‘Oku fiema‘u koe ‘e he ‘Otuá ke ke hoko ko hono kaume‘a. Kuo faifai ange peá ke fakakaukau ‘e lava ke ke hoko ko ha kaume‘a ‘o e Tokotaha lahi taha ‘i he ‘univēsí? Ko ‘Ēpalahame, ‘a ia na‘á ne mo‘ui ‘i he kuonga mu‘á, na‘e ui ia ko e kaume‘a ‘o e ‘Otuá. (Semisi 2:​23) ‘Oku ‘i ai ‘a e ni‘ihi kehe ‘oku lau ki ai ‘i he Tohitapú na‘a nau toe fiefia ‘i he kaume‘a mo e ‘Otuá pea na‘e tāpuaki‘i lahi kinautolu. ‘I he ‘ahó ni, kuo hoko ai ‘a e kakai mei he tapa kotoa ‘o e māmaní ko e ngaahi kaume‘a ‘o e ‘Otuá. Ko koe foki ‘e lava ke ke hoko ko e kaume‘a ‘o e ‘Otuá.

Ko e hoko ko ha kaume‘a ‘o e ‘Otuá ‘oku lelei ange ia ‘i he hoko ko ha kaume‘a ‘o ha tangata pē. ‘Oku ‘ikai ‘aupito ke fakalotomamahi‘i ‘e he ‘Otuá ‘a hono ngaahi kaume‘a mateakí. (Sāme 18:25) Ko e hoko ko ha kaume‘a ‘o e ‘Otuá ‘oku lelei ange ia ‘i hono ma‘u ‘o e koloá. ‘I he taimi ‘oku mate ai ha tokotaha koloa‘ia, ‘oku ‘alu ‘a ‘ene pa‘angá ki he ni‘ihi kehé. Kae kehe, ko e fa‘ahinga ‘oku nau fiefia ‘i he kaume‘a mo e ‘Otuá ‘oku nau ma‘u ha koloa mahu‘inga ‘e ‘ikai lava ‘e ha taha ke ‘ave.​—Mātiu 6:19.

‘E feinga nai ‘a e kakai ‘e ni‘ihi ke ta‘ofi koe mei ho‘o ako ‘o fekau‘aki mo e ‘Otuá. Na‘a mo e ni‘ihi ‘o ho ngaahi kau­me‘á mo e fāmilí te nau fai nai eni. (Mātiu 10:​36, 37) Kapau ‘e kata‘i koe pe fakamanamana‘i koe ‘e he ni‘ihi kehé, ‘eke hifo kiate koe, ‘⁠Ko hai ‘oku ou loto ke fakahōifua‘í​—ko e tangatá pe ko e ‘Otuá?’ Fakakaukau angé ki he me‘á ni: Kapau ‘e tala atu ‘e ha taha kiate koe ke tuku ho‘o kaí, te ke talangofua ki ai? Ko e mo‘oni ‘e ‘ikai! ‘Okú ke fiema‘u ‘a e me‘akaí ke ke mo‘ui. Ka ‘e lava ‘e he ‘Otuá ‘o ‘ai koe ke ke mo‘ui ta‘engata! Ko ia, ‘oua ‘aupito ‘e tuku ke ta‘ofi koe ‘e ha taha mei ho‘o ako ki he founga te ke lava ai ke hoko ko ha kaume‘a ‘o e ‘Otuá.​—Sione 17:3.