‘Oku fiema‘u ‘a e feingá ke fakahoko ha kaume‘a; ‘oku fiema‘u ‘a e feingá ke tauhi ha kaume‘a. Ko ho‘o ngaahi feinga ke hoko mo nofo ma‘u ai pē ‘i he hoko ko ha kaume‘a ‘o e ‘Otuá ‘e tāpuaki‘i lahi. Na‘e pehē ‘e Sīsū ki he fa‘ahinga ko ia na‘a nau tui kiate iá: “‘E fakatau‘ataina ‘a kimoutolu ‘e he mo‘oni.” (Sione 8:32) Ko e hā ‘a e ‘uhinga ‘o e me‘a ko iá?

‘E lava ke ke fiefia ‘i he tau‘atāiná he taimí ni. ‘E lava ke ke tau‘atāina mei he ngaahi akonaki loi mo e ngaahi loi ko ia kuo fakamafola ‘e Sētané. ‘E lava ke ke tau‘atāina mei he ta‘e‘iai ha ‘amanaki ko ia ‘okú ne fakafonu ‘a e mo‘ui ‘a e kakai ‘e laui miliona, ‘a ia ‘oku ‘ikai te nau ‘ilo‘i ‘a Sihová. (Loma 8:22) Ko e ngaahi kaume‘a ‘o e ‘Otuá ‘oku a‘u ‘o nau tau‘atāina mei he “manavahe ki he mate.”​—Hepelu 2:14, 15.

‘E lava ke ke fiefia ‘i he tau‘atāina he māmani fo‘ou ‘a e ‘Otuá. Ko ha tau‘atāina fakaofo mo‘oni ē ‘e lava ke ke fiefia ai ‘i he kaha‘ú! ‘I he māmani Palataisí, ‘e ‘i ai ‘a e tau‘atāina mei he taú, mahamahakí, mo e faihiá. Ko e tau‘atāina mei he masivá mo e fiekaiá. Ko e tau‘atāina mei he ta‘umotu‘á mo e maté. Ko e tau‘atāina mei he manavaheé, fakafe‘ātungiá, mo e fakamaau ta‘etotonú. ‘Oku pehē ‘e he Tohitapú ‘o kau ki he ‘Otuá: “‘Oku ke folahi ho nima, pea ke fakamakona ‘a e holi ‘a e me‘a mo‘ui kotoa.”​—Sāme 145:16.

 ‘E mo‘ui ta‘engata ‘a e ngaahi kaume‘a ‘o e ‘Otuá. Ko e mo‘ui ta‘engatá ko ha me‘a‘ofa mahu‘inga ia ‘a ia ‘e foaki ‘e he ‘Otuá ki he fa‘ahinga kotoa ‘oku nau kumi ki he‘ene kaume‘á. (Loma 6:23) Fakakaukau atu pē ki he ‘uhinga kiate koe ‘a e mo‘ui ta‘engatá!

Te ke ma‘u ‘a e taimi ke fai ai ‘a e ngaahi me‘a lahi. Mahalo pē te ke sai‘ia ke ako ki he founga hono tā ha me‘alea. Pe mahalo te ke loto ke ako tāvalivali pe ke hoko ko ha tufunga. Te ke sai‘ia nai ke ako ‘o fekau‘aki mo e fanga monumanú pe ko e ngaahi ‘akaú. Pe ‘okú ke loto nai ke ke folau ‘o sio ‘i he ngaahi fonua kehekehe pea mo e kakaí. Ko hono ma‘u ‘a e mo‘ui ta‘engatá te ne ‘ai ai ke malava ‘a e ngaahi me‘a kotoa ko ení!

Te ke ma‘u ‘a e taimi ke fakahoko ai ha ngaahi kaume‘a tokolahi. Ko e mo‘ui ta‘engatá te ne ‘ai ke malava ai ‘o ‘ilo‘i ‘a e tokolahi kehe ko ia kuo nau hoko ko e ngaahi kaume‘a ‘o e ‘Otuá. Te ke hoko ai ‘o ‘ilo‘i honau ngaahi talēnití mo honau ngaahi ‘ulungaanga leleí, pea te nau hoko foki mo kinautolu ko ho ngaahi kaume‘a. Te ke ‘ofa ‘iate kinautolu, pea te nau ‘ofa ‘iate koe. (1 Kolinito 13:8) Ko hono ma‘u ‘a e mo‘ui ta‘engatá te ne ‘oatu ai kiate koe ‘a e taimi ke fakakaume‘a ai ki he tokotaha kotoa pē ‘i he fo‘i māmaní! Hiliō he me‘a kotoa, ko ho‘o kaume‘a mo Sihová ‘e tupulaki ia ‘o toe mālohi ange ‘i he faai mai ‘a e ngaahi senitulí. ‘Ofa ke ke hoko ko e kaume‘a ‘o e ‘Otuá ‘o ta‘engata!