Ko e kaume‘á ‘oku makatu‘unga ia ‘i he ‘ofá. Ko e lahi ange ‘a ho‘o ako ‘o fekau‘aki mo Sihová, ko e lahi ange ia ‘a ho‘o ‘ofa kiate iá. ‘I he tupulaki ‘a ho‘o ‘ofa ki he ‘Otuá, ‘e toe tupulaki foki ai mo ho‘o holi ke tauhi kiate iá. ‘E ue‘i koe ‘e he me‘á ni ke ke hoko ai ko ha ākonga ‘a Sīsū Kalaisi. (Mātiu 28:19) ‘I he kau ki he fāmili fiefia ‘o e Kau Fakamo‘oni ‘a Sihová, ‘e lava ke ke hokosia ai ‘a e kaume‘a mo e ‘Otuá ‘o ta‘engata. Ko e hā kuo pau ke ke faí?

Kuo pau ke ke fakahāhā ‘a ho‘o ‘ofa ki he ‘Otuá ‘aki ‘a e talangofua ki he‘ene ngaahi laó. “Ko eni ia ‘a e ‘ofa ki he ‘Otua, ‘a ‘etau tauhi ki he‘ene ngaahi tu‘utu‘uni. Pea ‘oku ‘ikai ke fakamafasia ‘ene ngaahi tu‘utu‘uni.”​—1 Sione 5:3, 4a.

Ngāue‘aki ‘a e me‘a ‘okú ke akó. Na‘e fai ‘e Sīsū ha talanoa ‘a ia ‘okú ne fakatātaa‘i ‘a e me‘á ni. Na‘e langa ‘e ha tangata poto hano fale ‘i he maká. Na‘e langa ‘e ha tangata vale hano fale ‘i he ‘one‘oné. ‘I he taimi ne hoko mai ai ha fu‘u afā lahi, na‘e ‘ikai ke holo ‘a e fale na‘e langa ‘i he maká, ka ko e fale na‘e langa ‘i he ‘one‘oné na‘e holo ia pea ko ha fu‘u holo lahi. Na‘e pehē ‘e Sīsū ko e fa‘ahinga ko ia ‘oku fanongo ki he‘ene ngaahi akonakí pea fai ki aí ‘oku nau hangē ko e tangata poto ‘a ia na‘e langa ‘i he maká. Ka ko e fa‘ahinga ko ia ‘oku fanongo ki he‘ene ngaahi akonakí pea ‘ikai ke fai ki aí ‘oku nau hangē ko e tangata vale ko ia na‘e langa ‘i he ‘one‘oné. Ko fē ‘a e tangata ‘okú ke loto ke hangē ko iá?​—Mātiu 7:24-27.

 Fakatapui. ‘Oku ‘uhinga ení ko ho‘o hū kia Sihova ‘i he lotu ‘o tala ange kiate ia ‘okú ke loto ke fai ‘a hono finangaló ‘o ta‘engata. Ko hono fai ‘a e finangalo ‘o e ‘Otuá ‘oku fakahaa‘i ai ko ha ākonga koe ‘a Sīsū Kalaisi.​—Mātiu 11:29.

Papitaiso. “Ke papitaiso koe, ‘o fufulu koe mei ho‘o ngaahi angahala, ‘o takua hono huafa.”​—Ngāue 22:16.

Hoko ‘o kau kakato ‘i hono tauhi ‘a e ‘Otuá. “‘Ilonga ha me‘a te mou fai, ngaue fie ngaue ki ai, he ko e ngaue [“kia Sihova,” NW], ‘o ‘ikai ki he kakai.”​—Kolose 3:23.