Ko Sīsū Kalaisí ko e ‘Alo ia pea mo e kaume‘a ofi taha mo ‘ofeina taha ‘o Sihová. Ki mu‘a ke ne mo‘ui ko ha tangata ‘i he fo‘i māmaní, na‘e mo‘ui ‘a Sīsū ‘i hēvani ko ha me‘amo‘ui laumālie māfimafi. (Sione 17:5) Na‘á ne toki ha‘u leva ki he fo‘i māmaní ke ako‘i ki he kakaí ‘a e mo‘oni ‘o fekau‘aki mo e ‘Otuá. (Sione 18:37) Na‘á ne toe foaki ‘a ‘ene mo‘ui fakaetangatá ke fakahaofi ‘a e fa‘ahinga talangofua ‘o e tangatá mei he angahalá mo e maté. (Loma 6:23) Ko Sīsū ‘a e Tu‘i he taimí ni ‘o e Pule‘anga ‘o e ‘Otuá, ko ha founga-pule fakahēvani ‘a ia te ne ‘omai ‘a e Palataisí ki he fo‘i māmani ko ení.​—Fakahā 19:16.

Ko e kau ‘āngeló ko e toe ngaahi kaume‘a kinautolu ‘o e ‘Otuá. Na‘e ‘ikai ke kamata ‘a e mo‘ui ‘a e kau ‘āngeló ‘i he tu‘unga ko e fa‘ahinga ‘o e tangatá ‘i he fo‘i māmaní. Na‘e fakatupu kinautolu ‘i hēvani ki mu‘a ke ngaohi ‘e he ‘Otuá ‘a e fo‘i māmaní. (Siope 38:4-7) ‘Oku ‘i ai ‘a e kau ‘āngelo ‘e laui miliona. (Taniela 7:10) Ko e ngaahi kaume‘a fakahēvani ko eni ‘o e ‘Otuá ‘oku nau loto ke ako ‘e he kakaí ‘a e mo‘oni ‘o fekau‘aki mo Sihová.​—Fakahā 14:6, 7.

‘Oku toe ‘i ai ‘a e ngaahi kaume‘a ‘o e ‘Otuá ‘i he fo‘i māmaní; ‘okú ne ui kinautolu ko ‘ene kau fakamo‘oni. Ko ha fakamo‘oni ‘i he fakamāu‘angá ‘okú ne tala ‘a e me‘a ‘okú ne ‘ilo‘i ‘o fekau‘aki mo ha taha, pe ko ha me‘a. ‘Oku tala ‘e he Kau Fakamo‘oni ‘a Sihová ki he ni‘ihi kehé ‘a e me‘a ‘oku nau ‘ilo‘i ‘o fekau‘aki mo Sihova pea mo ‘ene taumu‘á. (Aisea 43:10) ‘I he hangē ko e kau ‘āngeló, ‘oku loto ‘a e Kau Fakamo‘oní ke tokoni‘i koe ke ke ako ‘a e mo‘oni ‘o fekau‘aki mo Sihová. ‘Oku nau loto ke ke hoko foki ko e kaume‘a ‘o e ‘Otuá.