻu fakalaumālie. (Mātiu 6:33; Luke 13:24) Kae fēfē kapau ʻoku ʻai koe ʻe he fakatangá, mahamahakí, pe palopalema fakafāmilí ke ke helaʻia ʻaupito? Pe fēfē kapau ʻoku toʻo ʻe hoʻo ngāue fakamāmaní ʻa e taimi mo e ivi naʻá ke mei fakamoleki mo e fakatahaʻangá? ʻI hono kounaʻi koe ʻe he ngaahi meʻa ke faí—pea siʻi ʻaupito ʻa e taimi mo e ivi ke fai ʻaki iá—te ke ongoʻi lōmekina nai. Kuó ke aʻu ʻo fifili nai pe ʻoku ʻamanekina ʻe Sihova ha meʻa lahi ʻaupito meiate koe.

ʻOku maʻu ʻe Sihova ʻa e mahinó. ʻOku ʻikai ʻaupito te ne ʻamanekina meia kitautolu ha meʻa lahi ange ʻi heʻetau malavá. Pea ʻokú ne ʻafioʻi ʻoku tau fiemaʻu ha taimi ke fakaakeake ai mei ha mafasia fakaesino mo fakaeongo.—Saame 103:13, 14.

Ko e fakatātaá, fakakaukau ki he anga hono tokangaʻi ʻe Sihova ʻa e palōfita ko ʻIlaisiaá. ʻI he taimi naʻe hoko ai ʻa ʻIlaisiā ʻo mātuʻaki loto-siʻi mo manavaheé peá ne hola ki he toafá, naʻe ngāhiʻi ʻe Sihova ʻa e palōfitá pea tuʻutuʻuni atu ke ne foki ki heʻene ngāué? ʻIkai. Naʻe fekau tuʻo ua atu ʻe Sihova ha  ʻāngelo ke fafangu fakalelei hake ʻa ʻIlaisiā pea ʻoange kiate ia ha meʻakai ke ne kai. Naʻa mo ia, ʻi he ʻaho ʻe 40 ki mui ai, naʻe kei loto-moʻua mo manavahē ʻa ʻIlaisiā. Ko e hā mo ha toe meʻa naʻe fai ʻe Sihova ke tokoniʻi ia? ʻUluakí, naʻe fakahaaʻi ʻe Sihova te ne malava ke maluʻi ia. Uá, naʻe fakafiemālieʻi ʻe Sihova ʻa ʻIlaisiā ʻaki ha “leʻo naʻe ngananganaiki mai.” Fakaʻosí, naʻe fakaeʻa ʻe Sihova naʻe ʻi ai mo e faʻahinga ʻe laui afe ʻoku nau lotu faitōnunga ki he ʻOtuá. Naʻe vave ʻa e toe longomoʻui ʻa ʻIlaisiā ʻi he tuʻunga ko ha palōfita faivelenga. (1 Tuʻi 19:1-19) Ko e hā ʻa e lēsoní? ʻI he taimi naʻe lōmekina ai ʻa ʻIlaisiā ʻe he loto-moʻuá, naʻe fakafeangai ʻa Sihova kiate ia ʻi he anga-kātaki mo e manavaʻofa. Kuo ʻikai liliu ʻa Sihova. ʻOkú ne tokanga lahi mai kiate kitautolu ʻi he founga tatau.

ʻI he taimi ʻokú ke fakakaukau ai ki he meʻa ʻe lava ke ke ʻoatu kia Sihová, hoko ʻo faitotonu. ʻOua ʻe fakahoa ʻa e meʻa ʻoku lava ke ke fai he ʻaho ní mo e meʻa naʻá ke faʻa faí. Ke fakatātaaʻi: Ko ha tokotaha lele kuo tuku ʻene fakamālohisinó ʻi ha laui māhina pe ngaahi taʻu ʻe ʻikai lava ke ne tafoki hake pē ʻo hoko atu ʻene founga-tuʻumaʻu ki muʻá. Ka, te ne kamata ke fokotuʻu ha ngaahi taumuʻa iiki ke toe maʻu mai ai hono mālohí mo ʻene kātakí. Ko e kau Kalisitiané ʻoku nau hangē ha kau lová. ʻOku nau fakamālohisino fakataha mo e fakakaukau atu ki ha taumuʻa pau. (1 Kolinitō 9:24-27) Ko e hā ʻoku ʻikai ai te ke tuli ki ha taumuʻa fakalaumālie ʻe taha ʻe mātuʻaki faingofua ke ke aʻusia he taimi ní? Ko e fakatātaá, te ke fokotuʻu nai ʻa e taumuʻa ke maʻu ʻa e fakataha ʻa e fakatahaʻangá. Kole kia Sihova ke ne tokoniʻi koe ke lavaʻi ʻa hoʻo taumuʻá. ʻI hoʻo toe maʻu ʻa e mālohi fakalaumālié, te ke “kamata o vakai oku lelei a Jihova.” (Saame 34:8, PM) Manatuʻi ko ha meʻa pē te ke fai ke fakahaaʻi hoʻo ʻofa kia Sihová—ʻo tatau ai pē pe ʻoku siʻisiʻi fēfē—ʻoku mahuʻinga kiate ia.—Luke 21:1-4.

Naʻe anga-fēfē hono fakaivia ʻe Sihova ʻa June ke foki ange kiate iá? ʻOkú ne pehē: “Naʻá ku hanganaki lotu kia Sihova, ʻo kole kiate ia ke ne tokoniʻi au. Naʻe tala mai ʻe hoku ʻofefine-ʻi-he-fonó ʻoku ʻi ai ha ʻasemipilī ʻi hoku feituʻú. Naʻá ku fakakaukau ke maʻu ha ʻaho ʻe taha ʻo e ʻasemipilií. He fakafiefia moʻoni ē ke toe fakataha mo e kakai ʻa Sihová! Ko e ʻasemipilī ko iá naʻe hoko ko e tokoni ia naʻá ku tatali ki aí. ʻOku ou toe fiefia he taimí ni ʻi he tauhi kia Sihová. ʻOku mātuʻaki mohu ʻuhinga ange ʻa e moʻuí kiate au. ʻOku ou ʻiloʻi pau he taimí ni ʻa ʻeku fiemaʻu hoku fanga tokouá mo tali ʻenau tokoní. ʻOku ou fakamālō ʻi he kei taimi ʻeku foki maí.”