Ke hoko ko e kaume‘a ‘o e ‘Otuá, ‘oku fiema‘u ke ke ako ‘o fekau‘aki mo ia. ‘Oku ‘ilo‘i ‘e ho ngaahi kaume‘á ho hingoá pea ngāue‘aki ia? ‘Oku pehē. ‘Oku fiema‘u koe ‘e he ‘Otuá ke ke ‘ilo‘i mo ngāue‘aki foki ‘a hono huafá. Ko e huafa ‘o e ‘Otuá ko Sihova. (Sāme 83:18; Mātiu 6:9) Kuo pau foki ke ke toe ako ki he me‘a ‘okú ne sai‘ia aí mo e me‘a ‘oku ‘ikai te ne sai‘ia aí. ‘Oku fiema‘u ke ke ‘ilo‘i ‘a hono ngaahi kaume‘á pea mo hono ngaahi filí. ‘Oku fiema‘u ha taimi ke ke hoko ai ‘o ‘ilo‘i ha taha. ‘Oku pehē ‘e he Tohitapú ‘oku fakapotopoto ke vahe‘i ha taimi ke ako ai ‘o fekau‘aki mo Sihova.​—Efeso 5:15, 16.

‘Oku fai ‘e he ngaahi kaume‘a ‘o e ‘Otuá ‘a e me‘a ‘oku fakahōifua kiate iá. Fakakaukau atu fekau‘aki mo ho ngaahi kaume‘á. Kapau te ke ngaohikovi‘i kinautolu pea fai ‘a e ngaahi me‘a ‘oku nau fehi‘a aí, te nau hokohoko atu ke hoko ko ho ngaahi kaume‘á? Ko e mo‘oni ‘e ‘ikai! ‘I he founga tatau, kapau ‘okú ke loto ke hoko ko e kaume‘a ‘o e ‘Otuá, ‘oku fiema‘u ke ke fai ‘a e me‘a ‘oku fakahōifua kiate iá.​—Sione 4:24.

‘Oku ‘ikai ke taki atu ‘e he ngaahi lotu kotoa pē ki he kaume‘a mo e ‘Otuá. Ko Sīsū, ‘a ia ko e kaume‘a ofi taha ia ‘o e ‘Otuá, na‘á ne lau ‘o kau ki ha hala ‘e ua. Ko e hala ‘e taha ‘oku fālahi pea ‘oku fonu ia ‘i he kakaí. Ko e hala ko iá ‘oku taki atu ia ki he faka‘auhá. Ko e hala ‘e tahá ‘oku fāsi‘i ia pea ‘oku tokosi‘i ‘a e kakai ‘oku nau fononga aí. Ko e hala ko iá ‘oku taki atu ia ki he mo‘ui ta‘engatá. ‘Oku ‘uhinga ení, kapau ‘okú ke loto ke ke kaume‘a mo e ‘Otuá, kuo pau ke ke ako ‘a e founga totonu ke lotu ai kiate iá.​—Mātiu 7:13, 14.