‘I he taimi ‘oku ‘i ai ai hao kaume‘a ‘a ia ‘okú ke fakamā‘olunga‘i mo toka‘i, ‘okú ke feinga ke hoko ‘o hangē ko iá. “‘Oku lelei mo angatonu ‘a Sihova,” ko e lau ia ‘a e Tohitapú. (Sāme 25:8) Ke hoko ko e kaume‘a ‘o e ‘Otuá, kuo pau ke tau lelei mo anga-tonu. ‘Oku pehē ‘e he Tohitapú: “Mou hoko mu‘a ko e kau fa‘ifa‘itaki ki he ‘Otua, ‘o tāu mo e fanau kuo ‘ofeina: pea fou ‘i he ‘ofa.” (Efeso 4:32, 33 [5:1, 2, PM]) Ko e ngaahi founga eni ‘e ni‘ihi ke fai ai iá:

Fa‘a tokoni ki he ni‘ihi kehé. “Ta ngaue ‘aonga ki he kakai kotoa pe.”​—Kaletia 6:10.

Ngāue mālohi. “Ke ‘oua na‘a kei kaiha‘a ‘e he kaiha‘a: ka ne fakafitefita‘a mu‘a, ‘o ngaue‘aki ‘a e ongo nima ko ia ki he me‘a ‘oku lelei.”​—Efeso 4:28.

Tauhi ke ma‘a fakaesino mo fakae‘ulungaanga. “Tau fakama‘a kitautolu mei he ‘uli kotoa pe ‘o e kakano mo e loto, ‘o tau fakakakato ‘etau ma‘oni‘oni ‘i he ‘apasia ki he ‘Otua.”​—2 Kolinito 6:19 (7:1, PM).

 Tō‘ongafai ki he ngaahi mēmipa ‘o ho fāmilí ‘aki ‘a e ‘ofa mo e faka‘apa‘apa. “Ko kimoutolu foki fakafoitangata​—‘e, ke taki taha ‘ofa ki si‘ono uaifi ‘o hange ko ‘ene ‘ofa kiate ia; pea ko e uaifi ke ne faka‘apa‘apa ki hono husepaniti. ‘A e fanau, mou talangofua ‘i he ‘Eiki ki ho‘omou matu‘a.”​—Efeso 5:33–6:1.

Fakahāhā ‘a e ‘ofa ki he ni‘ihi kehé. “Ke tau fe‘ofa‘aki mu‘a: he ko ‘ofa ko e tupu mei he ‘Otua ia.”​—1 Sione 4:7.

Talangofua ki he ngaahi lao ‘a e fonuá. “Ke anganofo ‘a e tangata kotoa pe ki he [founga-pulé] . . . Ko ia mou fai kiate kinautolu kotoa pe ‘a e me‘a ‘oku totonu: ‘a e tukuhau kiate ia ‘oku a‘ana ‘a e tukuhau.”​—Loma 13:1, 7.