‘Oku loto ‘a Sētane ke ke fai ‘a e mēsikí. ‘Oku fai ‘e he tokolahi ‘a e ngaahi feilaulau ki he fanga kuí pe ki he ngaahi laumālié ke malu‘i kinautolu mei ha maumau. ‘Oku nau fai eni koe‘uhi ‘oku nau manavahē ki he ngaahi mālohi ‘o e māmani laumālié. ‘Oku nau tui ha ngaahi fo‘i mama pe ngaahi vesa fakamēsiki. ‘Oku nau inu pe mili‘aki honau sinó ‘a e “ngaahi faito‘o” ‘oku pehē tokua ‘okú ne ma‘u ‘a e mālohi fakamēsiki. ‘I honau ngaahi ‘apí pe ‘i he kelekelé, ‘oku fūfuu‘i ai ‘e he kakai ‘e ni‘ihi ‘a e ngaahi me‘a ‘oku nau tui ‘oku ‘i ai hono ngaahi mālohi fakaemalu‘i. ‘Oku ngāue‘aki ‘e he ni‘ihi ‘a e “faito‘o” fakamēsikí koe‘uhi ‘oku nau tui te ne ‘omai ‘a e lavame‘a ‘i he pisinisí, ngaahi sivi fakaakó, pe ko e faisoó.

Ko ho malu‘i lelei taha meia Sētané ko hono ‘ai ‘a Sihova ke hoko ko ho kaume‘a. Ko Sihova ko e ‘Otuá mo ‘ene kau ‘āngeló ‘oku nau mālohi mama‘o ange ‘ia Sētane mo ‘ene kau tēmenioó. (Semisi 2:19; Fakahā 12:9) ‘Oku vēkeveke ‘a Sihova ke fakahaa‘i ‘a hono mālohí ma‘a hono ngaahi kaume‘á​—‘a e fa‘ahinga ko ia ‘oku nau mateaki kakato kiate iá.​—2 Kalonikali 16:9 (2 Fakamatala Mea Hokohoko, PM).

‘Oku pehē ‘e he Folofola ‘a e ‘Otuá: “Tapu ho‘omou fai ‘a e tuki [“mēsiki,” NW].” ‘Oku fakahalaia‘i ‘e Sihova ‘a e mēsikí mo e tō‘onga fakafaimaná koe‘uhi he ko hono fai ‘o e ngaahi me‘a ko iá ‘oku lava ke ‘ai fakahangatonu ai ha taha ke ‘i he mālohi ‘o Sētane ko e Tēvoló.​—Livitiko 19:26.