‘E ‘ikai tatau ‘a Palataisi mo e māmani ‘oku tau mo‘ui ai he taimi ní. Na‘e ‘ikai ‘aupito fiema‘u ‘e he ‘Otuá ke fakafonu‘aki ‘a e māmaní ‘a e fakahoha‘a mo e mamahi, ongosia mo e faingata‘a‘ia. ‘I he kaha‘ú, ‘e ngaohi ai ‘e he ‘Otuá ‘a e fo‘i māmaní ko ha palataisi. ‘E tatau mo e hā ‘a e Palataisí? Tau sio angé ki he me‘a ‘oku lea‘aki ‘e he Tohitapú:

Kakai lelei. ‘E hoko ‘a Palataisi ko e ‘api ia ‘o e ngaahi kaume‘a ‘o e ‘Otuá. Te nau fefai‘aki ai ‘a e ngaahi me‘a lelei. Te nau mo‘ui ai ‘o fakatatau ki he ngaahi founga mā‘oni‘oni ‘a e ‘Otuá.​—Palovepi 2:21 (Lea Fakatātā, PM).

Lahi ‘a e me‘akaí. ‘I Palataisi, ‘e ‘ikai ke toe ‘i ai ha fiekaia. ‘Oku pehē ‘e he Tohitapú: ‘‘E mafola mai ‘a e koane [pe me‘akaí] ‘i he fonua.’​—Sāme 72:16.

Ngaahi fale lelei mo e ngāue fakafiefia. ‘I he fo‘i māmani Palataisí, ‘e ma‘u ai ‘e he fāmili kotoa pē ‘a honau ‘api tonu. ‘E fai ai ‘e he tokotaha kotoa pē ‘a e ngāue ‘okú ne ‘omai ‘a e fiefia mo‘oní.​—Aisea 65:21-23.

 Melino ‘i māmani lahi. ‘E ‘ikai ke toe faitau mo mate ‘a e kakaí ‘i he taú. ‘Oku pehē ‘e he Folofola ‘a e ‘Otuá: “‘Oku ne [‘Otuá] lolololo ‘a e ngaahi tau.”​—Sāme 46:8, 9.

Mo‘ui lelei. ‘Oku tala‘ofa mai ‘a e Tohitapú: “‘Oku ‘ikai ha nofo ai [‘i Palataisi] te ne pehe, ‘Oku ou mahaki.” (Aisea 33:24) Pehē foki, ‘e ‘ikai ha taha ‘e heke pe kui pe tuli pe ‘ikai lava ke lea.​—Aisea 35:5, 6.

Ko ha ngata‘anga ki he ongosiá, mamahí, mo e maté. ‘Oku pehē ‘e he Folofola ‘a e ‘Otuá: “‘E ‘ikai toe ai ha mate, pea ‘e ‘ikai toe ai ha mamahi, pe ha tangi, pe ha ongosia; kuo mole ‘a e ngaahi me‘a mu‘a.”​—Fakahā 21:4.

‘E mole atu ‘a e kakai koví. ‘Oku tala‘ofa mai ‘a Sihova: “Ko e kakai kovi ‘e tu‘usi mei he fonua, ‘io, ko kinautolu ‘oku fai kākā ‘e ta‘aki mei ai.”​—Palovepi 2:22.

‘E fe‘ofa‘aki mo fetoka‘i‘aki ‘a e kakaí. ‘E ‘ikai ke toe ‘i ai ha fakamaau ta‘etotonu, fakafe‘ātungia, mānumanu, mo ha tāufehi‘a. ‘E fā‘ūtaha ‘a e kakaí pea te nau mo‘ui ‘o fehoanaki mo e ngaahi founga mā‘oni‘oni ‘a e ‘Otuá.​—Aisea 26:9.